1, 2. ¿Xii nga rescate, ne xiñee caquiiñenu ni?

BICHEE ADÁN dxi naca perfectu ne pur laani binítibe oportunidad ni nápabe de guibánibe para siempre ne ngueca ca xiiñibe. Nanna Adán cadi jneza ni biʼniʼ que, ngue runi naquiiñeʼ gatiʼ. Peru ¿ca xiiñibe yaʼ? Qué gápacaʼ donda pur bichee Adán (Rom. 5:12, 14). ¿Ñee zanda gaca xiixa para guilacaʼ de lu náʼ guendaguti la? Zanda pue. Despué de guti Adán, bisihuinni Jehová ximodo chigulá millón de binni ni zá de Adán de lu náʼ pecadu ne guendaguti (Gén. 3:15). Gudixhe Jehová padxí guseendaʼ Xiiñiʼ dede guibáʼ «para gudii xquendanabani para guilá stale binni» (Mar. 10:45; Juan 6:51).

² ¿Xii nga rescate? Lu ca Escrituras Griegas Cristianas ná laani nga preciu ni gudixe Jesús para gudxiguetaʼ ni biniti Adán (1 Cor. 15:22). ¿Xiñee caquiiñenu ni yaʼ? Purtiʼ lu Ley stiʼ Jehová ná naquiiñeʼ gudiicabe guendanabani pur guendanabani (Éx. 21:23, 24). Biniti Adán guendanabani perfectu stiʼ. Ngue runi, para gaca cumplir Ley stiʼ Dios, naquiiñeʼ gudii Jesús guendanabani perfectu stiʼ pur binni (Rom. 5:17). Zacá qué zusaana Jesús de gaca  Bixhoze guiráʼ ca ni gapa fe lu rescate o guendaguti stiʼ (Is. 9:6; Rom. 3:23, 24).

3. Casi ná Juan 14:31 ne 15:13, ¿xiñee guyuu Jesús dispuestu gudii xquendanabani pur laanu?

³ Guyuu Jesús dispuestu gudii xquendanabani purtiʼ guizáʼ nadxii Bixhoze ne laanu (biindaʼ Juan 14:31; 15:13). Pur guendarannaxhii riʼ, qué nucheenebe Bixhózebe dede ra gútibe ne bíʼnibe ni ná. Pur guti Jesús pur laanu, zedandá dxi zaca cumplir ni gudixhe ique Jehová para binni ne Guidxilayú. Lu artículo riʼ zadúʼyanu xiñee bidii Dios lugar gacaná Jesús ante gatiʼ, laaca zazíʼdinu xi gucané ti hombre ni bicaa Biblia gudii xquixe peʼ pur guti Jesús. Ne últimu la? zadúʼyanu ximodo zanda gudiʼnu xquixe peʼ ne gusisácanu sacrificiu ni biʼniʼ Jehová ne Jesús pur laanu.

4. Bisiene ximodo guti Jesús.

⁴ Guxuíʼlunu xi bizaaca Jesús últimu dxi guyuu lu Guidxilayú. Bidiibe lugar guinaazeʼ ne quiñe ca soldadu romanu laabe, neca ñanda nucaa rídxibe stale legión de ángel para ñacané laabe (Mat. 26:52-54; Juan 18:3; 19:1). Gudíñecabe laabe né ti chicote dede gúxhani guidi ládibe. Despué biguáʼcabe laabe ti poste de yaga neca maʼ naze rini déchebe. Bizulú Jesús zixubiyú poste que para chiné ni ra chiguuticabe laa, peru nagueendaca biʼniʼ obligar ca soldadu que ti hombre guáʼ ni (Mat. 27:32). Ora yendá Jesús lugar ra chiguuticabe laa, bitaabicabe clavu náʼ ne ñee, ne ra maʼ cá lu yaga que, pur pesu stiʼ jmaruʼ si caxeleʼ ca herida stiʼ. Cayuunaʼ ne cayacaná jñaa ne ca xhamigu Jesús ne cayuni burla ca gobernante judíu laa (Luc. 23:32-38; Juan 19:25). Xadxí biʼniʼ sufrir Jesús, maʼ apena cayuni corazón ne ca pulmón stibe dxiiñaʼ ne cayaca nagana para laabe guicaabe bi. Cumu nanna Jesús qué nucheené Bixhoze la? ora mayaca gátibe, biʼniʼ orarbe Jehová, óraque bigaanda íquebe ne bidiibe xquendanabánibe (Mar. 15:37; Luc. 23:46; Juan 10:17, 18; 19:30). ¡Aque naná modo gutiʼ Jesús ne nabé feu modo biʼniʼ tratárcabe laabe!

