1, 2. a) Xi rusiidiʼ ejemplu stiʼ Gedeón ne 300 soldadu stiʼ laanu. (Biiyaʼ dibuju ni zeeda ra ruzulú tema riʼ). b) Xiñee risaca guni huantarnu casi na Lucas 21:19.

NUU juez Gedeón ne ejércitu stiʼ lu ti guerra nabé nadipaʼ ne guizáʼ maʼ bidxágacaʼ. Maʼ gudiʼdiʼ ti gueelaʼ de nándacabe ca enemigu stícabe ne maʼ guzácabe 32 kilómetru. Xi guca despué yaʼ. Biblia na: «Yendá Gedeón ra nuu Jordán, ne gudíʼdibe ni, laabe ne chonna gayuaa hombre ni nuuné laabe, maʼ bidxágacabe». Peru caʼruʼ guiluxe guerra que, purtiʼ cayaadxaruʼ guuticabe sti 15 mil soldadu. Stale iza bininá ca enemigu que ca israelita. Ngue runi, qué niree Gedeón ne ca xpinni gana de nizanándacaʼ laacabe, dede ra binduuxecaʼ laacabe (Jueces 7:22; 8:4, 10, 28).

² Laanu laaca nuunu lu ti guerra nadipaʼ ne zándaca ziuu ora gusidxaga ni laanu. Ca enemigu stinu nga Binidxabaʼ ne guidxilayú stiʼ, ne laaca cudxíʼlunu donda gulenenu. Nuu de laanu maʼ ziné stale iza de cudxiilú cani. Ne huayacané Jiobá laanu para guni ganarnu stale biaje. Peru caʼruʼ diʼ guiluxe guerra riʼ. Zándaca ziuu ora zadxáganu lu guerra riʼ o zadxáganu purtiʼ maʼ xadxí de cabézanu guinitilú guidxilayú malu riʼ. Jesús guníʼ zápanu stale guendanagana ne zazanándacabe laanu lu ca últimu dxi. Peru  laaca guniʼbe zuni ganarnu guerra riʼ pa guni huantarnu (biindaʼ Lucas 21:19). Xi riníʼ diidxaʼ guni huantarnu. Xi zacané laanu guni huantarnu. Ne ximodo ndiʼ riniisinu lu stiidxaʼ Dios ora runi huantarnu (Santiago 1:4).

3. Xi riníʼ diidxaʼ guni huantarnu.

³ Ora riníʼ Biblia de tuuxa ni runi huantar la? cadi caníʼ si ni de tuuxa ni nuu conforme né ca guendanagana stiʼ. Caníʼ ni de ti binni ni riníʼ ique ximodo gudxiilú guendanagana stiʼ. Laaca caníʼ ni de ti binni nadxibalú, ni ruzuubaʼ diidxaʼ ne napa paciencia. Ti libru na riníʼ diidxaʼ riʼ cadi guiníʼ ique binni maʼ biluxe guidxilayú ne cadi guiree gana ora gapa guendanagana. Laani nga guzuhuaa binni dxiichiʼ ne cadi guitende ñee neca tiidiʼ ra jma nagana. Ora runi huantarnu ti guendanagana la? reeda gaca ni casi ora ñuni ganarnu ti guerra. Zacá maʼ qué rucáʼ íquenu ca yuubaʼ stinu, sínuque jma ricá íquenu premiu nuu para laanu.

4. Xiñee racané guendarannaxhii laanu guni huantarnu.

⁴ Pa nadxiinu binni la? zacané ni laanu guni huantarnu (biindaʼ 1 Corintios 13:4, 7). Xiñee rininu zacá yaʼ. Guzéʼtenu ti ejemplu. Cumu nadxiinu Jiobá la? randa runi huantarnu intiica guendanagana gudiibe lugar tiidinu (Lucas 22:41, 42). Ne runi huantarnu ca hermanu stinu ora gucheenecaʼ laanu purtiʼ nadxiinu laacaʼ (1 Pedro 4:8). Ne cumu nadxiinu xheelanu la? racané ni laanu guni huantarnu intiica guendanagana ne zaca xquendaxheelanu jma nadipaʼ. Ne dede zacané ni ca guendaxheelaʼ nabani nayecheʼ purtiʼ laaca ridxaagalucaʼ guendanagana (1 Corintios 7:28).

