1, 2. a) Xiñee rábiluʼ cadi guendariguite nga chúʼnisa binni. b) Xi naquiiñeʼ guʼyaʼ chaahuiluʼ ante chuʼnísaluʼ.

ÑEE lii nga tobi de ca hombrehuiiniʼ o dxaapahuiiniʼ ni racalaʼdxiʼ chúʼnisa la? Chúʼnisa binni nga tobi de ca ndaayaʼ ni jma galán. Casi bidúʼyanu lu tema gudiʼdiʼ que, cadi guendariguite diʼ ni. Ora chuʼnísaluʼ la? cusihuínniluʼ nezalú xcaadxi binni maʼ bidiiluʼ xquendanabániluʼ Jiobá. Maʼ gúdxiluʼ Dios zúniluʼ ni na ne ndiʼ nga ni jma risaca lu xquendanabániluʼ. Cumu cadi guendariguite ni la? ante chuʼnísaluʼ naquiiñeʼ gánnaluʼ pa maʼ biniisiluʼ lu stiidxaʼ Dios, pa dxandipeʼ racaláʼdxiluʼ chuʼnísaluʼ ne pa riene chaahuiluʼ xii nga gudiiluʼ lii Dios.

² Ñee rábiluʼ maʼ nuuluʼ listu para chuʼnísaluʼ la? Zándaca guiníʼ íqueluʼ caʼruʼ chuʼluʼ listu. O zándaca guni sentirluʼ maʼ nuuluʼ listu, peru bixhózeluʼ ne jñaaluʼ rábicaʼ lii cuézaluʼ dede ora maʼ biniisiluʼ xcaadxi ne ora maʼ biziidiluʼ jma. Peru cadi guireeluʼ gana. Biʼniʼ stipa pur guʼnuʼ ca cosa ca jneza ti ganda chuʼluʼ listu para chuʼnísaluʼ. Tema riʼ cuzeeteʼ chonna cosa ra zanda guʼyuʼ ximodo nuuluʼ. Primé, ca cosa ni runi creluʼ. Guiropa, ca cosa ni rúniluʼ. Ne guionna, ni runi sentirluʼ pur Jiobá.

3, 4. Xi zanda guiziidiluʼ de ejemplu stiʼ Timoteu.

³ Gunabadiidxaʼ ca ndiʼ laca lii: «Xiñee runeʼ cré nuu Dios. Xiñee nuaaʼ seguru zeeda Biblia de Dios. Xiñee runeʼ ni na ca ley stiʼ Dios lugar de ñuneʼ ni na binni guidxilayú». Pa gúniluʼ zacá la? zacané cani lii chinándaluʼ conseju stiʼ apóstol Pablu riʼ: «Zacá zanna tu xii nga racalaʼdxi Dios guni tu, ni nachaʼhui ne ni chuʼlaʼdxiʼ ne ni jneza peʼ» (Romanos 12:2). Ca diidxaʼ riʼ riníʼcani liipeʼ nga naquiiñeʼ chuʼluʼ seguru de ti cosa: ni jma jneza para lii nga guʼnuʼ ni na Dios. Xiñee naquiiñeʼ guʼnuʼ ni yaʼ.

⁴ Guníʼ ique ejemplu stiʼ Timoteu. Laabe nanna dxíchibe xi guiráʼ rusiidiʼ Stiidxaʼ Dios purtiʼ bisiidiʼ jñaabe ne jñaabiidabe cani laabe. Peru Pablu guníʼ: «Qué chi undaa lu ni ma biziidi luʼ, ni nanna dxichi lu dxandíʼ» (2 Timoteo 3:14, 15). Ora guníʼ Pablu nanna dxichi Timoteu ni dxandíʼ, caniʼbe nuu Timoteu seguru dxandíʼ cani rusiidiʼ Stiidxaʼ Dios. Peru, xiñee nuube seguru yaʼ. Ñee purtiʼ gudxi jñaabe ne jñaabiidabe laabe dxandíʼ ni la? Coʼ. Ni biʼniʼ Timoteu nga guníʼ ique lu guiráʼ ni maʼ biziidiʼ ne bidii cuenta dxandíʼ cani (biindaʼ Romanos 12:1).

