1. Ximodo zanda guzúʼbanu stiidxaʼ Jiobá ne guzúʼbanu stiidxaʼ ca gobiernu nuu ndaaniʼ Guidxilayú.

BIBLIA rusiidiʼ laanu naquiiñeʼ guzúʼbanu stiidxaʼ ca gobiernu nuu ndaaniʼ Guidxilayú. Peru laaca rusiidiʼ ni laanu cadi naquiiñeʼ gusaana de guzúʼbanu stiidxaʼ Dios (Hechos 5:29; Tito 3:1). Ximodo zanda gúninu guiropaʼ ndiʼ yaʼ. Lu Biblia zeeda ti principiu ni zanda gacané laanu. Jesús guníʼ: «Laudii César sti César, ne laudii Dios sti Dios» (Mateo 22:21). ^[1] Ximodo gudiʼnu «César sti César» yaʼ. Ra gúninu ni na ca ley stiʼ gobiernu, guni respetarnu cani runi mandar ndaaniʼ xquídxinu ne quíxenu impuestu (Romanos 13:7). Peru, pa gabi cani runi mandar xquídxinu laanu gúninu xiixa ni qué riuulaʼdxiʼ Dios yaʼ. Óraque huaxa maʼ qué zúninu ni guinábacabe laanu. Peru zusiénenu ni laacabe né stale respetu.

2. Ximodo rusihuínninu qué riuʼnu lu política.

² Ti modo gudiʼnu «Dios sti Dios» nga gácanu neutral ora maʼ cayeeteʼ de política. Ndiʼ riníʼ cadi chuʼnu pur tobi o pur stobi (Isaías 2:4). Ximodo zanda gusihuínninu cadi nuunu pur tobi o pur stobi yaʼ. Rusihuínninu ni ora qué rucáʼlunu ca gobiernu nuu lu Guidxilayú riʼ, purtiʼ nánnanu Jiobá nga cudii lugar chúʼcabe. Ne ora gúnicabe xiixa para  gusihuínnicabe jma risaca xquídxinu la? laaca qué rinándanu laacabe (Romanos 13:1, 2). Qué lica rucáʼlunu para guchaʼnu ti gobiernu pur stobi ne qué rucaʼnu ti políticu guni xiixa ni racaláʼdxinu. Laaca qué runi votarnu pur ti candidatu o pur ti partidu políticu ne qué riuʼnu lu política.

3. Xiñee naquiiñeʼ gácanu neutral.

³ Xiñee racalaʼdxiʼ Dios gácanu neutral yaʼ. Nuu stale razón. Primé, purtiʼ zinándanu ejemplu stiʼ Jesús. Laabe guniʼbe: «Naa cadi zinanda guidxilayú». Ngue runi qué ñuu dxi ñuube lu política ne qué ñebe lu guerra (Juan 6:15; 17:16). Guiropa, naquiiñeʼ gácanu neutral purtiʼ nuunu pur Reinu stiʼ Dios. Guníʼ ique ndiʼ: ximodo gábinu binni gobiernu si stiʼ Dios nga zanda guni chaahuiʼ ca guendanagana stinu, pa chuʼnu pur ti gobiernu stiʼ guidxilayú riʼ yaʼ. Guionna, naquiiñeʼ gácanu neutral purtiʼ nuunu tobi si né ca hermanu stinu ni nuu lu guidubi Guidxilayú. Ca religión ni qué rusiidiʼ ni dxandíʼ rutíndecaʼ binni purtiʼ riuucaʼ lu política (1 Pedro 2:17).

4. a) Xiñee nánnanu zaca jma nagana para laanu gácanu neutral ra zidiʼdiʼ dxi. b) Xiñee naquiiñeʼ chuʼnu listu dede yanna ti ganda gácanu neutral.

