1, 2. a) ¿Ximodo zándaca guni sentirnu ora guiníʼ íquenu guiráʼ ni bizaaca Jesús dxi guyuu lu Guidxilayú riʼ? b) ¿Xi zazíʼdinu lu artículo riʼ?

 ORA rati ti binni ni nadxiinu, guizáʼ racananu. Ne jma racananu ora rietenaláʼdxinu ni bizaacabe ca dxi ante gátibe, jmaruʼ si pa guizáʼ gucanabe. Zándaca ra tidiʼ tiempu zietenaláʼdxinu xiixa cosa de laabe ni gacané laanu chuʼnu nayecheʼ sti biaje, casi xiixa ni bisiidibe laanu, xiixa ni bíʼnibe o ni guniʼbe para cuʼbe gana laanu o para gusixídxibe laanu.

² Laaca riuubaʼ ladxidoʼno ora ridúʼndanu ni ruzeeteʼ Biblia modo gucaná Jesús ne modo gutiʼ. Ne ca dxi ante ne despué de Conmemoración, jma ribeenu tiempu para guiníʼ íquenu pabiáʼ risaca sacrificiu ni bíʼnibe (1 Cor. 11:24, 25). Peru ora guiníʼ íquenu ca cosa ni biʼniʼ ne ni guníʼ Jesús dxi guyuu lu Guidxilayú, guizáʼ riéchenu. Laaca riuʼnu gana ora riníʼ íquenu xi cayúnibe yanna ne xi zúnibe pur laanu despué. Lu artículo riʼ zazíʼdinu pa guiníʼ íquenu ca cosa ni bizéʼtenu riʼ ne guiníʼ íquenu pabiáʼ nadxii Jesús laanu, zacané ni laanu guyúbinu modo gudiʼnu xquixe peʼ laabe.

3. ¿Xi zucaa laanu gudiʼnu xquixe peʼ ni biaxa pur laanu?

³ Pa guiníʼ íquenu modo bibani Jesús ne modo gutiʼ, rucaani laanu gudiʼnu xquixe peʼ laa. Dxi biʼniʼ predicarbe lu Guidxilayú riʼ, bisiidibe binni ca cosa galán ni zuni Reinu stiʼ Dios. Para laanu guizáʼ risaca guiráʼ ni bisiidibe de Reinu.  Rudiʼnu xquixe peʼ ni biaxa pur laanu, purtiʼ pur laani zanda gaca xhamígunu Jehová ne Jesús. Pa gápanu fe Jesús laaca zápanu esperanza de guibáninu sin qué chuʼ dxi gátinu ne guidúʼyanu guiasa ca binni ni nadxiinu de lade gueʼtuʼ (Juan 5:28, 29; Rom. 6:23). Ni dxandíʼ nga qué huayúninu gastiʼ para guicaanu ca ndaayaʼ ca. Qué ziuu dxi quíxenu Dios ne Cristu guiráʼ ni maʼ bíʼnicaʼ pur laanu (Rom. 5:8, 20, 21). Peru ¿ximodo zanda gusihuínninu rudiʼnu xquixe peʼ laacabe yaʼ? Guidúʼyanu ni.

4. ¿Xi biʼniʼ María Magdalena para bisihuinni cudii xquixe peʼ Jesús pur ni biʼniʼ pur laabe? (Biiyaʼ dibuju).