5, 6. Xiñee risaca guiziidiluʼ dédeca yanna guiníʼ íqueluʼ lu cani maʼ nannuʼ.

⁵ Zándaca laaca maʼ xadxíhuiiniʼ nga de biziidiluʼ ni rusiidiʼ Biblia. Pa zacá ni, biʼniʼ casi Timoteu ne guníʼ ique xiñee runi creluʼ cani runi creluʼ. Pa gúniluʼ nga zaca fe stiluʼ jma naguidxi, ne qué zúniluʼ ni gucaa ca xcompañéruluʼ lii nin ni na sti binni ne laaca qué zúniluʼ ni racaláʼdxiluʼ.

⁶ Nabé risaca guiziidiluʼ guiníʼ íqueluʼ lu guiráʼ ni maʼ nannuʼ ne gudiiluʼ cuenta dxandíʼ cani. Xiñee yaʼ. Purtiʼ zacá zanda guicábiluʼ ni guinabadiidxaʼ ca xcompañéruluʼ lii, casi pa guiniʼcaʼ: «Xiñee runi creluʼ dxandíʼ nuu Dios. Pa nadxii Dios laanu, xiñee cudiibe lugar cayaca cosa malu. Pa Dios bizáʼ de guiráʼ cosa, tu bizáʼ laabe yaʼ». Ora maʼ riníʼ íqueluʼ lu cani maʼ biziidiluʼ, zacané ca guendarinabadiidxaʼ riʼ lii chuʼluʼ seguru de cani runi creluʼ. Ne zucaacani lii guni estudiarluʼ Biblia jma.

7-9. Bisiene ximodo zanda gacané ca guía de estudiu stiʼ libru Xipeʼ ndiʼ cusiidiʼ Biblia lii para iguidxi fe stiluʼ.

⁷ Pa guni estudiar chaahuiluʼ Biblia la? zanda guicábiluʼ intiica guendarinabadiidxaʼ, guiene chaahuiluʼ ne chuʼluʼ seguru de cani runi creluʼ (Hechos 17:11). Laadu, ca Testigu, nápadu stale publicación ni zanda gacané lii gúniluʼ guiráʼ nga. Stale hombrehuiiniʼ ne dxaapahuiiniʼ huayacané ca publicación riʼ laacaʼ: folletu El origen de la vida ne libru ¿Existe un Creador que se interese por nosotros? Ne stale tu huaquiiñeʼ libru Xipeʼ ndiʼ cusiidiʼ Biblia ni zeeda lu jw.org. Zeedani lu pestaña ra na ENSEÑANZAS BÍBLICAS > JÓVENES. Racá zeeda guía de estudiu ra nuu caadxi tema ni zacané lii guiene chaahuiluʼ guiráʼ ni rusiidiʼ Biblia.

⁸ Cumu maʼ runi estudiarluʼ Biblia la? zándaca maʼ nánnaluʼ guicábiluʼ caadxi guendarinabadiidxaʼ ni zeeda lu guía de estudiu. Peru, ñee nuuluʼ seguru dxandíʼ cani ricábiluʼ luni la? Ca guía de estudiu ca zacané cani lii guiníʼ íqueluʼ né stale cuidadu lu stale textu ni zeeda lu Biblia ne zaguu cani gana lii gucaaluʼ xi pur runi creluʼ cani na Biblia. Ne laaca zacaneni lii gánnaluʼ ximodo gusiéneluʼ ni sti binni. Pa randa riuuluʼ lu ca guía de estudiu riʼ, biquiiñeʼ cani para guni estudiarluʼ ti gacané cani lii gápaluʼ  confianza lu guiráʼ ni maʼ biziidiluʼ de lu Biblia.

⁹ Nabé risaca nga chuʼluʼ seguru dxandíʼ cani maʼ biziidiluʼ de lu Biblia. Zacanécani lii chuʼluʼ listu para chuʼnísaluʼ. Ti baʼdudxaapahuiiniʼ Testigu guníʼ: «Ante quixheʼ iqueʼ chuaanisaʼ, biindaʼ ne bineʼ estudiar Biblia para bidieeʼ cuenta dxandíʼ religión stinneʼ». Laabe riniʼbe, cada dxi tiidiʼ nánnabe dxandíʼ religión stibe.

