1. ¿Xiñee stale binni rinabadiidxaʼ gunáʼ nga religión ni dxandíʼ?

TIEMPU riʼ nuu stale religión ni riníʼ nácacaʼ xpinni Cristu ne runi adorarcaʼ Dios modo riuulaʼdxiʼ. Nga runi stale binni rinabadiidxaʼ: «¿Gunáʼ nga religión ni rusiidiʼ ni dxandíʼ? O ¿riuulaʼdxiʼ Dios guiráʼ religión la?». ¿Laanu yaʼ? ¿Ñee runi crenu dxandíʼ ni rusíʼdinu ne riuulaʼdxiʼ Dios modo runi adorarnu laa la? ¿Ñee zanda guni crenu laanu nga religión ni dxandíʼ la? Guidúʼyanu caadxi prueba ni rusihuinni zacá ni.

2. ¿Xiñee gunna dxichi Pablo dxandíʼ ni runi cré? (1 Tesalonicenses 1:5).

² Gunna dxichi Pablo dxandíʼ ni runi cré (biindaʼ 1 Tesalonicenses 1:5). Ne gúnnabe zacá ni cadi purtiʼ si bisiecheʼ ni laabe, sínuque purtiʼ biʼniʼ estudiar chaahuibe Stiidxaʼ Dios. Laabe biʼniʼ crebe «guiráʼ ni cá lu Stiidxaʼ Dios la? Dios nga guníʼ xi guicá luni» (2 Tim. 3:16). Ra biʼniʼ estudiar Pablo bidii cuenta Jesús nga Mesías ni maca nexheʼ gueeda que. Peru ca líder stiʼ ca religión stiʼ ca judíu qué ninacaʼ ñuni crecaʼ ni. Ca hombre ni rusiguii riʼ riniʼcaʼ runibiaʼcaʼ Dios, peru pur ni rúnicaʼ rihuinni cadi dxandíʼ ni (Tito 1:16). Ma gadxé guca Pablo de ca hombre riʼ purtiʼ laa qué ñuni cré diʼ ca ni guyuulaʼdxiʼ si, sínuque biʼniʼ cré guiráʼ ni caziidiʼ de lu Biblia. Guyuuláʼdxibe gusiidibe ne gúnibe ni ná «guiráʼ ca conseju stiʼ Dios» (Hech. 20:27).

3. ¿Ñee caquiiñeʼ gánnanu guiráʼ ca respuesta stiʼ ca pregunta stinu para ganna dxíchinu dxandíʼ ni runi crenu la? (Biiyaʼ cuadru ni láʼ « Qué zanda guiénenu guiráʼ ni runi Jehová ne ni riníʼ ique»).

 ³ Nuu binni riníʼ ique naquiiñeʼ guicabi religión ni dxandíʼ ca guiráʼ ca pregunta ni runi binni, dede né ca pregunta ni cadi zeeda lu Biblia. ¿Ñee jneza nga cuézanu guizaaca nga la? Guidúʼyanu ejemplu stiʼ Pablo. Dxandíʼ nga gúdxibe ca xpinni Cristu «laguyubi chaahuiʼ xii nga ni jneza», peru laaca gúnnabe nuu stale cosa ni qué riénebe (1 Tes. 5:21). Laabe guniʼbe «huaxiéʼ conocimientu nápanu» ne laaca «nachuunduʼ cadúʼyanu yanna, casi ñaca nidúʼyanu lu ti espeju de guiibaʼ» (1 Cor. 13:9, 12). Qué ñanna Pablo guiráʼ cosa, ne ngaca laanu. Peru gúnnabe ca cosa caquiiñeʼ ganna ti xpinni Cristu, ne gucané ni laabe ganna dxiichibe dxandíʼ ni runi crebe.

4. ¿Ximodo zanda ganna dxíchinu dxandíʼ ni runi crenu, ne xi zadúʼyanu lu artículo riʼ?