⁴ Guzéʼtenu ejemplu stiʼ ti gunaa judía ni láʼ María Magdalena. Guizáʼ cayacanabe purtiʼ cayuniná gadxe demonio laabe. Zándaca guníʼ íquebe guirutiʼ zanda gacané laabe. ¿Ñee ruxuíʼlunu pabiáʼ biéchebe ne bidiibe xquixe peʼ Jesús pur gulee ca demonio que luguiabe la? Ngue runi gúcabe ti xpinni Cristu ne biquiiñebe tiempu stibe, stipa stibe ne ca cosa ni nápabe para gucanebe Jesús tiempu biʼniʼ predicar (Luc. 8:1-3). Neca guizáʼ bisisaca María guiráʼ ni biʼniʼ Jesús pur laa, peru zándaca qué ñénebe pabiáʼ naroʼbaʼ regalu chigudii Jesús laabe despué. Purtiʼ para tiempu que, chigudiiruʼ Jesús xpida pur binni ti zacá ca ni gapa fe laa guicaa guendanabani ni qué zaluxe (Juan 3:16). Neca zaqué, ra qué nusaana María Jesús, bisihuinni cudii xquixe peʼ laabe. Ne dxi cá Jesús lu yaga, biaanabe gaxha de raqué para gacanebe Jesús ne quixhedxibe ladxidóʼ ca ni nuu raqué (Juan 19:25). Ne dxi nuu Jesús ndaaniʼ baʼ, yené María ne xhupa gunaa guixi ni rindáʼ naxhi para cuʼcaʼ lu cuerpu stibe (Mar. 16:1, 2). Guluu Jehová ndaayaʼ María pur qué nixeleʼ de Jesús. ¡Nanna pabiáʼ biéchebe ora bíʼyabe maʼ biasa Jesús de lade gueʼtuʼ ne guniʼné laabe yaʼ! Ti privilegiu ni huaxiéʼ si tu gupa (Juan 20:11-18).

5. ¿Ximodo zanda gusihuínninu rudiʼnu xquixe peʼ Jehová ne Jesús guiráʼ ni maʼ bíʼnicaʼ pur laanu?

 ⁵ Laanu laaca zanda gusihuínninu rudiʼnu xquixe peʼ Jehová ne Jesús guiráʼ ni maʼ bíʼnicaʼ pur laanu. ¿Ximodo zanda gúninu ni yaʼ? Ra iquiiñenu tiempu stinu, stipa stinu ne ca cosa ni nápanu para gúninu xhiiñaʼ Jehová. Guzéʼtenu ti ejemplu, zanda chigacanenu lu construcción ne mantenimientu ndaaniʼ ca yoo ni riquiiñenu para guni adorarnu Jehová.

6. ¿Xiñee rininu ti regalu nga sacrificiu ni biʼniʼ Jesús pur cada tobi de laanu?

⁶ Ora riníʼ íquenu pabiáʼ nadxii Jehová ne Jesús laanu, laaca rucaa ni laanu gannaxhiinu laacabe (1 Juan 4:10, 19). Ne jma rannaxhiinu laacabe ora gánnanu xiñee guti Jesús pur cada tobi de laanu. Guizáʼ bidii apóstol Pablo xquixe peʼ pur regalu riʼ. Nga runi ndiʼ nga ni bicaabe ra nuu ca xpinni Cristu de Galacia: «Xiiñiʼ Dios, ni nadxii naa ne ni bidii xpida pur naa» (Gál. 2:20). Pur sacrificiu stiʼ Jesús, bichiña Jehová lii ra nuu para gácaluʼ xhamigu (Juan 6:44). ¿Cadi dxandíʼ riécheluʼ gánnaluʼ biiyaʼ Jehová xiixa cosa galán luguialuʼ ne guizáʼ naroʼbaʼ ni gudíxebe para gaca xhamíguluʼ laabe la? ¿Cadi rucaa nga lii gannaxhiiluʼ Jehová ne Jesús la? Nga runi guiranu naquiiñeʼ guinabadiidxanu: «¿Xi rucaa guendarannaxhii ca naa guneʼ?».

7. Casi rihuinni lu foto ca, ¿ximodo zanda gusihuínninu nadxiinu Jehová ne Jesús? (2 Corintios 5:14, 15; 6:1, 2).

⁷ Guendarannaxhii ni nápanu Dios ne Cristu rucaani laanu gannaxhiinu binni (biindaʼ 2 Corintios 5:14, 15; 6:1, 2). Ti modo zanda gúninu ni nga ra guni predicarnu binni né stale gana. Runi predicarnu binni de intiica raza, cultura, ricu  o pobre. Zacá runinenu Jehová dxiiñaʼ purtiʼ laa «racalaʼdxiʼ gulá guiráʼ xixé binni ne guiziidiʼ chaahuicaʼ ni dxandíʼ» (1 Tim. 2:4).

