ÑEE rietenalaʼdxuʼ gunáʼ nga dxi ni jma risaca para lii la? Dxi bichaganaluʼ la? Dxi gule primé xiiñiluʼ la? O dxi guyuunísaluʼ. Pa ni bizéʼtenu últimu riʼ nga laani la? nánnadu rietenalaʼdxuʼ pabiáʼ nayecheʼ biʼniʼ sentirluʼ ne pabiáʼ biecheʼ cani biʼyaʼ bisihuínniluʼ nadxiiluʼ Jiobá de guidubi ladxidoʼloʼ, guidubi xhiálmaluʼ, guidubi xquendabiaaniluʼ né guiráʼ stipa stiuʼ (Marcos 12:30).

Ne dede dxi que cayuʼnuʼ ni na Jiobá né stale guendanayecheʼ. Peru ra zidiʼdiʼ iza, nuu hermanu maʼ huaxiéʼ nuu nayecheʼ neca cayuni ni na Jiobá. Xiñee pue. Xi razón nápanu para gúninu ni na Jiobá ne chuʼ ladxidoʼno nayecheʼ yaʼ.

Rusiecheʼ mensaje stiʼ Reinu laanu purtiʼ rusietenaláʼdxini laanu maʼ cadi candaa diʼ para gunitilú Jiobá guidxilayú riʼ ne zabáninu ndaaniʼ ti paraísu. Ne nanna dxíchinu mayaca gueeda ni, purtiʼ Sofonías 1:14 cayabi laanu: «Maʼ gaxha nuu dxi jma risaca stiʼ Jiobá». Neca zacá, ora guni sentirnu ruluíʼ nabé candaa para gueeda xiixa ni cabézanu, zándaca gucaani laanu gusaana de chuʼnu nayecheʼ ne maʼ qué gúninu xhiiñaʼ Dios cásica bíninu dxiqué (Proverbios 13:12).

Laaca nuunu nayecheʼ purtiʼ nuunu ndaaniʼ guidxi nayá stiʼ Jiobá. Ne zándaca pur bidúʼyanu pabiáʼ galán nabani ca xpinni Dios nga ni bicaa laanu chuuláʼdxinu guizíʼdinu ni dxandíʼ (1 Pedro 2:12). Peru, ximodo guni sentirnu pa guchee ti hermanu ne uguu jnézacabe laa pur ni biʼniʼ yaʼ. Caadxi xpinni Cristu rireecaʼ gana ne rirá guendanayecheʼ sticaʼ.

Guidxilayú stiʼ Binidxabaʼ riʼ rucaa laanu guni crenu caquiiñenu stale cosa, neca cadi dxandíʼ ni; ne pa qué gatananu la? zusirani guendanayecheʼ stinu. Nga runi, naquiiñeʼ guietenaláʼdxinu ca diidxaʼ guníʼ Jesús riʼ: «Iruti zanda gapa chupa xpixuaana ne guni ni na iropa cabe tobi si tiru, purti jma zanaxhii be tobi ne zaca nanalaʼdxi be stobi, o pacaa jma zacá nú be ngue ne qué zazaalaʼdxi be stobi que. Zaqueca qué zanda di ganaxhii tu Dios ne ganaxhii ca tu bidxichi» (Mateo 6:24). Qué zanda diʼ gúninu chupa cosa juntu: gacaláʼdxinu chuʼnu nayecheʼ ora maʼ cayúninu ni na Jiobá ne laca gacaláʼdxinu gápanu guiráʼ ni nuu lu Guidxilayú riʼ.