⁴ ¿Ximodo zanda ganna dxíchinu dxandíʼ ni runi crenu? Ti cosa ni zanda gúninu nga guchaaganu modo biʼniʼ adorar Jesús Dios ne modo runi adorar ca testigu stiʼ Jehová Dios tiempu riʼ. Lu artículo riʼ zadúʼyanu caadxi cosa ni runi ca xpinni Cristu ni dxandíʼ. Primé, qué runi adorarcaʼ bidóʼ. Guiropa, runi respetarcaʼ lá Jehová. Guionna, rinaaze dxiichicaʼ ni runi crecaʼ. Ne guidapa, nadxiisaacaʼ.

5. ¿Ximodo bisiidiʼ Jesús naquiiñeʼ guni adorarnu Dios, ne ximodo zanda chinándanu ejemplu stiʼ?

⁵ Cumu guizáʼ nadxii Jesús Jehová la? laasibe nga biʼniʼ adorar dxi guyuu guibáʼ ne zaqueca dxi guyuu lu Guidxilayú riʼ (Luc. 4:8). Ne ngaca bisiidibe ca discípulo stibe gúnicaʼ. Nin Jesús ne nin ca  discípulo stiʼ qué niquiiñecaʼ bidóʼ para guni adorarcaʼ Dios. Cumu ti espíritu nga Dios la? nin ti cosa ni guni binni qué zanda guni representar gloria stibe (Is. 46:5). ¿Ñee jneza nga guzáʼ binni ti bidóʼ ne guni orar ni la? Guiropa de ca chii mandamientu ni guníʼ Jehová que ná: «Cadi naquiiñeʼ guzaʼluʼ ti figura o gúniluʼ ti copia stiʼ ca cosa ni nuu guibáʼ, o ni nuu lu guidxilayú o ni nuu ndaaniʼ nisa. Cadi naquiiñeʼ guzuxíbiluʼ xañee ca cosa ca» (Éx. 20:4, 5). Para ca binni ni racalaʼdxiʼ gusiecheʼ Dios la? riénecaʼ cadi naquiiñeʼ guni adorarcaʼ bidóʼ.

6. ¿Tu ejemplu stiʼ rinanda ca testigu stiʼ Jehová tiempu riʼ?

⁶ Ca binni ni nanna de historia riniʼcaʼ Dios si nga biʼniʼ adorar ca xpinni Cristu ni bibani lu primé siglu. Guzéʼtenu ti ejemplu, ti libru ni caníʼ de historia ná qué lica niníʼ ique ca primé xpinni Cristu niguucaʼ bidóʼ ca lugar ra runi adorarcaʼ Dios (History of the Christian Church). Tiempu riʼ, laanu ca testigu stiʼ Jehová rinándanu ejemplu stiʼ ca xpinni Cristu ni bibani lu primé siglu. Qué runi orarnu bidóʼ o ángel, nin Jesús qué runi orarnu. Laaca qué runi adorarnu ca símbolo stiʼ ca guidxi ca, casi guni saludarnu bandera o sti cosa. Intiica si gúnicabe laanu, maʼ gudixhe íquenu chinándanu ca diidxaʼ ni guníʼ Jesús: «Biʼniʼ adorar Jehová Dios stiluʼ» (Mat. 4:10).

7. ¿Xi rusihuinni maʼ gadxé ca testigu stiʼ Jehová de xcaadxi religión?

