1. ¿Xi caquiiñeʼ guni guiráʼ ca xpinni Cristu?

¿ÑUULÁʼDXINU nuxóʼñenu lu ti carrera ni nánnanu nabé nadipaʼ jmaruʼ si pa huaranu o maʼ bidxáganu la? Zándaca coʼ njaʼ. Neca zacá, guníʼ apóstol Pablo cuxooñeʼ ca xpinni Cristu lu ti carrera (Heb. 12:1). Peru biaʼ tiica iza o stipa nápanu, guiranu caquiiñeʼ guni huantarnu «dede ora gueeda fin» para guicaanu premiu ni maʼ guníʼ Jehová chigudii laanu (Mat. 24:13).

2. Casi ná 2 Timoteo 4:7, 8, ¿xiñee gunda guníʼ Pablo cuxóʼñenu lu ti carrera?

² Gunda guníʼ Pablo cuxooñeʼ ca xpinni Cristu lu ti carrera purtiʼ laa peʼ maʼ yendá lu meta (biindaʼ 2 Timoteo 4:7, 8). Peru ¿xi carrera caníʼ Pablo raríʼ yaʼ?

3. ¿Xi carrera nga guníʼ apóstol Pablo cuxóʼñenu?

³ Guyuu biaje biquiiñeʼ apóstol Pablo caadxi ejemplu stiʼ ca juegu ni guca ndaaniʼ guidxi Grecia dxiqué para gusiidiʼ xiixa cosa risaca (1 Cor. 9:25-27; 2 Tim. 2:5). Chupa chonna biaje bichaagabe xquendanabani ti xpinni Cristu casi ti carrera (1 Cor. 9:24; Filip. 2:16 Gál. 2:2; nota). Ruzulú ruxooñeʼ ti binni lu carrera riʼ dxi raca dedicar Jehová ne riuunisa (1 Ped. 3:21). Ne rindá lu meta ora gudii Jehová laa guendanabani ni qué zaluxe (Mat. 25:31-34, 46; 2 Tim. 4:8).

4. ¿Xi zadúʼyanu lu artículo riʼ?

⁴ Zeeda gaca carrera ni cuxooñeʼ ca xpinni Cristu casi ti carrera ra ruxooñeʼ ca atleta. ¿Xiñee yaʼ? Primé, purtiʼ laaca naquiiñeʼ guxóʼñenu lu ti neza sin guiréʼchunu. Guiropa, purtiʼ caquiiñeʼ quixhe íquenu chindanu lu meta. Ne guionna,  caquiiñeʼ gudxíʼlunu intiica guendanagana guidxaagalunu.

5. ¿Gunáʼ nga neza caquiiñeʼ guxooñeʼ ca xpinni Cristu, ne xiñee?

⁵ Para ganda guni ganar ca binni ni ziguxooñeʼ lu ti carrera premiu la? caquiiñeʼ guxooñecaʼ lu neza ni maʼ nexheʼ checaʼ. Zacaca nga laanu, pa racaláʼdxinu guicaanu guendanabani ni qué zaluxe la? caquiiñeʼ guxóʼñenu lu neza o guibáninu modo naquiiñeʼ guibani ca xpinni Cristu (Hech. 20:24; 1 Ped. 2:21). Peru Binidxabaʼ ne ca ni runi ni ná racaláʼdxicaʼ cueechucaʼ ca xpinni Dios ne gucaacaʼ laacabe gúnicabe «guiráʼ ca cosa malu ni» rúnicaʼ (1 Ped. 4:4). Runi búrlacaʼ modo nabáninu ne riniʼcaʼ jma galán nabánicaʼ purtiʼ nápacaʼ libertad. Peru cadi dxandíʼ ni riníʼcabe (2 Ped. 2:19).

6. ¿Xi rizíʼdinu de ejemplu stiʼ Brian?

