1. ¿Xiñee runi comentarnu lu ca reunión ca?

 ¿XIÑEE riuunu ca reunión ca? Primé, purtiʼ racaláʼdxinu gusisácanu Jehová (Sal. 26:12; 111:1). Guiropa, para ganda cúʼsaanu gana laanu ca tiempu nagana riʼ (1 Tes. 5:11). Ora rindisananu ne runi comentarnu lu ca reunión ca la? cayúninu guiropa’ cosa riʼ.

2. ¿Pora zanda guni comentarnu lu ca reunión ca?

² Zanda guni comentarnu lu ca reunión ni rápanu guiráʼ semana. Ca fin de semana ca zanda guni comentarnu lu reunión stiʼ Torre stiʼ ni rapa. Lu ca reunión ni raca ndaaniʼ semana zanda gudiʼnu comentariu lu sección ni láʼ «Guyúbinu ca perla ni gaʼchiʼ», ne lu «Reunión ra riuundaʼ Biblia», laaca zanda gúninu ni ra guinábacabe laanu guicábinu.

3. a) ¿Xiñee raca nagana para laanu gudiʼnu comentariu? b) ¿Ximodo racané Hebreos 10:24, 25 laanu?

³ Guiranu racaláʼdxinu gusisácanu Jehová ne cuʼnu gana ca hermanu ora gudiʼnu comentariu. Peru ¿xiñee rácani nagana yaʼ? Purtiʼ zándaca ridxíbinu guindisananu, o purtiʼ zándaca qué rudiicabe laanu comentariu guiráʼ biaje racaláʼdxinu. Lu carta bicaa apóstol Pablo ra nuu ca hebreu, ridxélanu ti cosa ni zanda gacané laanu. Ora bizeetebe cadi naquiiñeʼ gusaananu de chuunu ca reunión stinu, guniʼbe naquiiñeʼ: «Cúʼsaanu gana laanu»  (biindaʼ Hebreos 10:24, 25). Cadi guiaandaʼ laanu zanda cuʼnu gana ca hermanu stinu ora gudiʼnu ti comentariu nachucu. Pa gúninu ni la? zusihuínninu nápanu fe ne qué zadxíbinu guindisananu. Ne pa qué gudiicabe laanu comentariu biaʼ racaláʼdxinu la? cadi guireʼnu gana ne guiéchenu ora guni comentar ca hermanu stinu (1 Ped. 3:8).

4. ¿Xi chonna cosa zadúʼyanu lu artículo riʼ?

⁴ Lu artículo riʼ, zadúʼyanu ximodo zanda cuʼnu gana ca hermanu pa nuunu ndaaniʼ ti congregación nahuiiniʼ ra zanda gudiʼnu stale comentariu. Laaca zadúʼyanu ximodo zanda gúninu ni pa nuunu ndaaniʼ ti congregación naroʼbaʼ ra nuu stale hermanu ni runi comentar. Ne últimu la? zadúʼyanu ximodo naquiiñeʼ gaca ca comentariu stinu para cuʼnu gana xcaadxi.

5. ¿Ximodo zanda cúʼsaanu gana laanu pa nuunu ndaaniʼ ti congregación nahuiiniʼ?

⁵ Cumu huaxiéʼ hermanu nuu ndaaniʼ ti congregación nahuiiniʼ la? nuu biaje zabeza hermanu ni cayuni conducir reunión ca chuʼ tu guindisanáʼ ne pur nga zándaca guindaa reunión ca ne zándaca guiree ca hermanu ca gana. Peru ¿xi zanda gúninu para cadi guizaaca ndiʼ yaʼ? Caquiiñeʼ chuʼnu listu para guni comentarnu. Zacá zaguʼnu gana ca hermanu stinu guni comentarcaʼ jma.

6, 7. ¿Xi zanda gacané laanu para cadi guidxíbinu guni comentarnu?

