Bizáʼ Dios cuerpu stiʼ binni né capacidad para gaca regenerar ni. Ora ti binni nazaaca iruuguʼ paxaraa de laa, sáʼ xiixa ladi o guidaabi xiixa cosa laa, «nagueendaca ruzulú cuerpu stiʼ binni ti procesu para ganda gusianda ni ti herida nahuiiniʼ o naroʼbaʼ» (Johns Hopkins Medicine). Nagueendaca runi reaccionar cuerpu stiʼ binni para ganda gucueeza ni de guixii rini ca, para gaca ndiʼ, ridiʼdiʼ ziáʼ rini lu ca vena ca para gaca acumular ni ne guchii ni lu herida ca ti zacá guicá ni biquiixu ne despué gaca chaahuiʼ guidi ladi binni sti biaje.

GUNÍʼ IQUE NDIʼ: Pa Dios ni Bizáʼ laanu, bíʼnibe cuerpu stiʼ binni né capacidad para gaca regenerar, ¿ñee zaníʼ íquenu qué zanda gusiándabe ca yuubaʼ nuu ndaaniʼ ladxidoʼno ne rucaa laanu chuʼnu triste la? Hombre bicaa Salmo que guyuu seguru zanda gusianda Dios ca binni ni cayuubaʼ ladxidóʼ ne ruchéndabe venda ra naná laacaʼ (Salmo 147:3). Peru pa lii nga napuʼ ti trauma emocional, ¿ximodo zanda chuʼluʼ seguru zuchenda Dios «venda ra naná lii», yanna riʼ ne lu futuro yaʼ?

Dios cayabi laanu: «Cadi guidxíbiluʼ, purtiʼ nuaaniáʼ lii. Cadi chuʼluʼ xizaa, purtiʼ naa nga Dios stiluʼ. Zudieeʼ stipa lii, ya, zacaniáʼ lii; dxandipeʼ zanaazeʼ dxiicheʼ lii né nayaʼ derechu, ni runeniáʼ ni jneza» (Isaías 41:10). Ra gánnanu nadxii Dios laanu, riguixhedxí ni ladxidoʼno ne rudii ni stipa laanu para ganda gudxíʼlunu ca guendanagana stinu. Sicaríʼ guníʼ apóstol Pablo de laani, riguixhedxí ni ladxidóʼ binni «dede iruti zanda guiene ximodo ni». De raqué bizeetebe: «Intiisi zanda gune purti [rudii Dios poder] naa ne racané naa» (Filipenses 4:4-7, 9, 13).

Ruquidxi Biblia fe stinu lu ca promesa ni maʼ guníʼ Dios chiguni pur binni. Guzéʼtenu ti ejemplu, lu Apocalipsis 21:4, 5 rabi ni laanu xi chiguni Dios ne xiñee zanda gápanu confianza laabe.

• «Zuchaa be nisa» riete lunu. Zabee Jiobá guiráʼ ca cosa ni rucaa laanu guni sufrirnu ne ni riguu xizaa laanu, neca xa jma nahuiiniʼ cani ne ruluíʼ qué risaca cani.

• «Ni zuba lu trono» ni nuu guibáʼ, Rey ni jma nadipaʼ ni bizáʼ guiráʼ ni nuu, zaquiiñeʼ poder ne autoridad stiʼ para cadi guibiguetaʼ guni sufrirnu ne gacané laanu ora caquiiñenu ni.

• Jiobá peʼ cayabi laanu de ca promesa stiʼ «dxandí irá diidxa riʼ, zanda guni cre lu ni». Modo naca Jiobá, tobi lucha Dios dxandíʼ, rusihuinni ni zuni cumplirbe guiráʼ ca promesa ni maʼ guniʼbe.

«“Zuchaa be nisa riete lú caʼ, ne ma qué ziuu ru enda guti nin enda ruuna nin enda racaná ladxidóʼ nin yuubaʼ, purti ma udiʼdi irá ni uyuu chiqué. Oraque na ni zuba lu trono que: ‘‘Biiyaʼ, cayune irá xixé cosa nacubi.ʼʼ Ne laca na: -Dxandí irá diidxa riʼ, zanda guni cre lu ni”» (Apocalipsis 21:4, 5).

Guiráʼ cani bizáʼ Dios ne Biblia racané cani laanu gunibiaʼnu Bixhózenu ni nuu guibáʼ. Ora guidúʼyanu guiráʼ ni bizáʼ Dios rucaa cani laanu gaca xhamígunu laabe, peru Biblia peʼ rabi laanu: «Laidxiña gaxha de Dios, ne laa zadxiña gaxha de laatu» (Santiago 4:8). Ne Hechos 17:27 ná: «Cadi zitu nuu be, sínuque gaxha doʼ nuu be de cada tobi de laanu».

Ra jma cueeluʼ tiempu para gunibiaʼluʼ Dios, jma ziuuluʼ seguru rizaaláʼdxibe lii (1 Pedro 5:7). ¿Xi zabeendunu pa gápanu confianza Jiobá yaʼ?

Guidúʼyanu ni bizaaca ti hombre de Japón, ni láʼ Toru. Neca bisiidiʼ jñaabe laabe de Dios peru biuube lade ti grupu de mafia nabé malu de Japón, ni láʼ yakuza. Laabe guniʼbe: «Guníʼ iqueʼ nanalaʼdxiʼ Dios naa ne runi castigarbe naa ora gatiʼ ti binni nuu gaxha de naa, jmaruʼ si ora gaca ni tuuxa ni nadxieeʼ». Toru bidii cuenta, guiráʼ ca cosa malu ni biʼyaʼ nga bicaa laa gaca «ti binni guizáʼ malu ne qué riá stobi». Ne laabe guniʼbe xi ca cosa ni gucaláʼdxibe ñúnibe: «Gucalaʼdxeʼ ñateʼ dxi naca joven ne gaca famoso purtiʼ biiteʼ ti binni jma nadipaʼ que naa».

 Peru ora Toru ne xheelaʼ, Hannah, bizulú biʼniʼ estudiárcabe Biblia, nabé bichaabe lu xquendanabánibe ne modo laabe. Hannah guníʼ: «Nabé bidxagayaaʼ modo bichaa xheelaʼ». Yanna huaxa maʼ bichaa Toru modo guníʼ ique ne ná: «Nannaʼ dxandíʼ nuu Dios ne rizaaláʼdxibe cada tobi de laanu. Qué racaláʼdxibe gatiʼ nin ti binni, ne nuube listu para guni perdonarbe binni ni gaca arrepentir de guidubi ladxidóʼ. Zanda gábinu laabe intiica si cosa ni zándaca qué zábinu ti binni ne laabe ziénebe laanu. Maʼ cadi candaa, zabee Jiobá guiráʼ ca guendanagana nuu, yuubaʼ ne guiráʼ ni rucaa binni guni sufrir. Ne yanna riʼ, racanebe laanu stale. Dxandipeʼ rizaaláʼdxibe laanu ne rápabe laanu ora nuunu triste» (Salmo 136:23).

Casi bidúʼyanu ni bizaaca Toru, ora gánnanu zanda cueeʼ Dios guiráʼ ni rusiguunaʼ laanu ne maʼ cadi candaa zúnibe ni, rudii ni laanu ti esperanza guizáʼ sicarú, ne racané ni laanu lu xquendanabáninu. Nga runi, neca nabáninu ndaaniʼ ti Guidxilayú ra nuu stale yuubaʼ, zanda gacané guendarannaxhii stiʼ Dios lii.