Riechené Jiobá ca xpinni ni napa fe laa
«Laguni casi cani ma napa ni bidii stiidxa Dios udii binni. Cacaa cabe ni purti runi cre cabe ne cadi caree cabe gana» (HEBREOS 6:12).
DIIDXAʼ RIUUNDAʼ: 11 NE 54
1, 2. Xi guendanagana bidxaagalú Jefté ne xiiñidxaapaʼ.
CHIGUZÉʼTENU de ti hombre ni guyé lu guerra. Biʼniʼ ganarbe guerra que ne maʼ zedayuube ra lídxibe. Guizáʼ biecheʼ xiiñidxaapabe ora biʼyaʼ laabe, ngue runi bixooñeʼ para guidxaagalú laabe, bizulú cayuundaʼ ne cuyaa . Peru biʼniʼ bixhózebe xiixa ni nabé bidxagayaabe. Gucheza hombre riʼ xhaba para gusihuinni nabé nuu triste ne bicaa ridxi: «¡Ay, xiiñeʼ! Maʼ gundaaluʼ ladxiduáʼ». Bisiénebe xiiñidxaapabe gúdxibe Jiobá chigúnibe xiixa para laa. Ne pur ni bidii stiidxabe riʼ, qué zachaganáʼ baʼdudxaapaʼ riʼ ne qué zapa xiiñiʼ. Xi biʼniʼ xiiñibe yaʼ. Oraqueca guníʼ zuni ni bidii stiidxaʼ bixhoze. Né ni guníʼ baʼdudxaapaʼ riʼ bisihuinni nanna qué ziuu dxi guinabaʼ Jiobá laa guni xiixa cosa malu (Jueces 11:34-37). Bidxátipa ladxidóʼ hombre riʼ ora biʼyaʼ pabiáʼ naroʼbaʼ fe napa xiiñiʼ. Nánnabe ziechené Jiobá xiiñibe pur ni maʼ gudixhe ique guni.
2 Jefté ne xiiñidxaapaʼ nga ca binni cuzéʼtenu raríʼ. Nabé gúpacabe confianza Jiobá ne gúnnacabe jneza guiráʼ ni runi. Neca gudíʼdicabe ra jma nagana, bisihuínnicabe nápacabe fe Jiobá. Cumu racaláʼdxicabe uguu Jiobá ndaayaʼ laacabe la? gudixhe íquecabe gúnicabe intiica sacrificiu para laani.
3. Ximodo zanda gacané ejemplu stiʼ Jefté ne xiiñidxaapaʼ laanu.
Judas 3). Para ganda gúninu nga la? lu tema riʼ zadúʼyanu ximodo biʼniʼ huantar Jefté ne xiiñidxaapaʼ ca guendanagana gúpacaʼ ne ximodo bisihuínnicaʼ naguidxi fe sticaʼ.
3 Nuu tiru raca nagana para tuuxa gusihuinni pabiáʼ naguidxi fe stiʼ. Nga runi, naquiiñeʼ gudxíʼlunu né guiráʼ stipa stinu ti cadi guirá fe stinu (GUCA FE STÍCABE NAGUIDXI NECA GUYUUCABE LADE BINNI QUÉ RUZUUBAʼ DIIDXAʼ
4, 5. a) Xi gudxi Jiobá ca israelita que gúnicaʼ ora guiuucaʼ lu Layú ni Bizabiruaa Dios. b) Casi na Salmo 106, xi guleendú ca israelita pur qué nuzuubacaʼ stiidxaʼ Dios.
4 Guiráʼ dxi bietenalaʼdxiʼ Jefté ne xiiñidxaapaʼ guiráʼ cosa malu guleendú ca israelita pur qué nuzuubacaʼ stiidxaʼ Jiobá. Biaʼ 300 iza ante guiuu ca israelita lu Layú ni Bizabiruaa Dios gudii laacaʼ, biʼniʼ mandar Jiobá laacaʼ guuticaʼ guiráʼ binni runi adorar ca dios falsu nuu raqué. Peru qué nuzuubaʼ ca israelita diidxaʼ (Deuteronomio 7:1-4). Ra gudiʼdiʼ tiempu, bizulú biʼniʼ adorar stale de laacaʼ ca dios falsu que ne guyuunecaʼ ni cadi xheelacaʼ, cásica runi ca binni de Canaán. Biblia na: «Ne bizulú [bidaaguʼ ca israelita] ca guidxi que, ne yenándacaʼ ni rúnicabe. Ne qué nusaana de ñuni adorarcaʼ ca bidóʼ stícabe, ne beeda gaca ngue ti trampa para laacaʼ. Ne guca biidiʼ xquendanabánicaʼ pur cani bíʼnicaʼ, ne guyuunecaʼ ni cadi xheelacaʼ ora biʼniʼ adorarcaʼ ca dios stícabe» (Salmo 106:35, 36, 39).
