1, 2. ¿Xi cazaaca Jesús ora guníʼ ca últimu diidxaʼ stiʼ?

BIXUIʼLÚ nuunu 14 de nisán stiʼ iza 33. Bigaaniʼ ca enemigu stiʼ Jesús donda ique pur xiixa ni qué ñuni, laaca biʼniʼ búrlacaʼ laabe, bininacaʼ ne bicaacaʼ laabe lu ti yaga. Cá clavu náʼ ne ñee Jesús ne naná para guicaa bi ne para guiníʼ. Neca zacá, caniʼbe purtiʼ nuu cosa risaca ni naquiiñeʼ guiniʼbe.

² Guidúʼyanu xi guníʼ Jesús ora cá lu yaga que ne xi zanda guizíʼdinu de ca diidxaʼ guniʼbe. Yanna, gucaʼdiáganu Jesús (Mat. 17:5).

3. Ora guníʼ Jesús «Bixhozeʼ, biʼniʼ perdonar laacabe», ¿tudé ngue caniʼbe?

³ Ni guníʼ Jesús. Bicaasicabe Jesús lu yaga, gúdxibe Jehová: «Bixhozeʼ, biʼniʼ perdonar laacabe purtiʼ qué gánnacabe xi cayúnicabe». ¿Tudé ngue caniʼbe yaʼ? (Luc. 23:33, 34). Zándaca caniʼbe de ca soldadu romanu ni bicaa clavu nabe ne ñeebe purtiʼ qué runibiaʼcaʼ laabe. O zándaca caniʼbe de ca binni ni gunabaʼ gátibe peru despué gúpacaʼ fe laabe (Hech. 2: 36-38). Peru qué nidaa Jesús xiana pur ca cosa ni cadi jneza bíʼnicabe laa (1 Ped. 2:23). Ni bíʼnibe nga gunábabe Jehová guni perdonar ca binni ni biiti laabe.

4. ¿Xi rizíʼdinu ra biʼniʼ perdonar Jesús ca enemigu stiʼ?

⁴ Ni rizíʼdinu. Cásica Jesús, laanu laaca naquiiñeʼ guni perdonarnu xcaadxi (Col. 3:13). Zándaca gucaalú caadxi binni laanu o dede né familia stinu purtiʼ qué riénecaʼ ni runi crenu ne modo nabáninu. Zándaca guiniʼcaʼ cosa ni cadi dxandíʼ de laanu, gusituicaʼ lunu, guichézacaʼ ca publicación stinu o dede gábicaʼ laanu zuninacaʼ laanu. Lugar de guidaʼnu xiana, guinábanu Jehová gacané laacabe para guiziidicabe de lu Biblia (Mat. 5:44, 45). Zándaca nuu biaje zaca nagana para laanu guni perdonarnu, jmaruʼ si pa cadi galán modo biʼniʼ tratárcabe laanu. Peru cadi naquiiñeʼ guidaʼnu xiana purtiʼ zándaca guninani laanu cásica runiná venenu. Sicaríʼ guníʼ ti hermana: «Ora runi perdonarnu tuuxa, qué riníʼ diʼ ni riuuláʼdxinu ni runi o rudiʼnu lugar guniná laanu, sínuque riniʼni cadi guidaʼnu xiana» (Sal. 37:8). Ora maʼ biʼniʼ perdonarnu, maʼ qué zudiʼnu lugar guniná ca cosa ni bíʼnicabe laanu (Efes. 4:31, 32).

5. ¿Xi promesa biʼniʼ Jesús tobi de ca hombre ni gucuá cueʼ, ne xiñee bíʼnibe ni?

⁵ Ni guníʼ Jesús. Ra gucuá Jesús lu yaga, laaca gucuá chupa gubaanaʼ cueʼbe. Ora biʼyaʼ ca hombre riʼ Jesús, biʼniʼ búrlacaʼ laabe (Mat. 27:44). Peru despué, maʼ qué ñuni burla tobi de laacabe Jesús, purtiʼ bidii cuenta qué ñúnibe «nin ti cosa malu» (Luc. 23:40, 41). Ne cadi ngasi, laaca bisihuínnibe runi crebe ziasa Jesús de lade gueʼtuʼ ne zaca rey. Óraque guníʼ hombre riʼ: «Jesús, bietenalaʼdxiʼ de naa ora guiuuluʼ lu Reinu stiluʼ» (Luc. 23:42). Rihuinni dxíchica napa hombre riʼ fe. Jesús bicabi laabe: «Dxandíʼ ni chitidxeʼ lii yannadxí: ziuuneluʼ naa ndaaniʼ Paraísu», qué niníʼ diʼ Jesús ziuube lu Reinu (Luc. 23:43). Ca diidxaʼ «ziuuneluʼ naa» rusihuínnini biʼniʼ Jesús ti promesa hombre riʼ. Nanna Jesús riá Bixhoze binni, ngue runi bidiibe esperanza gubaanaʼ que ante gatiʼ (Sal. 103:8).

