ARTICULO DE ESTUDIU 15
¿Xi rizíʼdinu de ca milagru ni biʼniʼ Jesús?
«Guzabe lu guidxilayú ne bíʼnibe cosa galán ne bisiándabe» (HECH. 10:38).
CANCIÓN 13 Chinándanu ejemplu stiʼ Cristu
NI ZAZÍʼDINU a
1. ¿Xi bizaaca para biʼniʼ Jesús primé milagru stiʼ?
GUINÍʼ íquenu nabáninu ra maʼ ziluxe iza 29. Tiempu bizulú Jesús biʼniʼ predicar. Guyé Jesús, jñaa ne caadxi de ca discípulo stiʼ, ti guendaxheelaʼ ni guca ndaaniʼ guidxi Caná, ti guidxihuiiniʼ riaana ladu guiá de Nazaret, lugar ra biniisi Jesús. Cumu xhamiga María familia stiʼ ca ni cachaganáʼ que la? nga runi zándaca cayacané raqué. Peru bizaaca xiixa ni ñándaca nusituí lú ca ni cachaganáʼ que ne familia sticaʼ: bibidxi vinu. b Zándaca jma stale invitadu nuu de biaʼ ni cabézacabe. Nagueendaca guyé María ra nuu xiiñiʼ ne gúdxibe laa: «Maʼ qué gápacabe vinu» (Juan 2:1-3). ¿Xi biʼniʼ Jesús óraque yaʼ? Bíʼnibe ti cosa ni qué huayuu dxi gaca, bíʼnibe nisa «vinu chaahuiʼ» (Juan 2:9, 10).
2, 3. a) ¿Ximodo biquiiñeʼ Jesús poder stiʼ? b) ¿Xi zazíʼdinu lu artículo riʼ?
2 Tiempu biʼniʼ predicar Jesús bíʼniruʼ stale milagru. c Gucanebe stale mil de binni ra biquiiñebe poder stibe. Casi dxi biyaanabe gaayuʼ mil hombre ne despué biyaanabe tapa mil. Pa ugábanu gunaa ne xcuidi ni guyuu dxi guca guiropaʼ milagru riʼ la? zándaca biyaanabe jma de veintisiete mil binni (Mat. 14:15-21; 15:32-38). Laaca bisianda Jesús binni huará (Mat. 14:14; 15:30, 31). Guiníʼ íquenu pabiáʼ bidxagayaa guiráʼ binni nuu raqué ora biyaanaʼ ne bisianda Jesús laacaʼ.
3 Lu artículo riʼ zazíʼdinu stale cosa de ca milagru ni biʼniʼ Jesús ni zuquidxi fe stinu. Laaca zadúʼyanu ximodo gácanu humilde ne guianu binni cásica biʼniʼ Jesús dxi biʼniʼ ca milagru que.
NI RIZÍʼDINU DE JEHOVÁ NE DE JESÚS
4. ¿Xi zanda guizíʼdinu de ca milagru ni biʼniʼ Jesús?
4 Ca milagru biʼniʼ Jesús rusiidiʼ ca ni laanu stale de laabe ne de Bixhózebe. Purtiʼ Jehová nga bidii laabe poder para gúnibe ca ni. Sicaríʼ ruzeeteʼ Hechos 10:38 de Jesús: «Gulí Dios laabe né espíritu santu ne bidii poder laabe, guzabe lu guidxilayú ne bíʼnibe cosa galán ne bisiándabe ca ni cayuniná Binidxabaʼ laa, purtiʼ nuuné Dios laabe». Sicaríʼ nga bisihuinni Jesús naca casi Bixhoze (Juan 14:9). Guidúʼyanu chonna cosa ni rizíʼdinu de ca milagru ni biʼniʼ Jesús ni zuquidxi fe stinu.
5. ¿Xi bicaa Jesús guni milagru? (Mateo 20:30-34).