5 Cumu qué nuzuubaʼ ca israelita diidxaʼ la? qué ñapa diʼ Jiobá laacaʼ ora bicaalú ca enemigu sticaʼ laacaʼ (Jueces 2:1-3, 11-15; Salmo 106:40-43). Nanna dxíchinu guca nagana para ca familia ni nadxii Jiobá gusihuínnicaʼ pabiáʼ naroʼbaʼ fe sticaʼ ca dxi nagana que. Peru Biblia ruzeeteʼ de caadxi israelita ni gudixhe ique guni guiráʼ ni gusiecheʼ ladxidóʼ Jiobá. Casi Jefté ne xiiñidxaapaʼ, laaca guyuu Elqaná, Ana ne Samuel (1 Samuel 1:20-28; 2:26).
6. a) Xii nga ca cosa ni nabé rucaa guidxilayú riʼ binni guni. b) Xi naquiiñeʼ gucáʼ íquenu gúninu.
6 Yanna riʼ nuu stale binni ni nabani cásica bibani ca binni de Canaán. Ca binni riʼ nisi maʼ caníʼ íquecaʼ de sexo, de guendaridinde ne gápacaʼ bueltu. Peru Jiobá rabi laanu chuʼnu cuidadu. Laabe racaláʼdxibe gápabe laanu cásica gúpabe ca israelita, ti qué chuuláʼdxinu ca cosa malu runi binni guidxilayú. Yanna yaʼ, ñee zúninu stipa pur cadi chinándanu ejemplu stiʼ ca israelita ni bichee riʼ la? (1 Corintios 10:6-11). Naquiiñeʼ gúninu stipa ti cadi chinándanu modo nabani binni guidxilayú (Romanos 12:2).
GUCA FE STIʼ JEFTÉ NAGUIDXI NECA GUCA XIIXA NI CADI CABEZA
7. a) Ximodo biʼniʼ tratar binni xquidxi Jefté laa. b) Ñee bidxiichi Jefté pur ni bíʼnicabe laa la?
7 Tiempu bibani Jefté que, nabé bicaalú ca enemigu stiʼ ca israelita laacaʼ purtiʼ qué nuzuubacaʼ stiidxaʼ Jiobá (Jueces 10:7, 8). Peru cadi ngue si, laaca gupa Jefté guendanagana né ca biʼchiʼ ne ca ancianu stiʼ Israel. Guca nanaláʼdxicabe laabe ne bidxiichinécabe laabe. Ngue runi, guládxicabe laabe ne gúxhacabe laabe ca layú stibe (Jueces 11:1-3). Peru qué nidaabe xiana pur ca cosa malu biʼniʼ ca israelita. Xiñee nánnanu ni yaʼ. Purtiʼ dxi gunabaʼ ca ancianu stiʼ guidxi Israel laabe gacanebe laacaʼ, bíʼnibe ni de guidubi ladxidoʼbe (Jueces 11:4-11). Xiñee bíʼnibe zaqué yaʼ.
8, 9. a) Ximodo gucané Ley ni gucuaa Moisés que Jefté. b) Xii nga ni jma bisisaca Jefté.
8 Guca Jefté ti hombre ni nabé nanna tinde ne laaca binibiáʼ chaahuiʼ hombre riʼ historia stiʼ Israel ne Ley ni gucuaa Moisés. Ra bíʼyabe modo runi tratar Jiobá xquidxi, biziidibe xii nga ni jneza ne ni cadi jneza Jueces 11:12-27). Ne biquiiñebe guiráʼ ni nánnabe para quixhe íquebe gúnibe ni jneza lu xquendanabánibe. Laabe nánnabe qué riuulaʼdxiʼ Jiobá guquíxecabe ni guni stobi laacabe, sínuque rinabaʼ Dios gannaxhiisaacabe. Ne laaca biziidibe lu Ley que ximodo naquiiñeʼ guni tratarbe sti binni, dede né cani nanalaʼdxiʼ laabe. Biblia na: «Cadi gacananaláʼdxiluʼ bíʼchiluʼ ndaaniʼ ladxidoʼloʼ. Naquiiñeʼ gulídxeluʼ xcompañéruluʼ, ti cadi guaneluʼ laabe pecadu stibe. Cadi guquíxeluʼ ni guni tuuxa binni xquídxiluʼ lii ne cadi gapuʼ xiana laabe; ne napa xidé gannaxhiiluʼ sti binni cásica nadxiiluʼ lii. Naa nga Jiobá» (Levítico 19:17, 18).
