1. ¿Xi nanna dxiichinu?

 NANNA dxiichinu nadxii Jehová laanu ne racaláʼdxibe ni galán para laanu (Rom. 8:35-39). Ne pa gúninu ni ná ca principiu ni zeeda lu Biblia la? zabeendunu ni galán (Is. 48:17, 18). Yanna, pa guidxaagalunu ti guendanagana ni cadi cabézanu, ¿xi zanda gúninu yaʼ?

2. ¿Xi guendanagana zándaca guidxaagalunu ne xi zándaca guiníʼ íquenu?

² Guiráʼ ca xpinni Jehová rapa guendanagana. Zándaca guni ti familia stinu xiixa ni guniná laanu, o zándaca gápanu xiixa guendahuará ne pur laani maʼ huaxiéʼ gúninu lu xhiiñaʼ Jehová. Laaca zanda guniná ti desastre natural ra nabézanu. Ne zándaca sanándacabe laanu pur ni runi crenu. Ora tídinu lu ca guendanagana riʼ zándaca guiníʼ íquenu: «¿Xiñee cadideʼ lu guendanagana riʼ pue? ¿Ñee bineʼ xiixa cosa malu la? ¿Ñee maʼ qué gapa ndaayaʼ stiʼ Jehová la?». Cadi guireeluʼ gana pa huayuni sentirluʼ zacá purtiʼ laaca zacá huayuni sentir stale xpinni Jehová (Sal. 22:1, 2; Hab. 1:2, 3).

3. ¿Xi rusiidiʼ Salmo 34:19 laanu?

³ (Biindaʼ Salmo 34:19). Riete chupa cosa nabé risaca lu versículo riʼ: 1) stale guendanagana ridxaagalú  binni nachaʼhuiʼ ne 2) racané Jehová laacabe gudxiilúcabe ni. ¿Ximodo racané Jehová laanu gudxíʼlunu ca ni yaʼ? Racanebe laanu guiénenu xiñee sicaríʼ nabáninu lu Guidxilayú riʼ. Neca nánnanu zabáninu nayecheʼ pa gúninu ni ná Jehová la? qué riníʼ diʼ nga qué zápanu guendanagana (Is. 66:14). Racalaʼdxiʼ Dios guiníʼ íquenu lu ca ndaayaʼ chiguicaanu despué (2 Cor. 4:16-18). Peru laga cabézanu ca ni la? zacanebe laanu gudxíʼlunu ca guendanagana stinu (Lam. 3:22-24).

4. ¿Xi zazíʼdinu lu artículo riʼ?

⁴ Lu artículo riʼ zeeda ejemplu sti caadxi xpinni Jehová ni bibani dxiqué ne de tiempu riʼ, ne zadúʼyanu xi zanda guizíʼdinu de laacabe. Pa gápanu confianza Jehová zacanebe laanu gudxíʼlunu ca guendanagana ni cadi cabézanu, qué ziuu dxi gudiibe lugar guiábanu (Sal. 55:22). Ra guidúʼndanu ca ejemplu riʼ galán guiníʼ íquenu: «¿Xi ñuneʼ pa naa nga ñapa guendanagana riʼ yaʼ? ¿Ximodo racané ejemplu riʼ naa gapa jma confianza Jehová yaʼ? ¿Xi rusiidiʼ ni naa yaʼ?».

5. ¿Xi biʼniʼ Labán Jacob? (Biiyaʼ dibuju ni zeeda lu portada).

⁵ Bidxaagalú ca xpinni Jehová ni bibani dxiqué guendanagana ni cadi cabézacaʼ. Guidúʼyanu ni bizaaca Jacob. Gudxi bixhózebe laabe guichaganabe ti familia stibe ni runi adorar Jehová, ti xiiñidxaapaʼ Labán. Zacá zaguu Jehová ndaayaʼ laabe (Gén. 28:1-4). Bizuubaʼ Jacob diidxaʼ: bireebe de Canaán ne guyebe ra nabeza Labán, napa Labán chupa xiiñidxaapaʼ, Lea ne Raquel. Guyuulaʼdxiʼ Jacob ni jma nahuiiniʼ de ca xiiñidxaapaʼ Labán ni láʼ Raquel. Ne guná Jacob guni dxiiñaʼ gadxe iza para Labán ti ganda guichaganáʼ Raquel (Gén. 29:18). Peru gudxite Labán laabe ne bidii laabe Lea, xiiñidxaapaʼ ni jma huaniisi. Bidii Labán lugar guichaganáʼ Jacob Raquel ti semana despué, peru caquiiñeʼ gúnibe dxiiñaʼ xcadxe iza para laa (Gén. 29:25-27). Laaca cadi jneza modo biʼniʼ tratar Labán Jacob ora bíʼnicaʼ negocio. Biʼniʼ Jacob xhiiñabe 20 iza. ¡Biaa pabiáʼ malu guca Labán! (Gén. 31:41, 42).