10. Ti Testigu ni maʼ guyuunisa, xiñee naquiiñeʼ gusihuínnibe lu cani rúnibe dxandíʼ nápabe fe.

¹⁰ Biblia na: «Zacaca nga cani na runi cre peru qué runi jneza. Qué iquiiñe modo runi cre cabe que» (Santiago 2:17). Nga runi, pa nápaluʼ fe ne nuuluʼ seguru de ni runi creluʼ, galán nga gusihuínniluʼ ni lu ca cosa ni rúniluʼ. Zacá zúniluʼ ni na Biblia: «Gácatu binni ni nabani jneza ne gúnitu ni na Dios modo riuulaʼdxiʼ» (2 Pedro 3:11, TNM).

11. Xi riníʼ ca diidxaʼ «gácatu binni ni nabani jneza».

¹¹ Xi riníʼ ca diidxaʼ «gácatu binni ni nabani jneza». Riníʼcani guibani binni nayá. Guzéʼtenu ti ejemplu. Guníʼ ique lu cani maʼ bíʼniluʼ lu ca últimu xhoopaʼ beeu ni maʼ gudiʼdiʼ. Ora bicaacabe lii gúniluʼ xiixa cosa malu, ñee bidiiluʼ cuenta xii nga ni jneza ne cani cadi jneza la? (Hebreos 5:14). Ñee rietenaláʼdxiluʼ bicaanaluʼ xiixa ni biquiinde lii gucheeluʼ o ni bicaa ca xcompañéruluʼ lii guʼnuʼ la? Ñee galán ejemplu stiluʼ ra scuela la? Ñee rúniluʼ ni na Jiobá la? o rúniluʼ ni na ca xcompañéruluʼ para cadi guni búrlacaʼ lii (1 Pedro 4:3, 4). Dxandíʼ, guiranu nga rucheʼnu. Dede cani maʼ ziné stale iza de cayuni ni na Dios, nuu biaje zanda guituílucaʼ gusihuínnicaʼ testigu stiʼ Jiobá laacaʼ. Peru cani maʼ bidii xquendanabani Dios la? naquiiñeʼ gánnacaʼ ti ndaayaʼ nga gaca tobi testigu stiʼ Jiobá ne gusihuinni ni ra gaca xquendanabani nayá.

12. a) Xi riníʼ «gúnitu ni na Dios modo riuulaʼdxiʼ». b) Ximodo naquiiñeʼ guidúʼyanu cani.

¹² Xi riníʼ ca diidxaʼ «gúnitu ni na Dios modo riuulaʼdxiʼ». Laaca riníʼcani de ca cosa ni rúniluʼ ra congregación, casi cheluʼ reunión ne chigucheecheluʼ diidxaʼ. Ne xcaadxi cosa ni rúniluʼ stúbiluʼ, casi guni orarluʼ Jiobá ne gúʼndaluʼ Biblia. Tu maʼ bidii xquendanabani Jiobá la? riuu nayecheʼ ora runi ca cosa riʼ ne qué ruuyabe cani casi ti dxiiñaʼ nadipaʼ. Runi sentir casi biʼniʼ sentir rey David ora guníʼ: «Riecheʼ ora guneʼ ni naluʼ, Dios stinneʼ, ne nuu ca ley stiluʼ ndaaniʼ ladxiduáʼ» (Salmo 40:8).

13, 14. a) Xi zanda gacané lii gúniluʼ «ni na Dios modo riuulaʼdxiʼ». b) Ximodo huayacané cuadru ni zeeda lu libru ca stale de cani nahuiiniʼ.

¹³ Xi zanda gacané lii gúniluʼ ni na Dios modo riuulaʼdxiʼ. Zanda iquiiñeluʼ ni zeeda lu cuadru stiʼ libru Los jóvenes preguntan, volumen 2, yaza 308 ne 309. Luni zanda guicábiluʼ ca guendarinabadiidxaʼ riʼ: «Ñee rinábaluʼ ni jmapeʼ caquiiñeluʼ lu oración stiluʼ la? Pur ni riniʼluʼ lu oración stiluʼ, rusihuínniluʼ nadxiiluʼ Jiobá la?», «Xi libru ruundaluʼ ora maʼ cayuni estudiarluʼ stúbiluʼ» ne «Ñee rigucheecheluʼ diidxaʼ neca qué guiree bixhózeluʼ ne jñaaluʼ la?». Lu ca yaza stiʼ libru ca laaca zanda gucaaluʼ cani naguixhe íqueluʼ gúniluʼ ti guni orarluʼ jma galán, gúʼndaluʼ Biblia stúbiluʼ jma jneza ne gucheecheluʼ diidxaʼ jma galán.