(9 Sti cosa ni zándaca gucané Jefté nga ejemplu stiʼ José. Nánnabe guca nanalaʼdxiʼ ca biʼchiʼ José laa, neca zaqué biaʼ José laacabe (Génesis 37:4; 45:4, 5). Zándaca guníʼ ique Jefté ni biʼniʼ José, ne gucané ni laa guni ni riuulaʼdxiʼ Jiobá. Nabé gucaná Jefté pur ni biʼniʼ ca biʼchiʼ laa, peru qué nizaalaʼdxiʼ ni. Para laabe la? ni jma risaca nga guisaca lá Jiobá ne gacanebe guilá xquidxi (Jueces 11:9). Ni racalaʼdxiʼ Jefté nga gusihuinni napa fe Jiobá. Ngue runi guluu Dios ndaayaʼ laabe ne laaca guluu ndaayaʼ guidubi guidxi que (Hebreos 11:32, 33).
10. Ximodo racané ca principiu zeeda lu Biblia laanu gúninu ni naquiiñeʼ guni ti xpinni Cristu.
10 Ximodo zanda chinándanu ejemplu stiʼ Jefté yaʼ. Guiníʼ íquenu ndiʼ: xi gúninu pa gucheené ti hermanu laanu o pa ruluíʼ cadi galán modo runi tratarbe laanu. Naquiiñeʼ gúninu cásica biʼniʼ Jefté ne iquiiñenu ca principiu ni zeeda lu Biblia para gánnanu xi zanda gúninu. Qué chuʼ dxi gusaana de gúninu ni na Jiobá purtiʼ si naná nuu ladxidoʼno. Ne cadi gusaana de chuunu ca reunión ne cueenu tiempu para guidxaaganu ca hermanu. Naquiiñeʼ guzúʼbanu stiidxaʼ Jiobá. Pa gúninu zacá, zanda gudxíʼlunu ca guendanagana stinu ne zudiʼnu ti ejemplu galán xcaadxi (Romanos 12:20, 21; Colosenses 3:13).
CA SACRIFICIU NI RUSIHUINNI PABIÁʼ NAGUIDXI FE STINU
11, 12. a) Xi promesa biʼniʼ Jefté. b) Xi naquiiñeʼ gúnibe para gaca ni bidii stiidxabe.
11 Nanna Jefté caquiiñeʼ gacané Dios laa para ganda gulá guidxi Israel de ca enemigu stiʼ. Ngue runi bíʼnibe ti voto Jiobá. Guniʼbe zudiibe Dios primé binni guidxaagalú laabe pa gacané laabe guni ganarbe ca enemigu stibe. Guníʼ Jefté zudii binni riʼ casi «ofrenda ni riaʼquiʼ» (Jueces 11:30, 31). Xii ndiʼ caniʼbe yaʼ.
12 Cadi caníʼ diʼ Jefté zuuti primé binni gueeda guidxaagalú laa. Xiñee rininu zacá yaʼ. Purtiʼ nánnabe qué lica riuulaʼdxiʼ Jiobá guuticabe binni para gudiicabe ti sacrificiu (Deuteronomio 18:9, 10). Tiempu que, ora chigudii ca israelita xiixa nabé risaca Jiobá la? rudiicaʼ ti ofrenda ni riaʼquiʼ. Nga runi, zanda guiénenu caníʼ Jefté zudii ti binni para guni ni na Jiobá ndaaniʼ tabernáculo que biaʼ dxi guibani. Guyuulaʼdxiʼ Jiobá promesa biʼniʼ Jefté ne gucané laabe guni ganarbe ca enemigu stibe (Jueces 11:32, 33). Peru, tuu nga binni chigudii Jefté casi ti regalu para Dios yaʼ.
13, 14. Ximodo racané Jueces 11:35 laanu gánnanu pabiáʼ naroʼbaʼ fe stiʼ Jefté.
