1, 2. a) Xiñee nánnanu zanda gaca xhamígunu Dios. b) Xi zaninu lu tema riʼ.

DEDE ora gálenu hasta ora gátinu, ni jma caquiiñenu nga guendarannaxhii. Ne zacá nga laani, laanu caquiiñenu binni ni dxandíʼ gaca xhamigu laanu ne gannaxhii laanu, cadi guendarannaxhii si ni rusihuinni ti hombre ne ti gunaa ora riuuláʼdxisaacaʼ. Peru jma caquiiñeʼ gaca xhamígunu Dios ne gannaxhii laanu. Stale binni riníʼ ique nagana ni, purtiʼ qué randa ridúʼyanu Dios ne purtiʼ guizáʼ napa poder. Peru laanu nánnanu zanda gaca xhamígunu Jiobá.

² Xiñee nánnanu ni yaʼ. Purtiʼ Biblia ruzeeteʼ de binni ni guca xhamigu Dios. Galán guiníʼ íquenu ca binni riʼ ne chinándanu ejemplu sticaʼ. Xiñee yaʼ. Purtiʼ gástiruʼ sti cosa ni jma risaca lu xquendanabáninu que gaca xhamígunu Dios. Lu tema riʼ zaninu de ejemplu stiʼ Abrahán (biindaʼ Santiago 2:23). Laabe guca xhamígube Dios purtiʼ gúpabe fe laa. Nga runi na Biblia laabe nga «bixhoze irá xixé cani guni cre  Dios», o cani napa fe (Romanos 4:11). Ora maʼ zidúʼndanu tema riʼ, zanda guinabadiidxanu laca laanu: «Xi zanda guneʼ para gapaʼ fe casi gupa Abrahán ne gacaʼ ti binni ni dxandíʼ gaca xhamigu Jiobá yaʼ».

3, 4. a) Gunáʼ nga prueba jma naroʼbaʼ gudiʼdiʼ Abrahán ra bisihuinni napa fe. b) Xi nanna dxichi Abrahán pur fe stiʼ.

³ Bixuiʼlú napa Abrahán biaʼ 125 iza ne chaahuiʼ chaahuiʼ ziguiʼbaʼ lu ti dani. ^[1] Atrá de laabe zeeda xiiñibe, Isaac, laa napa biaʼ 25 iza. Ziné Abrahán ti gudxíu ne caadxi cosa para guni ti gui. Ne Isaac ziné yaga ni iquiiñecabe. Ndiʼ nga viaje ni jma nagana biʼniʼ Abrahán lu guidubi xquendanabani. Peru cadi purtiʼ maʼ bióʼxhobe. Laabe nácarube ti hombre nadipaʼ. Nabé nagana guca ni para laabe purtiʼ ora chindácabe lugar que napa xidé guni sacrificarbe xiiñibe, casi biʼniʼ mandar Jiobá laabe gúnibe (Génesis 22:1-8).

⁴ Ndiʼ nga prueba ni jma naroʼbaʼ gudiʼdiʼ Abrahán ra bisihuinni napa fe. Nuu tu riníʼ nabé malu guca Dios ora biʼniʼ mandar Abrahán guni sacrificar Isaac. Xcaadxi na biʼniʼ Abrahán ni purtiʼ cadi nadxii xiiñiʼ. Cani riníʼ zacá qué gápacaʼ fe ne qué gánnacaʼ xipeʼ nga fe (1 Corintios 2:14-16). Qué nuzuubaʼ diʼ Abrahán stiidxaʼ Dios sin niníʼ ique xi cayuni. Bizuubabe stiidxaʼ Dios purtiʼ dxandipeʼ nápabe fe. Nanna dxíchibe qué ziuu dxi guni mandar Jiobá laabe gúnibe xiixa ni guniná laabe. Ne nanna dxíchibe zaguu Dios ndaayaʼ laabe ne xiiñibe pa guzuubabe stiidxaʼ Dios. Ximodo gúnnabe ni yaʼ. Pur ca cosa ni biziidibe ne pur ca cosa ni bibánibe, o experiencia stibe.

5. a) Ximodo zándaca binibiáʼ Abrahán Jiobá. b) Xi guleendú Abrahán pur guiráʼ ni biziidiʼ de Dios.

⁵ Ca cosa ni biziidibe. Gule Abrahán ndaaniʼ guidxi Ur. Nabé runi adorar ca binni de guidxi riʼ dios ni cadi dxandíʼ. Ne laaca biʼniʼ adorar bixhoze Abrahán ca dios que (Josué 24:2). Yanna, ximodo binibiáʼ Abrahán Jiobá yaʼ. Biblia rusiidiʼ zeedabe de familia stiʼ Sem, ti xiiñiʼ Noé. Ne guti Sem dxi napa Abrahán biaʼ 150 iza. Nabé gupa Sem fe Jiobá, ne zándaca guníʼnebe familia stibe de Jiobá. Nga runi, zanda guininu zacá nga beeda gunibiáʼ Abrahán Jiobá. Gucané cani biziidiʼ Abrahán riʼ laa para gannaxhii Jiobá ne gapa fe Dios.