⁶ Pa racalaʼdxiʼ tuuxa cheʼ lu neza stiʼ ca binni ni runi ni ná Binidxabaʼ la? qué zandaa zudii cuenta cadi libre ca binni ni zeʼ lu neza ca, sínuque nácacaʼ esclavu (Rom. 6:16). Guidúʼyanu ni bizaaca ti hermanu láʼ Brian. Dxi nahuiinibe la? bisiidiʼ jñaabe ne bixhózebe laabe ca principiu zeeda lu Biblia. Peru dxi maʼ nácabe joven guníʼ íquebe pa dxandíʼ zacané ni biziidibe que laabe guibánibe nayecheʼ. Ngue runi, gudixhe íquebe guibánibe modo ribani ca ni runi ni ná Binidxabaʼ. Sicaríʼ guníʼ Brian: «Qué niníʼ iqueʼ pa libertad ni cuyubeʼ que nucaani naa guiaba lu caadxi viciu». Ra gudiʼdiʼ tiempu bizulú guca drogarbe, guxúdxibe ne biʼniʼ practicarbe pecadu sexual. Ne laacaʼ guniʼbe: «Ra gudiʼdiʼ iza guduubaʼ droga jma nadipaʼ ne guca nagana para naa gusaanaʼ guiráʼ ni. Dede bituaaʼ droga para guiree bueltu stiʼ viciu gupaʼ que». Peru ra gudiʼdiʼ tiempu bizulú gúpabe confianza Jehová ne biʼniʼ respetarbe ca norma stiʼ. Bichaabe modo nabánibe ne guyuunísabe lu iza 2001. Yanna huaxa dxandíʼ nayecheʼ nabánibe purtiʼ maʼ cuxooñebe lu carrera ra zeʼ ca xpinni Cristu. *

7. Casi ná Mateo 7:13, 14, ¿xi chupa neza nuu?

⁷ Nabé risaca cuinu xi neza nga caquiiñeʼ guxóʼñenu. Purtiʼ qué racalaʼdxiʼ Binidxabaʼ guxóʼñenu lu neza nabéʼ ni riné laanu «lu guendanabani», sínuque racaláʼdxibe guxóʼñenu lu neza xilaga, neza ra zeʼ mayoría de binni guidxilayú. Jma fácil nga cheʼ binni lu neza riʼ, peru rineni laacaʼ lu  «guendaguti» (biindaʼ Mateo 7:13, 14). Pa qué racaláʼdxinu chuʼ ni guxheleʼ laanu de lu neza ni riné binni lu guendanabani la? caquiiñeʼ gápanu confianza Jehová ne gucaʼdiáganu ni gábibe laanu.

8. ¿Xi runi ca ni ziguxooñeʼ lu ti carrera ora rirenda ñeecaʼ ne riábacaʼ?

⁸ Ca binni ni ziguxooñeʼ lu ti carrera ruuyadxicaʼ ra ziguxooñecaʼ para cadi guirenda ñeecaʼ. Peru neca zacá, zándaca guiaba ñeecabe ndaaniʼ ti barranca o guidxelasaa sti corredor laacabe. Pa guiábacabe la? riásacabe ne runi seguírcabe lu carrera ca. Qué riuucabe xizaa xiñee biábacabe, sínuque riguixhe íquecabe chindácabe lu meta ne guicaacabe premiu ni guni ganárcabe.

9. ¿Xi caquiiñeʼ gúninu pa guirenda ñeenu?

⁹ Laanu ca xpinni Cristu, zándaca guirenda ñeenu stale biaje lu carrera ra ziguxóʼñenu pur ni guininu o pur ni gúninu, o purtiʼ biʼniʼ ti hermanu laanu xiixa ni qué ñuuláʼdxinu. Peru cadi naquiiñeʼ guidxagayaanu, purtiʼ binni ruchee guiranu ne cuxóʼñenu lu ti neza nabéʼ ni ziné laanu guicaanu ti guendanabani ni qué zaluxe. Nga runi, normal nga guidxelasaanu ca ni ziguxóʼñenenu lu carrera riʼ. Pablo guníʼ zándaca ziuu razón para gaca quejarnu pur ni guni tuuxa laanu (Col. 3:13). Peru cadi guidúʼyadxinu xiñee birenda ñeenu, sínuque quixhe íquenu premiu ni chiguicaanu. Pa guiábanu, guiásanu ne guxóʼñenu sti biaje. Cadi maʼ néxhenu layú maʼ cadxiichinu ne cayaca quejarnu, purtiʼ pa gúninu ni, qué zindanu lu meta ca ne qué zacaanu premiu ca. Ne zándaca guchíʼñanu ca ni ziguyooñeʼ para guicaa guendanabani ni qué zaluxe.