⁶ Stale tu laa ridxibi ora guiníʼ ique chiguni comentar. ¿Xi zanda gúniluʼ pa rizaacaluʼ ndiʼ yaʼ? ¿Xi zanda gúniluʼ para cadi guidxíbiluʼ guni comentarluʼ ne zacá cuʼluʼ gana ca hermanu? Guidúʼyanu ni.

⁷ Ni zanda gacané lii nga ca sugerencia ni huaree lu caadxi artículo stiʼ revista Torre stiʼ ni rapa. b Tobi de ca sugerencia ca nga gaca preparar chaahuiluʼ (Prov. 21:5). Ra jma guiene chaahuiluʼ información ca la? qué zadxíbiluʼ guni comentarluʼ. Sti cosa ni zanda gúniluʼ nga gudiiluʼ comentariu nachucu (Prov. 15:23; 17:27). Pa gaca ca comentariu stiluʼ nachucu jma ziene ca hermanu ca ni. Pa gúniluʼ ni bizéʼtenu riʼ la? zuuyaʼ xcaadxi guca prepararluʼ jneza ne biéneluʼ ni biindaluʼ.

8. ¿Ximodo ruuyaʼ Jehová stipa ni rúninu ora runi comentarnu?

⁸ Yanna, pa maʼ bíʼniluʼ guiráʼ ni nuu lu naluʼ para guni comentarluʼ peru ridxíbirouʼ, ¿xiruʼ zanda gúniluʼ yaʼ? Cadi guiaandaʼ lii guizáʼ rusisaca Jehová stipa ni rúniluʼ (Luc. 21:1-4). Qué ribezaʼ Jehová gudiiluʼ jma de ni biaʼ zanda gudiiluʼ (Filip. 4:5). Guní’ ique xi zanda gúniluʼ ne gunabaʼ Jehová gacané lii cadi guidxíbiluʼ. ¿Xiñee qué quixhe íqueluʼ gudiiluʼ comentariu nachucu yaʼ?

9. ¿Xi zándaca gueeda guizaaca ndaaniʼ ti congregación naroʼbaʼ?

⁹ Cumu ndaaniʼ ti congregación naroʼbaʼ nuu stale publicador la? zándaca  gaca nagana gudiicabe lii ti comentariu purtiʼ stale tu candisanáʼ. Guzéʼtenu ni bizaaca ti hermana láʼ Danielle. c Nabe riuuláʼdxibe guni comentarbe ra reunión purtiʼ para laabe zacá cayuni adorarbe Dios, caguube gana xcaadxi ne racané ni laabe iguidxi fe stibe. Peru ora yeguni servirbe ndaaniʼ ti congregación naroʼbaʼ jma huaxiéʼ rudiicabe laabe comentariu, dede nuu biaje nin tobi. Laabe guniʼbe: «Nabé feu modo bineʼ sentir, dede qué ridxelaʼ xi guneʼ. Bineʼ sentir casi ñaca nuniteʼ ti privilegiu, purtiʼ ora qué gudiicabe lii ti comentariu la? riníʼ íqueluʼ qué naʼ hermanu ca guni comentarluʼ».

10. ¿Xi zanda gúniluʼ para ganda guni comentarluʼ?

¹⁰ ¿Ñee huazaacaluʼ ni bizaaca Danielle la? Pa huazaacaluʼ ni la? zándaca huaníʼ íqueluʼ, gucaadiágasiluʼ reunión ca ne maʼ qué zandísanaluʼ. Peru cadi guireeluʼ gana. ¿Xi zanda gúniluʼ yaʼ? Zanda guni prepararluʼ chupa chonna comentariu. Ne zacá, pa qué gudiicabe lii comentariu lu ca primé párrafo ca la? zándaruʼ guni comentarluʼ lu xcaadxi párrafo ca. Ora maʼ cayuni estudiarluʼ revista Torre stiʼ ni rapa, guníʼ ique xi cusiidiʼ cada párrafo ca lii de tema stiʼ artículo ca. Zacá zápaluʼ xiixa para guni comentarluʼ. Sti cosa ni zanda gúniluʼ nga guni prepararluʼ ca párrafo ni cusiene xiixa tema nagana (1 Cor. 2:10). Purtiʼ jma huaxiéʼ tu rindisanáʼ lu ca párrafo ca. Yanna, pa neca maʼ yenándaluʼ ca ni bizéʼtenu raríʼ, ne caʼruʼ gudiiluʼ nin ti comentariu, ¿xi zanda gúniluʼ yaʼ? Ante guzulú reunión zanda guiníʼneluʼ hermanu ni chigutiidiʼ Torre stiʼ ni rapa ca, ne gábiluʼ laa xi párrafo racaláʼdxiluʼ guni comentarluʼ.

