ARTÍCULO DE ESTUDIU 31
CANCIÓN 12 Nandxoʼloʼ Jiobá, Dios stidu
Ni maʼ biʼniʼ Jehová para gulá binni de lu náʼ pecadu ne guendaguti
«Nabé gunnaxhii Dios guidxilayú, nga runi bidii tobi lucha Xiiñiʼ» (JUAN 3:16).
TEMA
¿Xi maʼ biʼniʼ Jehová para gacané laanu gudxíʼlunu ne guni ganarnu pecadu ne guibáninu sin qué chuʼ dxi gátinu?
1, 2. a) ¿Xii nga pecadu, ne ximodo zanda guni ganarnu ni? (Biiyaʼ «Idea risaca»). b) ¿Xi zadúʼyanu lu artículo riʼ ne lu xcaadxi artículo stiʼ revista riʼ? (Laaca zanda gúʼyaluʼ yaza 32 ra ná «Lii, ni cayuundaʼ revista riʼ»).
¿ÑUULÁʼDXILUʼ ñánnaluʼ pabiáʼ nadxii Jehová lii la? Ti modo zanda gánnaluʼ ni nga ra guni estudiarluʼ ni maʼ bíʼnibe para gulabe lii de lu náʼ pecadu ne guendaguti. Naca pecadu a ca ti enemigu nabé feu ne laasinu qué zanda diʼ gúninu gastiʼ para guni ganarnu ni. Guiráʼ xixenu rucheʼnu guiráʼ dxi, purtiʼ gulenenu donda ne pur nga rátinu (Rom. 5:12). Peru nuu ti cosa galán ni naquiiñeʼ gánnanu: nanna dxíchinu zanda gacané Jehová laanu guni ganarnu pecadu.
2 Maʼ ziné Jehová biaʼ xhoopaʼ mil iza de cayacané binni gudxiilú pecadu. ¿Xiñee yaʼ? Purtiʼ guizáʼ nadxiibe laanu. Dede dxi bizaʼbe laanu guizáʼ nadxiibe laanu ne pur nga maʼ gudixhe íquebe gúnibe stale cosa ni ridxagayaanu para gacanebe laanu gudxíʼlunu pecadu. Dios nanna riné pecadu ca lu guendaguti ne qué racaláʼdxibe gati nin tobi de laanu, sínuque racaláʼdxibe guibáninu para siempre (Rom. 6:23). ¡Ne laaca ngaca nga ni racaláʼdxibe para lii! Lu artículo riʼ zacábinu chonna pregunta: primé, ¿xi maʼ biʼniʼ Jehová para gudii laanu ti esperanza?, guiropa, ¿xi biʼniʼ ca binni ni bibani tiempu gucuá Biblia para gusiéchecaʼ Jehová neca nácacaʼ binni ruchee? ne guionna, ¿xi biʼniʼ Jesús para gulá binni de lu náʼ pecadu ne guendaguti?
¿XI MAʼ BIʼNIʼ JEHOVÁ PARA GUDII LAANU TI ESPERANZA?
3. ¿Ximodo nga beeda gaca Adán ne Eva binni ruchee?
3 Dxi bizáʼ Jehová Adán ne Eva, gucaláʼdxibe nibánicaʼ nayecheʼ. Nga runi bidiibe laacaʼ ti lugar galán ra cuézacaʼ, bicheelabe laacaʼ ne bidiibe laacaʼ ti dxiiñaʼ galán, guchacaʼ Guidxilayú riʼ de binni ne ñúnicaʼ ni ti paraísu casi jardín de Edén que. Ti cosa si gúdxibe laacaʼ cadi gúnicaʼ ne gúdxibe laacaʼ záticaʼ pa qué guzuubacaʼ diidxaʼ. Ne maʼ nánnanu xi bizaaca: ti ángel malu ni cadi nadxii laacabe ninca Jehová, bicaa Adán ne Eva gucheenecaʼ Dios. Lugar de ñápacabe confianza Bixhózecabe ni nadxii laacabe, laga bíʼnicabe ni ná ángel malu que ne bicheenécabe Dios. Ne pur ngue, guca modo peʼ guníʼ Jehová que. Dede dxi que gudíxecabe pur ca ni bíʼnicabe: bióʼxhocabe ne gúticabe (Gén. 1:28, 29; 2:8, 9, 16-18; 3:1-6, 17-19, 24; 5:5).
4. ¿Xiñee nanalaʼdxiʼ Jehová pecadu, ne xiñee racanebe laanu gudxíʼlunu ni? (Romanos 8:20, 21).
