1. Neca napa Jiobá stale poder, xi runi invitarbe binni guni.

JIOBÁ nga bizáʼ guiráʼ ni nuu. Laasibe nga binni ni jma nuu xpiaaniʼ ne laasibe nga binni ni jma napa poder. Biene Job zacá ni. Ngue runi, ora byuiʼné Jiobá laabe de guiráʼ ca cosa sicarú ni bizáʼ, guniʼbe maʼ biziidibe ne maʼ bidiibe cuenta zanda guni Dios guiráʼ ni naguixhe ique. Zanda guni Dios guiráʼ ni gacalaʼdxiʼ (Job 42:2). Ne cadi caquiiñeʼ diʼ chuʼ tu gacané laa. Neca zacá, runi invitarbe ca xpínnibe guninecaʼ laabe dxiiñaʼ, zacá rusihuínnibe nadxiibe laacaʼ.

2. Xi dxiiñaʼ nabé risaca bidii Jiobá Jesús.

² Primeca ni bizáʼ Jiobá nga Xiiñiʼ, Jesús. De raqué maʼ bidiibe Xiiñibe ti dxiiñaʼ nabé risaca. Gúdxibe laa gacané laabe guzáʼcabe guiráʼ ni nuu guibáʼ ne guiráʼ ni nuu lu Guidxilayú (Juan 1:1-3, 18). Guidúʼyanu xi guníʼ apóstol Pablu de dxiiñaʼ biʼniʼ Jesús: «Irá xixé ni nuu ibáʼ ne ni nuu guidxilayú la? Xiiñi be biʼni irá ni, casi ni rihuinni, zaqueca ni qué rihuinni, ni nandxóʼ ne ni runi mandar». Ne laaca guníʼ Pablu: «Laa bizáʼ irá ni, ne para laa uyáʼ ni» (Colosenses 1:15-17). Bidii Jiobá  lugar gacané Jesús laa lu guiráʼ dxiiñaʼ biʼniʼ ne laaca biyubi Jiobá ximodo ganna guiráʼ binni ni. ¡Aque naroʼbaʼ ndaayaʼ riʼ xa!

3. a) Xi dxiiñaʼ bidii Jiobá Adán. b) Xiñee bidii Jiobá lugar gacané Adán laa.

³ Laaca maʼ huayuni invitar Jiobá binni para guninecaʼ laa dxiiñaʼ. Guzéʼtenu ejemplu stiʼ Adán: gudxi Dios laabe quíxhebe lá guiráʼ ca maniʼ (Génesis 2:19, 20). Nánnanu guyuu Adán nayecheʼ né dxiiñaʼ bidii Dios laa. Para bidxélabe ximodo guiree lá cada tobi de laacame, gupa xidé biiyabe ximodo cada maniʼ ne xi runi. Ñanda ñuni Jiobá dxiiñaʼ riʼ, purtiʼ laa bizáʼ laacame. Peru cumu nabé nadxiibe Adán la? bidiibe lugar laa gacané laabe. Ne laaca gúdxibe laa guni guidubi Guidxilayú riʼ ti paraísu (Génesis 1:27, 28). Triste guininu ni, peru despué maʼ qué niná Adán ñuniné Jiobá dxiiñaʼ. Pur ni bíʼnibe riʼ gucanabe ne laaca nabé cayacaná guiráʼ cani za de laabe (Génesis 3:17-19, 23).

4. Tu guiráʼ huayuniné Jiobá dxiiñaʼ para gaca ni naguixhe ique.

⁴ Gudiʼdiʼ si tiempu, laaca biʼniʼ invitar Dios xcaadxi binni para guninecaʼ laa dxiiñaʼ. Casi Noé, laa biʼniʼ ti arca para gunda bilá ne para bilá binnilidxi dxi biaba ti nisaguié naroʼbaʼ. Moisés gulee guidxi Israel de Egipto. Josué yené ca israelita lu ti layú ni maca guníʼ Dios gudii laacaʼ. Salomón bicuí ti yuʼduʼ ndaaniʼ guidxi Jerusalén. Ne María beeda gaca jñaa Jesús. Biquiiñeʼ Jiobá ca hombre ne ca gunaa bizuubaʼ diidxaʼ riʼ ne stáleruʼ de ca xpínnibe para gacanecaʼ laabe gaca ni maʼ gudixhe íquebe.