⁴ Zándaca nabézanu ti lugar ra qué rinabaʼ binni chuʼnu pur ti partidu políticu. Peru cumu jma maʼ zidxiña dxi guinitilú guidxilayú stiʼ Binidxabaʼ la? jma nagana zaca para laanu gácanu neutral. Casi na 2 Timoteo 3:3, 4, ca binni nuu tiempu riʼ qué runilucaʼ rúnicaʼ intiica cosa ne cadi nuucaʼ tobi si. Ne zeʼ dxi jma zidale ca binni riʼ. Ne nuu tiru málasi ruchaa política stiʼ xiixa guidxi. Maʼ guca ndiʼ ndaaniʼ chupa chonna guidxi roʼ, ne pur nga huadxaagalú ca hermanu stinu stale guendanagana. Nga runi naquiiñeʼ chuʼnu listu yanna ti gácanu neutral ora guidxaagalunu xiixa guendanagana. Guidúʼyanu tapa cosa ni zanda gacané laanu.

5. Xi riníʼ ique Jiobá de ca gobiernu napa binni.

⁵ Ti modo zanda chuʼnu listu yanna ti gácanu neutral nga guidúʼyanu ca gobiernu stiʼ Guidxilayú riʼ casi ruuyaʼ Jiobá laacaʼ. Xi riníʼ ique Jiobá de laacabe yaʼ. Laabe qué riuuláʼdxibe ca gobiernu riʼ, purtiʼ dxi bizaʼbe binni qué nudiibe derechu laacaʼ para guni mandarcaʼ stobi (Jeremías 10:23). Para Jiobá la? guiráʼ binni zeeda gaca ti familia si. Peru qué rudii ca gobiernu ca lugar chuʼ binni tobi si ora riniʼcaʼ jma risaca xquídxicaʼ. Ne neca nuu gobiernu racalaʼdxiʼ guni caadxi cosa jneza, qué zanda guni chaahuicaʼ guiráʼ guendanagana stinu. Ca gobiernu stiʼ guidxilayú riʼ nácacaʼ enemigu stiʼ Reinu stiʼ Dios, ni bizulú cayuni mandar lu iza 1914. Maʼ cadi candaa zunduuxeʼ gobiernu stiʼ Dios guiráʼ gobiernu nuu lu Guidxilayú riʼ. Biblia na: «Maʼ cucaalú ca rey stiʼ guidxilayú riʼ, ne laaca maʼ bidagulisaa ca xaíque stiʼ ca guidxi ca para gucaalucaʼ Jiobá ne ungidu stiʼ. Zunideluʼ laacabe né ti cetru de guiibaʼ, zuxuuxeluʼ laacabe casi ñácacabe ti vasu de yú» (Salmo 2:2, 9).

6. Ximodo naquiiñeʼ guni tratarnu ca binni ni napa autoridad lu ti gobiernu.

⁶ Rudii Dios lugar chuʼ ca gobiernu ca purtiʼ racanecaʼ para gapa binni guendariuudxi ne para cadi chuʼdíndecaʼ. Ne racané ndiʼ laanu para ganda gucheechenu stiidxaʼ Reinu (Romanos 13:3, 4). Dede rabi Jiobá laanu guni orarnu pur ca gobiernu ca ti cadi chuʼ tu guchiiñaʼ laanu ora guni adorarnu laabe (1 Timoteo 2:1, 2). Pa guni tuuxa laanu xiixa la? zanda guinábanu gacané ca autoridad laanu, cásica biʼniʼ apóstol Pablu (Hechos 25:11). Dxandíʼ ruzeeteʼ Biblia nuu ca gobiernu ca lu náʼ Binidxabaʼ, peru qué riníʼ diʼ ni rábibe cada gobiernu xipeʼ nga guni (Lucas 4:5, 6). Nga runi, qué zanda guininu Binidxabaʼ nga naazeʼ ca binni ni runi xhiiñaʼ tuuxa gobiernu. Biblia na cadi guininu mal de ca autoridad ca ne naquiiñeʼ guni respetarnu laacaʼ (Tito 3:1, 2).

