1. ¿Xi runi ti binni ni dxandíʼ maʼ guca arrepentir?

 ORA rúninu xiixa ni cadi jneza, nabé risaca nga gaca arrepentirnu. Casi ná Biblia, binni ni maʼ guca arrepentir, raca nanalaʼdxiʼ ca cosa malu ni biʼniʼ, maʼ qué runi ni ne riguixhe ique cadi guiaba luni sti biaje (biyubi diidxaʼ «arrepentir» lu Glosario).

2. ¿Xiñee naquiiñeʼ guiziidiʼ guiráʼ xixenu de modo naquiiñeʼ gaca arrepentir tuuxa? (Nehemías 8:​9-11).

² Guiráʼ xixenu nga naquiiñeʼ guizíʼdinu de modo naquiiñeʼ gaca arrepentir tuuxa. ¿Xiñee yaʼ? Purtiʼ guiráʼ dxi nga rucheʼnu. Cumu guiranu nga zanu de Adán ne Eva la? guiranu rucheʼnu ne rátinu (Rom. 3:23; 5:12). Guirutiʼ rilá de laani. Dede binni ni gupa stale fe, casi apóstol Pablo, bidxiilucaʼ pecadu (Rom. 7:​21-24). Peru qué riníʼ diʼ nga guidubi dxi naquiiñeʼ guiuubaʼ ladxidoʼno purtiʼ nácanu binni ruchee. Riá Jehová laanu ne racalaʼdxiʼ guibáninu nayecheʼ. Guiníʼ íquenu ca judíu ni bibani ca dxi bibani Nehemías (biindaʼ Nehemías 8:​9-11). Qué ñacalaʼdxiʼ diʼ Jehová ñuu xhaatacabe triste pur ca pecadu stícabe, sínuque ñúnicabe xhiiñaʼ né guendanayecheʼ. Laabe nánnabe riuu binni nayecheʼ ora raca arrepentir, pur nga racaláʼdxibe gusiidibe laanu de laani. Nanna dxíchinu riá Bixhózenu ni nuu guibáʼ laanu, nga runi zuni perdonarbe ca pecadu stinu pa gaca arrepentirnu.

3. ¿Xi zadúʼyanu lu artículo riʼ?

³ Lu artículo riʼ zazíʼdinu xcaadxi cosa de modo naquiiñeʼ gaca arrepentir tuuxa. Primé, zadúʼyanu xi bisiidiʼ Jehová guidxi Israel de modo naquiiñeʼ gaca arrepentircaʼ. Despué, zadúʼyanu ximodo guucané Jehová binni gaca arrepentircaʼ. Ne últimu, zadúʼyanu xi biziidiʼ ca xpinni Jesús de laani.

 NI BISIIDIʼ JEHOVÁ GUIDXI ISRAEL DE MODO NAQUIIÑEʼ GACA ARREPENTIRCAʼ

4. ¿Xi bisiidiʼ Jehová guidxi Israel de modo naquiiñeʼ gaca arrepentircaʼ?

⁴ Dxi biʼniʼ Jehová ca israelita xquidxi, bíʼninebe laacaʼ ti pactu o ti acuerdu. Biʼniʼ prometer Jehová zapa ne zaguu ndaayaʼ laacabe pa chinándacabe ca ley stiʼ. Ne gúdxibe laacaʼ: «Ca mandamientu ni cudieeʼ lii yannadxí riʼ cadi nagana cani para lii ne zanda gúniluʼ ni nácani» (Deut. 30:​11, 16). Peru pa gudxiidéchecabe laabe ra guni adorárcabe xcaadxi Dios, maʼ qué ziuuláʼdxibe ni gúnicaʼ ne naná zaguíxecaʼ pur ni gúnicaʼ. Yanna, pa guizaaca nga, ¿riníʼ nga maʼ qué ziuu dxi chuulaʼdxiʼ Dios ni gúnicabe la? Coʼ, purtiʼ Ley que ná zanda guibiguétacabe ra nuu Jehová, Dios stícabe, ne guzuubacabe stiidxaʼ (Deut. 30:​1-3, 17-20). Ni caninu raríʼ nga zanda gaca arrepentírcabe. Ne pa gúnicabe ni la? Jehová zudxiguetaʼ laacabe sti biaje ra nuu ne zaguu ndaayaʼ laacabe.