5. ¿Xii nga ni jma bininá ladxidóʼ Jesús?

⁵ Nabé feu modo biiticabe Jesús, peru ni jma feu nga biiticabe laabe purtiʼ nácabe caniʼbe contra Dios o cadi cayuni respetarbe laa ne nombre stiʼ (Mat. 26:64-66). Guizáʼ gucaná ladxidóʼ Jesús pur ni caníʼ binni de laabe, ngue runi gulézabe ñuni Bixhózebe xiixa para cadi nugaanicabe donda íquebe (Mat. 26:38, 39, 42). Yanna, ¿xiñee bidii Jehová lugar guninácabe ne guuticabe Xiiñiʼ yaʼ? Guidúʼyanu chonna razón.

6. ¿Xiñee naquiiñeʼ gucaacabe Jesús lu ti yaga?

⁶ Primé razón, napa xidé guicá Jesús lu ti yaga para gulabe ca judíu que de maldición stiʼ Ley (Gál. 3:10, 13). Biaba maldición luguiácabe purtiʼ guníʼcabe zúnicabe ni ná Ley stiʼ Dios, peru qué ñúnicabe ni. Ne laaca nápacabe pecadu ni bisaanané Adán laacabe (Rom. 5:12). Ley bidii Dios ca israelita que ná naquiiñeʼ gatiʼ ti hombre pa biʼniʼ cometer ti pecadu guizáʼ malu, ne guyuu biaje bicaacabe cuerpu stiʼ binni ni maʼ guti ca lu ti yaga (Deut. 21:22, 23; 27:26). * Nga runi, pur gucuá Jesús lu yaga que, guleendú  guidxi ni bicaanáʼ laabe stale cosa galán pur sacrificiu stibe.

7. ¿Gunáʼ nga guiropa razón pur bidii Dios lugar gacaná Xiiñiʼ?

⁷ Guiropa razón, bidii Dios lugar gacaná Xiiñiʼ ti chuʼ listu para gaca Sumo Sacerdote. Biʼniʼ sentir Jesús pabiáʼ nagana nga guzuubaʼ binni stiidxaʼ Dios ora cadiʼdiʼ lu prueba. Cumu guizáʼ nadipaʼ ra cadíʼdibe la? biʼniʼ orarbe Dios ne «dede biinabe ne bicaabe ridxi». Ra gudiʼdiʼ Jesús ca prueba nagana riʼ, bisihuinni riene laanu ne maʼ nanna ximodo gacané ca ni cadiʼdiʼ lu prueba. Rudiʼnu xquixe peʼ Jehová purtiʼ maʼ gulí ti Sumo Sacerdote ni «nanna xi raca nagana para laanu» (Heb. 2:17, 18; 4:14-16; 5:7-10).

8. ¿Gunáʼ nga guionna razón pur bidii Jehová lugar gacaná Xiiñiʼ?

⁸ Guionna razón, bidii Jehová lugar gacaná Jesús para gusihuinni zanda guzuubaʼ ti binni stiidxaʼ Jehová, neca tidiʼ ra jma nagana. Purtiʼ Binidxabaʼ guníʼ rúninu ni ná Dios para si gudii laanu xiixa ne laaca riníʼ íquebe nácanu casi Adán, laaca cadi nadxiinu Jehová (Job 1:9-11; 2:4, 5). Nanna Jehová qué zucheené Xiiñiʼ laa, ngue runi bidiibe lugar tidiʼ Jesús lu prueba que, zaqué bisihuinni Jesús rusiguii Binidxabaʼ.

9. ¿Xi ejemplu bidii apóstol Juan laanu?