5. Xiñee Jiobá si nga ni jma zanda gacané laanu guni huantarnu.

⁵ Guinábanu Jiobá gudii stipa laanu. Biblia na racané Jiobá laanu para guni huantarnu ne riguixhedxí ladxidoʼno (Romanos 15:5). Laasibe nga ni jma riene chaahuiʼ ximodo nuunu, xi runi sentirnu ne xi guiráʼ maʼ gudídinu. Nga runi, nanna dxíchibe xipeʼ nga ni jma caquiiñenu para guni huantarnu. Biblia na zudii Dios «guiráʼ ni gacalaʼdxiʼ cani ridxibi laabe; zucaadiágabe ora guinábacaʼ gacanebe laacaʼ, ne zulabe laacaʼ» (Salmo 145:19). Peru, ximodo ricabi Dios oración stinu ora rinábanu laa gudii stipa laanu para guni huantarnu yaʼ.

6. Ximodo racané Jiobá laanu guni huantarnu xiixa guendanagana casi maʼ bidii stiidxaʼ.

⁶ Jiobá maʼ bidii stiidxaʼ zacané laanu guni huantarnu pa guinábanu ni laa (biindaʼ 1 Corintios 10:13). Ximodo rúnibe ni yaʼ. Nuu tiru la? ribeebe guendanagana stinu. Peru jma stale biaje rudiibe stipa laanu para guni huantarnu ti gápanu paciencia ne chuʼnu nayecheʼ (Colosenses 1:11). Ne laaca nanna dxichi Jiobá pora maʼ birá stipa stinu, pora maʼ bidxaga xquendabiaaninu ne pora ruluíʼ maʼ qué zanda guni huantar ladxidoʼno. Qué ziuu dxi gudiibe lugar gápanu xiixa guendanagana ni gucaa laanu guchéʼnenu laabe.

7. Biquiiñeʼ ti ejemplu para gusiéneluʼ xiñee caquiiñeʼ guizíʼdinu ni zeeda lu Biblia ti guni huantarnu.

⁷ Iquiiñenu Stiidxaʼ Dios para guquídxinu fe stinu. Xiñee nabé risaca gúninu nga yaʼ. Quíxhenu ti ejemplu. Para quibaʼ binni lu ti dani nabé nasoo la? ti dxi si naquiiñeʼ gó biaʼ ró chonna o tapa gubidxa. Pa racalaʼdxiʼ binni riʼ guni huantar dede chindá luguiáʼ la? caquiiñeʼ gó biaʼ gándatiʼ. Zacaca nga caquiiñeʼ gúninu pa racaláʼdxinu guni huantarnu dede dxi gueeda fin, caquiiñeʼ guizíʼdinu stale cosa de Stiidxaʼ Dios. Caquiiñeʼ cueenu tiempu para guni estudiarnu Biblia stúbinu ne para chuunu guiráʼ reunión. Zacatiʼ nga zanda gaca fe stinu naguidxi (Juan 6:27).

8, 9. a) Casi na Job 2:4, 5, xi naquiiñeʼ gusihuínninu ora ridxaagalunu guendanagana. b) Xi naquiiñeʼ guiníʼ íquenu ora gápanu guendanagana.

 ⁸ Guietenaláʼdxinu cadi naquiiñeʼ gusaananu Dios. Ca guendanagana ridxaagalunu nabé runiná cani laanu stale. Peru óraca nga zusihuínninu pa qué zusaana de gúninu ni na Dios. Qué racalaʼdxiʼ Binidxabaʼ guni mandar Jiobá guibáʼ ne lu Guidxilayú. Laabe bicaalube Jiobá ora guniʼbe rúninu ni na purtiʼ rudii laanu stale cosa galán. Ca dxi bibani Job, guníʼ Binidxabaʼ: «Guiráʼ ni napa binni zudii ni para gulá xquendanabani». Ne despué guniʼbe zaxeleʼ Job de Jiobá pa gaxha Dios laa guiráʼ ni napa (Job 2:4, 5). Despué de stale iza, guleecabe Binidxabaʼ de guibáʼ, ne dede dxiqué caguube xqueja ca xpinni Dios ni ruzuubaʼ diidxaʼ (Apocalipsis 12:10). Yanna laaca riniʼbe runi adorarnu Dios purtiʼ rudii laanu stale cosa galán. Ni racaláʼdxibe nga gudxiʼdéchenu modo runi mandar Dios ne gusaana de gúninu ni na. Nga runi, ni gúninu ora guidxaagalunu xiixa guendanagana zusihuinni ni pa nuunu pur Jiobá casi tobi ni runi mandar guibáʼ ne lu Guidxilayú.