6. ¿Xi xcaadxi guendanagana gupa Jacob?

⁶ Gúparuʼ Jacob guendanagana. Cumu naroʼbaʼ familia stibe la? guyuu biaje qué ñuu ca xiiñibe tobi si. Dede bitoocabe, bíʼchicabe, José, para gaca esclavu. Ne chupa de ca xiiñibe —Simeón ne Leví— biʼniʼ biidicaʼ lá Jehová ne lá familia stibe. Ne guti, xheelabe, Raquel ra gule guiropa xiiñiʼ. Ne dxi maʼ huaniisi Jacob gupa xidé guyé Egipto purtiʼ guyuu ti hambre guidxi ra nabeza (Gén. 34:30; 35:16-19; 37:28; 45:9-11, 28).

7. ¿Ximodo bisihuinni Jehová cayuulaʼdxiʼ ni biʼniʼ Jacob?

⁷ Qué nusaana Jacob de ñapa fe lu ca promesa stiʼ Jehová neca gupa guiráʼ guendanagana ca. Ne bisihuinni Jehová cayuulaʼdxiʼ ni cayúnibe. Guidúʼyanu ximodo. Neca gudxite Labán Jacob peru bidii Jehová laabe stale cosa. Ne ora bíʼyabe nabániruʼ José bidiibe xquixe peʼ Jehová purtiʼ zácaxabe maʼ guti. Cumu guizáʼ xhamigu Jacob Jehová la?  gunda bidxiilú guirá ca guendanagana ni gupa (Gén. 30:43; 32:9, 10; 46:28-30). Pa gaca xhamígunu Jehová ne chuʼnu gaxha de laa la? zanda gudxíʼlunu ca guendanagana ni cadi cabézanu.

8. ¿Xi gucalaʼdxiʼ rey David ñuni?

⁸ Gucalaʼdxiʼ rey David ñúniruʼ xhiiñaʼ Jehová, nucuí templu stiʼ Dios. Ne gúdxibe ni profeta Natán, laa guníʼ: «Biʼniʼ ni ná ladxidoʼloʼ, purtiʼ nuuné Dios ni dxandíʼ lii» (1 Crón. 17:1, 2). Zándaca nagueendaca gudixhe chaahuiʼ David modo gaca dxiiñaʼ que. ¡Nanna pabiáʼ biecheʼ David yaʼ!

9. ¿Xi biʼniʼ David ora gucuaa ti noticia ni cadi cabeza?

⁹ Peru gucuaa David ti noticia ni cadi cabeza. Gueelaʼ queca gudxi Natán David ni ná Jehová, cadi laa diʼ nga ni chigucuí templu que sínuque tobi de ca xiiñiʼ (1 Crón. 17:3, 4, 11, 12). ¿Xi biʼniʼ David ora binadiaga ni yaʼ? Bichaabe ni naguixhe íquebe gúnibe. Bizulube bitópabe bueltu ne guiráʼ ni caquiiñeʼ para gucuí Salomón templu que (1 Crón. 29:1-5).

10. ¿Ximodo guluu Jehová ndaayaʼ David?

¹⁰ Despué de gunna David cadi laa chigucuí templu que, biʼniné Jehová laabe ti pactu: gudxi laabe tobi de ca xiiñibe, ni zá de laabe, qué zusaana de gaca rey (2 Sam. 7:16). Zuuyaʼ David zacá cumplir ca diidxaʼ riʼ lu ti mil iza guni mandar Cristu. ¡Pabiáʼ ziecheʼ David guʼyaʼ naca tobi de ca ni zaa de laa Rey! Rusiidiʼ relatu riʼ laanu neca qué zanda gúninu biaʼ ñuuláʼdxinu lu xhiiñaʼ Jehová, zanda gudiibe laanu stale ndaayaʼ ni cadi cabézanu.

11. ¿Xi ndaayaʼ gucuaa ca xpinni Cristu ni bibani lu primé siglu? (Hechos 6:7).

¹¹ Nabé guyuu ca xpinni Cristu ni bibani lu primé siglu que xizaa, ¿xiñee yaʼ? Purtiʼ qué gánnacabe padxí ne pora gueeda Reinu stiʼ Dios (Hech. 1:6, 7). Yanna, ¿xi bíʼnicabe yaʼ? Qué nusaana de ñuni predicárcabe. Ne ra jma bíʼnicabe ni, bidiicabe cuenta caguu Jehová ndaayaʼ dxiiñaʼ ni cayúnicabe que (biindaʼ Hechos 6:7).