5. ¿Ximodo bisihuinni Jehová qué ñuuyaʼ xquidxi casi binni ni maʼ qué gapa remediu? (2 Reyes 17:​13, 14).

⁵ Guidxi ni gulí Jehová que, bidxiideche laabe stale biaje. Cadi biʼniʼ adorársicaʼ bidóʼ, sínuque bíʼnicaʼ xcaadxi cosa feu. Ne pur ni bíʼnicabe que naná modo gudíxecabe ni. Peru qué ñuuyaʼ diʼ Jehová laacabe casi binni ni maʼ qué gapa remediu, sínuque stale biaje biseendabe profeta para cuʼ gana laacabe gaca arrepentírcabe ne guibiguétacabe ra nuu (biindaʼ 2 Reyes 17:​13, 14).

6. ¿Ximodo biquiiñeʼ Jehová ca profeta para gusiidibe xquídxibe pabiáʼ risaca gaca arrepentircaʼ? (Biiyaʼ imagen ca).

⁶ Dxiqué la? gatigá ruseendaʼ Jehová ca profeta stiʼ ra nuu ca israelita para quixhenabe ne cuʼ jnézabe laacaʼ. Biquiiñeʼ Dios Jeremías para gudxi xquidxi ca diidxaʼ riʼ: «Biguetaʼ, Israel ni qué runa [ . . . ]. Qué zuuyatuxhuaʼ laatu purtiʼ nacaʼ leal [ . . . ]. Qué zapaʼ xiana para siempre. Gunna maʼ bicheeluʼ, purtiʼ maʼ bidxiidécheluʼ Jehová» (Jer. 3:​12, 13).  Ne biquiiñebe Joel para guniʼbe: «Laguibiguetaʼ ra nuaaʼ de guidubi ladxidoʼto» (Joel 2:​12, 13). Ne laaca gúdxibe Isaías guiníʼ: «Lagusiá laatu; lacuee de neza luaʼ ca cosa malu ni rúnitu; lagusaana de gúnitu cosa malu» (Is. 1:​16-19). Ne biʼniʼ mandarbe Ezequiel guinabadiidxaʼ: «¿Ñee rábitu riuuladxeʼ gati ti binni malu la? [ . . . ] ¿Ñee cadi rábitu jma riuuladxeʼ gusaanabe neza stibe ne zaa nabánibe la?». «Qué riuuladxeʼ diaʼ gati guirutiʼ [ . . . ]. Nga runi laguibiguetaʼ ra nuaaʼ ne laguibani» (Ezeq. 18:​23, 32). Nabé riecheʼ Jehová ora raca arrepentir ti binni de ca pecadu stiʼ, purtiʼ ni racaláʼdxibe nga guibani binni sin qué chuʼ dxi gati. Ne qué riguidxináʼ si Jehová ne ribeza dede ora quixhe ique binni ca guibiguetaʼ ra nuube ne oracaruʼ gacanebe laa. Guidúʼyanu caadxi ejemplu.

7. ¿Xi bisiidiʼ Jehová xquidxi ra biquiiñeʼ ejemplu stiʼ Oseas ne stiʼ xheelaʼ?