5 Primé, guizáʼ nadxii Jesús ne Bixhoze laanu. Dxi guyuu Jesús lu Guidxilayú riʼ, biquiiñeʼ poder ni bidii Dios laa para gusianda binni ni cayacaná, zacá bisihuínnibe nadxiibe laacaʼ. Guzéʼtenu ti ejemplu. Ti biaje gunabaʼ chupa ciegu laabe gacanebe laacaʼ (biindaʼ Mateo 20:30-34). Lu relatu ca ná «guizáʼ biá» Jesús ca hombre riʼ, ngue runi bisiándabe laacaʼ. Diidxaʼ griegu «guizáʼ biá» riníʼ ni guni sentir tuuxa dede ndaaniʼ ladxidóʼ laa peʼ nga cayacaná. Cumu biá Jesús binni la? gunnaxhiibe laacaʼ ne nga bicaa laabe gudiibe ni gó ca ni candaana ne gusiándabe ti hombre napa lepra (Mat. 15:32; Mar. 1:41). Nanna dxiichinu nadxii Jehová ne Jesús laanu ne riuubaʼ ladxidoʼcaʼ ora gúʼyacaʼ cayacananu (Luc. 1:78; 1 Ped. 5:7). ¡Guizáʼ maʼ racaláʼdxicabe cueecabe guiráʼ ca guendanagana ni napa binni!
6. ¿Xi poder maʼ bidii Dios Jesús?
6 Guiropa, maʼ bidii Dios poder Jesús para cuee guiráʼ ca guendanagana ni cayuniná binni. Jesús si zanda cuee ca guendanagana ni napa binni. ¿Xiñee yaʼ? Purtiʼ nápabe poder para cueebe pecadu, guendahuará ne guendaguti (Mat. 9:1-6; Rom. 5:12, 18, 19). Bisihuinni ca milagru ni biʼniʼ Jesús zanda gusianda «guiráʼ guendahuará» ne guindisaʼ ca ni maʼ guti (Mat. 4:23; Juan 11:43, 44). Laaca nápabe poder para gucueezabe bi yooxhoʼ ne cueebe espíritu malu (Mar. 4:37-39; Luc. 8:2). Guizáʼ ratadxí ladxidoʼno gánnanu maʼ bidii Jehová poder Xiiñiʼ.
7, 8. a) Pur ca milagru biʼniʼ Jesús, ¿xi nannadxíchinu zazaaca despué? b) ¿Xi milagru jma ñuuláʼdxiluʼ ñuuyaluʼ ora maʼ nuuluʼ ndaaniʼ Guidxilayú cubi?
7 Guionna, zanda chuʼnu seguru zedané Reinu stiʼ Dios stale ndaayaʼ. Ca milagru ni biʼniʼ Jesús racané ca ni laanu gánnanu xi guirá zúnibe casi Rey lu Reinu stiʼ Dios. Guníʼ ique ximodo zabáninu ora maʼ guni mandar Jesús lu Guidxilayú riʼ. Guiráʼ xixé binni ziuu nazaaca, purtiʼ zabeebe guiráʼ guendahuará ne guiráʼ yuubaʼ ni runiná binni (Is. 33:24; 35:5, 6; Apoc. 21:3, 4). Maʼ qué zuniná ca desastre natural ca laanu ne maʼ qué ziaadxaʼ ni guidoʼno (Is. 25:6; Mar. 4:41). Guizáʼ ziéchenu ora guidxaagalunu ca binni ni nadxiinu ni guiasa de lade guetu (Juan 5:28, 29). Yanna, ¿xi milagru jma ñuuláʼdxiluʼ ñuuyaluʼ ora maʼ nuuluʼ ndaaniʼ Guidxilayú cubi ca yaʼ?
8 Bisihuinni Jesús naca humilde ne riá binni dxi biʼniʼ milagru, laanu laaca caquiiñeʼ gusihuínninu guiropaʼ cualidad riʼ. Guidúʼyanu chupa ejemplu. Primé, guidúʼyanu ni bizaaca lu ti guendaxheelaʼ ni guca ndaaniʼ guidxi Caná.
GÁCANU HUMILDE
9. ¿Xiñee biʼniʼ Jesús ti milagru lu ti guendaxheelaʼ ni guca ndaaniʼ guidxi Caná? (Juan 2:6-10).