4 Nabé triste guiráʼ ni bizaaca riʼ, peru bidii Jehová lugar guicá ni lu Biblia para guiénenu xiñee nabé nanaláʼdxibe pecadu. Ruxheleʼ pecadu ca laanu de Bixhózenu ni nuu guibáʼ ne rineni laanu lu guendaguti (Is. 59:2). Ne pur nga nabé riuulaʼdxiʼ Binidxabaʼ, ángel malu que, pecadu, nga runi bicaabe Adán ne Eva gucheecaʼ ne ngaca nga racaláʼdxibe né laanu. Zándaca guníʼ íquebe maʼ biʼniʼ ganarbe pur ni bíʼnibe ndaaniʼ jardín de Edén. Peru qué gánnabe pabiáʼ nadxii Jehová binni. Qué nuchaa diʼ Dios ni maca gudixhe ique guni para ca ni zá de Adán ne Eva. Cumu nadxiibe guiráʼ binni la? nagueendaca bidiibe laacaʼ ti esperanza (biindaʼ Romanos 8:20, 21). Nanna Jehová ziuu tu zannaxhii laa ne zuyúbicaʼ gacanebe laacaʼ para gudxiilucaʼ pecadu. Ne cumu laabe nga bizaʼbe laanu ne laabe nga Bixhózenu la? zúnibe guiráʼ ni nuu lu nabe para chuʼnu gaxha de laabe ne guni ganarnu pecadu ne guendaguti. ¿Xi zúnibe yaʼ?
5. ¿Ximodo ne padxí bizeeteʼ Jehová primé biaje de esperanza ni zudii binni? (Génesis 3:15).
5 (Biindaʼ Génesis 3:15, nota). Primé biaje bizeeteʼ Jehová de esperanza riʼ nga ora guniʼbe xi chiguizaaca Binidxabaʼ. Guníʼ Dios de ti descendencia nabé risaca purtiʼ ra tidiʼ tiempu zunitiluni Binidxabaʼ ne zuni chaahuini guiráʼ guendanagana ni bizulú ndaaniʼ jardín de Edén pur donda stiʼ Binidxabaʼ (1 Juan 3:8). Peru zacaná descendencia riʼ, purtiʼ Binidxabaʼ zuniná laabe, dede zátibe. Guizáʼ zuniná nga ladxidóʼ Jehová. Peru cadi pur gana si zazaaca ni, purtiʼ nanna Jehová pur laani zalá millón de binni de lu náʼ pecadu ne guendaguti.
¿XI BIʼNIʼ CA XPINNI DIOS DE DXIQUÉ PARA GUSIÉCHECAʼ DIOS NECA NÁCACAʼ BINNI RUCHEE?
6. ¿Xi biʼniʼ ca hombre ni gupa fe casi Abel ne Noé para chuʼcaʼ gaxha de Jehová?
6 ¿Ñee zanda chuʼ binni ruchee gaxha de Jehová la? Chaahuiʼ chaahuiʼ zigusiénebe ni ra zidiʼdiʼ tiempu. Bicheené si Adán ne Eva Jehová, primé binni ni gupa fe laabe nga Abel, guiropa xiiñicabe. Gunnaxhiibe Jehová, bisiéchebe laa ne guyuube gaxha de laa. Ne pur nga gucuá íquebe gudiibe laa ti sacrificiu. Cumu gúpabe dendxuʼ la? bidiibe chupa chonna de laacame Jehová. ¿Xi biʼniʼ Dios yaʼ? Guyuuláʼdxibe «modo naca Abel ne gucuaabe ofrenda stiʼ» (Gén. 4:4). Despué laaca gucuaabe sacrificiu ni biʼniʼ ca binni ni nadxii laabe ne ni napa confianza laabe, casi Noé (Gén. 8:20, 21). Ndiʼ rusihuinni zanda gusiecheʼ tuuxa laabe ne chuʼ gaxha de laabe neca naca binni ruchee. b
7. ¿Xi rizíʼdinu de ora gucalaʼdxiʼ Abrahán nudii xiiñiʼ casi sacrificiu?
7 Gunabaʼ Jehová Abrahán, sti hombre ni gupa fe, guni xiixa guizáʼ nagana: gudiibe Isaac, xiiñibe, casi sacrificiu. Zándaca guizáʼ gucaná ladxidóʼ Abrahán pur ni gunabaʼ Jehová laa guni. Peru neca zacá, guyuube dispuestu guzuubabe diidxaʼ. Maʼ para gúnibe ni, bicueeza Jehová laabe. Ni biʼniʼ Abrahán riʼ, rusiidini ca binni ni napa fe ti cosa nabé risaca: guyuu Jehová dispuestu gudii xiiñiʼ, ni nadxii, casi sacrificiu purtiʼ guizáʼ nadxiibe guiráʼ binni (Gén. 22:1-18).
8. ¿Xi bisihuinni ca sacrificiu ni bíʼnicabe casi ná Ley stiʼ Moisés? (Levítico 4:27-29; 17:11).