⁹ Ora maʼ cadídinu ti guendanagana galán guiníʼ íquenu ndiʼ: ti ladu nuu Binidxabaʼ ne ca demonio, cayuuyadxicaʼ laanu ne caniʼcaʼ zudxiʼdéchenu Dios. Peru sti ladu nuu Jiobá, ne rey stinu Jesucristu, ca ungidu ni maʼ biasa lade gueʼtuʼ ne mil de ángel. Laaca cayuuyacabe laanu, peru caguucabe gana laanu para cadi guidxáganu. Riéchecabe ora ruuyacabe qué ruchéʼnenu Jiobá ne cayuni huantarnu neca gápanu guendanagana. Óraca nga rabi Jiobá laanu: «Guluu xpiaanuʼ xiiñehuiineʼ ne bisiecheʼ ladxiduáʼ, ti ganda guicabeʼ ni cayuni burla naa» (Proverbios 27:11).

10. Ximodo zanda chinándanu ejemplu stiʼ Jesús ora gápanu guendanagana.

¹⁰ Guiníʼ íquenu xi zabeendunu pa guni huantarnu. Bixuiʼlú cayúniluʼ ti viaje ne napa xidé tiidiluʼ ndaaniʼ ti túnel guizáʼ ziuulaʼ. Nabé nacahui ndaaniʼ ni. Peru nánnaluʼ ti cosa, pa guni seguirluʼ la? zuuyaluʼ biaaniʼ sti biaje ra guiluxe túnel que. Zacaca nga guendanabani stinu. Zándaca ziuu ora zadídinu ra nagana ne ziuʼnu xizaa. Dede Jesús laaca biʼniʼ sentir zacá. Ora bicaacabe laabe lu madero que para gátibe, bisituícabe lube ne bininácabe laabe stale. Ngue nga ca cosa ni jma triste gudíʼdibe lu xquendanabánibe. Xi gucané laabe para biʼniʼ huantarbe yaʼ. Biblia na biʼniʼ huantarbe «purti nanna be nabé zieche be ora ma udiʼdi be ni» (Hebreos 12:2, 3). Jma bicaa ique Jesús ca cosa ni zabeendú pa guni huantar, tobi de laani nga zacanebe guiá lá Dios ne zusihuínnibe Jiobá si nga napa derechu para guni mandar. Nánnabe zaluxe prueba cadíʼdibe, peru qué ziuu dxi guiluxe premiu nuu para laabe guibáʼ. Ora gápanu guendanagana la? chinándanu ejemplu stiʼ Jesús. Ximodo yaʼ. Ra guiníʼ íquenu guiráʼ ca cosa galán zabeendunu ne guietenaláʼdxinu zadxiña dxi zaluxe ca guendanagana stinu.

11. Xiñee galán gunibiaʼnu ca xpinni Dios ni maʼ gudiʼdiʼ ra nagana.

¹¹ Nuu stale xpinni Dios ni maʼ biʼniʼ huantar cásica laanu. Ca dxi bibani apóstol Pedru que, nabé bicaalú Binidxabaʼ ca xpinni Cristu. Ngue runi gudxi Pedru laacabe: «Lauzuhuaa dxiichi lu ni runi cre tu, ne laucaa lú laabe, purti nanna tu cadi laasi tu cadiʼdi tu ni, sínuque zacaca cayacaná ca hermanu stitu ni nuu irá ladu» (1 Pedro 5:9). Nga runi, galán gunibiaʼnu cani maʼ gudiʼdiʼ ra nagana. Zacané ejemplu stícabe laanu para guzúʼbanu diidxaʼ, para gudiʼnu cuenta zanda guni huantarnu ne para guietenaláʼdxinu zudii Jiobá laanu premiu pa qué guixélenu de laa (Santiago 5:11). Guidúʼyanu ejemplu stiʼ caadxi xpinni Dios ni biʼniʼ huantar. ^[1]