8. ¿Ximodo zanda gusihuínninu nadxiinu ca hermanu stinu?

⁸ Sti modo zanda gusihuínninu nadxiinu Dios ne Cristu nga ra gannaxhiinu ca hermanu stinu (1 Juan 4:21). Guzéʼtenu ti ejemplu, rizaaláʼdxinu laacabe ne racanenu laacabe ora cadíʼdicabe lu xiixa guendanagana. Riguixhedxinu ladxidóʼcabe ora gatiʼ ti binni ni nadxiicabe, rigánnanu laacabe ora huarácabe ne rúninu guiráʼ ni nuu lu nanu para cuʼnu gana laacabe ora nuucabe triste (2 Cor. 1:3-7; 1 Tes. 5:11, 14). Laaca runi orarnu pur laacabe purtiʼ nánnanu «napa oración stiʼ ti binni nachaʼhuiʼ stipa» (Sant. 5:16).

9. ¿Gunáʼ nga sti modo rusihuínninu nadxiinu ca hermanu stinu?

⁹ Sti modo zanda gusihuínninu nadxiinu ca hermanu stinu nga ra gúninu stipa pur chuʼnu galán né laacabe. Rúninu stipa guni perdonarnu casi runi Jehová ni. Guiníʼ íquenu ndiʼ: pa bidii Jehová lugar gatiʼ Xiiñiʼ pur ca pecadu stinu, ¿ñee cadi naquiiñeʼ gucaa nga laanu guni perdonarnu ca hermanu stinu ora gúnicaʼ laanu xiixa la? Qué racaláʼdxinu gácanu casi esclavu malu ni bizeeteʼ Jesús lu ti parábola. Biʼniʼ perdonar xpixuaanabe laabe deuda ni nuzaabibe laa, peru laabe qué ninabe ñuni perdonarbe sti esclavu ni jma huaxiéʼ nuzaabiʼ laabe (Mat. 18:23-35). Nga runi, pa napaneluʼ ti hermanu xiixa guendanagana, ¿xiñee qué gúniluʼ stipa guiníʼneluʼ laabe para guni chaahuitu ni ante de Conmemoración yaʼ? (Mat. 5:23, 24). Pa gúniluʼ ni zusihuínniluʼ guizáʼ nadxiiluʼ Jehová ne Jesús.

10, 11. ¿Ximodo zanda gusihuinni ca ancianu nadxiicaʼ Jehová ne Jesús? (1 Pedro 5:1, 2).

¹⁰ Zanda gusihuinni ca ancianu nadxiicaʼ Jehová ne Jesús ra gápacaʼ né stale cariñu ca dendxuhuiiniʼ stiʼ Jesús (biindaʼ 1 Pedro 5:1, 2). Nga peʼ nga ni gudxi Xiiñiʼ Dios apóstol Pedro guni. Cumu chonna biaje guníʼ Pedro qué runibiáʼ Jesús la? nga runi guizáʼ racaláʼdxibe gusihuínnibe nadxiibe laa. Biasa si Jesús de lade gueʼtuʼ, gunabadiidxaʼ laabe: «Simón xiiñiʼ Juan, ¿nadxiiluʼ naa la?». Nanna dxíchinu ñuni Pedro intiica cosa para gusihuinni dxandíʼ nadxii laabe. Ne ndiʼ nga ni bicabi Jesús laabe: «Gupa ca dendxuhuiiniʼ stinneʼ» (Juan 21:15-17). Ne dede dxi que, né stale cariñu gupa Pedro ca dendxuhuiiniʼ stiʼ Señor, ne zaqué bisihuínnibe nadxiibe laa.

¹¹ Ca semana ante ne despué de Conmemoración, ¿ximodo zanda gusihuinni ca ancianu zinándacaʼ ca diidxaʼ ni gudxi Jesús Pedro? Zusihuínnicabe nadxiicabe Jehová ne Jesús pa cueecabe tiempu para cúʼcabe gana ca hermanu ne gacanécabe ca ni nuu inactivu chuʼcaʼ jma gaxha de Jehová (Ezeq. 34:11, 12). Laaca zanda gúnicabe ni pa cúʼcabe gana ca binni ni ricaa estudiu ne binni ni cheʼ Conmemoración primé biaje. Naquiiñeʼ guidxaagalúcabe ca binni riʼ ne gúʼyacabe laacaʼ casi binni ni zanda gueeda gaca xpinni Dios.

