Cayaca predicar ca noticia galán de Reinu stiʼ Dios lu guidubi naca Guidxilayú, casi maca biʼniʼ profetizar Jesús (Mateo 24:14). Lu libru stiʼ Daniel cusiene naca Reinu riʼ ti gobiernu ni zeeda de Dios. Lu capítulo 2 stiʼ libru riʼ caníʼ ziasa ne ziaba caadxi potencia o reinu, ne bizulú guca ni né guidxi Babilonia peru laaca rugaanda ni ca dxi stinu riʼ, ne versículo 44 cayabi laanu xi chiguizaaca despué:

«Ca dxi stiʼ ca rey ca, Dios ni nuu guibáʼ zucuí ti reinu ni qué ziuu dxi guinitilú ne qué zadiʼdiʼ ni lu náʼ sti guidxi. Zunideni ne zunduuxeni guiráʼ ca reinu ca, ne laasini ziaanani para siempre».

Cásica profecía riʼ, zeeda xcaadxi profecía lu Biblia ni caníʼ Reinu stiʼ Dios nga chiguiaana xlugar ca gobiernu stiʼ guidxilayú riʼ ne zedané ni orden ne guendariuudxi ndaaniʼ Guidxilayú. ¿Ximodo zabani binni ora maʼ guni mandar Reinu riʼ yaʼ? Guidúʼyanu caadxi promesa sicarú ni maʼ cadi candaa zaca cumplir.

• MAʼ QUÉ ZIUU GUERRA

  Salmo 46:9. «Runduuxeʼ [Dios] guendaridinde lu guidubi guidxilayú. Rigúzabe arcu ne rugabe lanza; rucaaguibe carru de guerra lu guí».

  Pa niquiiñeʼ guiráʼ ca recursu ne guendanuuxpiaaniʼ nuu para ñacané ca ni binni, lugar de niquiiñecaʼ ni para chaʼ ca armamentu ni rinécabe lu guerra, ¿ximodo ruxuíʼluluʼ nibani binni yaʼ? Dxi guni mandar Reinu stiʼ Dios lu Guidxilayú riʼ, zaca cumplir promesa ni caníʼ maʼ qué ziuu guerra.

• MAʼ QUÉ ZIUU GUENDAHUARÁ

  Isaías 33:24. «Guirutiʼ tu cueza racá zaníʼ: “Huaraʼyaʼ”».

  Bixuiʼlú ti Guidxilayú ra maʼ qué chuʼ guendahuará de corazón nin cáncer nin dxiña (diabetes) ninruʼ sti yuubaʼ ni runiná binni. Ndaaniʼ ti Guidxilayú zacá maʼ qué zaquiiñeʼ medicina nin hospital. Zaca guiráʼ binni nazaaca.

• MAʼ QUÉ ZIUU GUENDARINDAANA

  Salmo 72:16. «Ziuu stale biidxiʼ lu guidxilayú; lu ca dani ca jma stale ziuu».

  Zudii Guidxilayú riʼ stale guendaró para guiráʼ binni. Maʼ qué ziuu guendarindaana nin desnutrición.

• MAʼ QUÉ ZIUU YUUBAʼ NIN GUENDAGUTI

  Apocalipsis 21:4. Zuchaa Dios «nisa riete lucaʼ, maʼ qué ziuuruʼ guendaguti, maʼ guirutiʼ qué ziuu triste, maʼ guirutiʼ qué zuunaʼ ne maʼ qué ziuuruʼ yuubaʼ. Maʼ gudiʼdiʼ guiráʼ ni guyuu dxiqué».

   Zabani binni sin chuʼ dxi gatiʼ ndaaniʼ Guidxilayú riʼ dxi gaca ni ti paraísu purtiʼ maʼ qué zápacaʼ pecadu. Ne nga nga ni maʼ biʼniʼ prometer Jehová, Dios ni nadxii ne ni Bizáʼ laanu.

¿Ñee raʼbuʼ dxandíʼ zaca ca ni la? ¿O ti bacaandaʼ si ca ni? Neca riuulaʼdxiʼ stale binni guibani casi runi prometer Biblia, peru nabé nagana raca para stale de laacaʼ guiénecaʼ xii nga guibani binni sin chuʼ dxi gatiʼ, purtiʼ qué huayuu dxi chuʼ ti binni ni qué huayuu dxi gatiʼ.

Maʼ xadxí nga canu yaga lu náʼ guendaguti ne pecadu, dede stale binni riníʼ ique normal nga guibáninu né yuubaʼ ne guendananá. Peru cadi zacá nga gucalaʼdxiʼ Dios nibani binni guidxilayú.

Para guni crenu ca promesa stiʼ Dios, laapebe cayábibe laanu de guiráʼ ni maʼ bidii stiidxabe chigúnibe: «Qué zabiguetaʼ ni ra nuaaʼ sin gaca ni, sínuque zuni ni ni racalaʼdxeʼ, ne dxandipeʼ zareendú ni biseendaʼ stiidxaʼ guni» (Isaías 55:11).

Biblia ná «qué rusiguii» Dios (Tito 1:2). Cumu laabe nga cayuni prometerbe ca cosa sicarú riʼ, zanda guiníʼ ique chaahuinu ca pregunta riʼ: «¿Dxandíʼ nga zanda guibani binni sin qué chuʼ dxi gatiʼ ndaaniʼ ti paraísu lu Guidxilayú riʼ la? ¿Xi naquiiñeʼ gúninu para ganda gúʼyanu ca promesa stiʼ Dios yaʼ?» Xcaadxi artículo ni zeeda riʼ zacané ca ni lii guicábiluʼ ca pregunta riʼ.