Lu ca iza huadiʼdiʼ, guirutiʼ tu ñanda nicabi pregunta ca, ngue runi guti millón de binni pur ca epidemia. Peru gudiʼdiʼ si tiempu, gunna ca científicu ni dxandíʼ o respuesta stiʼ pregunta ca. Gúnnacabe stale de ca guendahuará ca riásacani pur ca bacteria ne virus. Cumu biénecabe ximodo riasa ca guendahuará ca la? huayacané ni para ganda gaca prevenir stale guendahuará ne gánnacabe ximodo gusiándacabe ni, ne ganda guibani millón de binni jma xadxí ne chuʼcaʼ jma nazaaca.

¿Xi zanda guininu de xcaadxi pregunta nabé risaca yaʼ? Ora gánnaluʼ respuesta ni dxandíʼ stiʼ ca pregunta zeeda xagueteʼ riʼ, ¿ñee rábiluʼ zacaneni lii lu xquendanabániluʼ la?

• ¿Tuu nga Dios?

• ¿Tuu nga Jesucristu?

• ¿Xii nga Reinu stiʼ Dios?

• ¿Ximodo zabáninu despué?

Millón de binni maʼ bidxela respuesta stiʼ ca pregunta riʼ ne maʼ nabánicaʼ nayecheʼ. Laaca zanda gacané respuesta stiʼ ca pregunta riʼ lii.

Zándaca huanabadiidxaluʼ pa zanda gánnaluʼ ni dxandíʼ de xiixa cosa, purtiʼ zeʼ dxi jma nagana raca para binni ganna ni dxandíʼ. ¿Xiñee yaʼ?

Stale binni maʼ qué runi cré ni riníʼ ca gobiernu, ca empresa o ca mediu de comunicación. Raca nagana para binni guni cré pa dxandíʼ ni riníʼcabe o pa caguitesícabe laacaʼ. Cumu maʼ huaxiéʼ napa binni confianza ne stale de ca información riʼ cadi dxandíʼ cani la? maʼ cadi casi zécabe runi crécabe ni gabi tuuxa laacabe neca dxandíʼ ni.

Neca zacá nabáninu yanna, zanda gánnaluʼ respuesta ni dxandíʼ stiʼ ca pregunta ni nabé runi binni. ¿Ximodo yaʼ? Cásica ruyúbiluʼ respuesta stiʼ xcaadxi pregunta ni huaxiéʼ risaca.

Guiráʼ dxi ruyúbinu gánnanu ni dxandíʼ. Casi runi ti gunaa láʼ Jessica, ruyubi siʼ guendaró ni cadi ziné cacahuate. Laabe guniʼbe: «Alérgica xiiñeʼ, dede pa gobe ti guisihuiiniʼ cacahuate zanda gátibe. Nga runi, ante sieʼ xiixa, primeru ruundaʼ chaahueʼ etiqueta stini para guuyaʼ ca ingrediente ziné ni. Despué, runeʼ investigar jma ne rinieniáʼ empresa runi ni para gannaʼ chaahueʼ pa cadi ziné ni cacahuate. Sti cosa ni runeʼ nga ruundaʼ xi ná xcaadxi binni de ximodo runi empresa ca dxiiñaʼ».

Zándaca cadi guiráʼ dxi naquiiñeʼ guyúbiluʼ gánnaluʼ respuesta stiʼ ca pregunta ni rúniluʼ casi runi Jessica, peru zanda chinándaluʼ modo rúnibe para gánnaluʼ ni dxandíʼ:

• Biyubi información.

• Biʼniʼ investigar jma.

• Biiyaʼ chaahuiʼ pa dxandíʼ ni ná xcaadxi información.

Zanda gacané modo runi Jessica riʼ lii para guidxélaluʼ respuesta stiʼ ca pregunta ni nabé runi binni. Guidúʼyanu ximodo.

Laaca modo ruyubi Jessica ganna cadi ziné xiixa cosa cacahuate, zacaca nga rúnibe para gánnabe respuesta ni dxandíʼ de ca pregunta nabé risaca ni runi binni. Laabe guniʼbe: «Guundaʼ chaahueʼ ne guneʼ investigar, huayacaneni naa gannaʼ ni dxandíʼ rusiidiʼ Biblia». Millón de binni huayuni casi runi Jessica ne huadxélacaʼ respuesta ni dxandíʼ rusiidiʼ Biblia de ca pregunta riʼ:

• ¿Xi pur nabáninu?

• ¿Xi rizaaca binni ora gatiʼ?

• ¿Xiñee nabé nuu yuubaʼ?

• ¿Xi cayuni Dios para cuee ca yuubaʼ stinu?

• ¿Ximodo chuʼ familia stinu nayecheʼ?

Laaca zanda gánnaluʼ respuesta ni dxandíʼ stiʼ ca pregunta riʼ, ra gúʼndaluʼ Biblia ne guyúbiluʼ jma información lu sitiu www.pr418.com.