⁷ Tiempu riʼ, stale binni rinanda ca líder stiʼ ca religión ni nabé runibiáʼ binni, dede xcaadxi si para guni adorárcabe laacaʼ. Stale binni rié ndaaniʼ yuʼduʼ stícabe, riziʼcaʼ libru ne rudiicaʼ stale bueltu para gacanecaʼ laacabe. Nuu tu laa runi cré guiráʼ ni rabi ca líder ca laacaʼ. ¡Zuluáʼ pa ñuuyacabe Jesús qué ñéchecabe biaʼ riéchecabe ora ruuyacabe ca líder ca! Peru laanu, ca ni dxandíʼ xpinni Jehová qué rinándanu nin ti binni. Neca runi respetarnu ca hermanu ni runi dirigir laanu, peru rinándanu ni bisiidiʼ Jesús ora guníʼ: «Guiratu bíʼchitu» (Mat. 23:8-10). Qué runi adorarnu binni, nin ti líder stiʼ religión o ti gobernante políticu. Qué runi apoyarnu laacabe, sínuque rácanu neutral ne rixélenu de guidxilayú riʼ. Lu guiráʼ ni bizéʼtenu riʼ rusihuinni ni maʼ gadxé laanu de ca binni ni riníʼ nácacaʼ xpinni Cristu (Juan 18:36).

8. ¿Ximodo nánnanu racalaʼdxiʼ Jehová gusisácanu lá ne gusíʼdinu ni binni?

⁸ Sicaríʼ guníʼ Jesús lu ti oración: «Bixhozeʼ, bisisaca laluʼ». Oraqueca bicabi Jehová laabe de guibáʼ né ti ridxi nadipaʼ ne reciu ne guníʼ zusisaca lá (Juan 12:28). Biaʼ dxi biʼniʼ Jesús xhiiñaʼ Jehová, bisisaca lá Bixhoze (Juan 17:26). Nga runi, ca ni dxandíʼ xpinni Cristu riuuláʼdxicaʼ iquiiñecaʼ lá Dios ne rusiidicaʼ ni xcaadxi binni.

9. ¿Ximodo bisihuinni ca xpinni Cristu ni bibani lu primé siglu que runi respetarcaʼ nombre stiʼ Dios?

⁹ Lu primé siglu que, despué de guca formar congregación stiʼ ca xpinni Cristu, «bietenalaʼdxiʼ Jehová ca binni de xcaadxi nación ne de ládecaʼ cabibe ti guidxi ni chiné nombre stibe» (Hech. 15:14). Guyuulaʼdxiʼ ca xpinni Cristu que iquiiñecaʼ lá Dios ne gusiidicaʼ ni binni. Biquiiñecabe lá Dios ora biʼniʼ predicárcabe ne ora bicaacabe ca libru ni zeeda lu Biblia. *  Zacá bisihuínnicabe laacabe nga guidxi ni gulí Dios para chiné nombre stiʼ (Hech. 2:14, 21).

10. ¿Xi prueba rusihuinni ca testigu stiʼ Jehová nga guidxi ni riquiiñeʼ lá Dios?

¹⁰ Guidúʼyanu caadxi prueba ni rusihuinni ca testigu stiʼ Jehová nga ni riquiiñecaʼ lá Dios. Tiempu riʼ, stale líder stiʼ ca religión ca qué rinacaʼ gusiidicaʼ binni lá Dios. Ráxhacabe lá Dios ora runi traducírcabe Biblia ne qué rinácabe iquiiñeʼ binni lá Dios ndaaniʼ yuʼduʼ stícabe. * Peru nánnanu ca testigu si stiʼ Jehová nga rusisácacaʼ lá Dios ne runi respetarcaʼ ni. Nin ruʼ sti religión qué rusiidiʼ binni lá Dios casi rúninu ni laanu. Rúninu stipa pur gusihuínninu dxandíʼ nácanu testigu stiʼ Jehová purtiʼ zinenu lá Jehová (Is. 43:10-12). Huabee xquidxi Dios jma de 240 millón de Biblia Traducción del Nuevo Mundo, ra zeeda lá Jehová stale lugar ra huayaxha xcaadxi traductor ni. Ne huaree publicación ni biree de lu Biblia ra zeeda lá Jehová lu jma de 1,000 idioma.

11. ¿Ximodo bisihuinni ca xpinni Cristu ni bibani lu primé siglu naaze dxiichicaʼ ni runi crecaʼ?