7. Xi cadi naquiiñeʼ guiníʼ íquenu.

⁷ Cumu racaláʼdxinu guzúʼbanu stiidxaʼ Dios la? rácanu neutral ne qué riuʼnu pur ti políticu o pur ti grupu políticu. Zándaca ziuu ora  zaca ndiʼ nagana para laanu, jmaruʼ si pa ruluíʼ zabeendunu caadxi cosa galán pur cani naguixhe íquecabe gúnicabe. Quíxhenu ti ejemplu. Guiníʼ íquenu racalaʼdxiʼ ca binni nuu neza ra nabézanu guindísacaʼ gobiernu purtiʼ nabé huayuninabe laacaʼ. Zándaca laaca maʼ huayuniná gobiernu riʼ ca testigu stiʼ Jiobá. Xi gúninu yaʼ. Nánnanu qué zucáʼlunu gobiernu riʼ. Peru, ñee zaninu biaʼsi ngue ni cayuni ca binni que ne ndaaniʼ ladxidoʼno guininu tílasi ganda guni ganar ca binni cucaalú gobiernu que la? (Efesios 2:2). Pa racaláʼdxinu gácanu neutral la? naquiiñeʼ chuʼnu cuidadu né ni rininu ne ni rúninu. Peru laaca cadi galán diʼ guiníʼ íquenu napa tobi de ca grupu ca razón o jma jneza modo runi tobi que stobi.

8. Ximodo zanda gácanu binni «nexhená» ne binni «nadóʼ» ora gaca nagana para laanu gácanu neutral.

⁸ Guiropa modo chuʼnu listu para gácanu neutral nga «gatananu casi nexhená beendaʼ», peru laaca naquiiñeʼ gácanu «nadóʼ casi nadóʼ paloma» (biindaʼ Mateo 10:16, 17). Ximodo gácanu binni «nexhená» yaʼ. Ra guiníʼ íquenu ca guendanagana ni zándaca gueeda luguianu. Yanna, ximodo zanda gácanu binni «nadóʼ» yaʼ. Ra gácanu neutral ora gápanu guendanagana. Guidúʼyanu chupa chonna de ca guendanagana riʼ ne xi zacané laanu gácanu neutral.

9. Ximodo zanda gácanu binni nexhená ora maʼ caninenu binni.

⁹ Ora rinínenu xcaadxi binni. Naquiiñeʼ chuʼnu cuidadu ora guzulú guiníʼ binni de política. Guzéʼtenu ti ejemplu. Pa caninenu ti binni de Reinu stiʼ Dios la? cadi naquiiñeʼ gábinu laabe riuuláʼdxinu o qué riuuláʼdxinu modo riníʼ ique ti xaíque o ti partidu políticu. Yanna, pa gacalaʼdxiʼ tuuxa guiníʼ de cani naguixhe ique binni para guni chaahuiʼ ca guendanagana nuu lu Guidxilayú riʼ yaʼ. Jma galán iquiiñenu Biblia para gusiénenu laabe Reinu stiʼ Dios nga chiguni chaahuiʼ ca guendanagana stinu. Yanna, pa gacaláʼdxibe guiniʼbe de guendarutiidiʼ baʼduʼ, de ora richaganáʼ ti hombre ne sti hombre o ti gunaa ne sti gunaa yaʼ. Naquiiñeʼ gábinu laabe xi riníʼ Biblia ne gusiénenu laabe ximodo rinándanu ca conseju stini. Yanna, xi gúninu pa guiniʼbe naquiiñeʼ guiree o guidxaa xiixa ley yaʼ. Qué zaninu gastiʼ de tema ca ne cadi gacaláʼdxinu guchaa binni modo riníʼ ique.