⁷ Guidúʼyanu xi bisiidiʼ Jehová xquidxi ra biquiiñebe profeta Oseas ne Gómer, xheelaʼ. Guyuuné gunaa riʼ gadxé hombre ne despué bisaanabe Oseas pur xcaadxi hombre. ¿Ñee biiyaʼ Jehová laabe casi ti gunaa ni maʼ qué gapa remediu la? Cumu ruuyabe xi nuu ndaaniʼ ladxidóʼ binni la? gúdxibe Oseas: «Guyé sti biaje, gunnaxhii gunaa ni maʼ gunnaxhii sti hombre ne ni nuuné sti hombre, cásica nadxii Jehová Israel, xquidxi, laga cayuni adorárcabe xcaadxi Dios» (Os. 3:1; Prov. 16:2). Cadi guiaandaʼ laanu canagucheeruʼ Gómer. Peru gudxi Jehová Oseas guni perdonar laabe ne guibiguetané laabe. a Né ejemplu riʼ bisiidiʼ Jehová xquidxi qué ruuyadibe laacaʼ casi binni ni maʼ qué gapa remediu. Neca cayúnirucaʼ pecadu nabé feu, qué nusaanabe de ñánnaxhiibe laacaʼ, ne biseendarube profeta para gacané laacaʼ gaca arrepentircaʼ ne guchaacaʼ modo nabánicaʼ. Peru Jehová, Dios ni ruuyaʼ ladxidóʼ binni, ¿ñee zacanebe tuuxa gaca arrepentir pa cayúniruʼ ti pecadu grave la? (Prov. 17:3). Guidúʼyanu ni.

XIMODO RACANÉ JEHOVÁ CA BINNI NI CUCHEE GACA ARREPENTIRCAʼ

8. ¿Xi biʼniʼ Jehová para gacané Caín gaca arrepentir? (Génesis 4:​3-7; biiyaʼ imagen ca).

⁸ Caín nga primé xiiñiʼ Adán ne Eva. Ne pur nga laaca beeda gácabe binni ruchee. Ne lu Biblia ná «puru cosa malu bíʼnibe» (1 Juan 3:12). Ne zándaca pur nga, ora bidii ofrenda stiʼ Jehová, laa qué ñuulaʼdxiʼ «modo naca Caín ne qué nicaabe ofrenda stiʼ». Peru lugar de nuchaa modo naca, laga bidxiichi ne guyuu triste. ¿Xi biʼniʼ Jehová yaʼ? Guniʼné laabe (biindaʼ Génesis 4:​3-7). Né stale cariñu guniʼné Jehová Caín guiníʼ ique xi cayuni. Gúdxibe laa zanda gusiecheʼ ladxidoʼbe sti biaje ne laaca gudxi Jehová laabe xi zazaacabe pa qué guchaabe xpiaʼbe. Peru qué nucaadiaga Caín Jehová ne qué nudiibe lugar ñacané laabe ñaca arrepentirbe. ¿Xi biʼniʼ Jehová pur ngue yaʼ? ¿Ñee gudixhe íquebe maʼ qué ziuuruʼ dxi gacanebe guirutiʼ gaca arrepentir la? ¡Coʼ, cadi zacá diʼ ni!.

9. ¿Ximodo gucané Jehová David gaca arrepentir?

⁹ Nabé gunnaxhii Jehová rey David. Guniʼbe naca David «ti hombre ni rusiecheʼ» ladxidoʼbe (Hech. 13:22). Peru nabé grave ca pecadu ni biʼniʼ David, guyuunebe  ni cadi xheelabe ne biitibe ti hombre, ne Ley stiʼ Moisés ná naquiiñeʼ gátibe (Lev. 20:10; Núm. 35:31). Peru cumu nachaʼhuiʼ Jehová la? biyubi modo gacané laabe, ne biseendaʼ profeta Natán para guiniʼné laabe, neca caʼruʼ gusihuinni David maʼ guca arrepentir. b Biquiiñeʼ Natán ti ejemplu para chindá ndaaniʼ ladxidóʼ David. Oraqueruʼ bidii David cuenta bicheené Jehová ne guca arrepentir (2 Sam. 12:​1-14). Bicaabe ti salmo ra bisihuínnibe pabiáʼ naná nuu ladxidoʼbe (Sal. 51, encabezamiento). Dede yanna nabé maʼ gucané salmo riʼ stale binni ni maʼ bichee ne maʼ bicaani laacaʼ gaca arrepentircaʼ. ¿Cadi dxandíʼ riéchenu ora ridúʼyanu né stale cariñu gucané Jehová David gaca arrepentir la?