12. Pa guiníʼ íquenu ca diidxaʼ ni guníʼ Jesús gueelaʼ ante gatiʼ, ¿ximodo zacané ni laanu gácanu nadxibalú? (Juan 16:32, 33).

¹² Gueelaʼ ante gatiʼ Jesús, sicaríʼ gúdxibe ca discípulo stibe: «Zápatu stale sufrimientu ndaaniʼ guidxilayú. Peru ¡lagaca valiente!, maʼ bineʼ ganar guidxilayú»  (biindaʼ Juan 16:32, 33). ¿Xi gucané Jesús gaca nadxibalú dxi bicaalú ca enemigu stiʼ laa ne cadi gudxiideche Dios dede dxi gutiʼ yaʼ? Confianza ni gúpabe Jehová. Cumu nanna Jesús laaca zadxaagalú ca discípulo stiʼ ca guendanagana riʼ la? gunábabe Jehová gapa laacaʼ (Juan 17:11). Racané ndiʼ laanu gácanu nadxibalú purtiʼ nánnanu jma napa Jehová poder que tutiica enemigu gucaalú laanu (1 Juan 4:4). Cayuuyaʼ Jehová guiráʼ ni cazaacanu. Ne nanna dxíchinu pa gápanu confianza laabe de guidubi ladxidoʼno zacanebe laanu cadi guidxíbinu ne gácanu nadxibalú.

13. ¿Ximodo bisihuinni José de Arimatea nadxibalú?

¹³ Guininu de José de Arimatea, ti hombre ni nabé biʼniʼ respetar ca judíu. Gúcabe tobi de ca judíu ni guyuu lu tribunal supremo stiʼ ca judíu o Sanedrín. Peru qué ñácabe nadxibalú tiempu biʼniʼ predicar Jesús. Juan guníʼ gúcabe «ti discípulo stiʼ Jesús, peru nagaʼchiʼ» purtiʼ bidxíbibe ca judíu (Juan 19:38). Neca guyuuláʼdxibe gucaadiágabe mensaje stiʼ Reinu, nagaʼchiʼ gúpabe fe Xiiñiʼ Dios. Zándaca bidxíbibe maʼ cadi guni respetar binni laabe. Intiica si bicueeza laabe, Biblia ná despué de guti Jesús, gupa José «valor ne guyé ra nuu Pilato ne gunabaʼ laabe cuerpu stiʼ Jesús» (Mar. 15:42, 43). Maʼ qué nucaachiʼ José naca discípulo stiʼ Jesús.

14. ¿Xi naquiiñeʼ gúninu pa riuʼnu xizaa xi guiníʼ binni?

¹⁴ ¿Ñee riuuluʼ xizaa xi guiníʼ binni de lii cásica bizaaca José de Arimatea la? ¿Ñee rituí luluʼ guiniʼluʼ nácaluʼ testigu stiʼ Jehová ra scuela o ra dxiiñaʼ la? ¿Ñee cudiiluʼ lugar tidiʼ tiempu para gácaluʼ publicador o chuʼnísaluʼ la? Cadi gudiiluʼ lugar ni guiníʼ xcaadxi guchibi ni lii para cadi gúniluʼ ni jneza. Gunabaʼ Jehová gacané lii ne gudii valor lii para gúniluʼ ni ná. Ra gúʼyaluʼ modo guicábibe ca oración stiluʼ zacané ni lii cadi guidxíbiluʼ ne gácaluʼ jma nadxibalú (Is. 41:10, 13).

15. ¿Xi biʼniʼ ca discípulo dxi bíʼyacaʼ maʼ biasa Jesús de lade gueʼtuʼ? (Lucas 24:52, 53).