Cumu nadxiinu Jiobá la? qué raca nagana para laanu gúninu ni na (1 Juan 5:3). Guietenaláʼdxinu xi guníʼ Jesús, laa bizeeteʼ ziuʼnu nayecheʼ ne zadxátipa ladxidoʼno pa gácanu discípulo stiʼ. Laabe guniʼbe: «Latáʼ ra nuaa irá ni ma bidxaga de cuyubi modo guia ladxidóʼ, cani ma qué ganda guni irá ni rucaa cabe laa guni, purti para laa ruluíʼ naguixhe cabe ti ayubu xa yanni. Latáʼ ra nuaaʼ, zaziilaʼdxi ladxidóʼ to. Laudxiiba ayubu stinne xa yanni tu purti nasisi ni, cadi nanaa ni casi ni nua tu ca. Laudii lugar usiide laatu purti qué zaca nia laatu naduxhuʼ ne qué zadinde nia laatu» (Mateo 11:28-30). Peru, xiñee zanda guininu riecheʼ ladxidoʼno ora gúninu ni na Jiobá yaʼ. Guidúʼyanu chonna razón nabé risaca (Habacuc 3:18).

Jiobá nga ti Dios nayecheʼ, ne laa nga rudii guendanabani laanu (Hechos 17:28; 1 Timoteo 1:11). Neca maʼ gudiʼdiʼ stale iza dede dxi guyúʼnisanu, dede nagasi cayúninu ni na Jiobá né stale guendanayecheʼ purtiʼ qué riaandaʼ laanu laabe nga rudiibe guendanabani laanu.

Guzéʼtenu ejemplu stiʼ Héctor, ti hermanu ni guca superintendente viajante cuarenta iza. Yanna riʼ maʼ qué randa rúnibe xhiiñaʼ Jiobá biaʼca bíʼnibe dxiqué purtiʼ maʼ huaniisibe ne nabé maʼ huará xheelabe, peru dede nagasi nuube nayecheʼ purtiʼ cayúnibe ni na Jiobá (Salmo 92:12-14). Héctor cayabi laanu: «Nagana nga gapaʼ xheelaʼ purtiʼ maʼ huará. Ne nabé riuaaʼ triste ora ruuyaʼ modo zirá stipa stibe chaahuiʼ chaahuiʼ. Peru qué rudieeʼ lugar gusirá ndiʼ guendanayecheʼ ni napaʼ de guneʼ ni na Dios ni dxandíʼ. Nannaʼ Jiobá nga rudii guendanabani naa ne nannaʼ xi pur bizaʼbe binni, guiropaʼ razón riʼ nga rucaa naa gannaxhieeʼ laabe ne guneʼ ni nabe de guidubi xhialmaʼ. Para cadi gusaanaʼ de chuaaʼ nayecheʼ la? rucheecheʼ diidxaʼ biaʼ zanda guneʼ ne runeʼ stipa para cadi gusiaandaʼ xi chiguni Reinu stiʼ Dios pur laanu».

Maʼ bilá Jiobá laanu de pecadu ne guendaguti. Biblia cusietenalaʼdxiʼ laanu: «Nadxii xhaata Dios binni guidxilayú ngue runi bidii tobi lucha Xiiñiʼ, ti irá tu guni cre Xiiñi be que la? cadi initilú sínuque gapa enda nabani ni qué zaluxe» (Juan 3:16). Pa gápanu fe lu sacrificiu stiʼ Jesús la? zaca perdonar ca pecadu stinu ne zanda guibáninu sin gátinu. Ndiʼ nga tobi de ca razón ni rucaa laanu gudiʼnu xquíxepeʼ Dios ne chuʼ ladxidoʼno nayecheʼ ora maʼ cayúninu ni na, cadi dxandíʼ la?

Yanna guzéʼtenu de Jesús, ti hermanu de México, laa bidii cuenta runi dxiiñaʼ casi ora ñaca ti  esclavu: «Cumu racalaʼdxeʼ guneʼ ganar jma bidxichi la? bineʼ dxiiñaʼ hasta gaayuʼ turnu seguidu. Peru despué binebiaʼyaʼ Jiobá ne biziideʼ maʼ bidiibe Xiiñibe pur binni. Óraque nga biale de naa guneʼ ni na Jiobá ne bidieeʼ laa xquendanabaneʼ. Despué de veintiocho iza de cayuneʼ dxiiñaʼ para ti empresa si, bisaanaʼ dxiiñaʼ que ne gudixhe iqueʼ guneʼ xhiiñaʼ Jiobá de tiempu completu. Dede dxiqué hasta nagasi nuaaʼ nayecheʼ».