10. Xi naquiiñeʼ gúninu para gácanu neutral ora guidúʼyanu o guidúʼndanu xiixa noticia.

¹⁰ Ora guidúʼndanu o gucaʼdiáganu noticia. Nuu biaje ridúʼyanu nabé riuu caadxi periódicu o caadxi binni rutiidiʼ noticia pur ti organización o pur ti partidu políticu. Jma raca ndiʼ ndaaniʼ ca guidxi ra riguixhe ca gobiernu ca xi noticia naquiiñeʼ ganna binni. Pa nuu ti periodista o pa nuu ti agencia de noticia ni rusihuinni nuu pur ti partidu si la? naquiiñeʼ chuʼnu cuidadu ti cadi guzulú guiníʼ íquenu zaqueca. Naquiiñeʼ guinabadiidxanu laca laanu: «Ñee riuuladxeʼ gucaadiaʼgaʼ tuuxa periodista si purtiʼ para naa biaʼsi nga ni riniʼbe de política la?». Pa racaláʼdxinu gácanu neutral la? cadi gatigá guidúʼyanu ne guidúʼndanu ca noticia ni nuu pur ti partidu políticu. Jma galán guyúbinu periódicu o noticia ni qué riuu pur tobi o pur stobi. Ora guidúʼyanu o guidúʼndanu noticia la? naquiiñeʼ guietenaláʼdxinu xi rusiidiʼ Biblia (2 Timoteo 1:13).

11. Xi zazaaca pa jma rusisácanu bidxichi o xcaadxi cosa ni nápanu.

¹¹ Pa nabé risaca ca cosa ni nápanu para laanu. Pa jma rusisácanu bidxichi o xcaadxi cosa material ni nápanu la? jma zaca nagana para laanu gácanu neutral. Guidúʼyanu ti ejemplu. Lu iza 1970, stale Testigu de Malaui gupa xidé bisaanacaʼ guiráʼ ni nápacaʼ purtiʼ qué ninacaʼ ñuucaʼ tobi si né ti partidu políticu. Peru ti hermana láʼ Ruth guníʼ qué ñanda nusaana caadxi hermanu ca cosa risaca nápacaʼ. Dxandíʼ guyécabe ti lugar ra guyé xcaadxi Testigu, peru  despué guyuucabe pur partidu políticu que para gunda bibiguétacabe ra lídxicabe. Peru huaxiéʼ si nga tu huayuni zacá, jma stale xpinni Dios huayaca neutral neca guibaninecaʼ huaxiéʼ bidxichi o neca guníticaʼ guiráʼ ni nápacaʼ (Hebreos 10:34).

12, 13. a) Ximodo ruuyaʼ Jiobá guiráʼ binni. b) Ximodo zanda gánnanu pa maʼ bizulú caníʼ íquenu jma risaca xquídxinu que stobi.

¹² Pa jma rusisácanu xquídxinu o cultura stinu. Ndaaniʼ Guidxilayú riʼ nabé nuu binni ni rusisaca xquidxi, raza o cultura stiʼ. Peru Jiobá qué riníʼ ique jma risaca tuuxa binni o ti grupu binni que stobi. Para laabe la? ngueca ca laanu. Dxandíʼ, gadxé gadxé modo bizaʼbe laanu. Ne laanu zanda chuuláʼdxinu ne guidxagayaanu ni. Cadi canabaʼ diʼ Jiobá laanu gudxiʼdéchenu cultura stinu. Peru laaca qué racaláʼdxibe guiníʼ íquenu jma risácanu que stobi (Romanos 10:12).