¹⁵ Dxi gutiʼ Jesús guizáʼ guyuu ca discípulo stibe triste. ¿Ximodo ñuni sentirluʼ pa ñácaluʼ tobi de laacabe yaʼ? Biniti ca discípulo que ti xhamígucaʼ ni guizáʼ nadxiicaʼ ne maʼ qué nidxélacaʼ xi ñúnicaʼ (Luc. 24:17-21). Peru despué bihuinni  Jesús nezalúcabe ne gulee tiempu para gusiene laacabe cayuni cumplir caadxi profecía ni zeeda lu Biblia. Laaca bidii laacabe ti dxiiñaʼ nabé risaca (Luc. 24:26, 27, 45-48). Ne para dxi biguetaʼ Jesús guibáʼ, gudiʼdiʼ si cuarenta dxi, maʼ qué ñuu ca discípulo que triste, sínuque maʼ guyuucaʼ nayecheʼ. Nuucabe nayecheʼ purtiʼ nánnacabe nabani Jesús ne zacané laacabe guni cumplírcabe dxiiñaʼ ni biaananécabe. Ne ngue bicaa laacabe cadi gusaana de gusisácacabe Jehová (biindaʼ Lucas 24:52, 53; Hech. 5:42).

16. ¿Ximodo zanda chinándanu ejemplu stiʼ ca discípulo stiʼ Jesús?

¹⁶ Laanu yaʼ, ¿ximodo zanda chinándanu ejemplu stiʼ Jesús? Ra gúninu ni ná Jehová guiráʼ dxi né guendanayecheʼ, ne cadi tiempu si raca Conmemoración. Ne para ganda gúninu ni, naquiiñeʼ guyúbinu Reinu stiʼ Dios primeru. Guzéʼtenu ti ejemplu, nuu tu laa maʼ bichaa dxi runi dxiiñaʼ o biaʼ hora runi dxiiñaʼ para gapa jma tiempu guni predicar, cheʼ reunión ne guni adoración en familia guiráʼ semana. Nuu tu laa maʼ gudixhe ique cadi guyubi gapa stale cosa risaca para ganda gacané ndaaniʼ congregación o chiguni predicar ra huaxiéʼ nuu Testigu. Para cadi gusaana de gúninu ni ná Jehová la? cadi naquiiñeʼ guireʼnu gana. Ne laabe cayuni prometerbe laanu guizáʼ zaguube ndaayaʼ laanu pa gúninu ni ná Reinu stibe primé lu xquendanabáninu (Prov. 10:22; Mat. 6:32, 33).

17. ¿Xi naquiiñeʼ gúninu tiempu raca Conmemoración? (Biiyaʼ foto).

¹⁷ Maʼ racaláʼdxinu ganda martes 4 de abril para gúninu Conmemoración. Peru cadi naquiiñeʼ diʼ cuézanu dede guedandá dxi ca para guiníʼ íquenu ni biʼniʼ Jesús ne guendaguti stiʼ. Laaca naquiiñeʼ guiníʼ íquenu ximodo rusihuinni Jehová ne Jesús pabiáʼ nadxiicaʼ laanu. Guiníʼ íquenu ca cosa ni bizéʼtenu riʼ tiempu raca Conmemoración. Guzéʼtenu ti ejemplu, zanda cueenu tiempu para guni estudiar chaahuinu tema ni láʼ «Últimu semana bibani Jesús lu Guidxilayú», ni biree lu Xhiiñaʼ Dios ne modo nabáninu, abril de 2019 yaza 4. Biyubi relatu ni gacané lii gudiiluʼ xquixe peʼ Jehová ne Jesús, gusihuínniluʼ nadxiiluʼ laacaʼ, gápaluʼ valor ne chuʼluʼ nayecheʼ. Ne guníʼ ique xi zanda gúniluʼ para gusihuínniluʼ cudiiluʼ xquixe peʼ laacabe de guidubi ladxidoʼloʼ. Cadi guiaandaʼ laanu, zusisaca Jesús guiráʼ ni gúninu para guietenaláʼdxinu laa tiempu raca Conmemoración (Apoc. 2:19).