6, 7. Xi guiráʼ gudiʼdiʼ Abrahán ni gucané laa gaca fe stiʼ jma naguidxi.

⁶ Ca cosa ni bibánibe. Ximodo gucané ca cosa ni bibani Abrahán laa gapa ti fe naguidxi yaʼ. Ca cosa ni riziidiʼ ti binni la? rucaani guni sentir xiixa, ne ni guni sentir binni riʼ rucaani laa guni xiixa. Ngapeʼ nga ni guca Abrahán. Biziidibe stale cosa de Dios ne bicaa ngue laabe guni respetarbe Jiobá, «Dios ni jma nandxóʼ» (Génesis 14:22). Bidxíbibe ñúnibe xiixa ni qué riuulaʼdxiʼ Jiobá (Hebreos 5:7). Ni biʼniʼ sentirbe riʼ nga bicaa laabe cadi gusaana de guzuubabe stiidxaʼ Jiobá. Pa dxandíʼ racaláʼdxinu gaca xhamígunu Dios la? laaca naquiiñeʼ guni respetarnu laa de guidubi ladxidoʼno (Salmo 25:14).

⁷ Biʼniʼ mandar Dios Abrahán ne Sara guireecaʼ de xquídxicaʼ ne chindézacaʼ ti guidxi ni qué runibiaʼcaʼ. Maʼ cadi nahuiinicabe dxi guca ndiʼ, ne napa xidé cuézacabe ndaaniʼ yoo de lari (o carpa) guidubi naca xquendanabánicabe. Ne laaca nanna Abrahán zadxaagalú stale guendanagana. Peru gudixhe íquebe  guzuubabe stiidxaʼ Jiobá. Pur bizuubabe diidxaʼ nga guluu Jiobá ndaayaʼ laabe ne gupa laabe. Guzéʼtenu ti ejemplu. Biblia na gucuaacabe Sara ne yenécabe laa chupa biaje purtiʼ galán laa. Guyuu Abrahán ra naxoo purtiʼ zándaca gueeda guuticabe laa. Peru guiropaʼ biaje riʼ biʼniʼ Jiobá ti milagru para gupa Abrahán ne Sara (Génesis 12:10-20; 20:2-7, 10-12, 17, 18). Cani gudiʼdiʼ Abrahán riʼ gucaneni laa gaca fe stiʼ jma naguidxi.

8. Ximodo zanda guizíʼdinu stale cosa ne gápanu experiencia ti gaca xhamígunu Jiobá ne chuʼnu jma gaxha de laa.

⁸ Yanna, laanu yaʼ. Ñee zanda gácanu ti binni ni dxandíʼ xhamigu Jiobá la? Zanda pue. Para nga naquiiñeʼ guizíʼdinu de Jiobá ne gápanu experiencia, cásica Abrahán. Ximodo yaʼ. Laanu zanda guidúʼndanu Biblia, ni qué ñanda ñuni Abrahán. Nga runi jma zanda guizíʼdinu stale cosa ne gápanu jma experiencia que laabe (Daniel 12:4; Romanos 11:33). Lu Biblia zeeda guiráʼ ni naquiiñeʼ gánnanu de «Dios ni jma nandxóʼ». Ni guizíʼdinu riʼ zucaani laanu gannaxhiinu Jiobá ne guni respetarnu laa. Ne cani guni sentirnu riʼ zucaacani laanu guzúʼbanu stiidxabe. Óraca zadúʼyanu modo gápabe laanu ne modo uguube ndaayaʼ laanu, zacá nga zápanu experiencia ti gaca fe stinu jma naguidxi. Ziuʼnu nayecheʼ ne zápanu guendariuudxi, pa gúninu ni na Jiobá de guidubi ladxidoʼno (Salmo 34:8; Proverbios 10:22). Ra jma maʼ zizíʼdinu de Dios ne gápanu jma experiencia lu xquendanabáninu, jma zaca xhamígunu laabe ne ziuʼnu jma gaxha de laabe.

9, 10. a) Xi naquiiñeʼ gúninu pa racaláʼdxinu guindaa amistad galán stinu. b) Ximodo gupa Abrahán amistad gupané Jiobá.