⁹ Riguidxi fe stiʼ ca xpinni Cristu ora riziidicaʼ de ni biʼniʼ Jesús pur laanu. Qué huasaana de guni predicarcaʼ neca cucaalú binni laacaʼ o cadíʼdicaʼ lu prueba. Guzéʼtenu ejemplu stiʼ apóstol Juan. Zándaca jma de sesenta iza qué nusaana de ñuni predicar de Cristu ne ni biʼniʼ pur laanu. Nápabe biaʼ ti gayuaa iza ora yené ca romanu laabe lu isla stiʼ Patmos purtiʼ guníʼ íquecaʼ nácabe ti binni malu. ¿Xi cosa malu cayuni Juan yaʼ? Cusiidibe de Dios ne cudiibe «testimonio de Jesús» (Apoc. 1:9). ¡Aque galán ejemplu bisaana Juan purtiʼ gupa fe ne biʼniʼ huantar!

10. Lu ca libru ni bicaa Juan, ¿ximodo bisihuinni rudii xquixe pur ni biʼniʼ Jesús?

¹⁰ Lu ca libru ni bicaa apóstol Juan, bisihuinni pabiáʼ nadxii Jesús ne rudii xquixe peʼ pur guti pur laanu. Jma de ti gayuaa biaje bizeetebe ca ndaayaʼ ni nápanu pur guti Jesús pur laanu. Apóstol Juan bicaa: «Pa guchee tuuxa la? nápanu ti ayudante ra nuu Bixhózenu, laa nga Jesucristu, tobi ni runi ni jneza» (1 Juan 2:1, 2). Laaca bizeetebe pabiáʼ risaca gudiʼnu «testimonio de Jesús» (Apoc. 19:10). Rihuinni dxíchica bidii Juan xquixe peʼ Jesús pur guti pur laanu. ¿Ximodo zanda gusihuínninu laaca rudiʼnu xquixe peʼ yaʼ?

11. ¿Xi zacané laanu para cadi gucheʼnu?

¹¹ Naquiiñeʼ gucueezanu laanu para cadi gucheʼnu. Pa dxandíʼ peʼ rudiʼnu xquixe peʼ guti Jesús pur laanu, qué zaninu: «Cadi caquiiñeʼ gucueezaʼ naa, zanda gucheeʼ ne despué guinabaʼ perdón». Lugar de nga la? ora guidxaagalunu xiixa ni zucaa laanu gúninu xiixa cosa malu zaninu: «¡Qué zuneʼ diaʼ nga! Purtiʼ maʼ biʼniʼ Jehová ne Jesús stale cosa pur naa». Laaca naquiiñeʼ guinábanu Jehová gudii stipa laanu ne gábinu laa: «Cadi gudiiluʼ lugar guiábadu lu tentación» (Mat. 6:13).

12. ¿Ximodo zanda chinándanu conseju ni zeeda lu 1 Juan 3:16-18?

 ¹² Gannaxhiinu ca hermanu stinu. Ora rúninu ni, laaca rusihuínninu rudiʼnu xquixe peʼ pur ni biʼniʼ Jesús pur laanu. Cadi pur laasinu guti Jesús, laaca gútibe pur ca hermanu stinu, ne bíʼnibe ni purtiʼ laaca nadxiibe laacaʼ (biindaʼ 1 Juan 3:16-18). Pur modo guni tratarnu ca hermanu stinu zusihuínninu nadxiinu laacaʼ (Efes. 4:29, 31–5:2). Racanenu laacabe ora huarácabe ne ora cadíʼdicabe xiixa guendanagana, casi ti desastre natural. Yanna, pa guiníʼ ti hermanu o guni xiixa ni qué chuuláʼdxinu, ¿xi naquiiñeʼ gúninu yaʼ?

13. ¿Xiñee naquiiñeʼ guni perdonarnu?

¹³ ¿Ñee raca nagana para laanu guni perdonarnu tuuxa ni bininá laanu la? (Lev. 19:18). Pa zacá ni, galán chinándanu ni ná conseju riʼ: «Laguni huantarsaa ne laguni perdonar de guidubi ladxidoʼto ni guni stobi laatu. Cásica biʼniʼ perdonar Jehová laatu, laatu laaca naquiiñeʼ gúnitu zacá» (Col. 3:13). Cada biaje guni perdonarnu ca hermanu stinu, rusihuínninu rudiʼnu xquixe peʼ Jehová pur biseendaʼ Jesús gatiʼ pur laanu. ¿Ximodo zanda gusisácanu jma regalu ni bidii Dios laanu riʼ yaʼ?