5. a) Xi dxiiñaʼ zanda guni guiranu. b) Ñee caquiiñepeʼ gacanenu Jiobá para gaca dxiiñaʼ riʼ la? (Biiyaʼ dibuju ni zeeda ra ruzulú tema riʼ).

⁵ Ca dxi riʼ, cayuni invitar Jiobá laanu para gacanenu Reinu stibe ne zanda gúninu ni de stale modo. Qué zanda diʼ guni cada tobi de laanu biáʼqueca, peru guiranu zanda gucheechenu stiidxaʼ Reinu. Ñee caquiiñeʼ Jiobá gacanenu laa lu dxiiñaʼ riʼ la? Coʼ. Pa ñacaláʼdxibe la? ñanda niníʼnebe binni dede guibáʼ. Ne Jesús guníʼ ñanda niquiiñebe guié para niniʼné binni de Rey ne de Reinu stibe (Lucas 19:37-40). Peru rudii Dios lugar guninenu laa dxiiñaʼ (1 Corintios 3:9). Apóstol Pablu bicaa ca diidxaʼ riʼ: «Runi né du Dios dxiiñaʼ, ne canaba du laatu usihuinni tu cadi pur gana si uca be nachaʼhui ne laatu» (2 Corintios 6:1). Ti ndaayaʼ naroʼbaʼ nga guninenu Jiobá dxiiñaʼ. Guidúʼyanu chupa chonna razón pur riéchenu ora guninenu Dios dxiiñaʼ.

6. Xi biʼniʼ sentir Jesús tiempu biʼniné Bixhoze dxiiñaʼ.

⁶ Laanu, ca xpinni Dios, nabé riuʼnu nayecheʼ ora runinenu Jiobá dxiiñaʼ. Ejemplu stiʼ Jesús rusihuinni zacá ni. Ante gueeda Jesús lu Guidxilayú, biʼniʼ dxiiñaʼ para Jiobá casi «tobi ni runi xhiiñabe jnézapeʼ», o casi runi ti artesanu ni nabé nanna. Nánnabe nabé nadxii Dios laabe, ngue runi guniʼbe ca diidxaʼ riʼ: «Guyuaaʼ nayecheʼ nezalube guiráʼ dxi» (Proverbios 8:22, 30). Guizáʼ guyuube nayecheʼ tiempu bíʼninebe Bixhózebe dxiiñaʼ purtiʼ bíʼnibe stale cosa ne purtiʼ nánnabe nadxii Dios laabe. Yanna laanu yaʼ. Ñee laaca zanda guni sentirnu zacá la?

7. Xiñee ridxátipa ladxidoʼno ne riuʼnu nayecheʼ ora rucheechenu diidxaʼ.

⁷ Jesús guníʼ riuʼnu nayecheʼ ora rudiʼnu ni nápanu ne ora rudiicabe laanu xiixa (Hechos 20:35). Nabé biéchenu dxi  bisiidicabe laanu ni dxandí de Dios. Peru laaca riuʼnu nayecheʼ ora rusíʼdinu ni dxandíʼ sti binni ne ridxátipa ladxidoʼno. Xiñee yaʼ. Purtiʼ ridúʼyanu pabiáʼ nayecheʼ riuu binni ora maʼ caziidiʼ ni rusiidiʼ Biblia ne ora ruzulú runibiáʼ Dios. Riéchenu guidúʼyanu ximodo ruchaacabe modo laacabe ne modo ruchaacabe xquendanabánicabe. Nánnanu zacaacabe ti guendanabani ni qué zaluxe pa gaca xhamígucabe Dios (2 Corintios 5:20). Ñee raʼbuʼ nuu sti dxiiñaʼ ni jma gusiecheʼ laanu que gucheechenu diidxaʼ la?