⁹ Ora nápanu ti amistad galán né tuuxa la? nánnanu nabé risaca ni. Ne naquiiñeʼ gápanu ni para cadi guiniti ni. Biblia na: «Ni dxandíʼ xhamígunu la? guiráʼ ora nadxii laanu, ne zeeda gácabe casi ti bíchinu o ti bizánanu ni nuuca para gacané laanu ora nápanu xiixa guendananá» (Proverbios 17:17). Cadi casi ti jarrón nabé caru ni ruzuhuaa ti lugar para chuulaʼdxiʼ binni ni. Amistad riʼ zeeda gaca casi ti yagahuiiniʼ sicarú ni caquiiñeʼ gápacabe laa. Nanna Abrahán nabé risaca amistad napané Jiobá. Ngue runi qué nusaana de ñápabe ni. Ximodo bíʼnibe ni yaʼ.

¹⁰ Qué nusaana Abrahán de nuzuubaʼ stiidxaʼ Dios ne de ñuni respetar laabe. Guzéʼtenu ti ejemplu. Laga zinebe familia stibe ne cani runi xhiiñabe guidxi ra gudxi Dios laabe chebe, bíʼnibe ni na Dios lu guiráʼ ni gudixhe íquebe gúnibe,  dede né lu ca cosa ni jma nahuiiniʼ. Ti iza ante gale Isaac, biʼniʼ mandar Jiobá Abrahán guni circuncidar guiráʼ ca hombre nuu ra lidxi. Maʼ napa Abrahán 99 iza dxi que. Xi bíʼnibe yaʼ. Ñee guniʼbe cadi jneza ni cayuni mandar Jiobá laabe la? Ñee biyúbibe xiixa pretextu para cadi guzuubabe diidxaʼ la? Coʼ, sínuque gúpabe confianza Dios ne bizuubabe stiidxaʼ dxi queca (Génesis 17:10-14, 23).

11. a) Xiñee guyuu Abrahán xizaa. b) Ximodo gucané Jiobá Abrahán.

¹¹ Qué nusaana de nuzuubaʼ Abrahán stiidxaʼ Jiobá, ne bizuubabe diidxaʼ dede lu ca cosa ni jma nahuiiniʼ. Gucané ngue para guca amistad stícabe jma naguidxi. Gupa Abrahán confianza para guiniʼné Jiobá de intiica cosa, dede né ca tema ni raca nagana para laa guiene. Guzéʼtenu ti ejemplu. Dxi guníʼ Jiobá chigunitilú Sodoma ne Gomorra, nabé guyuu Abrahán xizaa. Xiñee yaʼ. Purtiʼ caníʼ íquebe zati binni malu ne binni nachaʼhuiʼ. Zándaca cá íquebe Lot, sobrínube ne familia stiʼ, purtiʼ nabézacaʼ Sodoma. Peru napa Abrahán confianza Jiobá, «Juez stiʼ guidubi naca guidxilayú». Nga runi qué nudxiibaʼ Abrahán laca laa ora gudxi Dios cani naguu xizaa laa. Ximodo gucané Jiobá laabe yaʼ. Gupa Jiobá paciencia laabe ne gucané laabe gánnabe naca ti Dios ni riaʼ binni. Bisiene Jiobá laabe rulá ca binni nachaʼhuiʼ ora runi juzgar binni (Génesis 18:22-33).

12, 13. a) Ximodo gucané guiráʼ ni biziidiʼ ne guiráʼ experiencia stiʼ Abrahán laa. b) Xiñee nánnanu gupa Abrahán fe Jiobá.

¹² Rihuinni dxíchica gucané ca cosa ni biziidiʼ ne experiencia stiʼ Abrahán laa para cadi gusaana de gaca xhamigu Jiobá. Ngue runi, ora gunabaʼ Jiobá Abrahán guni sacrificar Isaac, nanna nachaʼhuiʼ Dios, napa paciencia ne riaʼ binni. Nánnabe cadi málasi bichaa Dios ne guca malu. Xiñee nánnanu ni yaʼ.

¹³ Ante quibané Abrahán Isaac lu dani que, gudxi cani runi xhiiñaʼ: «Laguiaana raríʼ né burru riʼ, peru naa ne hombrehuiiniʼ riʼ chuudu rariʼcaʼ para guni adorardu, ne guibiguétadu ra nuutu» (Génesis 22:5). Xiñee gudxi Abrahán ca binni runi xhiiñaʼ que laaca zabiguetaʼ Isaac yaʼ. Ñee bisiguiibe laacaʼ la? Coʼ. Biblia na napa Abrahán stale confianza zanda guindisaʼ Jiobá Isaac de lade gueʼtuʼ (biindaʼ Hebreos 11:19). Laabe nánnabe biʼniʼ Jiobá ti milagru para gunda gupanebe Sara ti xiiñicabe neca maʼ bióʼxhocabe (Hebreos 11:11, 12, 18). Nánnabe zanda guni Dios guiráʼ cosa. Dxandíʼ, qué gánnadibe xi chiguizaaca dxi que. Peru nápabe fe zanda gusibani Jiobá Isaac pa gatiʼ ti gaca cumplir ca promesa stiʼ  Dios. Nga runi na Biblia Abrahán nga «bixhoze irá xixé cani guni cre Dios», o cani napa fe.