14. ¿Xi zacané laanu gusisácanu jma ni biʼniʼ Jesús pur laanu?

¹⁴ Gudiʼnu xquixe peʼ Jehová pur bidii Jesús gatiʼ pur laanu. Ti hermana de guidxi la India ni láʼ Joanna ni napa 83 iza, guníʼ: «Lu ca oración ni runeʼ guiráʼ dxi, ruzeeteʼ ni biʼniʼ Jehová para gulá laanu ne rudieeʼ xquixe peʼ laabe». Lu ca oración stinu, caquiiñeʼ guinábanu Jehová guni perdonar laanu pa bíninu xiixa cosa ni cadi jneza, peru pa biʼniʼ cometernu ti pecadu grave, naquiiñeʼ guinábanu ca ancianu gacanecaʼ laanu. Zucaadiágacaʼ ne zaquiiñecaʼ Biblia para gudiicaʼ conseju laanu, laaca zuni orarnécabe laanu ne zanábacabe Jehová guni perdonar laanu pur sacrificiu stiʼ Jesús, ti zacá ganda chuʼnu gaxha de Jehová sti biaje (Sant. 5:14-16).

15. ¿Xiñee naquiiñeʼ cueenu tiempu para guidúʼndanu ne guiníʼ íquenu ni biʼniʼ Jesús pur laanu?

¹⁵ Guiníʼ íquenu ni biʼniʼ Jesús ra gutiʼ pur laanu. Ti hermana ni napa 73 iza ni láʼ Rajamani, guníʼ: «Dede ridá nisa luaʼ  ora guundaʼ pabiáʼ gucaná Jesús». Zándaca laaca runi sentirnu modo runi sentir hermana riʼ ora guiníʼ íquenu pabiáʼ bininácabe Xiiñiʼ Dios. Peru ra jma cueenu tiempu para guiníʼ íquenu sacrificiu biʼniʼ Jesús, jma zannaxhiinu laabe ne Bixhózebe. Para ganda gúninu ni la? galán guidúʼndanu ni biʼniʼ Jesús pur laanu lu estudiu personal stinu.

16. Ora rusíʼdinu xcaadxi de ni biʼniʼ Jesús, ¿ximodo racaneni laanu? (Biiyaʼ imagen ni zeeda lu portada).

¹⁶ Gusíʼdinu xcaadxi ni biʼniʼ Jesús pur laanu. Cada biaje guinínenu binni de ni biʼniʼ Jesús pur laanu, jma rusisácanu ni. Nápanu herramienta para gusiénenu xiñee guti Jesús pur laanu. Guzéʼtenu ti ejemplu, zanda iquiiñenu ndaa 4 stiʼ folletu ni láʼ Ca diidxaʼ sicarú ni zeeda de Dios, ni napa título: «Tuu nga Jesucristu». O laaca zanda iquiiñenu capítulo 5 stiʼ libru ¿Xi rusiidiʼ Biblia laanu?, lu título «Rescate, ti regalu jma naroʼbaʼ ni bidii Dios laanu». Ne guiráʼ iza, ora riuunu ne runi invitarnu binni cheʼ Conmemoración, rusihuínninu cudiʼnu xquixe peʼ Jehová ne Jesús pur ni bíʼnicaʼ pur laanu. ¡Ti privilegiu guizáʼ galán bidii Jehová laanu nga gusíʼdinu binni de Xiiñiʼ!

17. ¿Xiñee zeeda gaca ni biʼniʼ Jehová pur laanu ti regalu nabé risaca?

¹⁷ Nápanu stale razón para gusisácanu ni biʼniʼ Jehová ne Jesús pur laanu ne cadi gusaana de gudiʼnu xquixe peʼ. Pur ni biʼniʼ Jesús pur laanu, zanda gaca xhamígunu Jehová neca binni ruchee laanu. Laaca pur laani zanitilú guiráʼ ni cayuni Binidxabaʼ (1 Juan 3:8). Ne zaca Guidxilayú riʼ ti paraísu casi maca gudixhe ique Jehová guni, ra guibani binni ni gannaxhii laabe ne ni guni ni nabe. Nga runi, guiráʼ dxi, gusihuínninu rudiʼnu xquixe peʼ pur regalu ni bidii Dios binni.