10. ¿Ximodo runi sentirluʼ ora gánnaluʼ napa Jehová paciencia ne runi perdonar laanu?

¹⁰ Qué riuulaʼdxiʼ diʼ Jehová nin ti pecadu, sínuque nanaláʼdxibe guiráʼ cani (Sal. 5:​4, 5). Peru Jehová nanna nácanu binni ruchee, ne cumu nadxiibe laanu la? racaláʼdxibe gacanebe laanu gudxíʼlunu pecadu. Racaláʼdxibe gacanebe dede ca binni ni guizáʼ maʼ bichee gaca arrepentircaʼ ne guidxíñacaʼ laabe. ¡Guizáʼ ratadxí ladxidoʼno gánnanu nga! Ora riníʼ íquenu paciencia ni napa Jehová ne modo runi perdonarbe binni, rucaa nga laanu gácanu fiel ne gaca arrepentirnu nagueendaca ora gucheʼnu. Yanna guidúʼyanu xi biziidiʼ ca discípulo stiʼ Jesús de modo naquiiñeʼ gaca arrepentircaʼ.

NI BIZIIDIʼ CA XPINNI JESÚS DE MODO NAQUIIÑEʼ GACA ARREPENTIRCAʼ

11, 12. ¿Xi ejemplu biquiiñeʼ Jesús para gusihuinni siempre nuu Bixhózebe listu para guni perdonar binni? (Biiyaʼ imagen).

¹¹ Lu primé siglu que, maʼ bedandá tiempu guihuinni Mesías. Casi bidúʼyanu lu artículo gudiʼdiʼ que, biquiiñeʼ Jehová Juan Bautista ne Jesucristu para gusiidicaʼ pabiáʼ risaca nga gaca arrepentir binni (Mat. 3:​1, 2; 4:17).

 ¹² Dxi biʼniʼ predicar Jesús, bisiidibe siempre nuu Bixhózebe listu para guni perdonar binni. Ne bihuinni zacá ni ora biquiiñebe ejemplu stiʼ hijo pródigo. Bisaana hombrehuiiniʼ que lidxi ne bibani modo gucalaʼdxiʼ. Peru despué «beeda xpiaanibe» ne biguétabe ra nuu bixhózebe. ¿Xi biʼniʼ bixhózebe óraque yaʼ? Jesús guníʼ «de zíturuʼ zeedabe, biiyaʼ bixhózebe laabe, biá laabe, bixooñeʼ ne gudiidxi laabe ne bidii bixiduʼ laabe». Zeʼ hombrehuiiniʼ que zinabaʼ gaca esclavu stiʼ bixhoze. Peru bixhózebe racalaʼdxiʼ guni perdonar laabe ne cuʼ laabe ndaaniʼ familia stiʼ sti biaje. Guníʼ bixhózebe: «Xiiñeʼ riʼ [ . . . ] binítibe peru maʼ bidxélabe» (Luc. 15:​11-32). Ante gueeda Jesús lu Guidxilayú riʼ, stale biaje biiyabe ximodo biá Jehová ca binni ni maʼ guca arrepentir de ca pecadu stiʼ. Nga runi guizáʼ sicarú bisiénebe modo riá Bixhózenu ni nuu guibáʼ binni.

13, 14. ¿Xi biziidiʼ apóstol Pedro de modo naquiiñeʼ gaca arrepentir ti binni, ne xi bisiidibe de laani? (Biiyaʼ imagen ca).

¹³ Stale cosa biziidiʼ apóstol Pedro de modo naquiiñeʼ gaca arrepentir binni ne modo naquiiñeʼ guni perdonar. Stale biaje bichee Pedro, peru siempre guyuu Jesús listu para guni perdonar laabe. Chonna biaje guniʼbe qué runibiaʼbe Jesús ne despué guizáʼ naná guyuu ladxidoʼbe pur ni bíʼnibe (Mat. 26:​34, 35, 69-75). Peru biasa si Jesús de lade gueʼtuʼ bihuinni nezalú Pedro, zándaca ora nuu Pedro stubi (Luc. 24:​33, 34; 1 Cor. 15:​3-5). Nanna Jesús maʼ guca arrepentir Pedro, ngue runi gudixhedxibe ladxidóʼ ne gúdxibe laa maʼ biʼniʼ perdonarbe laa (biiyaʼ Marcos 16:7 ne nota de estudiu diidxastiá «y a Pedro»).