6. ¿Xi rizíʼdinu de ni gudxi Jesús ti gubaanaʼ?

⁶ Ni rizíʼdinu. Rusihuinni Jesús ximodo Bixhoze (Heb. 1:3). Racalaʼdxiʼ Jehová guni perdonar ne gusihuinni riá laanu pa gaca arrepentirnu de ca cosa malu ni bíninu dxiqué ne gusihuínninu runi crenu guti Jesús pur laanu (1 Juan 1:7). Peru ¿xi zanda gúninu pa nuu tiru raca nagana para laanu guni crenu maʼ biʼniʼ perdonar Jehová laanu yaʼ? Guiníʼ íquenu ndiʼ: pa Jesús bisihuinni riá ti gubaanaʼ ni deruʼ cusihuinni napa fe laabe, ¿ñee cadi laaca ziá Jehová ca xpinni ni runi stipa pur guzuubaʼ stiidxabe la? (Sal. 51:1; 1 Juan 2:1, 2).

7. Casi ná Juan 19:26, 27, ¿xi gudxi Jesús María ne Juan?

⁷ Ni guníʼ Jesús (biindaʼ Juan 19:26, 27). Zándaca maʼ viuda María, ngue  runi biyubi Jesús tu gapa jñaa. Nánnabe ora gátibe maʼ ca bíʼchibe ne ca bizáʼnabe gudii ni iquiiñeʼ jñaabe. Peru zándaca para dxi que caʼruʼ gácacaʼ discípulo stibe. Nga runi, ¿tu gacané María chuʼ gaxha de Dios yaʼ? Juan nga tobi de ca apóstol stiʼ Jesús ne tobi de ca ni jma xhamigu. Para Jesús la? ca ni runi adorar Jehová beeda gácacaʼ casi familia stibe purtiʼ cayúnicaʼ ni ná Dios (Mat. 12:46-50). Ne cumu guizáʼ nadxiibe jñaabe la? biyúbibe chuʼ galán, ngue runi gunábabe Juan gacané jñaabe chuʼ gaxha de Jehová. Sicaríʼ gúdxibe María: «Racá nuu xiiñiluʼ», ne despué gúdxibe Juan: «Racá nuu jñaaluʼ».  Dede dxi que biiyaʼ María Juan casi xiiñiʼ ne gupa Juan laabe casi jñaa. Guizáʼ gunnaxhii Jesús María, gunaa ni gupa laabe dede dxi gúlebe ne yanna nuu ra cabe lu yaga.

8. ¿Xi rizíʼdinu de ni gudxi Jesús María ne Juan?

⁸ Ni rizíʼdinu. Zándaca gucaalú familia stinu laanu o dede guixélecaʼ de laanu. Peru zándaca chuʼnu jma gaxha de ca hermanu de congregación stinu que familia stinu. Ne casi maca guníʼ Jesús, pa chuʼnu gaxha de Jehová ne de xquidxi zacaanu «jma de 100» de ni bisaananu. Stale de ca hermanu zeeda gácacaʼ casi xiiñinu, jñaanu ne bixhózenu (Mar. 10:29, 30). ¿Xi runi sentirnu nuunu ndaaniʼ ti familia ni nuu tobi si purtiʼ nápacaʼ fe, nadxiicaʼ Jehová ne ca hermanu yaʼ? (Col. 3:14; 1 Ped. 2:17).

9. ¿Xi rizíʼdinu de ca diidxaʼ ni guníʼ Jesús ni zeeda lu Mateo 27:46?

⁹ Ni guníʼ Jesús. Ante gatiʼ Jesús, bicaa ti ridxi reciu: «Dios stinneʼ, Dios stinneʼ, ¿xiñee bisaanuʼ naa pue?» (Mat. 27:46). Qué rusiene diʼ Biblia xiñee guníʼ Jesús ca diidxaʼ riʼ. Peru guiníʼ íquenu xi rusiidini laanu. Ora guníʼ Jesús ca diidxaʼ riʼ, cayuni cumplirbe ti profecía ni zeeda lu Salmo 22:1. * Laaca rusihuinni ca diidxaʼ riʼ qué niguu diʼ Jehová «ti leʼ» para gulá Xiiñiʼ (Job 1:10). Biene Jesús bisaana Bixhoze laa lu náʼ ca enemigu stiʼ para gusihuinni napa fe dede ra gatiʼ, ne nin sti binni qué huadiʼdiʼ prueba casi gudíʼdibe. Né ca diidxaʼ ni guníʼ Jesús, laaca bisihuínnicani qué ñúnibe nin ti cosa malu para guuticabe laabe.