10. ¿Xi caquiiñeʼ gúninu para cadi guchíʼñanu ca hermanu stinu?

¹⁰ Pa qué racaláʼdxinu guchíʼñanu ca hermanu stinu ni ziguxóʼnenu lu carrera la? ziuu ora zudiʼnu lugar gúnicabe xiixa modo nácabe ne cadi gacaláʼdxinu gaca ni modo peʼ rábinu (Rom. 14:13, 19-21; 1 Cor. 8:9, 13). Qué raca ni bizéʼtenu riʼ lu ti carrera. Purtiʼ lu ti carrera, pa ñanda tobi si nga ñuni ganar. Ne stale biaje qué riníʼ  íquecabe ca xcaadxi binni ziguxooñenécabe. Nga runi zándaca rúnicabe stipa para tídicabe lú xcaadxi ne sanírucabe lu carrera ca. Peru laanu qué rúninu stipa pur tídinu lú ca hermanu stinu (Gál. 5:26; 6:4). Purtiʼ ni jma racaláʼdxinu nga gacanenu guiráʼ ca ni ganda para chindánenu laacaʼ lu meta ne guicaanu guendanabani ni qué zaluxe. Nga runi, rúninu stipa chinándanu conseju ni bidii Pablo ni ná cadi guyúbinu para laasinu, sínuque guizaaláʼdxinu xcaadxi binni (Filip. 2:4).

11. ¿Xi nga ni jma ricá ique ca ni ziguxooñeʼ lu ti carrera, ne xiñee?

¹¹ Ca ni ziguxooñeʼ lu ti carrera, cadi ra ziguxooñesica ruuyadxicaʼ, sínuque ricá íquecaʼ chindacaʼ lu meta. Neca cadi cayuuyacabe ni, peru ruxuíʼlucabe maʼ yendácabe ne maʼ gucuaacabe premiu. Nga riguu gana laacabe.

12. ¿Xi cayabi Jehová laanu zuni pur nadxii laanu?

¹² Nadxii Jehová laanu, nga runi cayábibe laanu zudiibe ti premiu ca ni chindá lu meta, laani nga ti guendanabani ni qué zaluxe, zándaca guibáʼ o lu guidxilayú. Cumu racané Biblia laanu gánnanu ximodo nga premiu riʼ la? zanda guxuíʼlunu pabiáʼ sicarú guendanabani ni chiguicaanu. Pa jma guicá íquenu esperanza nápanu, qué zudiʼnu lugar chuʼ xiixa ni gucueeza laanu para cadi gundúʼxenu carrera ra ziuunu.

13. ¿Xiñee maʼ gadxé laanu de ca binni ni bixooñeʼ lu carrera dxiqué?

¹³ Ca binni ni bixooñeʼ lu carrera ndaaniʼ guidxi Grecia dxiqué laaca bidxágacaʼ ne gúpacaʼ yuubaʼ. Peru ni gucané laacabe guni huantárcabe nga entrenamientu ni gucuaacabe ne stipa stícabe. Casi ca binni riʼ, laanu laaca cacaanu ti entrenamientu para guxóʼñenu lu carrera ra ziguxooñeʼ ca xpinni Cristu. Ne Jehová rudii laanu stipa stiʼ ne qué rirá stipa stibe. Nga runi, pa chuʼnu gaxha de laabe, zuni entrenarbe laanu ne zacanebe laanu gácanu nadipaʼ (1 Ped. 5:10).

14. ¿Ximodo racané 2 Corintios 12:9, 10 laanu gudxíʼlunu ca guendanagana stinu?