9 (Biindaʼ Juan 2:6-10). Cadi Jesús peʼ nga caquiiñeʼ guni xiixa ora bibidxi vinu lu guendaxheelaʼ que. Ne nin ti profecía qué ruzeeteʼ zuni Mesías ti milagru para guni vinu. Yanna, ¿ximodo rábiluʼ biʼniʼ sentir ca ni cachaganáʼ que yaʼ? Zándaca biá Jesús laacabe, ngue runi gucané laacabe ne bíʼnibe milagru ni bizéʼtenu ra bizulú artículo riʼ. Bíʼnibe 390 litru nisa vinu chaʼhuiʼ. ¿Xiñee ziáʼ vinu bíʼnibe yaʼ? Zándaca para iquiiñecabe ni guiaana sobra ca o gutoocabe ni para gapa ca ni cachaganáʼ que ni iquiiñecaʼ. ¡Nanna pabiáʼ biecheʼ ca ni bichaganáʼ que yaʼ!
Chinándanu ejemplu stiʼ Jesús ne cadi guni presumirnu xi guiráʼ rúninu. (Biiyaʼ párrafo 10 ne 11). e
10. Xi caadxi cosa risaca riete lu relatu ni zeeda lu Juan capítulo 2 (biiyaʼ dibuju).
10 Guidúʼyanu caadxi cosa ni bizaaca lu relatu ni riete lu Juan capítulo 2. Lu relatu riʼ riete gunabaʼ Jesús ca ni cayacané raqué guchacaʼ ca tinaja que de nisa. Bíʼnibe ni purtiʼ qué racaláʼdxibe gusisaca binni laabe (versículo 6 ne 7). Ne laaca cadi laadibe nga yenebe caadxi vinu ra nuu director stiʼ guendaxheelaʼ que, sínuque gunábabe ca ni nuu raqué chiné ni (versículo 8). Laaca qué nindisaʼ diʼ Jesús ti copa vinu nezalú ca ni nuu raqué ne niníʼ: «¡Laguni prueba vinu guizáʼ nanixe bineʼ riʼ!».
11. ¿Xi rusiidiʼ milagru ni biʼniʼ Jesús riʼ laanu?
11 ¿Xi rusiidiʼ milagru ni biʼniʼ Jesús riʼ laanu yaʼ? Rusiidiʼ ni laanu gácanu humilde. Qué niníʼ diʼ Jesús laa biʼniʼ nisa que vinu. Qué ñuu dxi ñuni presumir Jesús pur ca cosa ni biʼniʼ. Sínuque gúcabe humilde ne siempre biyúbibe guisaca Bixhózebe (Juan 5:19, 30; 8:28). Pa gácanu humilde casi Jesús la? qué zuni presumirnu xi guiráʼ huayúninu. Intiica ni cayúninu lu xhiiñaʼ Jehová, cadi guni presumirnu laanu cayúninu ni, sínuque siempre gusisácanu Dios (Jer. 9:23, 24). Nga runi, gusisácanu Jehová purtiʼ laa nga racané laanu gúninu intiica cosa (1 Cor. 1:26-31).
12. ¿Xiruʼ zanda gúninu para gácanu humilde cásica Jesús? Bizeeteʼ ti ejemplu.
12 Guidúʼyanu xiruʼ zanda gúninu para gácanu humilde cásica Jesús. Guiníʼ íquenu gulee ti ancianu tiempu para gacané ti siervu ministerial guni preparar primé discursu públicu ni chigudii. Ne pur gucané ancianu que laabe guizáʼ guyuulaʼdxiʼ ca hermanu que discursu ni bitiidibe. Biluxe si reunión que guyuu tu gudxi ancianu que: «Guizáʼ galán discursu bitiidiʼ fulano, ¿njaʼ?». Ñee caquiiñeʼ guiníʼ ancianu que: «Galán pue, naa gucaniáʼ laabe». O jma galán gácabe humilde ne guiniʼbe: «Dxandíʼ, guizáʼ galán bitiidibe ni». Ti binni humilde qué ruyubi gusisácacabe laa pur ca cosa ni runi pur xcaadxi. Purtiʼ nánnabe ruuyaʼ ne rusisaca Jehová ni cayúnibe (bichaaga ni né Mateo 6:2-4; Heb. 13:16). Pa gácanu humilde casi Jesús la? guizáʼ zusiéchenu Jehová (1 Ped. 5:6).
GUIANU BINNI
13. ¿Xi biʼyaʼ Jesús ante chuʼ ndaaniʼ guidxi Naín, ne xi biʼniʼ? (Lucas 7:11-15).