13 Casi bidúʼyanu lu primé párrafo stiʼ tema riʼ, primé binni bidxaagalú Jefté nga xiiñidxaapaʼ, tobi lucha xiiñibe, ne guizáʼ nadxiibe laa. Yanna yaʼ, xi guni Jefté. Ñee zúnibe ni bidii stiidxabe Jiobá la? Ñee zudiibe xiiñidxaapabe para chiguni ni na Jiobá ndaaniʼ tabernáculo biaʼ dxi guibani la?
14 Laaca gucané ca principiu ni zeeda lu Ley stiʼ Dios que Jefté para ganna xi guni. Zándaca bietenaláʼdxibe na Ley que naquiiñeʼ gudii ca israelita ca cosa ni jma galán nápacaʼ para Jiobá (Éxodo 23:19). Laaca bietenaláʼdxibe xiná Ley que naquiiñeʼ guni tuuxa ora guni ti voto. Ley que na: «Naquiiñeʼ guni ni maʼ guníʼ. Naquiiñeʼ gúnibe guiráʼ ni maʼ bidii stiidxabe gúnibe» (Números 30:2). Ngue runi biʼniʼ Jefté cásica biʼniʼ Ana, ti gunaa ni zándaca bibani tiempu stibe, bíʼnibe ni bidii stiidxabe neca nánnabe zaca ni nagana para laabe ne para xiiñidxaapabe. Yanna, cumu maʼ chiguni baʼdudxaapaʼ riʼ ni na Jiobá ndaaniʼ tabernáculo que biaʼ dxi guibani la? qué zachaganáʼ ne qué zapa xiiñiʼ. Pur nga maʼ qué zadale familia stiʼ Jefté ne qué ziuu tu guiaanané ca layú stiʼ (Jueces 11:34). Neca zaqué, guníʼ Jefté: «Maʼ bidieeʼ stiidxaʼ Jiobá, ne qué zanda diʼ cueʼ saʼyaʼ» (Jueces 11:35). Racané ca diidxaʼ riʼ laanu gudiʼnu cuenta pabiáʼ naguidxi fe stiʼ Jefté. Guyuulaʼdxiʼ Jiobá sacrificiu bíʼnibe ne guluu ndaayaʼ laabe. Ñanda ñaca fe stiluʼ naguidxi cásica stiʼ Jefté la?
15. a) Xi bidii stiidxanu Jiobá dxi bidiʼnu xquendanabáninu laa. b) Ximodo zanda gusihuínninu nápanu fe cásica gupa Jefté.
15 Dxi bidiʼnu xquendanabáninu Jiobá la? bidii stiidxanu ti cosa: ni jma risaca para laanu nga gúninu ni riuuláʼdxibe. Nánnanu ziuu ora zaca ni nagana para laanu. Peru, xi rúninu ora rinabaʼ Jiobá laanu gúninu xiixa ni qué riuuláʼdxinu yaʼ. Pa nápanu fe cásica gupa Jefté la? zusihuínninu ni ora gúninu ni bidii stiidxanu ne zuzúʼbanu diidxaʼ de guidubi ladxidoʼno. Nuu tiru nadipaʼ ca sacrificiu rúninu, peru nánnanu jma stale ndaayaʼ rudii Dios laanu (Malaquías 3:10). Yanna, xi gúcaxa né xiiñidxaapaʼ Jefté que yaʼ. Xi bíʼnibe ora gúnnabe ni bidii stiidxaʼ bixhózebe.
Ximodo zanda gusihuínninu naguidxi fe stinu cásica ni gupa Jefté ne xiiñidxaapaʼ. (Biiyaʼ párrafo 16 ne 17).