¹⁴ Biʼniʼ huantar apóstol Pablo stale guendanagana. Guluudí binni laabe ne guzanándacaʼ o biʼniʼ perseguircaʼ laabe, laaca guyuu biaje biʼniʼ sentirbe débil ne biʼniʼ huantarbe xiixa nabé naná ni beeda gaca casi «ti guichi lu beela» ládibe (2 Cor. 12:7). Peru qué nudiibe lugar nucueeza ca guendanagana que laabe, sínuque jma gúpabe confianza Jehová (biindaʼ 2 Corintios 12:9, 10). Nga runi qué nusaana Jehová de ñacané laabe.

15. ¿Xi zadúʼyanu pa chinándanu ejemplu stiʼ Pablo?

¹⁵ Cásica apóstol Pablo, zándaca cuʼdícabe laanu o sanándacabe laanu pur ni runi crenu. Zándaca cudxíʼlunu xiixa guendahuará o runi sentirnu maʼ bidxáganu. Peru pa chinándanu ejemplu stiʼ Pablo, zadúʼyanu pabiáʼ nadxii ne racané Jehová laanu lu cada guendanagana gápanu.

16. ¿Xi zanda guni ca hermanu ni huará?

¹⁶ Xi zanda guininu de ca hermanu ni nexheʼ ne maʼ qué randa riniibi, ca ni zuba lu silla de rueda, ca ni maʼ qué gapa stipa ñee ne ca ni maʼ huaxiéʼ ruuyaʼ. ¿Ñee zanda guxooñecabe lu carrera ra zeʼ ca joven ne ca ni nazaaca la? Zanda pue. Stale hermanu ni maʼ huaniisi ne ni huará laaca cuxooñecaʼ lu carrera para guicaacaʼ guendanabani ne qué rúnicaʼ ni né stipa si sticaʼ, sínuque Jehová nga rudii stipa laacabe para ganda guxooñecabe. Nuu de laacabe rucaadiágacabe ca reunión pur teléfono o ruuyacabe  ni lu JW streaming. Runi predicárcabe ca familia stícabe, ca doctor o ca enfermera.

17. ¿Xi runi sentir Jehová pur ca hermanu ni huará?

¹⁷ Cadi gudiʼnu lugar gucueeza ca guendahuará stinu laanu o cueecani gana laanu ne guiníʼ íquenu qué zanda guxóʼñenu lu neza ni ziné lu guendanabani. Nadxii Jehová laanu purtiʼ nápanu fe laa ne pur guiráʼ iza ni maʼ zinenu de cayúninu ni ná. Ora guni sentirnu zacá jma caquiiñenu gacané Jehová laanu ne laabe qué zusaanabe laanu, jma ziuube gaxha de laanu (Sal. 9:10). Guidúʼyanu xi guníʼ ti hermana ni huará: «Cumu cada dxi jma ziyaca xiroo guendahuará stinneʼ la? jma huaxiéʼ runeʼ predicar. Peru nannaʼ riecheʼ Jehová pur stipa ni guneʼ neca rabeʼ huaxiéʼ ni. Ne nga rusiecheʼ naa». Ora guni sentirnu maʼ careʼnu gana cadi guiaandaʼ laanu qué zusaana Jehová laanu. Guiníʼ íquenu ejemplu stiʼ apóstol Pablo sti biaje ne ca diidxaʼ ni guníʼ: «Riecheʼ de ca cosa ni rusihuinni débil naa [...]. Purtiʼ ora qué gapaʼ stipa, óraque nga jma napaʼ poder» (2 Cor. 12:10).

18. ¿Xi guendanagana nadipaʼ ridxaagalú caadxi hermanu?

¹⁸ Xcaadxi hermanu ni cuxooñeʼ lu carrera ni ziné lu guendanabani ridxaagalucaʼ sti tipu guendanagana. Ca hermanu ni nadxii Jehová riʼ nápacabe xiixa guendahuará ni qué rihuinni casi depresión o ansiedad, ne zándaca gaca nagana para xcaadxi guiene laacabe. ¿Xiñee nagana ra ridíʼdicabe yaʼ? Purtiʼ ora biluuza náʼ tuuxa o zuba lu silla de rueda guiráʼ tu ruuyaʼ ni né zándaca chuʼ tu gacalaʼdxiʼ gacané laacabe. Peru qué randa ridúʼyanu xi yuubaʼ ridiʼdiʼ ca binni ni napa ti guendahuará emocional ne mental. Laaca rápacabe yuubaʼ casi rapa ti binni ni biluuza náʼ peru zándaca cadi guiráʼ guni tratar laacabe né cariñu o gacané laacabe.