11. Casi ná Filipenses 2:4, ¿xi zanda gúninu?

¹¹ (Biindaʼ Filipenses 2:4). Guluu apóstol Pablo gana ca xpinni Cristu guizaaláʼdxicaʼ xcaadxi. ¿Ximodo zanda chinándanu conseju riʼ lu ca reunión ca  yaʼ? Ra cadi guiaandaʼ laanu laaca racalaʼdxiʼ xcaadxi guni comentar.

12. ¿Ximodo zanda cuʼnu gaca ca hermanu lu ca reunión ca? (Biiyaʼ foto ca).

¹² Para guiénenu ni, guzéʼtenu ti ejemplu. Ora maʼ caníʼneluʼ ca xhamíguluʼ diidxaʼ, cadi dxandíʼ laaca racaláʼdxiluʼ guiníʼcabe la? ngaca nga rizaaca lu ca reunión ca, racaláʼdxinu guiráʼ hermanu guni comentar. Ti modo cuʼnu gana ca hermanu stinu nga gudiʼnu lugar guni comentarcaʼ ne gusihuínnicaʼ fe sticaʼ (1 Cor. 10:24). Guidúʼyanu xi zanda gúninu para guni comentar ca hermanu stinu.

13. ¿Xi zanda gúninu para gudiʼnu lugar guni comentar xcaadxi hermanu?

¹³ Para ganda guni comentar jma hermanu la? galán gaca ca comentariu stinu nachucu. Zanda guni ca ancianu ne ca hermanu ni maʼ ziné stale iza ndaaniʼ xquidxi Dios ni bizéʼtenu riʼ. Ne ora gudiiluʼ ti comentariu, cadi gusiéneluʼ stale puntu luni. Ne para ganda guni comentar xcaadxi hermanu la? cadi guiniʼluʼ ni cá lu guidubi párrafo ca. Guzéʼtenu ti ejemplu, casi lu párrafo riʼ la? nuu chupa cosa ni zanda gúninu: gaca ca comentariu stinu nachucu ne cadi guzéʼtenu stale puntu. Pa lii nga primé gudiicabe guni comentarluʼ lu párrafo riʼ, ¿xiñee qué quixhe íqueluʼ guni comentarluʼ ti puntu si ni ruzeeteʼ ni yaʼ?

14. ¿Xi zacané laanu gánnanu panda biaje guindisananu para guni comentarnu? (Biiyaʼ ca foto ca).

¹⁴ Biiyaʼ pa zanda ne panda biaje guni comentarluʼ. Pa stale biaje guindisananu la? zándaca guni sentir hermanu ni cutiidiʼ información ca caquiiñeʼ gudii laanu comentariu neca nuuruʼ tu candisanáʼ ne caʼruʼ guni comentar. Ne zándaca guiníʼ ique xcaadxi cadi caquiiñeʼ guindisanacaʼ para guni comentarcaʼ (Ecl. 3:7).

15. a) ¿Xi cadi caquiiñeʼ gúninu pa qué gudiicabe laanu comentariu? b) ¿Xi caquiiñeʼ ganna hermanu ni canabadiidxaʼ ca? (Biiyaʼ cuadru ni láʼ « Ximodo gutiidiluʼ ca asignación stiluʼ ra zanda guicabi ca ni cucaadiaga»).