8. Ximodo runi sentir chupa chonna Testigu pur runinecaʼ Jiobá dxiiñaʼ.

⁸ Dxandíʼ riéchenu ora gacanenu sti binni gunibiáʼ Dios, peru jma riuʼnu nayecheʼ ora gánnanu cayúninu ni na Dios ne gudiʼnu cuenta rusisaca stipa stinu (biindaʼ 1 Corintios 15:58). Ti Testigu de Italia láʼ Marco guníʼ: «Qué ridxelaʼ diidxaʼ para guinieeʼ pabiáʼ nayecheʼ nuaaʼ pur cudieeʼ ni jma galán napaʼ Jiobá ne cadi cayuneʼ xhiiñaʼ tuuxa ni zusiaandaʼ ni bineʼ pur laa». Sti Testigu de Italia láʼ Franco na: «Guiráʼ dxi riquiiñeʼ Jiobá Biblia, ca publicación ni nápanu ne ca reunión para gusietenalaʼdxiʼ laanu pabiáʼ nadxii laanu. Neca ruluíʼ gastiʼ nga ni cayúninu, nabé risaca cani para laabe. Nga runi, nabé riecheʼ guneniáʼ Dios dxiiñaʼ ne rudiini naa stale razón para guibaneʼ».

9. a) Ximodo guyuu Jiobá ne Jesús. b) Xiñee guyuu Jiobá ne Jesús tobi si.

⁹ Ora runinenu tuuxa ni nadxiinu dxiiñaʼ, riuʼnu jma gaxha de laa. Runibiáʼ chaahuinu ximodo laabe, ca guenda nápabe ne xi cayúnibe para ugaandabe cani naguixhe íquebe. Guzéʼtenu ejemplu stiʼ Jesús que sti biaje, laa biʼniné Jiobá dxiiñaʼ mil millón de iza ante gueeda lu Guidxilayú. Nabé gunnaxhiisaacabe ne qué ñuu xiixa ni nuxheleʼ laacabe. Nga runi guníʼ Jesús: «Naa ne Bixhozeʼ, tobi si laadu» (Juan 10:30). Dxandíʼ, guirópacabe guyuucabe tobi si ne biéchecabe stale ora bíʼnicabe dxiiñaʼ juntu.

10. Xiñee riuʼnu jma gaxha de Jiobá ne de ca hermanu stinu ora rucheechenu diidxaʼ.

¹⁰ Gunabaʼ Jesús Jiobá gapa ca discípulo stiʼ. Xiñee yaʼ. Jesús peʼ gudxi laabe: «Ti gaca cabe tobi si casi laanu» (Juan 17:11). Ora ruzúʼbanu stiidxaʼ Dios ne ora rucheechenu diidxaʼ, runibiáʼ chaahuinu ca guenda sicarú napa Jiobá. Rudiʼnu cuenta gástiruʼ sti cosa jma galán que gápanu confianza Jiobá ne gúninu guiráʼ ni rinábabe laanu. Pa gúninu stipa pur gaca xhamígunu laabe la? laabe laaca zaca xhamígube laanu (biindaʼ Santiago 4:8). Laaca riuʼnu jma gaxha de Jiobá ne de ca hermanu stinu ora rucheechenu diidxaʼ, purtiʼ ridúʼyanu stipa cayúnicabe para guzuubacabe stiidxaʼ Jiobá. Cadi guiaandaʼ ndiʼ laanu: guendanagana ni cadíʼdicabe, laaca cadídinu cani; ni rusiecheʼ laacabe, laaca rusiécheni laanu. Laaca naguixhe íquenu  ugaandanu ni naguixhe ique ca hermanu stinu ne laaca cayuni huantarnu ca prueba ni cadíʼdicabe. Ti gunaa Testigu de Gran Bretaña láʼ Octavia guníʼ: «Ora runeniáʼ Jiobá dxiiñaʼ, racaneni naa chuaaʼ jma gaxha de laa ne de ca hermanu stinneʼ». Xiñee yaʼ. Laabe cusiénebe: «Purtiʼ laca naguixheʼ iqueʼ ugaandaʼ ni naguixhe ique ca hermanu stinneʼ». Cadi ngaca nga ni runi sentirluʼ la?

11. Xiñee ziuʼnu jma gaxha de ca hermanu stinu ne de Jiobá lu guidxilayú cubi ca.

¹¹ Yanna riʼ nabé maʼ nadxiinu Jiobá ne ca hermanu stinu. Peru jma zannaxhiinu laacabe ndaaniʼ Paraísu. Guníʼ ique si xi guiráʼ dxiiñaʼ sicarú ni gúninu juntu. Zadxaagalunu cani guiasa de lade gueʼtuʼ ne zusíʼdinu laacaʼ de Jiobá. Zúninu guidubi naca Guidxilayú riʼ ti paraísu. Zápanu stale dxiiñaʼ, peru ziuʼnu nayecheʼ guninenu ca hermanu stinu dxiiñaʼ. Ora maʼ guni mandar Reinu stiʼ Cristu la? chaahuiʼ chaahuiʼ zácanu binni sin donda. Cada dxi tiidiʼ ziuʼnu jma gaxha de ca hermanu stinu ne de Jiobá. Nanna dxíchinu zudiibe laanu guiráʼ ni racaláʼdxinu (Salmo 145:16).

