Ante gatiʼ Jesús, ¿xiñee guníʼ ca diidxaʼ ni bicaa David lu Salmo 22:1?

Lu Mateo 27:46 zeeda ca diidxaʼ ni guníʼ Jesús ante gatiʼ: «Dios stinneʼ, Dios stinneʼ, ¿xiñee bisaanuʼ naa pue?». Zacá biʼniʼ cumplir Jesús ni maca bicaa David lu Salmo 22:1 (Mar. 15:34). Cadi guníʼ diʼ Jesús ca diidxaʼ riʼ purtiʼ qué gapa fe. Nánnabe xiñee naquiiñeʼ gátibe ne nuube dispuestu gúnibe ni (Mat. 16:21; 20:28). Laaca nánnabe qué zapa Jehová laabe para cadi gátibe (Job 1:10). Bidii Jehová lugar gusihuinni Jesús qué zucheené laa neca naná modo gatiʼ (Mar. 14:35, 36).

Yanna, ¿xiñee guníʼ Jesús ca diidxaʼ ca yaʼ? Qué gánnanu xiñee, peru guidúʼyanu xiñee zándaca guniʼbe zacá. *

Né ca diidxaʼ guníʼ Jesús riʼ, zándaca cusihuinni qué zuni Jehová xiixa para cadi gátibe. Gupa xidé guti Jesús pur binni sin gacané Jehová laa. Naquiiñeʼ gátibe «pur guiráʼ xixé binni» (Heb. 2:9).

Zándaca bizeeteʼ Jesús caadxi diidxaʼ ni zeeda lu Salmo 22 para gacané ca binni ni nuu raqué guietenaláʼdxicaʼ guidubi  salmo que. Dxiqué gupa ca judíu costumbre guiziidicaʼ stale salmo de memoria. Nga runi, pa tuuxa gusietenalaʼdxiʼ laacabe ti versículo, nagueendacaʼ redasilú laacabe ni ná guidubi ti salmo. Zándaca guníʼ Jesús ca diidxaʼ ni zeeda lu salmo que para gacané ca discípulo stiʼ guietenaláʼdxicaʼ ca profecía ni zeeda lu salmo riʼ ni caníʼ de guendaguti stibe (Sal. 22: 7, 8, 15, 16, 18, 24). Ne laaca ra maʼ ziluxe salmo riʼ rusisácani Jehová ne ruzeeteʼ ni laasi nga napa derechu de guni mandar (Sal. 22:27-31).

Ora guníʼ Jesús ca diidxaʼ ni bicaa David zándaca cusihuinni qué gapa donda. Ante guuticabe Jesús biʼniʼ juzgárcabe laabe ti dxi cadi naquiiñeʼ gaca juzgar binni ne guníʼcabe caniʼbe contra Dios (Mat. 26:65, 66). Nagueenda biʼniʼ juzgárcabe laabe, bíʼnicabe ni huaxhinni ne qué ninándacabe ni ná ley (Mat. 26:59; Mar. 14:56-59). Ora guníʼ Jesús «Dios stinneʼ, ¿xiñee bisaanuʼ naa pue?», zándaca caniʼbe qué ñúnibe nin ti cosa malu para guni castigárcabe laabe.

Zándaca bisietenalaʼdxiʼ Jesús ca binni riʼ cayacaná David dxi bicaa salmo que, peru qué riníʼ diʼ nga maʼ qué riuulaʼdxiʼ Jehová ni runi David. Qué nusaana David de ñapa fe, purtiʼ despué de guniʼbe ca diidxaʼ que laaca guniʼbe nápabe confianza rapa Jehová ca xpinni ne qué nusaana Jehová de niguu ndaayaʼ laabe (Sal. 22:23, 24, 27). Zacaca nga beeda gaca né Jesús, «Xiiñiʼ David», neca cabe lu yaga, qué riníʼ diʼ nga maʼ qué riuulaʼdxiʼ Jehová ni rúnibe (Mat. 21:9).

Laaca zándaca guníʼ Jesús ca diidxaʼ riʼ purtiʼ nuu triste maʼ bisaana Jehová laa para ganda gusihuinni qué zucheené laabe dede ra gatiʼ. Despué de bicaalú Adán ne Eva Jehová, gupa xidé guni sufrir Jesús ne gatiʼ. Peru cadi nga diʼ nga ni maca gudixhe ique Jehová guni. Qué ñuni diʼ Jesús xiixa cosa malu, peru caquiiñeʼ guni sufrirbe ne gátibe para gusihuínnibe cadi dxandíʼ ni ná Binidxabaʼ. Laaca naquiiñeʼ gátibe para guilá binni ne gudxiguétabe ni biniti Adán (Mar. 8:31; 1 Ped. 2:21-24). Neca qué huayuu dxi gusaana Jehová Xiiñiʼ, gupa xidé bidiibe lugar gatiʼ.

Laaca zándaca nuu Jesús gacané ca xpinni guiénecaʼ xiñee bidii Jehová lugar gátibe zaqué. * Nanna Jesús ra guuticabe laa casi ti gubaanaʼ zucaani binni guirenda ñee o guni tropezar (1 Cor. 1:23). Napa xidé guiene ca xpinni Jesús xiñee chigati (Gál. 3:13, 14). Pa guiénecabe ni la? qué zuuyacabe Jesús casi ti gubaanaʼ, sínuque casi tuuxa ni chigulá laacabe.

Qué gánnanu xii ngue nuu Jesús guiníʼ né ca diidxaʼ que, nánnabe ra gátibe lu yaga que cayúnibe ni ná Jehová. Bizeetesibe ca diidxaʼ que guniʼbe: «¡Maʼ guca cumplir ni!» (Juan 19:30; Luc. 22:37). Bidii Jehová lugar gatiʼ Xiiñiʼ para gaca cumplir dxiiñaʼ ni beeda guni lu Guidxilayú. Laaca pur ngue gunda guca cumplir guiráʼ ni gucuá de Jesús lu «Ley stiʼ Moisés ne ni bicaa ca Profeta ne ni gucuá lu ca Salmo» (Luc. 24:44).