XI GÚNINU TI CADI GACA NANALÁʼDXINU BINNI
4 | Gunabaʼ Dios gacané lii
Biblia ná:
«Binni ni napa ca cualidad stiʼ espíritu la? rannaxhii, nuu nayecheʼ, nexhedxí ladxidóʼ, napa paciencia, amable laa, nachaʼhuiʼ, napa fe, nadóʼ, rucueeza laca laa» (GÁLATAS 5:22, 23).
¿Xi riniʼni?
Zanda gacané Dios laanu para cadi gacananaláʼdxinu sti binni. Zacané espíritu santu stiʼ Dios laanu para guchaʼnu modo nácanu ne gúninu ni jneza neca rábinu qué ñuu dxi ñúninu ni pa ñaca qué ñacané Dios laanu. Pa gúninu ni, zanda gúninu ni biʼniʼ apóstol Pablo. Sicaríʼ guniʼbe: «Napaʼ stipa para guneʼ intiica cosa purtiʼ rudii Dios poder naa» (Filipenses 4:13). Ne laaca zanda guininu: «Jehová nga racané naa» (Salmo 121:2).
Biʼniʼ stipa gúniluʼ ndiʼ:
«Dxiqué nabé gudindeniáʼ binni [...]. Peru [Jehová] gulee naa de ra nuaaʼ que ne gucanebe naa gacaʼ ti binni nadóʼ» (WALDO).
De guidubi ladxidoʼloʼ gunabaʼ Dios gudii lii espírutu santu stiʼ para gácaluʼ ti binni nachaʼhuiʼ (Lucas 11:13). Zanda gusihuinniluʼ nácaluʼ ti binni ni rannaxhii, ni qué ridinde, ni napa paciencia ne ni rucueeza laca laa, zacá nga naquiiñeʼ gácanu para cadi guidaʼnu xiana ne para cadi gaca nanalaʼdxinu binni. Biiyaʼ ximodo ná Biblia zanda gácanu zacá ne biʼniʼ stipa gácaluʼ ti binni ni napa ca cualidad ca. Laaca risaca nga guieeguluʼ binni ni runi stipa gaca zacá, purtiʼ zacanécabe lii gannaxhiiluʼ binni ne gúniluʼ cosa galán pur stobi (Hebreos 10:24).