¹³ Cadi naquiiñeʼ guni sentirnu jma risaca xquídxinu ne guiníʼ íquenu gástiruʼ sti guidxi jma galán que laani. Pa runi sentirnu zacá, zaca nagana para laanu gácanu neutral. Ngapeʼ nga ni guca tiempu bibani ca primé xpinni Cristu que. Caadxi de ca xpinni Cristu ni riníʼ diidxaʼ hebreu cadi jneza modo biʼniʼ tratarcaʼ ca viuda ni riníʼ diidxaʼ griegu (Hechos 6:1). Ximodo zanda gánnanu pa maʼ bizulú cusisácanu xquídxinu yaʼ. Guiníʼ íquenu: «Xi runeʼ ora gudii ti hermanu de sti guidxi xiixa conseju naa. Ñee qué ricaaʼ conseju stibe purtiʼ riníʼ iqueʼ jma galán modo rúnidu ca cosa ca xquidxeʼ la?». Pa zacá riníʼ íquenu la? guietenaláʼdxinu riníʼ Biblia cadi gudxíʼbanu laca laanu, ni jma jneza gúninu nga guiníʼ íquenu jma risaca stobi que laanu (Filipenses 2:3).

14. a) Ximodo zanda gacané oración laanu. b) Bizeeteʼ ti ejemplu ni zeeda lu Biblia ni rusihuinni pabiáʼ naroʼbaʼ poder napa ti oración.

¹⁴ Guionna modo para gácanu neutral nga guyúbinu gacané Jiobá laanu. Zanda gacané oración laanu. Guinábanu Dios gudii laanu espíritu santu, ni zanda gudii laanu paciencia ne gusiidiʼ laanu gucueezanu laanu. Zacané ca guenda riʼ laanu pa guni ti gobiernu xiixa ni cadi naquiiñeʼ gaca o guni xiixa ni cadi jneza. Laaca zanda guinábanu Dios gudii laanu guendabiaaniʼ ti gánnanu pora nga nuu ti guendanagana ra naquiiñeʼ gácanu neutral ne gudiibe stipa laanu para gúninu ni jneza (Santiago 1:5). Zándaca gueeda guseguyoocabe laanu o gudiicabe laanu sti castigu jma naná pur guzúʼbanu stiidxaʼ Dios. Pa guizaacanu zacá la? guinábanu Jiobá gacané laanu gácanu nadxibalú ti ganda gusiénenu xiñee neutral laanu. Naquiiñeʼ chuʼnu seguru zacané Jiobá laanu guni huantarnu. Zanda guidúʼyanu ti ejemplu ni rusihuinni pabiáʼ naroʼbaʼ poder napa ti oración lu libru stiʼ Hechos 4:27-31 (biindaʼ ni).

15. Ximodo zanda gacané Biblia laanu gácanu neutral. (Biiyaʼ recuadru «Gucané Stiidxaʼ Dios laacabe para gunda bizuhuaacabe dxiichiʼ»).

¹⁵ Maʼ bidii Jiobá laanu Biblia para gudii stipa laanu. Nuu versículo ni zanda gacané laanu gácanu neutral. Zanda guiníʼ íquenu lu cani ne gúninu stipa pur guizíʼdinu cani de memoria purtiʼ zándaca chuʼ dxi guiaadxaʼ Biblia laanu. Laaca zanda guquidxi Biblia esperanza stinu ti cadi guiaandaʼ laanu ca ndaayaʼ ni guedané Reinu stiʼ Dios. Caquiiñenu esperanza ca para guni huantarnu ora sanándacabe laanu (Romanos 8:25). Cuinu versículo ni caníʼ de guidxilayú cubi ca ne guxuíʼlunu ca cosa ni racaláʼdxinu gápanu raqué.

16, 17. Xi rusiidiʼ ejemplu stiʼ ca xpinni Dios ni guca neutral laanu. (Biiyaʼ foto ni zeeda ra ruzulú tema riʼ).