13 (Biindaʼ Lucas 7:11-15). Dxi maʼ ziné Jesús biaʼ ti iza arondaʼ de cayuni predicar, guyebe guidxi Naín. Riaana ni gaxha de guidxi Sunem, ra bisibani Eliseo xiiñiʼ ti gunaa (2 Rey. 4:32-37). Ora bidxiña Jesús ra puertaʼ stiʼ guidxi Naín, biiyabe zireenécabe ti gueʼtuʼ. Aque triste ni cazaaca riʼ. Guti tobi lucha xiiñiʼ ti viuda ne zinanda stale binni de guidxi que viuda riʼ. Bicueeza Jesús ca binni ni ziné gueʼtuʼ que ne bíʼnibe xiixa para gacanebe viuda que: bisibánibe xiiñiʼ. Ndiʼ nga primé de ca guionnaʼ biaje bisibani Jesús gueʼtuʼ ni riete lu ca Evangeliu.
Chinándanu ejemplu stiʼ Jesús ne guianu ca binni ni maʼ guti ti familia stiʼ. (Biiyaʼ párrafo 14 hasta 16).
14. Xi caadxi cosa risaca riete lu relatu ni zeeda lu Lucas capítulo 7 (biiyaʼ dibuju ca).
14 Guidúʼyanu caadxi cosa ni bizaaca lu relatu riʼ, ni riete lu Lucas capítulo 7. Lu relatu riʼ riete, primeru biiyadxí Jesús «gunaa que» ne despué «guizáʼ biabe laa» (versículo 13). Zándaca ra biiyabe cayuunaʼ gunaa riʼ purtiʼ guti xiiñiʼ, guizáʼ gucaná ladxidoʼbe. Peru cadi biásibe gunaa que, sínuque bíʼnibe xiixa para gacanebe laa. Zándaca né diidxaʼ nadóʼ guniʼbe: «Maʼ cadi gúʼnaluʼ». Peru qué niniʼné si Jesús gunaa que, sínuque bisibánibe xiiñiʼ ne bidiibe laa xiiñiʼ (versículo 14 ne 15).
15. ¿Xi rusiidiʼ milagru ni biʼniʼ Jesús laanu?
15 ¿Xi rusiidiʼ milagru ni biʼniʼ Jesús riʼ laanu? Rusiidiʼ ni laanu guianu ca binni ni maʼ guti ti familia stiʼ. Qué zanda gúninu milagru casi biʼniʼ Jesús ra bisibani xiiñiʼ viuda que. Peru zanda guianu ca ni maʼ guti ti familia stiʼ. ¿Ximodo yaʼ? Primé, caquiiñeʼ guizaaláʼdxinu laacabe, despué guidúʼyanu xi caquiiñecabe ne quixhedxinu ladxidóʼcabe (Prov. 17:17; 2 Cor. 1:3, 4; 1 Ped. 3:8). d Ca diidxaʼ o ca cosa ni gúniluʼ pur laabe guizáʼ zacané ni laabe. Neca para lii ruluíʼ huaxiéʼ risaca ca ni.
16. ¿Xi rusiidiʼ experiencia ni zeeda lu párrafo riʼ laanu? (Biiyaʼ foto ni rusihuinni ni bizaaca lu experiencia ca).
16 Guzéʼtenu ni bizaaca ndaaniʼ ti congregación chupa chonna iza atrá. Biiyaʼ ti hermana cayuunaʼ sti hermana ora cayuundacaʼ ti canción ra riete ziasa guiráʼ ca ni maʼ guti. Cumu nánnabe cadi tan xadxí de guti dxaapahuiiniʼ stiʼ hermana riʼ la? guyebe ra nuu, gudiidxibe laa ne biindanebe laa canción que. Pur ni bíʼnibe riʼ, bietenalaʼdxiʼ sti hermana que nadxii ca hermanu que laa. Ne guizáʼ nayecheʼ biʼniʼ sentir hermana ni guti xiiñiʼ que pur guyé reunión. Laa guníʼ: «Nannaʼ dxiicheʼ ra Yoo stiʼ Reinu si nga zanda guidxelaʼ tu gacané naa». Zanda chuʼnu seguru ruuyaʼ ne rusisaca Jehová guiráʼ ni rúninu para quixhedxinu ladxidóʼ ca ni maʼ guti ti familia stiʼ ne ca ni «maʼ gucadé ladxidóʼ» (Sal. 34:18).