14. a) Xi guendanagana rapa chupa chonna xpinni Dios. b) Ximodo racané ejemplu stiʼ Abrahán laanu.

¹⁴ Ca dxi riʼ qué rinabaʼ diʼ Jiobá laanu gudiʼnu xiiñinu casi ti ofrenda. Peru rinábabe laanu guzúʼbanu stiidxabe. Zándaca ziuu biaje qué ziénenu xiñee cayábibe laanu gúninu xiixa. O zándaca gaca nagana para laanu guzúʼbanu diidxaʼ. Nuu tu raca nagana para laa gucheeche diidxaʼ purtiʼ natuí ne qué randa riniʼné binni ni qué runibiáʼ. O zándaca guidxíbinu purtiʼ maʼ gadxé laanu de ca binni runinenu dxiiñaʼ o de ca binni rinenu scuela (Éxodo 23:2; 1 Tesalonicenses 2:2). Xi zanda gúninu pa runi sentirnu zacá yaʼ. Guietenaláʼdxinu fe gupa Abrahán ne modo guca nadxibalú. Pa cueenu tiempu para guiníʼ íquenu de ca hombre ne ca gunaa ni bizuubaʼ stiidxaʼ Jiobá casi laabe, zanda chinándanu ejemplu stibe ne zaca xhamígunu Jiobá (Hebreos 12:1, 2).

15. Xiñee nánnanu qué ñuu dxi ñaca arrepentir Abrahán pur bizuubaʼ stiidxaʼ Jiobá.

¹⁵ Qué ñuu dxi ñaca arrepentir Abrahán pur bizuubaʼ stiidxaʼ Jiobá. Ximodo nánnanu ni yaʼ. Purtiʼ Biblia na bibánibe 175 iza ne nuu ladxidoʼbe nayecheʼ dxi gútibe (Génesis 25:8). Qué riníʼ diʼ ndiʼ maʼ qué gapa Abrahán gana guibani, sínuque guyuube nayecheʼ ora guníʼ íquebe guiráʼ ni bíʼnibe biaʼ tiempu bibánibe. Xiñee yaʼ. Purtiʼ nabé bisaca para laabe gaca xhamígube Jiobá.

16. Xiñee ziuu Abrahán nayecheʼ ndaaniʼ Paraísu.

¹⁶ Biblia na cabeza Abrahán «guidxi ni bicuí Dios [...], guidxi ni qué ziuu dxi initilú» (Hebreos 11:10). «Guidxi» riʼ nga Reinu stiʼ Dios. Gupa Abrahán fe ziuu dxi guʼyaʼ guni mandar «guidxi» que guidubi Guidxilayú. Ne zaca ni zacá. Bixuiʼlú pabiáʼ nayecheʼ zuni sentir Abrahán ora guibani ndaaniʼ Paraísu ne gaca xhamigu Jiobá sti biaje. Ziéchebe gánnabe gucané fe stibe ca xpinni Dios pur stale iza. Zánnabe beeda gaca ni bíʼninebe Isaac lu dani que ti ejemplu de ti cosa nabé risaca guca despué (Hebreos 11:19). Ne zánnabe sti cosa: yuubaʼ biʼniʼ sentirbe ora chiguni sacrificarbe Isaac que, gucaneni millón de xpinni Dios. Xiñee yaʼ. Purtiʼ gucaneni laacaʼ guiénecaʼ yuubaʼ biʼniʼ sentir Jiobá dxi biseendaʼ Jesús gatiʼ pur binni (Juan 3:16). Maʼ gucané ejemplu stiʼ Abrahán riʼ laanu gusisácanu sacrificiu stiʼ Jesús jma, sacrificiu ra rihuinni ti guendarannaxhii ni jma risaca.

17. a) Xi naquiiñeʼ quixhe íquenu gúninu. b) Xi zadúʼyanu lu sti tema ca.

¹⁷ Quixhe íquenu cadi gusaana de chinándanu ejemplu de fe stiʼ Abrahán. Cásica laabe, laanu laaca caquiiñeʼ guizíʼdinu stale cosa ne gápanu experiencia. Pa qué gusaana de guizíʼdinu de Jiobá ne guzúʼbanu stiidxabe la? zadúʼyanu ximodo cuʼbe ndaayaʼ laanu ne gápabe laanu (biindaʼ Hebreos 6:10-12). Zacá qué zusaana de gaca Xhamígube laanu. Lu sti tema ca zadúʼyanu ejemplu stiʼ xhonna binni ni dxandíʼ guca xhamígucaʼ Dios.