8 Caadxi iza despué, bidii Jehová Ley ca israelita, ne luni gúdxibe laacaʼ naquiiñeʼ gudiicaʼ maniʼ casi sacrificiu para gaca perdonar ca pecadu sticaʼ (biindaʼ Levítico 4:27-29; 17:11). Bisihuinni ca sacrificiu que zuni Jehová ti sacrificiu jma risaca, purtiʼ ra gúnibe ni zuxhabe pecadu stiʼ binni tobi si tiru. Biquiiñeʼ Dios ca profeta que para bisiénecaʼ napa xidé gacaná ne gati tobi lucha Xiiñiʼ Dios, descendencia ni maca cá zeeda que. Casi ñaca nudiicabe ti dendxuhuiiniʼ casi sacrificiu (Is. 53:1-12). Guníʼ ique ndiʼ: zudii Jehová xiiñiʼ ni nadxii casi sacrificiu para gulá guiráʼ binni de lu náʼ pecadu ne guendaguti, dede né lii.
¿XI BIʼNIʼ JESÚS PARA GULÁ BINNI?
9. ¿Xi bisihuinni Juan Bautista? (Hebreos 9:22; 10:1-4, 12).
9 Lu iza 29, biiyaʼ Juan Bautista Jesús de Nazaret ne gúdxibe laa: «¡Laguuyaʼ, Dendxuhuiiniʼ stiʼ Dios ni ribee pecadu ndaaniʼ guidxilayú!» (Juan 1:29). Zacá nga bisihuínnibe Jesús nga descendencia ni guníʼ Dios chigueeda que. Jesús peʼ nga chigudii xquendanabani casi sacrificiu. Ne pur laani zanda guilá binni de lu náʼ pecadu ne guendaguti tobi si tiru (biindaʼ Hebreos 9:22; 10:1-4, 12).
10. ¿Ximodo bisihuinni Jesús bedayubi ca pecador?
10 Bizaalaʼdxiʼ Jesús ca binni ni cayuubaʼ ladxidóʼ purtiʼ nácacaʼ binni ruchee ne biʼniʼ invitarbe laacaʼ chinándacaʼ laabe. Laabe nánnabe pur pecadu ca nga racaná guiráʼ xixé binni. Nga runi bidxíñabe cásica hombre ne zaqueca gunaa ni nabé runibiáʼ binni laacaʼ casi pecador. Laca laabe gudíxhebe ejemplu riʼ: «Ca binni nazaaca cadi caquiiñeʼ checaʼ ra nuu doctor, peru ca ni huará caquiiñeʼ checaʼ». Ne laaca guniʼbe: «Cadi zedayubeʼ binni nachaʼhuiʼ sínuque binni pecador» (Mat. 9:12, 13). Ne bisihuínnibe zacá ni pur ca ni bíʼnibe. Casi dxi biabe xa gunaa ni gudiibiʼ ñeebe né ca nisa ni cayete lú ne biʼniʼ perdonarbe ca pecadu stiʼ (Luc. 7:37-50). Ne neca nánnabe cadi jneza diʼ nabani xa samaritana ni yendee nisa ra bizé que, peru bisiidibe laa stale cosa de Dios (Juan 4:7, 17-19, 25, 26). Dede bidii Jehová laabe poder para guindísabe hombre, gunaa ne xcuidihuiiniʼ de lade gueʼtuʼ, ne zacá biʼniʼ ganarbe ni riaxané pecadu, laani nga guendaguti (Mat. 11:5).
11. ¿Xiñee guyuulaʼdxiʼ ca pecador chuʼcaʼ gaxha de Jesús?
11 Dede ca binni ni biʼniʼ pecadu grave guyuuláʼdxicaʼ guidxíñacaʼ Jesús. Ne qué ridxagayaanu gacalaʼdxiʼ binni chuʼ gaxha de laabe purtiʼ riabe laacaʼ ne runi sentirbe ni cayuni sentircaʼ (Luc. 15:1, 2). Biʼniʼ felicitarbe ne gucanebe laacaʼ purtiʼ bisihuínnicaʼ nápacaʼ fe laabe (Luc. 19:1-10). Bisihuinni Jesús riá binni casi peʼ modo runi Bixhózebe ni (Juan 14:9). Pur ca ni guniʼbe ne pur ca ni bíʼnibe, bisihuínnibe nadxii ne riá Jehová laanu, ne racalaʼdxiʼ gacané laanu guni ganarnu pecadu. Gucané Jesús ca binni pecador ti guyúbicaʼ guchaacaʼ ne chinándacaʼ laabe (Luc. 5:27, 28).
12. ¿Xi bisiidiʼ Jesús de guendaguti stiʼ?