GUDIXHE IQUE GUNI ESTUDIARLUʼ CA MILAGRU NI BIʼNIʼ JESÚS
17. ¿Xi rizíʼdinu de ca milagru ni biʼniʼ Jesús?
17 Zaguidxi fe stinu pa guni estudiarnu ca milagru ni biʼniʼ Jesús. Zacané ca relatu riʼ laanu guidúʼyanu pabiáʼ nadxii Jehová ne Jesús laanu, laaca zusietenalaʼdxiʼ ca ni laanu napa Jesús poder para cuee guiráʼ ca guendanagana ni napa binni ne zanda guni crenu maʼ cadi candaa zedané Reinu stiʼ Dios stale ndaayaʼ para laanu. Laaca zacané ca milagru riʼ laanu gánnanu ximodo zanda gápanu ca cualidad ni bisihuinni Jesús. ¿Xiruʼ zanda gúniluʼ yaʼ? Ora gúniluʼ adoración en familia o gápaluʼ estudiu personal stiluʼ, galán quixheʼ íqueluʼ guni estudiarluʼ xcaadxi milagru ni biʼniʼ Jesús, biiyaʼ xi zanda guiziidiluʼ lu cada tobi de laacani ne despué guniʼné xcaadxi de ni biziidiluʼ. Pa gúniluʼ ni la? zápaluʼ stale tema ni guiníʼneluʼ xcaadxi ni zaguu gana laacaʼ (Rom. 1:11, 12).
18. ¿Xi zazíʼdinu lu sti artículo ca?
18 Ra maʼ ziluxe xhiiñaʼ Jesús lu Guidxilayú riʼ, bíʼnibe guionna ne últimu milagru ra gundísabe gueʼtuʼ. Peru maʼ gadxé gúcani de xhupa que, purtiʼ bisibánibe xhamígube ni maʼ ziné tapa gubidxa de guti. ¿Xi rusiidiʼ relatu riʼ laanu? Ne ¿xi zanda gúninu para iguidxi fe stinu dxandíʼ ziasa ca ni maʼ guti? Lu sti artículo ca zacábinu ca pregunta riʼ.
CANCIÓN 20 Bidiiluʼ Xiiñiluʼ ni jma nadxiiluʼ
a Guizáʼ ridxagayaanu ora ridúʼndanu ca milagru ni biʼniʼ Jesús, casi dxi bicueezabe bi yooxhoʼ, bisiándabe ca binni huará ne gundísabe ca ni maʼ guti. Ne gucuá ca relatu riʼ lu Biblia para gusiidiʼ ca ni laanu ne cadi para gánnasinu ca ni. Lu artículo riʼ zadúʼyanu chupa chonna de laacani, zazíʼdinu jma de Jehová ne Jesús ne zaguidxi fe stinu. Laaca zadúʼyanu xi cualidad naquiiñeʼ gápanu.
b Sicaríʼ bisiene ti binni ni nanna de lu Biblia: «Nabé risaca para ca binni de Oriente gácacaʼ hospitalariu ne jmaruʼ si lu ti guendaxheelaʼ. Caquiiñeʼ gudiicaʼ jma de biaʼ caquiiñeʼ ca invitadu sticaʼ, zacá nga zusihuínnicaʼ nácacaʼ hospitalariu».
c Lu ca Evangeliu ca riete jma de 30 milagru ni biʼniʼ Jesús. Ne laaca guyuu biaje bíʼnibe stale milagru lu ti dxi si. Casi dxi guyé stale binni ra nuube ne «bisiándabe stale de laacaʼ» (Mar. 1:32-34).
d Lu artículo ni láʼ «Jesús supo consolar a sus amigos», ni biree lu revista La Atalaya 1 de noviembre de 2010, zadxélaluʼ ni zacané lii gánnaluʼ xi guiniʼluʼ o xi gúniluʼ para quixhedxiluʼ ladxidóʼ tuuxa ni guti ti familia stiʼ.
e NI RIHUINNI LU IMAGEN RIʼ: Cayéʼ ca ni nuu lu guendaxheelaʼ que vinu chaʼhuiʼ ne cayuuyadxí Jesús laacabe.