¹⁴ Stale de cani nahuiiniʼ ni rapa gana chúʼnisa riniʼcaʼ nabé huayacané libru riʼ laacaʼ. Ti baʼdudxaapahuiiniʼ Testigu láʼ Tilda na huayacané ca guendarinabadiidxaʼ riʼ laa para quixhe ique ugaanda xiixa.  Laabe guniʼbe: «Chaahuiʼ chaahuiʼ bigaandaʼ cani gudixheʼ iqueʼ ne lu ti iza maʼ guyuaaʼ listu para chuaanisaʼ». Laaca zacagá guníʼ ti hombrehuiiniʼ Testigu láʼ Patrick: «Maca gudixheʼ iqueʼ ugaandaʼ caadxi cosa, peru ora bicaa cani lu guiʼchiʼ jma bineʼ stipa pur ugaandaʼ cani».

15. Xiñee lii nga naquiiñeʼ quixhe íqueluʼ gudiiluʼ xquendanabániluʼ Jiobá.

¹⁵ Sti guendarinabadiidxaʼ ni zeeda lu libru Los jóvenes preguntan nga: «Pa nusaana bixhózeluʼ, jñaaluʼ, o ca xhamíguluʼ xquidxi Jiobá, ñúniruluʼ ni nabe la?». Ora gudiiluʼ xquendanabániluʼ Jiobá ne chuʼnísaluʼ, maʼ lii si nga chigúniluʼ stipa pur gaca xhamíguluʼ laabe. Nga runi, ni gúniluʼ pur Jiobá la? cadi gúniluʼ ni purtiʼ si cayuuyaluʼ cayuni bixhózeluʼ, jñaaluʼ o sti binni ni. Pa guibániluʼ jneza yanna ne gúniluʼ ni na Dios modo riuulaʼdxiʼ, zusihuínniluʼ nuuluʼ seguru dxandíʼ cani runi creluʼ ne racaláʼdxiluʼ guni respetarluʼ ca ley stiʼ Dios. Oracaruʼ nga ziuuluʼ listu para chuʼnísaluʼ.

16, 17. a) Xi naquiiñeʼ gucaa ti binni chúʼnisa ne gaca xpinni Cristu. b) Xi zacané lii gusisácanu guendaguti stiʼ Jesús. Biquiiñeʼ ti ejemplu para gusiéneluʼ ni.

¹⁶ Ti dxi gunabadiidxaʼ ti hombre ni runibiáʼ Ley ni gucuaa Moisés Jesús gunáʼ nga mandamientu ni jma risaca. Jesús guníʼ: «Gunaxhii Dios stiuʼ de idubi ladxidóʼ loʼ ne idubi xhialma luʼ ne idubi xquenda biaani luʼ» (Mateo 22:35-37). Casi maʼ bidúʼyanu, pa racalaʼdxiʼ tuuxa chúʼnisa ne gaca ti xpinni Cristu, naquiiñeʼ gúnibe ni purtiʼ nadxiibe Jiobá. Ximodo zanda gannaxhiiluʼ Jiobá jma yaʼ. Tobi de ca modo ca nga guiníʼ íqueluʼ lu guendaguti stiʼ Jesús (biindaʼ 2 Corintios 5:14, 15 ne 1 Juan 4:9, 19). Pa cueeluʼ tiempu ne guiníʼ íqueluʼ lu ni bisigaʼdeʼ Dios lii, ziale de lii gudiiluʼ xquíxepeʼ laabe.