¹¹ Gunnaxhii Jesús ni dxandíʼ, ¿xii nga ni dxandíʼ ca yaʼ? Laani nga ni dxandíʼ de  Dios ne de ca propósitu stiʼ. Guiráʼ ni biʼniʼ Jesús bisihuinni ni xi runi cré ne bisiidini xcaadxi binni (Juan 18:37). Laaca riuulaʼdxiʼ ca ni dxandíʼ xpinni Jesús gusihuínnicaʼ dxandíʼ ni runi crecaʼ pur modo nabánicaʼ (Juan 4:23, 24). Pedro guníʼ naca religión stiʼ ca xpinni Cristu «neza ni dxandíʼ» (2 Ped. 2:2). Ca xpinni Cristu ni bibani lu primé siglu gunaazeʼ dxiichicaʼ ni runi crecaʼ, ngue runi bicaanacaʼ ni rusiidiʼ religión ni cadi dxandíʼ, tradición ne qué nucaadiágacaʼ ni zeeda si de xquendabiaaniʼ binni (Col. 2:8). Zacaca nga tiempu riʼ, ca ni dxandíʼ xpinni Cristu rúnicaʼ stipa pur sacaʼ «lu ni dxandíʼ» (3 Juan 3, 4). ¿Ximodo nga rizácabe ni lu dxandíʼ yaʼ? Ra gúnicabe stipa guni crécabe ne guibánicabe modo rusiidiʼ Stiidxaʼ Jehová.

12. ¿Xi runi ca hermanu ni runi dirigir xquidxi Dios ora rudiicaʼ cuenta caquiiñeʼ guchaacaʼ xiixa ne xiñee rúnicaʼ ni?

¹² Qué riníʼ diʼ ca testigu stiʼ Jehová nánnacaʼ guiráʼ ni zeeda lu Biblia. Huayuu biaje huacheecabe modo bisiénecabe xiixa tema ni zeeda lu Biblia o modo gudixhe chaahuicabe gaca xiixa ndaaniʼ congregación. Peru cadi naquiiñeʼ guidxagayaanu ndiʼ purtiʼ maca cá lu Stiidxaʼ Dios chaahuiʼ chaahuiʼ nga ziene xquidxi Dios xi racaláʼdxibe gúnicaʼ (Col. 1:9, 10). Chaahuiʼ chaahuiʼ nga rusiene Jehová laanu xii nga ni dxandíʼ, nga runi naquiiñeʼ gápanu paciencia ne cuézanu dede ora guiene chaahuinu ni dxandíʼ (Prov. 4:18). Ora rudii ca hermanu ni runi dirigir xquidxi Dios cuenta caquiiñeʼ guchaacaʼ modo riénenu xiixa o modo raca xiixa, nagueendaca rúnicaʼ ni. Stale religión ni cadi dxandíʼ ruchaacaʼ ni rúnicaʼ o ni runi crecaʼ para gusiéchecaʼ ca xpínnicaʼ o para chuulaʼdxiʼ binni ni rúnicaʼ. Peru ca testigu stiʼ Jehová ruchaacaʼ xiixa para chuʼcaʼ jma gaxha de Dios ne para guni adorarcaʼ laabe modo bisiidiʼ Jesús (Sant. 4:4). Ora ruchaʼnu xiixa, rúninu ni cadi purtiʼ zinándanu modo riníʼ ique binni tiempu riʼ, sínuque purtiʼ maʼ biene chaahuinu ni rusiidiʼ Biblia. Dxandíʼ peʼ naaze dxiichinu ni dxandíʼ (1 Tes. 2:3, 4).

13. ¿Gunáʼ nga cualidad jma risaca ni rusihuinni ca ni dxandíʼ xpinni Cristu, ne ximodo rusihuinni ca testigu stiʼ Jehová ni tiempu riʼ?