¹⁴ Pur ni bizaaca Pedro, gunna dxichiʼ ximodo nga gaca arrepentir ti binni ne  guni perdonárcabe laa. Nga runi gunda guniʼbe de laani nezalú xcaadxi binni. Gudiʼdiʼ si Saa stiʼ Pentecostés, bidii Pedro ti discursu nezalú stale judíu ra guniʼbe laacaʼ nga biiticaʼ Mesías, peru né stale cariñu gúdxibe laacaʼ: «Lagaca arrepentir ne laibiguetaʼ ra nuu Dios para guixiá ca pecadu stitu, ti guedané Jehová tiempu para gatadxí ladxidoʼto» (Hech. 3:​14, 15, 17, 19). Né ca diidxaʼ riʼ bisihuinni Pedro xii nga runi ti binni ni raca arrepentir, ribiguetaʼ ra nuu Dios, ni riníʼ ca diidxaʼ riʼ nga guchaabe modo riníʼ íquebe, gusaana de gúnibe cosa ni cadi jneza cayúnibe ne guzulú gúnibe ca cosa ni riuulaʼdxiʼ Dios. Apóstol ca guníʼ zuxhá Jehová guiráʼ ca donda stiʼ binni o zunitilube cani. Ne stale iza despué bisiene Pedro ndiʼ de Jehová: «Nápabe paciencia laatu purtiʼ qué racaláʼdxibe guinitilú nin tobi, ni racaláʼdxibe nga gaca arrepentir guiráʼ binni» (2 Ped. 3:9). ¡Aque galán nga gánnanu dxandíʼ peʼ runi perdonar Jehová ca pecadu stinu, neca gúninu pecadu guizáʼ grave!

15, 16. a) ¿Ximodo biziidiʼ Pablo xi riníʼ guni perdonárcabe tuuxa? (1 Timoteo 1:​12-15). b) ¿Xi zadúʼyanu lu sti artículo ca?

¹⁵ Huaxiéʼ si binni huayaca arrepentir de guiráʼ cosa ni huayuni casi biʼniʼ Saulo de Tarso ni. Nabé feu modo guzanándabe ca xpinni Cristu. Nga runi, stale tu laa biiyaʼ nagana para guchaabe. Peru cadi zacá diʼ biiyaʼ Jesús laabe. Cásica laabe ne zaqueca Bixhózebe, biiyacabe ca cualidad galán ni gupa Saulo. Jesús guníʼ: «Maʼ gulieeʼ hombre riʼ» (Hech. 9:15). Dede bíʼnibe ti milagru para gucanebe Saulo gaca arrepentir (Hech. 7:58–8:3; 9:​1-9, 17-20). Despué, dxi maʼ naca Saulo xpinni Cristu ne maʼ binibiáʼcabe laa casi apóstol Pablo, stale biaje bidiibe xquixe peʼ Jehová ne Jesús purtiʼ gúcacaʼ nachaʼhuiʼ ne biacaʼ laabe (biindaʼ 1 Timoteo 1:​12-15). Cumu guizáʼ cayéchebe la? guniʼbe: «Tantu nachaʼhuiʼ Dios nga nuu gacané lii gaca arrepentirluʼ» (Rom. 2:4).

¹⁶ Ti biaje, gunna Pablo guca ti bulla ndaaniʼ congregación de Corinto purtiʼ guyuu ti binni cayuni practicar pecadu sexual. ¿Ximodo biʼniʼ chaahuibe guendanagana que yaʼ? Ni bíʼnibe ca, rusiidini laanu pabiáʼ nadxii Jehová laanu ne modo riguu jneza binni, ne pabiáʼ risaca guianu xcaadxi. Lu sti artículo ca zaninu jma de relatu riʼ.