¹⁷ Guníʼ ique lu ejemplu riʼ. Bixuiʼlú cayátiluʼ guiiguʼ ne málasi ñuu tuuxa ni nulá lii. Xi ñúniluʼ yaʼ. Ñee nuchaaluʼ lari sin nudiiluʼ xquíxepeʼ binni bilá lii que la? Coʼ, njaʼ. Qué lica nusaanuʼ de nudiiluʼ xquíxepeʼ laabe. Zacaca nga laanu, bilá Jiobá ne Jesús laanu purtiʼ casi ora cayátinu guiiguʼ lu náʼ pecadu ne guendaguti, ne bíʼnicabe ni purtiʼ nadxiicabe laanu stale. ¡Bilácabe xquendanabáninu! Pur laacabe zanda guibáninu sin gátinu ndaaniʼ ti paraísu lu Guidxilayú. Cadi dxandíʼ naquiiñeʼ gudiʼnu xquíxepeʼ laacabe la?

18, 19. a) Xiñee cadi naquiiñeʼ guidxíbiluʼ gudiiluʼ xquendanabániluʼ Jiobá. b) Xiñee zabániluʼ jma galán pa gúniluʼ ni na Dios.

 ¹⁸ Ñee rudiiluʼ xquíxepeʼ pur ni maʼ biʼniʼ Jiobá pur lii la? Pa zacá ni, zanda gusihuínniluʼ ni ra gudiiluʼ xquendanabániluʼ Dios ne chuʼnísaluʼ. Casi maʼ nánnaluʼ, gudiiluʼ xquendanabániluʼ Dios riniʼni cudii stiidxaluʼ laabe zúniluʼ ni nabe ora tiica si. Peru cadi naquiiñeʼ guidxíbiluʼ ora gudii stiidxaluʼ laabe. Xiñee yaʼ. Purtiʼ racalaʼdxiʼ Jiobá ni jma galán para lii, ne laabe maʼ guniʼbe zaguube ndaayaʼ cani ruzuubaʼ diidxaʼ (Hebreos 11:6). Ora gudiiluʼ xquendanabániluʼ Jiobá ne chuʼnísaluʼ, qué zaca diʼ xquendanabániluʼ jma nagana. ¡Zabániluʼ jma galán! Guidúʼyanu xi guníʼ ti Testigu de 24 iza ni guyuunisa dxi nahuiiniʼ: «Pa nibezaʼ xcaadxi iza para ñuaanisaʼ la? ñeneʼ chaahueʼ xi ngue cayuneʼ. Peru ra guyuaanisaʼ que gupa ni naa de ca trampa stiʼ guidxilayú riʼ».

¹⁹ Casi maʼ guninu, Jiobá racalaʼdxiʼ ni galán para lii. Peru Binidxabaʼ qué rizaalaʼdxiʼ diʼ lii, purtiʼ laa ruyubi puru si para laa. Pa gúniluʼ ni nabe la? qué zudiibe lii gastiʼ ni galán. Ximodo gúnibe ni, pa qué gápabe ni galán gudiibe binni. Qué gápadibe noticia galán para binni, nin ti clase esperanza. Qué zanda gudiibe laanu ti cosa galán, purtiʼ nin para laabe gastiʼ ni galán (Apocalipsis 20:10).

20. Xi zacané lii chuʼluʼ listu para gudiiluʼ xquendanabániluʼ Jiobá ne chuʼnísaluʼ. (Laaca zanda gúʼyaluʼ cuadru « Cani zanda gacané lii gaca xhamíguluʼ Dios»).

²⁰ Gudiiluʼ xquendanabániluʼ Jiobá nga ni jma galán quixhe íqueluʼ gúniluʼ. Ñee maʼ nuuluʼ listu para gúniluʼ ni la? Pa zacá ni, cadi guidxíbiluʼ gúniluʼ ni. Peru pa gudiiluʼ cuenta ruluíʼ caʼruʼ chuʼluʼ listu la? yenanda ca conseju ni zeeda lu tema riʼ para ganda gúniluʼ ni. Bidii Pablu conseju ca hermanu de Filipo ti cadi gusaana de guiniisicaʼ lu stiidxaʼ Dios (Filipenses 3:16). Pa chinándaluʼ conseju riʼ, qué zandaa ziuuluʼ listu para gudiiluʼ xquendanabániluʼ Jiobá ne ziuunísaluʼ.