Para ganda guni Ca Binni Ruundaʼ Biblia que dxiiñaʼ ni biaananecaʼ de guni predicarcaʼ, naquiiñeʼ gápacaʼ stale valor. Naquiiñeʼ gábicabe «ca binni nadóʼ ca noticia galán», ne laaca gábicabe ca binni malu zuquixe «Dios stinu ni maʼ biʼniʼ ca enemigu stiʼ».

Ti hermanu ni guleza Canadá ni láʼ John Hoskin, biʼniʼ predicar né stale valor neca guyuu tu bicaalú laa. Ra bizulú iza 1921, guniʼné hermanu riʼ ti predicador de sti religión ne gúdxibe laa: «Naquiiñeʼ guininu né diidxaʼ nadóʼ de ca cosa ni zeeda lu Biblia. Ne pa cadi nuunu de acuerdu lu caadxi cosa la? zanda gusaananu ni de raca si, sin tíndenu». Peru qué nizaaca ni zaqué. Hermanu Hoskin guníʼ: «Cadi tan xadxí de canidu diidxaʼ, málasi guizáʼ reciu biseeguʼ predicador que puertaʼ stiʼ, dede guníʼ iqueʼ gulaa ca ventana stini».

Ne naduxhuʼ hombre que guníʼ: «¡Mejor yegusiidiʼ ca ni qué ganna de Biblia!». Qué niníʼ hermanu Hoskin gastiʼ, peru guníʼ íquebe: «Naa rabeʼ nga nga ni cayuneʼ».

Ne cadi raca si biaana ni, sti dxi queca guníʼ predicador que mal de hermanu que. Hermanu Hoskin guníʼ: «Guniʼbe mal de naa ndaaniʼ yuʼduʼ stibe. Ne gúdxibe laacaʼ gástiruʼ stobi casi naa ni yendá ndaaniʼ guidxi que purtiʼ cadi jneza ni rusiideʼ ne pur ngue naquiiñeʼ guuticabe naa». Neca bizaaca ndiʼ qué niree hermanu riʼ gana. Qué nusaana de ñuni predicarbe ne guníʼnebe stale binni. Laaca guniʼbe: «Guizáʼ nayecheʼ bineʼ predicar de yoo pur yoo raqué. Dede guyuu caadxi binni gudxi naa: “Nánnadu xhiiñaʼ Dios nga cayúniluʼ” ne gunabadiidxacabe naa pa zanda gacanécabe naa para cadi guiaadxaʼ gastiʼ naa».

Para gacanécabe binni guiene chaahuiʼ Biblia, biʼniʼ publicar Ca Binni Ruundaʼ Biblia lu revista ni runibiaʼnu yanna ¡Gutaná! caadxi pregunta ne ximodo ricabi Biblia cani. Laaca lu revista riʼ zeeda caadxi pregunta para ca joven, ni zanda iquiiñeʼ ca padre ca para ganda guiníʼnecaʼ laacabe. Ca ni napa xiiñiʼ zanda guinabadiidxacaʼ ne gacanecaʼ laacabe guidxélacabe ca respuesta stini lu Biblia. Cadi nagana ni rusiidicabe luni, tobi de ca pregunta que nga «¿Panda libru napa Biblia?». Ne stobi de laani nga «¿Ñee zazanándacabe guiráʼ xpinni Cristu la?», né ca pregunta riʼ  racanécabe ca joven para gácacaʼ nadxibalú ora guni predicarcaʼ.

Laaca lu revista riʼ nuu pregunta ne respuesta stiʼ Biblia para ca binni ni ziné jma stale tiempu de cayuundaʼ Biblia ne ridxélacabe respuesta stini lu primé libru stiʼ Estudios de las Escrituras. Stale de ca ni biʼndaʼ revista riʼ guleenducaʼ ni galán pur ca pregunta riʼ. Peru revista ni biree 21 de diciembre iza 1921 guníʼ maʼ qué zareeruʼ ca pregunta riʼ. ¿Xiñee maʼ qué zareecani yaʼ?

Bidii ca hermanu ni zaniruʼ ndaaniʼ xquidxi Dios cuenta caquiiñeʼ guiziidiʼ ca ni deruʼ cayuundaʼ Biblia de laani pur tema. Ne pur ngue lu beeu noviembre iza 1921 biree libru ni láʼ El Arpa de Dios lu diidxaʼ inglés ne lu iza 1925 bireeni lu diidxastiá. Ca binni ni ricaa libru riʼ ricá lacaʼ para guicaacaʼ ti cursu para ganda guni estudiarcaʼ libru riʼ stúbicaʼ ne gucané cursu riʼ «para ganda guiénecabe ximodo chigudii Dios guendanabani ni qué zaluxe binni guidxilayú». ¿Ximodo guca cursu riʼ yaʼ?

Ora ricaa ca binni que libru El Arpa de Dios, laaca ricaacaʼ ti tarjetahuiiniʼ ra cá xi yaza naquiiñeʼ gúʼndacaʼ. Sti semana despué, ricaacabe sti tarjeta ra cá xcaadxi pregunta ni caníʼ de ni maca biindacabe ne ra ziluxe ni cá paraa zuundabe sti semana ca.

Lu doce semana ricaa estudiante riʼ ti tarjeta ni ruseendaʼ congregación ra nuu guiráʼ semana. Ca hermanu ni maʼ huaniisi o ca ni maʼ qué zanda chiguni predicar de yoo pur yoo, nga ca ni ruseendaʼ ca tarjeta riʼ. Guzéʼtenu ni bizaaca hermana Anna Gardner, ti hermana de Millvale (Pensilvania, Estados Unidos), laa guníʼ: «Ra biree libru riʼ, nabé gucané ni bendaʼ Thayle para ganda guni jma lu xhiiñaʼ Jehová purtiʼ yanna maʼ zanda guseendabe ca tarjetahuiiniʼ ra cá ca pregunta que guiráʼ semana, purtiʼ qué randa rizabe». Ora riluxe estudiante que cursu stiʼ, riganna ca hermanu laabe para gacanecaʼ laabe guiziidibe jma de lu Biblia.

Ra maʼ ziluxe iza 1921, biseendaʼ hermanu Joseph Rutherford ti carta ra nuu ca congregación. Lu carta que ná: «Jma guca predicar stiidxaʼ Reinu iza riʼ ne jma gucané ni binni iza riʼ que ca iza gudiʼdiʼ ca». Guníʼ íquebe ca dxi ni zeeda ca, nga runi bizeetebe: «Nuuruʼ stale dxiiñaʼ ni gaca. Nga runi, lacuu gana xcaadxi para gúnicaʼ dxiiñaʼ riʼ». Rihuinni dxichi yenanda Ca Binni Ruundaʼ Biblia ni ná hermanu riʼ. Ne lu iza 1922, biʼniʼ predicárcabe né stale valor ne stale gana de Reinu stiʼ Dios.