12. Xi rusiidiʼ ejemplu stiʼ ca querubín ni gupa Edén que laanu.

 ¹² Ca querubín. Nabé risaca puestu napa ca ángel riʼ. Dxi bichee Adán ne Eva que, biseendaʼ Jiobá caadxi querubín ndaaniʼ Guidxilayú para gúnicaʼ ti dxiiñaʼ ni qué huayuu dxi gúnicaʼ guibáʼ. Ejemplu stícabe racané laanu para guni huantarnu ora guicaanu ti asignación nagana. Biblia na bizuhuaa Jiobá querubín «neza ra rindani gubidxa stiʼ jardín de Edén que, ne guluube ti espada naze bele ni cudii bieque ti cadi guidxiña guirutiʼ ra nuu yaga ni rudii guendanabani» (Génesis 3:24). ^[2] Qué riníʼ diʼ Biblia pa gudicheruaa ca querubín que o pa guniʼcaʼ huaxiéʼ risaca asignación que para laacaʼ. Qué nireecabe gana ne qué nusaanacabe dxiiñaʼ bidii Dios laacabe. Biaanacabe lu asignación que dede ora biluxe ni. Zándaca biaana ca querubín riʼ raqué dede ora biaba nisaguié naroʼbaʼ que, 1,600 iza despué.

13. Xi gucané Job guni huantar guiráʼ yuubaʼ stiʼ.

¹³ Job, ti hombre ni bizuubaʼ diidxaʼ. Zándaca ziuu ora zareʼnu gana purtiʼ biʼniʼ ti xhamígunu o ti binnilídxinu laanu xiixa ni bininá laanu. O zándaca nabé huaranu o cayuubaʼ ladxidoʼno purtiʼ guti ti binni ni nabé nadxiinu. Neca cadídinu ca yuubaʼ ca, zanda quixhedxí ejemplu stiʼ Job ladxidoʼno (Job 1:18, 19; 2:7, 9; 19:1-3). Qué ñanna diʼ Job xiñee málasi bizulú cadiʼdiʼ lu stale guendanagana. Peru qué ñuu dxi nireebe gana. Xi gucané Job para gunda biʼniʼ huantar yaʼ. Nuu chupa cosa ni gucané laabe. Primé, gunnaxhiibe Jiobá ne bidxíbibe ñúnibe xiixa ni qué riuulaʼdxiʼ (Job 1:1). Gudixhe íquebe gúnibe ni na Jiobá, neca tiidibe ra jma nagana. Ne guiropa, gudxi Jiobá laabe ximodo bizáʼ guiráʼ ni nuu para guietenaláʼdxibe pabiáʼ naroʼbaʼ poder stiʼ. Jmaruʼ si bicaa ndiʼ Job ganna zabee Jiobá ca yuubaʼ cadiʼdiʼ ora guʼyaʼ maʼ naquiiñeʼ cuee cani (Job 42:1, 2). Ne zaqué nga guca ni. Gulee Jiobá guiráʼ yuubaʼ stiʼ Job ne bidii laabe doble de ni binítibe. Biaʼ tiempu bibani Job despué, nabé guyuu nayecheʼ (Job 42:10, 17).

14. Casi na 2 Corintios 1:6, ximodo gucané ejemplu stiʼ Pablu xcaadxi hermanu para biʼniʼ huantarcaʼ.

¹⁴ Apóstol Pablu. Zándaca nuu de laanu cucaalúcabe laa o canazanándacabe laa purtiʼ cayuni ni na Jiobá. Pa ancianu laanu o pa nácanu superintendente de circuito, zándaca ziuu ora zuni sentirnu maʼ bidxáganu purtiʼ nápanu stale dxiiñaʼ. Pa zacá nuunu la? zanda gacané ejemplu stiʼ Pablu laanu. Nabé bininácabe laabe dxi guzanándacabe laabe. Ne laaca nabé guyuube xizaa pur ca hermanu stibe (2 Corintios 11:23-29). Peru qué ñuu dxi nireebe gana, ne gucané  ejemplu sicarú stibe xcaadxi para gunda biʼniʼ huantarcaʼ (biindaʼ 2 Corintios 1:6). Pa guni huantarnu la? zacané ejemplu stinu xcaadxi hermanu ti ganda guni huantarcaʼ.

15, 16. a) Xi ribeendunu ora runi huantarnu. b) Bizeeteʼ chupa ejemplu ni rusihuinni riniisinu lu stiidxaʼ Dios ora runi huantarnu.

