Sicaríʼ gudxi Pablo ca xpinni Cristu de Tesalónica: «Pa nuu tuuxa qué naʼ guni ni bicaʼdu lu carta riʼ la? lachuu cuidadu né binni ca» (2 Tes. 3:14). Dxiqué rininu ca ancianu si nga naquiiñeʼ chinanda ni riete lu textu ca. Ne pa tuuxa hermanu qué naʼ chinanda ca principiu zeeda lu Biblia, neca maʼ stale biaje bidiicabe conseju laa la? naquiiñeʼ gudii ca ancianu ca ti discursu ra congregación para gápacabe cuidadu né laabe. Ne dede dxi que, maʼ cadi naquiiñeʼ guidxaaga ca hermanu ca laabe, sínuque ra reunión ne lu predicación si nga zanda gúnicaʼ ni.

Peru yanna maʼ biénenu cada tobi de ca hermanu nga naquiiñeʼ chinanda conseju ni bidii Pablo riʼ. Nga runi, cadi caquiiñeʼ gudii ca ancianu ca ti discursu de laani. ¿Xiñee guca cambiu riʼ yaʼ? Para gánnanu ni, guidúʼyanu xidé caníʼ apóstol Pablo ora bidii conseju riʼ.

Guníʼ Pablo ndaaniʼ congregación de Tesalónica nuu hermanu ni «qué ruzuubaʼ diidxaʼ» ne qué rinanda ca conseju ni rudii Stiidxaʼ Dios. Ti biaje guyé Pablo ra nuucabe ne gudxi laacabe: «Pa qué naʼ tuuxa guni dxiiñaʼ la? cadi gó». Neca bidiibe conseju riʼ peru guyuu caadxi hermanu qué ninacaʼ ñúnicaʼ dxiiñaʼ neca ñanda ñúnicaʼ ni. Ne laaca riuucaʼ lu xpida binni. ¿Ximodo naquiiñeʼ guni tratar ca hermanu que binni ni cadi cuzuubaʼ diidxaʼ riʼ yaʼ? (2 Tes. 3:​6, 10-12).

Pablo guníʼ: «Lachuu cuidadu né binni ca». Lu diidxaʼ griegu la? racané ca diidxaʼ ca laacabe gudiicabe cuenta tuu nga binni que ne chúʼcabe cuidadu para cadi guicá xpiaʼ binni que laacabe. Cadi ca ancianu si nga gudxi Pablo ca diidxaʼ riʼ, sínuque gúdxibe ni guiráʼ ca hermanu de congregación que (2 Tes. 1:1; 3:6). Nga runi, pa guʼyaʼ ti xpinni Cristu cadi zinanda ti hermanu ca conseju stiʼ Biblia la? laa peʼ zacaa decisión de guixeleʼ de laabe.

Peru ¿ñee caníʼ ndiʼ zuni tratárcabe binni ca casi tuuxa ni maʼ guleecabe de ndaaniʼ congregación la? Coʼ, purtiʼ Pablo guníʼ: «Lagudii conseju laa casi guendabiʼchiʼ». Nga runi, cada tobi de ca hermanu zadxaagacaʼ laabe lu reunión ne predicación, peru qué zuni invitarcaʼ laabe ora checaʼ paxaraa o gúnicaʼ xiixa casi ti reunión social. Ne Pablo bisiene xi pur naquiiñeʼ gúnicabe ni: «Para guituí lú» binni ca. Pa gusaana de guidxaagacabe hermanu ni qué naʼ guzuubaʼ diidxaʼ riʼ, zanda gucaani laa guituí lú ne guchaa modo laa (2 Tes. 3:​14, 15).

Yanna, ¿laanu yaʼ? ¿Ximodo zanda chinándanu conseju riʼ? Primé, naquiiñeʼ guidúʼyanu pa dxandíʼ peʼ qué racalaʼdxiʼ hermanu ca guzuuba diidxaʼ, casi guníʼ Pablo. Peru cadi caniʼbe de ca hermanu ni ricaa decisión gadxé peʼ de ca decisión ni ricaanu ora rinanda ni ná conciencia stiʼ ne laaca cadi caniʼbe de ca hermanu ni runi xiixa cosa ni riuulaʼdxiʼ neca laanu qué riuuláʼdxinu ni. Ne laaca cadi caniʼbe de ti hermanu ni bininá o bichiichi laanu, sínuque caniʼbe de ca hermanu ni maʼ gucuaa conseju peru laapecaʼ qué nacaʼ guzuubacaʼ diidxaʼ.

Pa nuu ti hermanu qué naʼ chinanda ca conseju stiʼ Biblia a la? cada tobi de laanu naquiiñeʼ guicaa decisión de cadi guidxaaganu laabe o cadi guni invitarnu laabe ora gúninu xiixa, casi ti reunión social. Pa maʼ gucuaanu decisión ca la? gábinu ni familia si stinu ni, nabeza si ndaaniʼ lídxinu. Peru zadxaagarunu laabe lu reunión ne lu predicación. Ne ora maʼ bisaanabe ca cosa cadi jneza ni cayúnibe la? zadxaaganu laabe cásica bíninu ni dxiqué.