12. ¿Xi biʼniʼ ca xpinni Cristu neca guyuu ti hambre?

¹² Guyuu ti hambre lu guidubi naca Guidxilayú lu primé siglu que (Hech. 11:28). Ne laaca bininani ca xpinni Cristu de tiempu que. Nabé guyuu ca xaíque familia que xizaa pur gudiicaʼ ni gó binnilídxicaʼ. Yanna, ¿xi biʼniʼ ca joven ni maʼ gudixheʼ ique guni jma lu xhiiñaʼ Jehová yaʼ? zándaca guníʼ íquecaʼ pa jma galán gúnicaʼ ni tidiʼ si hambre que. Neca nagana ra cadiʼdiʼ ca xpinni Cristu que, qué nusaanacaʼ de ñúnicaʼ ni ná Jehová, bíʼnicaʼ biaʼ gúndatiʼ ne bidiicaʼ de ni nápacaʼ de guidubi ladxidoʼcaʼ ca hermanu de Judea (Hech. 11:29, 30).

13. ¿Xi ndaayaʼ gucuaa ca xpinni Cristu tiempu guyuu hambre que?

¹³ Tiempu guyuu hambre que, ¿xi ndaayaʼ gucuaa ca xpinni Cristu yaʼ? Ca ni gucuaa ayuda que la? biiyaʼ dxiichicaʼ cayapa Jehová laacaʼ (Mat. 6:31-33). Ne zándaca jmaruʼ si guyuucabe tobi si né ca hermanu ni gucané laacabe. Ne ca hermanu ni bidii de ni napa ¡nanna pabiáʼ biéchecaʼ ra gucanecaʼ laacabe yaʼ! (Hech. 20:35). Guizáʼ guluu Jehová ndaayaʼ laacabe purtiʼ bíʼnicabe biaʼ gúndatiʼ.

14. ¿Xi bizaaca Bernabé ne apóstol Pablo, ne xi ndaayaʼ gucuaacaʼ? (Hechos 14:21, 22).

 ¹⁴ Stale biaje guzanándacabe ca xpinni Cristu de primé siglu que dede né ora cadi cabézacaʼ ni. Dxi nacubi guyé Bernabé ne apóstol Pablo Listra, nabé guyuulaʼdxiʼ binni gucaadiaga laacabe. Peru despué bicuudxi ca enemigu stícabe ca binni que para guchacaʼ guié Pablo dede guníʼ íquecaʼ maʼ gútibe (Hech. 14:19). Peru biree Bernabé ne Pablo zecaʼ sti lugar ziguni predicarcaʼ. ¿Xi ndaayaʼ gucuaacabe yaʼ? «gucanécabe stale binni gaca discípulo». Ne ejemplu stícabe ne ca diidxaʼ guníʼcabe guluu ni gana ca hermanu que (biindaʼ Hechos 14:21, 22). Cumu qué nusaana Bernabé ne Pablo de ñuni predicarcaʼ la? gucanecaʼ stale binni. Nga runi, pa qué guireʼnu gana ne gúninu dxiiñaʼ ni bisaanané Jehová laanu la? zacaanu stale ndaayaʼ.

15. ¿Xi rusiidiʼ ejemplu stiʼ hermanu Alexander Macmillan laanu?

¹⁵ Ante guedandá iza 1914 cabeza ca xpinni Jehová guizaaca caadxi cosa. Stale de laacaʼ guníʼ íquecaʼ maʼ cadi candaa ziecaʼ guibáʼ ne tobi de ca hermanu que nga, Alexander Macmillan. Lu beeu septiembre iza 1914 bidiibe ti discursu ne luni guniʼbe: «Zándaca ndiʼ nga últimu discursu públicu ni gudieeʼ». Peru qué nizaaca diʼ ni. Purtiʼ despué bicaabe ca diidxaʼ riʼ: «Guyuu chupa chonna de laadu nagueendacaʼ guníʼ íquedu mápeca chuudu guibáʼ». Ne gúnirube: «Ni caquiiñeʼ gúnidu ca dxiqué nga cadi gusaana de gúnidu xhiiñaʼ Señor». Ne nga peʼ nga ni bíʼnibe. Biʼniʼ predicarbe né stale gana, gucanebe ca hermanu ni deguyoo pur fe sticaʼ ne neca maʼ nagólabe qué nusaana de ñebe reunión. Biquiiñebe tiempu stibe jneza laga cabézabe esperanza stibe. ¿Ximodo gucané ndiʼ laabe yaʼ? Lu iza 1966, ante gátibe bicaabe ca diidxaʼ riʼ: «Guizáʼ naguidxi nuu fe stinneʼ cásica dxiqué». Bisaanabe ti ejemplu galán para laanu ne jmaruʼ si para ca ni maʼ ziné stale iza de cabézacaʼ ca ndaayaʼ stiʼ Jehová (Heb. 13:7).