12 Maca nanna Jesús xii ngue cabeza laa. Stale biaje gúdxibe ca discípulo stibe zuni traicionárcabe ne zucaacabe laabe lu ti yaga (Mat. 17:22; 20:18, 19). Ne laaca nánnabe zuxhá sacrificiu stibe pecadu stiʼ guiráʼ binni, casi maca guníʼ Juan ne ca profeta. Ne laaca bisiidibe despué de gátibe zabídxibe «guiráʼ clase binni» (Juan 12:32). Ca ni gapa fe Jesús ne chinándacaʼ ca pasu stibe zanda gusiéchecaʼ Jehová ne maʼ qué zácacaʼ «esclavu stiʼ pecadu» (Rom. 6:14, 18, 22; Juan 8:32). Ne para gaca ni la? guca Jesús nadxibalú ne guyuu dispuestu gatiʼ neca nanna nabé feu modo chiguuticabe laa (Juan 10:17, 18).
13. ¿Ximodo guti Jesús, ne xi rusiidiʼ guendaguti stibe laanu de Jehová? (Biiyaʼ ca imagen ca).
13 Biʼniʼ traicionárcabe Jesús, gunaazecabe laa, guluudícabe laa, guníʼcabe cosa ni cadi dxandíʼ de laa, bigaanicabe donda ique ne guizáʼ feu modo bininácabe laa. Ne últimu la? bicaa caadxi soldadu laabe lu ti yaga para guuticaʼ laabe. Biʼniʼ huantar Jesús guiráʼ ni gudiʼdiʼ que, peru nabé biuubaʼ ladxidóʼ Jehová ora biʼyaʼ guiráʼ ni cayúnicabe Xiiñiʼ. Neca guizáʼ nadxiibe Xiiñibe ne nápabe stale poder, peru qué ñúnibe gastiʼ. ¿Xiñee yaʼ? Purtiʼ nadxiibe binni. Jesús peʼ guníʼ: «Nabé gunnaxhii Dios guidxilayú, nga runi bidii tobi lucha Xiiñiʼ, ti guiráʼ tu gapa fe Xiiñibe cadi guinitilú, sínuque guicaa guendanabani ni qué zaluxe» (Juan 3:16).
Guyuu Jehová dispuestu guiuubaʼ ladxidóʼ ora bidii lugar biiticabe Xiiñiʼ ti zacá ganda guilanu de lu náʼ pecadu ne guendaguti. (Biiyaʼ párrafo 13).
14. ¿Xi riziidiluʼ de sacrificiu stiʼ Jesús?
14 Sacrificiu stiʼ Jesús nga prueba jma risaca ni nápanu ni rusihuinni pabiáʼ nadxii Jehová guiráʼ ca ni zá de Adán ne Eva. Ne laaca rusihuínnini pabiáʼ nadxiibe lii. ¿Cadi dxandíʼ ridxagayaaluʼ ora guiníʼ íqueluʼ guiráʼ sacrificiu ni biʼniʼ Dios para gulá lii de lu náʼ pecadu ne guendaguti la? (1 Juan 4:9, 10). Racaláʼdxibe gacanebe cada tobi de laanu gudxíʼlunu pecadu ne guni ganarnu ni.
15. ¿Xi naquiiñeʼ gúninu para gacané sacrificiu stiʼ Jesús laanu?
15 Sacrificiu ni biʼniʼ Dios ra bidii tobi lucha Xiiñiʼ gueeda gati pur laanu, nácani ti regalu ni racané laanu para guixá ca pecadu stinu. Peru caquiiñeruʼ gúninu xiixa. Juan Bautista ne zaqueca Jesucristu bisiénecaʼ xi naquiiñeʼ gúninu: «Lagaca arrepentir, purtiʼ maʼ bidxiña Reinu ni nuu guibáʼ» (Mat. 3:1, 2; 4:17). Nga runi, pa dxandíʼ peʼ racaláʼdxinu gudxíʼlunu pecadu ne chuʼnu gaxha de Bixhózenu ni nadxii laanu la? risaca peʼ nga gaca arrepentirnu. Peru ¿xi riníʼ gaca arrepentir binni, ne ximodo racaneni laanu gusiéchenu Jehová neca nácanu binni ruchee yaʼ? Lu sti artículo ca zacábinu ca pregunta riʼ.
CANCIÓN 18 Xquíxepeʼ lii pur ni bisigáʼdeluʼ laadu
a IDEA RISACA: Riquiiñeʼ Biblia diidxaʼ pecadu para guiníʼ de chupa cosa. Primé, nuu biaje riquiiñeni ora runi tuuxa ti cosa ni ná Jehová cadi jneza o ni qué riuuláʼdxibe. Guiropa, laaca pecadu nga guendaruchee ni bisaanané Adán laanu ne pur pecadu riʼ nga rati guiráʼ binni.