19. ¿Xi rizíʼdinu de ejemplu stiʼ Mefibóset?

¹⁹ Pa rucueeza ca guendanagana stinu laanu o riníʼ íquenu qué riénecabe laanu zanda cuʼ relatu stiʼ Mefibóset gana laanu (2 Sam. 4:4). Neca huarabe biʼniʼ huantarbe ora guníʼ ique rey David xiixa ni cadi dxandíʼ de laabe ne cadi jneza modo biʼniʼ tratar laabe. Neca cadi Mefibóset nga biyubi gapa ca guendanagana que, qué nudiibe lugar nibeecani gana laabe, sínuque bisisácabe ca cosa galán ni nápabe. Bidiibe xquixe peʼ David pur guca nachaʼhuiʼ né laabe (2 Sam. 9:6-10). Ngue runi qué nidxiichibe ne qué nidaabe xiana ora guníʼ ique David cosa ni cadi dxandíʼ de laabe. Ne qué nudiibe lugar nibeecani gana laabe o nucaacani laabe nugaanibe  donda Jehová. Ni jma gucuá íquebe nga gacanebe rey ni maʼ gulí Dios (2 Sam. 16:1-4; 19:24-30). Gunabaʼ Jehová guicá ejemplu galán stiʼ Mefibóset lu Biblia para gacaneni laanu (Rom. 15:4).

20. ¿Xi rizaaca caadxi hermanu ni napa ansiedad, ne xi cadi naquiiñeʼ guiaandaʼ laanu?

²⁰ Pur guendahuará ni runibiáʼcabe casi ansiedad, stale hermanu nabe ridxibi o qué runi sentir galán ora nuu lade stale binni, neca zacá qué riaadxacabe ca reunión ne ca asamblea. Neca raca nagana para laacabe guiniʼnécabe tuuxa ni qué runibiáʼcabe peru riguni predicárcabe. Pa zacá runi sentirnu, cadi laasinu nga rizaacanu zacá. Stale hermanu ridiʼdiʼ ca guendanagana ni bizéʼtenu riʼ. Peru cadi guiaandaʼ laanu rusisaca Jehová stipa ni rúninu de guidubi ladxidoʼno. Cumu cadi cusaana de gúninu ni nabe la? nga rusihuinni caguube ndaayaʼ laanu ne cudiibe laanu stipa ni caquiiñenu * (Filip. 4:6, 7; 1 Ped. 5:7). Laaca cadi naquiiñeʼ guiaandaʼ laanu pa gúninu ni ná Jehová neca nápanu intiica guendahuará zusiéchenu laa.

21. ¿Xi zanda gúninu purtiʼ cayacané Jehová laanu?

²¹ Casi maʼ bidúʼyanu, maʼ gadxé nga carrera ni bizeeteʼ apóstol Pablo que ti carrera ra ruxooñeʼ ca atleta. Lu carrera ni guca dxiqué tobi si tu runi ganar. Peru lu carrera ra cuxooñeʼ ca xpinni Cristu, guiráʼ ca ni qué gucheené Dios, zacaacaʼ premiu ni chigudiibe laacaʼ, ti guendanabani ni qué zaluxe (Juan 3:16). Ne guiráʼ ca ni rié lu carrera dxiqué naquiiñeʼ chuʼcaʼ nazaaca, pa coʼ la? zándaca qué zuni ganarcaʼ. Peru stale de laanu nápanu xiixa guendahuará ni zanda gucueeza laanu, peru neca zacá cayuni huantarnu (2 Cor. 4:16). Cumu cayacané Jehová laanu la? cuxóʼñenu lu carrera riʼ dede ra guilúxenu ni.