12. Xiñee zeeda gaca dxiiñaʼ de guireeche diidxaʼ casi xiixa ni rapa laanu.

¹² Laanu, ca xpinni Cristu, naquiiñeʼ chuʼnu cuidadu ti cadi guixélenu de Jiobá. Cumu binni ruchee laanu ne nabáninu ndaaniʼ ti guidxilayú ni nuu lu náʼ Binidxabaʼ la? zanda guzulú guiníʼ íquenu casi riníʼ ique binni ne gúninu ni rúnicaʼ. Casi corriente nadipaʼ stiʼ ti guiiguʼ nga modo riníʼ ique binni. Pa qué racaláʼdxinu chiné corriente riʼ laanu la? caquiiñeʼ xhúʼbanu né guiráʼ stipa stinu. Pa qué gúninu ni la? chaahuiʼ chaahuiʼ zuxhéleni laanu de Dios. Nannuʼ xiñee rapa dxiiñaʼ de guireeche diidxaʼ riʼ laanu para cadi guixélenu de Jiobá la? Purtiʼ jma riníʼ íquenu lu ca cosa risaca ne galán ora rusíʼdinu binni de Dios ne de Biblia. Qué lica riníʼ íquenu lu ca cosa ni gusirá fe stinu (Filipenses 4:8). Raca fe stinu jma naguidxi ora gucheechenu diidxaʼ, purtiʼ rusietenaláʼdxini laanu ca promesa stiʼ Dios ne ca ley stiʼ. Laaca racaneni laanu gápanu ca guenda ni naquiiñeʼ gapa ti xpinni Cristu ni zapa laanu de Binidxabaʼ ne de guidxilayú stiʼ (biindaʼ Efesios 6:14-17).

13. Xiñee risaca para ti Testigu de Australia gucheeche diidxaʼ.

¹³ Ora rucheechenu diidxaʼ, ora ridúʼndanu Biblia ne ora racanenu ca hermanu, laaca rápani laanu purtiʼ maʼ gastiʼ tiempu para chuʼnu xizaa pur ca guendanagana stinu. Ti Testigu de Australia láʼ Joel caníʼ xiñee nabé risaca para laa chigucheeche diidxaʼ. Nabe racaneni laabe para cadi gusiaandabe napa binni stale guendanagana. Ne laaca rietenaláʼdxibe pabiáʼ racané ca conseju stiʼ Biblia laabe. Ne guníʼrube: «Ora gucheecheʼ diidxaʼ la? racaneni para cadi gudxiibaʼ laca naa, gapaʼ confianza Jiobá ne ca hermanu stinneʼ».

14. Xiñee nánnanu cayacané Dios laanu né espíritu stiʼ.

¹⁴ Laaca rihuinni racané Jiobá laanu né espíritu stiʼ ora rucheechenu diidxaʼ. Quíxhenu ti ejemplu ti ganda guiénenu ni. Bixuiʼlú gudxi tuuxa lii quíʼziluʼ guendaró ra nuu ca binni nabeza gaxha de ra liʼdxuʼ. Peru qué zaguixe binni que lii gastiʼ, sínuque lii nga quíxeluʼ ca gastu gúniluʼ. Laaca nánnaluʼ qué naʼ ca binni que chineluʼ guendaró que ra nuucaʼ ne nuu tu dede zaca nanalaʼdxiʼ lii pur ni chigúniluʼ. Pabiáʼ tiempu rábiluʼ zuni huantarluʼ gúniluʼ dxiiñaʼ riʼ yaʼ.  Qué zandaa zareeluʼ gana ne maʼ qué zuʼnuʼ ni. Ngaca nga ni rizaaca ora maʼ zinenu stiidxaʼ Dios ra nuu binni. Ribeenu tiempu stinu ne riquiiñenu bueltu stinu, peru runi burla binni laanu ne dede nuu tu raca nanalaʼdxiʼ laanu pur rúninu ni. Peru qué rusaana de gucheechenu diidxaʼ. Cadi dxandíʼ rusihuinni ndiʼ cayacané Jiobá laanu né espíritu stiʼ la?