16. Xi biʼniʼ xiiñidxaapaʼ Jefté ora gunna xi promesa biʼniʼ bixhoze. (Biiyaʼ dibuju zeeda ra ruzulú tema riʼ).
16 Gadxé nga voto biʼniʼ Jefté ne gadxé nga voto biʼniʼ Ana. Gunaa riʼ bidii stiidxaʼ zudii hombrehuiiniʼ stiʼ para guni ni na Dios ndaaniʼ tabernáculo casi ti nazareu (1 Samuel 1:11). Ca nazareu que randa richaganacaʼ ne rápacaʼ xiiñicaʼ. Peru xiiñidxaapaʼ Jefté riʼ qué zanda guichaganáʼ ne qué zapa xiiñiʼ, purtiʼ bidii bixhózebe laabe casi ti «ofrenda ni riaʼquiʼ» (Jueces 11:37-40). Guiníʼ íquenu ndiʼ: laabe nga xiiñidxaapaʼ xaíque stiʼ guidxi Israel, ngue runi ñándaca nichaganabe ti hombre nabé risaca nuu ndaaniʼ guidxi que. Peru yanna maʼ chiguni baʼdudxaapaʼ riʼ dxiiñaʼ ndaaniʼ tabernáculo, ti dxiiñaʼ ni ruluíʼ huaxiéʼ risaca para xcaadxi. Xi bíʼnibe yaʼ. Gúdxibe bixhózebe xiixa ni bisihuinni jma risaca para laabe gúnibe ni na Dios: «Bixhozeʼ, pa maʼ bidii stiidxaluʼ Jiobá, biʼniʼ ni maʼ guniʼluʼ» (Jueces 11:36). Biʼniʼ baʼdudxaapaʼ riʼ ti sacrificiu naroʼbaʼ, purtiʼ neca ñuuláʼdxibe nichaganabe ne ñápabe xiiñibe, gudixhe íquebe gúnibe ni na Jiobá. Ximodo zanda chinándanu ejemplu stibe yaʼ.
17. a) Xi zanda gúninu ti gápanu fe cásica gupa Jefté ne xiiñidxaapaʼ. b) Xiñee riguu textu stiʼ Hebreos 6:10-12 gana lii.
17 Ximodo zanda gápanu fe cásica gupa Jefté ne xiiñidxaapaʼ yaʼ. Yanna riʼ, nuu mil de Testigu ni zinanda ejemplu stiʼ xiiñiʼ Jefté, riguixhe íquecaʼ chuʼcaʼ stúbicaʼ neca ti tiempu, nga runi qué richaganacaʼ o qué rápacaʼ xiiñicaʼ. Xiñee yaʼ. Purtiʼ cá íquecabe gúnicabe jma lu xhiiñaʼ Jiobá. Laaca nuu stale hermanu ni maʼ huaniisi ni runi xcaadxi sacrificiu. Lugar de ñuunécabe ca xiiñicabe o ca xhiágacabe, riquiiñecabe tiempu ne stipa stícabe para gúnicabe ni na Jiobá. Caadxi de laacabe rigacané lade ca grupu de construcción. Xcaadxi rié Scuela para cani rucheeche stiidxaʼ Reinu ne rigacanecaʼ ndaaniʼ ca congregación ni caquiiñeʼ binni para gucheeche diidxaʼ. Xcaadxi riguixhe chaahuicaʼ tiempu sticaʼ ti ganda gucheechecaʼ diidxaʼ jma ora mayaca guietenaláʼdxinu guendaguti stiʼ Jesús. Qué ziuu dxi gusiaandaʼ Jiobá guiráʼ sacrificiu ni runi ca xpinni pur nadxiicaʼ laabe (biindaʼ Hebreos 6:10-12). Yanna, lii yaʼ. Ñee zanda guʼnuʼ intiica sacrificiu ti ganda guʼnuʼ ni na Jiobá jma la?
XI MAʼ BIZÍʼDINU
18, 19. a) Xi maʼ bizíʼdinu de Jefté ne xiiñidxaapaʼ. b) Ximodo zanda chinándanu ejemplu stícabe.
18 Zanda guizíʼdinu stale cosa de ejemplu stiʼ Jefté ne xiiñidxaapaʼ. Guzéʼtenu caadxi. Primé, biyúbibe xi racalaʼdxiʼ Jiobá ante quixhe íquebe gúnibe xiixa. Guiropa, qué ñuu dxi nudiibe lugar nicá modo riníʼ ique ca binni xquídxibe laabe. Guionna, bisihuínnibe pabiáʼ naguidxi fe stibe neca bíʼnicabe laabe xiixa ni cadi cabézabe. Ne dxi maʼ qué nuzuubaʼ caadxi binni stiidxaʼ Dios, laabe ne xiiñidxaapabe bisihuínnicabe pabiáʼ naguidxi fe stícabe. Guluu Jiobá ndaayaʼ Jefté ne xiiñidxaapaʼ pur ca sacrificiu ni bíʼnicaʼ. Ne laaca biquiiñeʼ Jiobá laacabe para gacanécabe xcaadxi binni guni adorar Dios.
19 Biblia na: «Laguni casi cani ma napa ni bidii stiidxa Dios udii binni. Cacaa cabe ni purti runi cre cabe ne cadi caree cabe gana» (Hebreos 6:12). Nga runi, chinándanu ejemplu stiʼ Jefté ne xiiñidxaapaʼ ne cadi gusaana de gusihuínninu naguidxi fe stinu. Guietenaláʼdxinu riechené Jiobá ca binni ni napa fe laa.