10. ¿Xi rizíʼdinu de ni gudxi Jesús Bixhoze?

¹⁰ Ni rizíʼdinu. Ti cosa ni rizíʼdinu nga cadi naquiiñeʼ cuézanu gulá Jehová laanu lu guiráʼ ca prueba ni tídinu. Cásica Jesús, naquiiñeʼ chuʼnu listu para cadi guchéʼnenu Jehová neca gátinu (Mat. 16:24, 25). Peru nánnanu qué zudii Dios lugar gueeda xiixa prueba luguianu ni qué zanda guni huantarnu (1 Cor. 10:13). Sti cosa ni rizíʼdinu nga, cásica Jesús, zándaca zuninácabe laanu neca qué gápanu donda (1 Ped. 2:19, 20). Rucaalú binni laanu purtiʼ cadi nácanu parte de guidxilayú riʼ ne rusíʼdinu ni dxandíʼ, ne cadi purtiʼ rúninu cosa malu (Juan 17:14; 1 Ped. 4:15, 16). Biene Jesús xiñee cudii Jehová lugar gacaná. Peru caadxi de ca xpinni Dios ni cadiʼdiʼ lu prueba rinabadiidxacaʼ xiñee cudii Jehová lugar gacanacaʼ (Hab. 1:3). Cumu riá Jehová ne napa paciencia la? riene cadi pur qué gapa ca xpinni fe nga riniʼcaʼ zacá, sínuque purtiʼ caquiiñecaʼ quixhedxibe ladxidoʼcaʼ (2 Cor. 1:3, 4).

11. ¿Xiñee guníʼ Jesús ca diidxaʼ ni zeeda lu Juan 19:28?

¹¹ Ni guníʼ Jesús (biindaʼ Juan 19:28). ¿Xiñee guníʼ Jesús cayati nisa? Para gaca cumplir profecía ni zeeda lu Salmo 22:15, ni ná: «Maʼ qué gapaʼ stipa, zeeda gacaʼ casi ti guisu de yu; caguiidiʼ ludxeʼ ndaaniʼ ruaaʼ». Guizáʼ cayati  Jesús nisa purtiʼ nabé cayacaná ra cá lu yaga que ne guizáʼ maʼ bidxaga. Ngue runi canábabe gudiicabe laabe nisa.

12. ¿Xi rizíʼdinu ora guníʼ Jesús cayati nisa?

¹² Ni rizíʼdinu. Qué niníʼ ique Jesús débil laa pa guiníʼ ni cayuni sentir, ne laanu laaca cadi naquiiñeʼ guiníʼ íquenu zacá. Zándaca qué zuni sentirnu galán pa gábinu tuuxa ni cazaacanu. Peru galán nga guyúbinu tu gacané laanu ora caquiiñenu ni. Guzéʼtenu ti ejemplu, pa maʼ huaniisinu o huaranu, zándaca caquiiñeʼ guinábanu ti xhamígunu chisiné laanu o chiné laanu doctor. Pa guni sentirnu careʼnu gana, zándaca caquiiñeʼ guinábanu ti ancianu o sti hermanu gucaadiaga laanu o gabi laanu «ti diidxaʼ galán» ni cuʼ gana laanu (Prov. 12:25). Cadi guiaandaʼ laanu nadxii ne racalaʼdxiʼ ca hermanu stinu gacanecaʼ laanu «ora nápanu xiixa guendananá» (Prov. 17:17). Peru qué zanda diʼ gánnacabe xi cazaacanu pa qué gábinu ni laacabe.

13. ¿Xi guleendú Jesús ra qué nucheené Jehová dede ra gutiʼ?

¹³ Ni guníʼ Jesús. Biaʼ las tres de la tarde stiʼ 14 de nisán, guníʼ Jesús: «¡Maʼ guca cumplir ni!» (Juan 19:30). Ante gatiʼ Jesús, gunna biʼniʼ guiráʼ ni gunabaʼ Jehová laa. ¿Xi guleendú Jesús pur qué nucheené Jehová dede ra gutiʼ yaʼ? Primé, bisihuínnibe rusiguii Binidxabaʼ, purtiʼ zanda guni ti binni perfectu ni ná Jehová neca gucaa Binidxabaʼ laa guchee. Guiropa, bidiibe xquendanabánibe para guilá stale binni. Pur ni bíʼnibe riʼ, zanda gaca binni ruchee xhamigu Dios ne gápacaʼ ti esperanza de guibánicaʼ para siempre. Ne guionna, bisihuinni Jesús Jehová si nga napa derechu para guni mandar ne bisiabe lá Bixhózebe.