¹³ Binibiáʼcabe ca xpinni Cristu ni bibani lu primé siglu purtiʼ bisihuínnicaʼ stale cualidad, tobi de laani nga gunnaxhiisaacaʼ. Jesús guníʼ: «Sicaríʼ nga zanna binni nácatu discípulo stinneʼ: pa nadxiisaatu» (Juan 13:34, 35). Tiempu riʼ, ca testigu stiʼ Jehová ni nuu lu guidubi naca Guidxilayú nadxiisaacaʼ ne nuucaʼ tobi si. Maʼ gadxé laanu que xcaadxi religión purtiʼ nácanu ti familia neca de gadxé gadxé guidxi ne cultura laanu. Ne rihuinni nadxiisaanu lu ca reunión ne lu ca asamblea ni rápanu. Ndiʼ racané laanu ganna dxiichinu laasinu nga runi adorarnu Jehová modo riuulaʼdxiʼ.

14. Casi ná Colosenses 3:12-14, ¿ximodo nga naquiiñeʼ gusihuínninu nadxiisaanu?

¹⁴ Biblia ná: «Ni jma naquiiñeʼ gúnitu nga gannaxhiisaatu» (1 Ped. 4:8). Ti modo zanda gusihuínninu nadxiisaanu nga ra guni perdonarnu ne guni huantarnu ni guni xcaadxi laanu purtiʼ binni ruchee laacaʼ. Laaca ruyúbinu modo gacanenu ne gácanu hospitalariu né guiráʼ hermanu dede né ca ni huayuniná laanu (biindaʼ Colosenses 3:12-14). Guendarannaxhii riʼ rusihuinni ni dxandíʼ xpinni Cristu laanu.

15. ¿Xi rúninu purtiʼ zinándanu modo biʼniʼ adorar congregación ni guyuu lu primé siglu que Dios?

¹⁵ Tiempu riʼ runi adorarnu Dios cásica biʼniʼ congregación stiʼ ca xpinni Cristu ni guyuu lu primé siglu ni. Guzéʼtenu ti ejemplu, nuunu organizadu casi modo gudixhe ca apóstol ni bibani lu primé siglu ni —nápanu superintendente viajante, ancianu ne siervu ministerial— (Filip. 1:1; Tito 1:5). Ne cásica bíʼnicabe, laanu laaca runi respetarnu ca ley stiʼ Jehová ni caníʼ de pecadu sexual ne guendaxheelaʼ, laaca runi respetarnu rini ne rápanu congregación de ca binni ni maʼ biʼniʼ cometer pecadu grave ne qué raca arrepentir (Hech. 15:28, 29; 1 Cor. 5:11-13; 6:9, 10; Heb. 13:4).

16. ¿Xi rusiidiʼ Efesios 4:4-6 laanu?

¹⁶ Guníʼ Jesús stale tu laa zaníʼ naca discípulo stiʼ, peru cadi guiracaʼ zusihuínnicaʼ dxandíʼ nácacaʼ ni (Mat. 7:21-23). Ne maca cá lu Stiidxaʼ Dios lu ca últimu dxi riʼ ziuu stale binni «zusihuínnicaʼ casi ora runi adorarcaʼ Dios» (2 Tim. 3:1, 5). Peru Biblia ná «ti fe si» nga nuu ne laa si ni nga riuulaʼdxiʼ Dios (biindaʼ Efesios 4:4-6).

17. ¿Tuu nga ca ni zinanda ejemplu stiʼ Jesús ne nácacaʼ religión ni dxandíʼ tiempu riʼ?

¹⁷ Yanna, ¿gunáʼ nga religión ni rusiidiʼ ni dxandíʼ yaʼ? Despué de bidúʼyanu ca prueba ca ne ejemplu bisaana Jesús, ne laani nga yenanda ca xpinni Cristu ni bibani lu primé siglu, rihuinni dxichi ca laacabe nga ca testigu stiʼ Jehová. Ti privilegiu naroʼbaʼ nga nuunu ndaaniʼ xquidxi Dios, nánnanu ni dxandíʼ de Jehová ne runibiaʼnu propósitu stiʼ. Nga runi guinaazeʼ dxiichinu ni runi crenu ne cadi gundaʼnu ni.