HUARÁ TI CHÚ ÑEE LUCÍA LADU BIGAʼ. Dxi nahuiinibe gúpabe poliomielitis, ti guendahuará ni ricá ne runiná ni sistema nervioso. Dxi nápabe 16 iza, gudxi patrona stibe laabe: «Biʼniʼ castigar Dios lii né parálisis purtiʼ qué nuzuubaluʼ stiidxaʼ jñaaluʼ ne qué ñuni respetarluʼ laa». Neca gudiʼdiʼ stale iza, peru rietenaláʼdxiruʼ Lucía pabiáʼ bininá ca diidxaʼ que laa.

ORA GUNNA DÁMARIS NAPA TI TUMOR CEREBRAL, gudxi bixhózebe laabe: «De seguru biʼnuʼ xiixa cosa malu. Nga runi cayuni castigar Dios lii». Ngue runi nabé triste biuu Dámaris.

Maʼ raca stale mil de iza, runi cré binni ti castigu stiʼ Dios nga ca guendahuará ca. Libru ni láʼ Usos y costumbres de las tierras bíblicas bisiene, ca tiempu bibani Jesús biʼniʼ cré binni «zeeda ca guendahuará ca pur pecadu stiʼ binni huará ca, o de familia stibe ne zeeda gaca ni ti castigu pur pecadu stibe». Ne lu Edad Media, «stale binni biʼniʼ cré, biquiiñeʼ Dios ca guendahuará ca (peste) para guni castigar binni pur ca pecadu sticaʼ», zacá bizeeteʼ libru Medieval Medicine and the Plague (La medicina medieval y la peste). Yanna, ¿ñee ti castigu stiʼ Dios nga guendahuará ni bininá guidubi guidxi Europa lu siglu catorce que la? ¿O guca ni pur ti infección stiʼ ti bacteria, casi bisihuinni ciencia ni despué? Zándaca guinabadiidxaluʼ pa riquiiñeʼ Dios ca guendahuará ca para guni castigar binni pur ca pecadu stiʼ. *

GUNÍʼ IQUE NDIʼ: Pa biquiiñeʼ Dios guendahuará ne yuubaʼ para guni castigar binni ni qué ruzuubaʼ diidxaʼ, ¿xiñee ga bisianda Jesús ca binni huará yaʼ? ¿Ñee cadi xa nusihuinni Jesús cadi jneza runi Dios? (Mateo 4:23, 24). Qué ziuu dxi gucaalú Jesús Bixhoze. Nga runi laabe guniʼbe: «Qué riaana dxie de gune ni riulaʼdxi be» ne «para ganna binni nadxiee Bixhozeʼ, ne rune ni gudxi naa guneʼ» (Juan 8:29; 14:31).

Nayaʼniʼ modo rusiidiʼ Biblia naca Jiobá ti «Dios ni runi ni jneza ne qué ruchee» (Deuteronomio 32:4). Guzéʼtenu ti ejemplu, qué ziuu dxi gudii Dios lugar gatiʼ stale binni lu ti accidente lu ti avión para si guni castigarbe ti binni ni zé ndaaniʼ ni. Abrahán, ti hombre ni bizuubaʼ stiidxaʼ Dios, gunna qué ziuu dxi guni Dios ni jma Nandxóʼ ti cosa zacá. Nga runi guniʼbe «qué zanda diʼ» o qué zaníʼ ique Dios guuti «binni ni runi ni jneza ne binni malu» (Génesis 18:25). Biblia laaca ruzeeteʼ Dios qué runi ni malu o «ni cadi jneza» (Job 34:10-12).

Racananu cadi purtiʼ cayuni castigar Dios laanu pur xiixa pecadu ni bíninu. Zacá bisiene Jesús ni ora laa ne ca discípulo stiʼ bidxaagacaʼ ti hombre ni qué ruuyaʼ dede dxi gule. Laacaʼ gunabadiidxacaʼ laabe: «Maistru, tu bichee para gule be zacá pue, laabe la? o bixhoze be o jñaa be». Jesús bicabi laacabe: «Cadi purti bichee cabe» (Juan 9:1-3).

Pur modo guníʼ ique binni dxiqué, bidxagayaa ca discípulo que ora guníʼ Jesús qué nuchee hombre riʼ nin bixhózebe ne nin jñaabe para ñaca castigarbe. Cadi bisianda si Jesús hombre riʼ, sínuque bisihuinni cadi jneza modo riníʼ íquecabe que (Juan 9:6, 7). Ra gánnanu cadi Dios nga napa donda pur ca yuubaʼ ni runiná laanu, riguixhedxí ni ladxidóʼ ca binni ni napa ti guendahuará malu.

 Biblia cayabi laanu:

• «Purti qué zanda uquiinde ni nadxaba Dios, ne qué ruquiinde Dios irutiʼ» (SANTIAGO 1:13). Ne cadi ngasi, maʼ cadi candaa zunitilú Dios guiráʼ ca cosa malu ni huayuniná binni maʼ raca stale iza, casi guendahuará, yuubaʼ ne guendaguti.

• «Bisianda [Jesucristu] stale binni huará» (MATEO 8:16). Ra bisianda Jesús ca binni huará, bisihuínnibe xi guiráʼ chiguni Reinu stiʼ Dios lu guidubi naca Guidxilayú.

• «Zuchaa [Dios] nisa riete lú caʼ, ne ma qué ziuu ru enda guti nin enda ruuna nin enda racaná ladxidóʼ nin yuubaʼ, purti ma udiʼdi irá ni uyuu chiqué» (APOCALIPSIS 21:3-5).

Yanna, ¿xiñee nuu stale guendananá ne yuubaʼ lu Guidxilayú riʼ yaʼ? Pa qué gapa Dios donda, ¿tu laa napa donda yaʼ? Maʼ raca stale iza nabé huayuni binni ca pregunta riʼ. Lu stiʼ artículo ca zadxélaluʼ respuesta ca.