15. Xiñee nabé risaca gucheechenu diidxaʼ.

¹⁵ Nabé risaca gucheechenu diidxaʼ purtiʼ racaneni gaca ni racalaʼdxiʼ Dios para binni. Jiobá racalaʼdxiʼ guibani binni sin gatiʼ, ne qué nuchaa diʼ ni naguixhe íquebe neca bichee Adán (Isaías 55:11). Para gulá Jiobá laanu de lu náʼ pecadu ne guendaguti la? biseendaʼ Jesús lu Guidxilayú para gudii xquendanabani pur laanu. Pa racaláʼdxinu guibáninu sin gátinu, naquiiñeʼ guzúʼbanu stiidxaʼ Dios. Bisiidiʼ Jesús binni xi racalaʼdxiʼ Dios gúnicaʼ, ne biʼniʼ mandar Jesús ca discípulo stiʼ gusiidicaʼ ni bisiidibe laacaʼ. Nga runi rucheechenu diidxaʼ ne racanenu binni gaca xhamigu Dios. Ora rúninu ni, racanenu Jiobá ne laaca racanenu guilá binni de lu náʼ pecadu ne guendaguti.

16. Xi rusihuínninu ora rucheechenu diidxaʼ.

¹⁶ Ora gunabadiidxaʼ ti xaíque yuʼduʼ Jesús xii nga mandamientu ni jma risaca stiʼ Dios, Jesús bicabi: «“Gunaxhii Dios stiuʼ de idubi ladxidóʼ loʼ ne idubi xhialma luʼ ne idubi xquenda biaani luʼ”. Nga nga primé mandamientu ne ni jma risaca. Ne rairopa ri zeda gaca casi primé ca: “Gunaxhii stobi cásica nadxii lu lii”» (Mateo 22:37-39). Ora rucheechenu diidxaʼ ne ora rusíʼdinu binni xi naquiiñeʼ guni para guibani sin gatiʼ, rusihuínninu zinándanu mandatu ni cayabi laanu gannaxhiinu binni ne gannaxhiinu Jiobá (biindaʼ Hechos 10:42). Nánnanu racaláʼdxibe gulabe «irá binni, ne ganna ca ni dxandíʼ» (1 Timoteo 2:4).

17. Xi riníʼ íqueluʼ de ndaayaʼ ni cudii Jiobá lii de gunineluʼ laa dxiiñaʼ.

¹⁷ Zanda gudiʼnu xquíxepeʼ Jiobá pur ndaayaʼ ni nápanu de guninenu laa dxiiñaʼ. Nabé riéchenu nga guninenu laabe dxiiñaʼ ne ridxátipa ladxidoʼno, riuʼnu jma gaxha de laabe ne de ca hermanu, ne rápani laanu. Ne laaca randa rusihuínninu nadxiinu Jiobá ne ca hermanu stinu. Lu guidubi Guidxilayú nuu millón de xpinni Dios, peru gadxé gadxé modo nabani cada tobi de laanu. Neca zacá, guiranu rucheechenu diidxaʼ biaʼ gándatiʼ, gastiʼ naca pa nahuiininu o pa maʼ huaniisinu, pa ricu o pa pobre laanu, pa nápanu stipa o pa coʼ. Runi sentirnu casi ti gunaa Testigu de Francia, laa guníʼ: «Binni ni jma risaca lu guidubi naca guibáʼ ne Guidxilayú, Dios ni bizáʼ guiráʼ ni nuu, Dios ni nayecheʼ, cayabi naa: “Guyé ne guníʼ. Guníʼ de naa. Guníʼ de guidubi ladxidoʼloʼ. Naa zudieeʼ stipa lii, zudieeʼ Stiidxaʼ lii, zacané ca ángel lii ne laaca zacané cani rucheeche diidxaʼ lii. Zusiideʼ lii ximodo gúniluʼ ni ne zudieeʼ instrucción lii ora iquiiñeluʼ ni”. Cudii Jiobá lugar gacanenu gaca ni naguixhe ique ne guninenu laa dxiiñaʼ. ¡Nabé naroʼbaʼ ndaayaʼ riʼ!».