¿Ñee huanabadiidxaluʼ xi futuro cabeza lii ne familia stiluʼ la? ¿Riníʼ íqueluʼ zápatu guiráʼ ni iquiiñetu ne zannaxhii binni laatu la? ¿O riníʼ íqueluʼ guirutiʼ zacané laatu ora tíditu ra nagana? ¿Zabánitu xadxí o nagueenda zátitu la? Maʼ xadxí nga riníʼ ique binni ca pregunta riʼ.

Ca dxi nabáninu riʼ, ca especialista riniʼcaʼ ximodo zaca futuro stinu pur guiráʼ estudiu ni huayúnicaʼ de guiráʼ cosa raca lu Guidxilayú. Neca stale de ni guníʼcabe guca cumplir, peru laaca nuu de laacani maʼ qué ñaca ca ni. Guzéʼtenu chupa ejemplu, casi lu iza 1912 ti hombre ni bizáʼ ti sistema de telegrafía inalámbrico ni biree lá Guglielmo Marconi guníʼ: «Ora maʼ chuʼ tecnología inalámbrica maʼ qué ziuu guerra». Ne ti hombre biʼniʼ dxiiñaʼ né ti compañía discográfica ni láʼ Decca Record qué niná ñuni contratar grupu ni biree lá los Beatles lu iza 1962 purtiʼ guníʼ ique qué zaquiiñeʼ ca grupu ni ruxhidxi guitarra.

Ne xcaadxi binni ruyubi ganna futuro stiʼ pur mediu de espiritismu. Nuu tu laa rié ra nuu ca astrólogo; dede lu stale revista ne periódicu reedapeʼ ti sección de horóscopo. Xcaadxi binni rié ra nuu ca ni runi adivinar o ca ni ná zanda guʼyaʼ futuro stiʼ binni lu carta de tarot, númeru o gúʼndacaʼ ndaaniʼ batanáʼ binni.

Dxiqué, para ganda ganna binni futuro stiʼ, guyecaʼ ra nuu ca oráculo, o ca binni ni guca sacerdote o sacerdotisa ni biʼniʼ xhiiñaʼ tuuxa dios. Ngapeʼ nga ni biʼniʼ Creso, rey stiʼ guidxi Lidia. Ante tindenebe Ciro, rey stiʼ guidxi Persia, biseendabe ofrenda risaca ra nuu oráculo de Delfos (Grecia) para gánnabe tu guni ganar. Oráculo que gudxi laabe, «zanitilú ti imperiu naroʼbaʼ» pa gucaalube Ciro. Zácaxa Creso zuni ganar, ngue runi bicaalú Ciro, peru laga Imperiu stiʼ binitilú.

Qué niquiiñeʼ ni gudxi oráculo que Creso, purtiʼ tutiica si ñuni ganar, laaca si ñaca cumplir ni guniʼbe que. Cumu cadi jneza ni gúdxicabe laabe la? binitilú imperiu stibe. Ca dxi riʼ, ¿xi zanda guininu de ca binni ni ruyubi xcaadxi modo para gánnacaʼ futuro sticaʼ yaʼ? ¿Ñee huabeendúcabe xiixa la?