¹⁵ Gudxi Jiobá discípulo Santiagu gucaa ca diidxaʼ riʼ: «Lauyubi iziidi tu uzuhuaa chaahui tu sin ixhacalaʼdxi tu, intiica gueeda. Zacá zaniisi tu lu stiidxa Dios. Ziene chaahui tu ni na, ne zuni tu ni» (Santiago 1:4). Racá ridúʼyanu guníʼ Santiagu naquiiñeʼ guni huantarnu ti guiniisinu lu «stiidxa Dios». Ximodo nga yaʼ. Ora cadídinu lu ti guendanagana la? zándaca gudiʼnu cuenta caquiiñeʼ gápanu jma paciencia, gannaxhiinu binni jma o gusisácanu ca cosa galán nápanu. Pa guni huantarnu la? zazíʼdinu gusihuínninu ca guenda riʼ jma jneza ne zácanu binni ni nabani modo riuulaʼdxiʼ Cristu.

¹⁶ Ora runi huantarnu la? racané ni laanu gácanu binni ni nabani modo riuulaʼdxiʼ Cristu, nga runi qué racaláʼdxinu guchéʼnenu ca ley stiʼ Dios para si guiluxe ca guendanagana stinu. Quíxhenu chupa ejemplu. Primé, xi gúninu pa cayaca nagana para laanu gusaana de guiníʼ íquenu xiixa cosa dxabaʼ yaʼ. Naquiiñeʼ guinábanu Jiobá gacané laanu guiree cosa malu riʼ ndaaniʼ íquenu ti cadi gucheʼnu. Guiropa, xi gúninu pa nuu ti binnilídxinu ni nabé rucaalú laanu purtiʼ nácanu testigu stiʼ Jiobá yaʼ. Cadi guireʼnu gana, naquiiñeʼ gucáʼ íquenu cadi gusaana de gúninu ni na Jiobá. Zacané nga laanu gápanu jma confianza Jiobá. Cadi guiaandaʼ laanu naquiiñeʼ guni huantarnu pa racaláʼdxinu guiechené Jiobá laanu (Romanos 5:3-5; Santiago 1:12).

17, 18. a) Biquiiñeʼ ti ejemplu para gusiéneluʼ xiñee risaca guni huantarnu dede ora gueeda fin. b) Laga maʼ zeeda dxiña dxi gueeda fin, xi nanna dxíchinu zuni Jiobá pur laanu.

¹⁷ Nabé risaca guni huantarnu dede hora gueeda fin, cadi ti tiempu si. Guzéʼtenu ejemplu stiʼ ti barcu ni maʼ cayaaziʼ. Pa racalaʼdxiʼ ca binni zeʼ ndaaniʼ ni guilacaʼ la? naquiiñeʼ xhúʼbacaʼ sin guidxágacaʼ dede guireecaʼ ra nabidxi. Zacaca nga laanu, pa racaláʼdxinu chuʼnu ndaaniʼ Paraísu la? naquiiñeʼ guni huantarnu dede ora gueeda fin ne qué chuʼ dxi guidxáganu. Napa xidé guininu casi guníʼ apóstol Pablu: «Qué riréʼ du gana» (2 Corintios 4:1, 16).

¹⁸ Cásica Pablu, runi crenu zacané Jiobá laanu guni huantarnu dede ora gueeda fin. Pablu bicaa: «Neca gueeda irá nga luguiá nu, qué zanda di usaba ni laanu, purti nadxii Cristu laanu. Nanna dxiʼche gasti zanda uxhele laanu de Dios ni nadxii laanu: nin enda guti, nin enda nabani, nin ángel, nin binidxabaʼ, nin ni riduʼya nu yanna riʼ, nin ni gueeda ruʼ, nin ni nuu ibáʼ, nin ni nuu xagueteʼ, nin gasti ru de irá ni bizáʼ Dios qué zanda uxhele laanu de Dios ni nadxii laanu, purti bisihuinni be pabiáʼ nadxii be laanu pur ni biʼni Jesucristu Señor stinu» (Romanos 8:37-39). Ora guni sentirnu maʼ cadxáganu la? cadi chuʼnu triste. Naquiiñeʼ chinándanu ejemplu stiʼ Gedeón ne ca soldadu stiʼ. Dxandíʼ maʼ bidxágacabe, peru qué nireecabe gana (Jueces 8:4). Ñee zinándaluʼ ejemplu stícabe la?