¹⁶ Guidapa modo chuʼnu listu para gácanu neutral nga guiníʼ íquenu lu ca ejemplu stiʼ ca xpinni Jiobá ni bizuubaʼ diidxaʼ. Ca dxi gucuá Biblia, guyuu stale tu guca nadxibalú ne gudixhe íquecaʼ gúnicaʼ ni jneza ngue runi gunda gúcacaʼ neutral. Casi Sadrac, Mesac ne Abednego  qué ninacaʼ ñuni adorarcaʼ ti bidóʼ de oro ni zeeda gaca gobiernu stiʼ Babilonia. Biblia na: «Pa zacá ni la? Dios stidu ni rúnidu ni na zanda gulá laadu. Neca uguuluʼ laadu ndaaniʼ horno ni cá guí ca zulabe laadu ne laaca zulabe laadu de lu naluʼ, rey. Peru pa qué gulabe laadu la? rey, gúnnaca ndiʼ, qué runi adorardu ca dios stiluʼ, ne qué zuni adorardu bidóʼ de oro ni bíʼniluʼ ca» (Daniel 3:17, 18). Ca dxi riʼ, huayacané historia riʼ stale de ca Testigu para gácacaʼ nadxibalú ti cadi guni adorarcaʼ bandera stiʼ xquídxicaʼ. Laaca zanda guiníʼ íquenu ejemplu stiʼ Jesús. Laabe qué ñuube lu política nin lu sti cosa ni nutinde binni. Nánnabe zacané ejemplu stibe ca discípulo que. Ngue runi guluube gana laacaʼ ne gúdxibe laacaʼ: «Ma udixhe dxie guidxilayú» (Juan 16:33).

¹⁷ Ca dxi stinu riʼ, nuu stale Testigu ni maʼ huayácacaʼ neutral. Nuu tu laa nabé feu modo biʼniʼ castigárcabe laa, huaseguyoocabe laa o dede huayuuticabe laa purtiʼ qué niná nucheené Jiobá. Ejemplu stícabe racané ni laanu gácanu nadxibalú. Ti hermanu de Turquía guníʼ: «Franz Reiter nga ti hombrehuiiniʼ ni biiticabe laa purtiʼ qué niná ñuu lu ejércitu stiʼ Hitler. Gueelaʼ ante gátibe que bicaabe ti carta ra nuu jñaabe, ni bicaabe luni bisihuinni pabiáʼ naroʼbaʼ fe ne confianza nápabe Jiobá. Naa rabeʼ zinandaʼ ejemplu stibe pa chuʼ dxi tiideʼ lu ti guendanagana casi ni gudíʼdibe». ^[2]

18, 19. a) Ximodo zanda gacané ca hermanu nuu ra congregación laanu para gácanu neutral. b) Xi maʼ gudixhe íqueluʼ gúniluʼ yanna.

¹⁸ Laaca zanda gacané ca hermanu stinu laanu gácanu neutral. Pa nuunu lu xiixa guendanagana, guinínenu ca ancianu. Laacabe zanda iquiiñecabe Biblia para gudiicabe conseju ni gacané laanu. Ne pa ganna xcaadxi hermanu de congregación stinu xi cayácanu la? laaca zaguucaʼ gana laanu. Zanda gábinu laacabe guni orárcabe pur laanu. Peru laanu laaca zanda uguʼnu gana ca hermanu stinu ne guni orarnu pur laacaʼ (Mateo 7:12). Lu sitiu de Internet jw.org nuu ti lista de hermanu ni daguyoo. Zadxélanu ni lu tema ra na «Testigos de Jehová presos por sus creencias (por países)», sección ra na PRENSA > ASUNTOS LEGALES. Cuinu lá caadxi hermanu ne guinábanu Jiobá gacané laacabe gácacabe nadxibalú ne cadi gusaanacabe laa (Efesios 6:18-20).

¹⁹ Cumu jma maʼ gaxha nuu fin stiʼ guidxilayú riʼ la? zándaca gucaa ca gobiernu laanu chuʼnu pur xiixa grupu. Nga runi nabé risaca chuʼnu listu para ganda gácanu neutral ndaaniʼ guidxilayú ni nuudinde riʼ.