Laaca nuunu nayecheʼ purtiʼ nayá xquendanabáninu. Ñee rietenalaʼdxuʼ ximodo bibániluʼ ante gunibiaʼluʼ Jiobá la? Guidúʼyanu xi gudxi apóstol Pablu ca cristianu de Roma: «Ucuá tu yaga lu ná pecadu». Peru despué guniʼbe: «Bilaa tu [ne] biuu tu lu ná enda nachaʼhuiʼ». Xi para yaʼ. Cumu nayá nuu xquendanabánicabe la? zanda guicaacabe ti guendanabani ni qué zaluxe (Romanos 6:17-22). Laanu laaca maʼ nayá xquendanabáninu, ne rapa ndiʼ laanu de guiráʼ ca yuubaʼ ni ridiʼdiʼ ca binni riuuné ni cadi xheelaʼ ne cani ridinde. Cadi dxandíʼ ti razón galán ndiʼ para chuʼnu nayecheʼ la?

Yanna guidúʼyanu ejemplu stiʼ Jaime, ti hombre gudxite box. Qué runi crebe Dios ne riníʼ íquebe bizulú guendanabani pur evolución. Dxi bizulú guyebe ca reunión stinu, guizáʼ bidxagayaabe ora bíʼyabe pabiáʼ nadxiisaa ca testigu stiʼ Jiobá. Peru bidiibe cuenta de ti cosa: para ganda guchaabe modo nabánibe la? caquiiñeʼ guni crebe Dios, ngue runi gunábabe laa gacané laabe gápabe fe. Jaime guníʼ: «Chaahuiʼ chaahuiʼ bidieeʼ cuenta naca Jiobá Bixhózenu ni nadxii ne riaʼ laanu. Nabé rapa ca ley stibe naa. Pa ñaca qué nuchaaʼ la? laaca maʼ guteʼ, cásica maʼ guti stale de ca xcompañeruaʼ. Ca iza ziniaaʼ de cayuneʼ ni na Jiobá nga cani jma rusiecheʼ naa».

Ximodo naquiiñeʼ guni sentirnu laga cabézanu guinitilú guidxilayú malu riʼ yaʼ. Bietenalaʼdxiʼ ndiʼ: «Tu uyubi ni na Espíritu Santu la?» zacaa «enda nabani ni qué zaluxe. Nga runi cadi iréʼ nu gana de guni nu jneza purti zadxiña dxi iree ndu ni bini nu, pa qué cui sa nu atrá» (Gálatas 6:8, 9). Cadi guireʼnu gana purtiʼ si cadídinu xiixa guendanagana; nuuné Jiobá laanu. Gúninu stipa pur gápanu ca guenda ni caquiiñeʼ para cadi gátinu ora gueeda gran tribulación ne gúninu ni na Jiobá né guendanayecheʼ (Santiago 1:2-4; Apocalipsis 7:9, 13, 14).

Nanna dxíchinu zudii Jiobá premiu laanu pa guni huantarnu. Ruuyabe ca stipa rúninu ne pabiáʼ nadxiinu laabe ne pabiáʼ nadxiinu labe, o xlabe. Cadi gusaana de gúninu ni na Jiobá né guendanayecheʼ ne zuni sentirnu cásica biʼniʼ sentir David: «Nuzuhuaaʼ Jiobá nezaluáʼ guiráʼ ora. Purtiʼ nuube ladu derechu stinneʼ, qué ziuu dxi guniibi dxáchacabe naa. Nayecheʼ nuu ladxiduáʼ, guizáʼ nuaaʼ nayecheʼ. Nannaʼ dxicheʼ qué zacaʼ gastiʼ» (Salmo 16:8, 9).