 ¹⁵ Ora stale hermanu candisanáʼ para guni comentar la? zándaca qué zudiicabe laanu guni comentarnu biaʼ racaláʼdxinu. Dede zándaca qué zudiʼnu nin ti comentariu lu reunión ca. Zándaca qué chuuláʼdxinu ora guizaaca ndiʼ, peru cadi naquiiñeʼ guidxiichinu (Ecl. 7:9).

16. ¿Xi zanda gúninu para cuʼnu gana ca ni biʼniʼ comentar?

¹⁶ Pa qué ganda guni comentarluʼ biaʼ racaláʼdxiluʼ la? zanda gucaadiágaluʼ comentariu ni gudii xcaadxi ne guni felicitarluʼ laacaʼ ora guiluxe reunión. Ca diidxaʼ galán ni gábiluʼ ca hermanu riʼ, zaguuni gana laacabe, cásica niguu ca comentariu ni gucaláʼdxiluʼ nudiiluʼ ca gana laacabe (Prov. 10:21). Ra guni felicitarnu xcaadxi, zaguʼnu gana laacaʼ.

17. a) ¿Xi zanda guni ca padre? b) Casi rihuinni lu videu ca, ¿xi tapa cosa naquiiñeʼ gúninu para guni prepararnu ti comentariu? (Laaca zanda gúʼyaluʼ nota ca).

¹⁷ ¿Xiruʼ zanda gúninu para cúʼsaanu gana laanu lu ca reunión ca? Pa nápaluʼ xiiñiluʼ, gucané laacabe gudiicabe  comentariu biaʼ laacabe (Mat. 21:16). Nuu biaje lu ca reunión ca riete tema ni caníʼ de ca guendanagana ni rapa ca guendaxheelaʼ o ximodo zanda gaca ca xpinni Cristu nayá. Peru zándaca chuʼ tobi o chupa párrafo ra zanda guni comentar ca xcuidi. Laaca zanda gacanetu ca xiiñitu gánnacaʼ cadi guiráʼ biaje guidisanacaʼ zacaacaʼ comentariu. Zacá qué ziuucaʼ triste ora gudiicabe comentariu xcaadxi (1 Tim. 6:18). d

18. ¿Xi zanda gúninu ora guni comentarnu? (Proverbios 27:2).

¹⁸ Guiranu zanda guni prepararnu ti comentariu para gusisácanu Jehová ne cuʼnu gana ca hermanu stinu (Prov. 25:11). Neca nuu biaje zanda guzéʼtenu xiixa experiencia ni bizaacanu, cadi naquiiñeʼ guininu puru si de laanu (biindaʼ Proverbios 27:2; 2 Cor. 10:18). Sínuque ni jma galán gúninu nga guininu de Jehová, de Stiidxabe ne de xquídxibe (Apoc. 4:11). Peru pa pregunta stiʼ ti párrafo ná zanda guzéʼtenu xiixa experiencia stinu la? zanda gúninu ni. Lu sti párrafo ca zeeda ti ejemplu.

19. a) ¿Xi zazaaca pa cada biaje chuunu reunión, guizaaláʼdxinu ca hermanu stinu yaʼ? (Romanos 1:11, 12). b) ¿Xiñee riuuláʼdxiluʼ guni comentarluʼ ra reunión?

¹⁹ Neca cadi nexheʼ modo peʼ naquiiñeʼ guni comentarnu ra reunión la? guiranu zanda gúninu stipa para cuʼnu gana xcaadxi. Pa gúninu ni bizéʼtenu riʼ la? zándaca ziuu hermanu gacalaʼdxiʼ guni comentar jma. Ne xcaadxi zándaca ziuucaʼ nayecheʼ biaʼ guni comentarcaʼ ne ziéchecaʼ ora gúʼyacaʼ nuu hermanu napa gana guni comentar. Nga runi, pa cada biaje chuunu reunión, guizaaláʼdxinu ca hermanu stinu la? zagúʼsaanu gana laanu (biindaʼ Romanos 1:11, 12).