14. Bisiene xi naquiiñeʼ gúninu cada dxi.

¹⁴ Ni rizíʼdinu. Naquiiñeʼ quixhe íquenu guzúʼbanu stiidxaʼ Jehová guiráʼ dxi. Guidúʼyanu ni guníʼ hermanu Maxwell Friend, ni guca profesor de Escuela Bíblica de Galaad stiʼ Watchtower. Lu ti asamblea internacional, bidiibe ti discursu ni caníʼ cadi guixélenu de Jehová, ne bizeetebe ca diidxaʼ riʼ: «Pa zanda gúniluʼ o guiniʼluʼ xiixa yannadxí la? biʼniʼ ni. ¿Ñee nánnaluʼ pa nabanirouʼ guixíʼ la? Guiráʼ dxi bisihuinni zanda gudii Dios lii guendanabani ni qué zaluxe». Casi guníʼ hermanu riʼ, guibáninu cada dxi casi ñaca laani nga últimu dxi nabáninu, ti zacá, pa gátinu la? zanda gábinu Jehová: «Bineʼ dede ra gúndatiʼ para cadi gucheeniaʼ lii, bisihuinneʼ rusiguii Binidxabaʼ, gucaniaʼ guiá laluʼ ne bisihuinneʼ lii si nápaluʼ derechu para guni mandarluʼ».

15. Casi ná Lucas 23:46, ¿xi gunna dxichi Jesús?

¹⁵ Ni guníʼ Jesús (biindaʼ Lucas 23:46). Né stale confianza guníʼ Jesús: «Bixhozeʼ, lu naluʼ rusaanaʼ espíritu stinneʼ». Gúnnabe lu náʼ Jehová nuu xquendanabánibe ne laaca gúnnabe zietenalaʼdxiʼ Bixhózebe de laabe.

16. ¿Xi rizíʼdinu de ejemplu stiʼ Joshua?

¹⁶ Ni rizíʼdinu. Naquiiñeʼ chuʼnu dispuestu  gusaananu xquendanabáninu lu náʼ Jehová. Para ganda gúninu ni la? naquiiñeʼ gápanu confianza laabe de guidubi ladxidoʼno (Prov. 3:5). Guiníʼ íquenu ejemplu stiʼ Joshua, ti hermanu de 15 iza ni gupa ti guendahuará ni biiti laa. Qué ninabe nicaabe tratamientu ni zucaa laabe gucheenebe Dios. Ante gátibe gúdxibe jñaabe: «Lu náʼ Jehová nuu xquendanabaneʼ». Ne laaca guniʼbe: «Amá, nanna dxicheʼ zandisaʼ Jehová naa de lade gueʼtuʼ. Maʼ biiyabe ni nuu ndaaniʼ ladxiduáʼ ne nánnabe dxandíʼ nadxieeʼ laabe». * Guiranu naquiiñeʼ guiníʼ íquenu ndiʼ: «Pa tideʼ lu prueba ne chuʼ xquendanabaneʼ lu peligru, ¿zuzuubaʼ stiidxaʼ Jehová ne zapaʼ confianza zandísabe naa de lade gueʼtuʼ la?».

17, 18. ¿Xi maʼ bizíʼdinu lu artículo riʼ? (Laaca zanda gúʼyaluʼ cuadru ni láʼ « Ni rizíʼdinu de ca últimu diidxaʼ ni guníʼ Jesús»).

¹⁷ Maʼ bizíʼdinu stale cosa risaca de ca últimu diidxaʼ ni guníʼ Jesús ante gatiʼ. Bizíʼdinu naquiiñeʼ guni perdonarnu xcaadxi ne gápanu confianza zuni perdonar Jehová laanu. Riéchenu nuunu ndaaniʼ ti familia ni runi ni ná Dios ne ni nuu listu para gacané laanu. Ne zanda guinábanu gacanécabe laanu ora caquiiñenu ni. Nánnanu zacané Jehová laanu guni huantarnu intiica prueba ni tídinu. Laaca riénenu pabiáʼ risaca nga guzúʼbanu stiidxaʼ Jehová cada dxi ne nanna dxíchinu zandisaʼ Jehová laanu de lade gueʼtuʼ pa gátinu.

¹⁸ Pa gúninu ca ni maʼ bizíʼdinu lu artículo riʼ, zúninu ni biʼniʼ mandar Jehová ora guníʼ gucaʼdiáganu Xiiñiʼ (Mat. 17:5).