16. ¿Xi guendanagana bidxaagalú hermanu Jennings ne xheelaʼ? (Santiago 4:14).

¹⁶ Raca huará stale xpinni Jehová ora cadi cabézacaʼ ni. Casi hermanu Herbert Jennings guníʼ lu historia stiʼ, laa ne xheelaʼ guizáʼ nayecheʼ biʼniʼ servircaʼ Jehová ndaaniʼ guidxi Ghana. b Ra gudiʼdiʼ tiempu, bihuinni nápabe ti guendahuará ni cayuniná xquendabiaanibe. Biquiiñeʼ hermanu Jennings ca diidxaʼ ni zeeda lu Santiago 4:14 (biindaʼ ni) para guiníʼ zeeda gaca ni cazaaca que xiixa ni cadi cabézabe gaca. Bicaabe ca diidxaʼ riʼ: «Gupa xidé bidxíʼludu ni cazaacadu que ne bisaanadu guidxi Ghana, ca xhamígudu ne bibiguétadu Canadá [para guicaaʼ tratamientu]». Gucané Jehová hermanu Jennings ne xheelaʼ para cadi gusaanacaʼ de gúnicaʼ ni nabe neca cadíʼdicaʼ lu guendanagana.

17. ¿Ximodo huayacané ejemplu stiʼ hermanu Jennings xcaadxi hermanu?

¹⁷ Guizáʼ gucané ca diidxaʼ ni guníʼ  hermanu Jennings lu historia stiʼ xcaadxi hermanu. Ti hermana bicaa ca diidxa riʼ: «Ndiʼ nga tobi de ca artículo ni nabé gucané naa [...]. Ra biindaʼ gupa xidé bisaana hermanu Jennings asignación ni napa para guicaa tratamientu stiʼ gucané ni naa gudxieluaʼ guendanagana ni napa». Ne sti hermanu bicaa: «Chii iza gucaʼ ancianu peru gupa xidé bisaanaʼ ni pur guendahuará ni bininá xquendabiaaneʼ. Guníʼ iqueʼ qué risacaʼ, dede rireeʼ gana guundaʼ ca historia stiʼ ca hermanu [...] Peru guizáʼ gucané naa guundaʼ qué niree hermanu Jennings gana». Pa gudxíʼlunu ca guendanagana ni cadi cabézanu la? zanda gacanenu xcaadxi ra gúʼyacaʼ cayuni huantarnu ne naguidxi nuu fe stinu (1 Ped. 5:9).

18. ¿Xi rusiidiʼ ni bizaaca ti hermana viuda de Nigeria laanu? (Biiyaʼ ca foto ni rusihuinni ni bizaaca lu experiencia riʼ).

¹⁸ Stale xpinni Jehová huayuniná pandemia COVID-19 laacaʼ. Guzéʼtenu ni bizaaca ti hermana viuda de Nigeria, cumu qué gápabe bueltu ne huaxiéʼ guendaró nápabe la? ti siadóʼ gunabadiidxaʼ xiiñibe laabe xi gócabe despué, purtiʼ maʼ ti taza arroz si nápacabe. Gudxi hermana que laabe: «Cumu qué gápanu ni guidoʼno nin bueltu la? zinándanu ejemplu stiʼ viuda de Sarepta que, gúninu ni guidoʼno ne ni nápasinu ne cuézanu gacané Jehová laanu» (1 Rey. 17:8-16). Nin caʼruʼ lica guiníʼ íquecabe xi gócabe, málasi yené ca hermanu que ti bolsa despensa ra nuucabe. ¡Ndaaniʼ bolsa que nuu guendaró para jma de chupa semana! Cadi cabeza hermana que ni peru raqué bidiibe cuenta bicaadiaga Jehová ni gúdxibe dxaapahuiiniʼ stibe. Nga runi pa gápanu confianza Jehová ora gápanu guendanagana ni cadi cabézanu la? zacané ni laanu chuʼnu jma gaxha de laabe (1 Ped. 5:6, 7).

19. ¿Xi guendanagana bidxaagalú Alexéi Yershov?

 ¹⁹ Lu ca últimu iza riʼ stale de ca hermanu stinu canazanándacabe laacaʼ, ti cosa ni cadi cabézacaʼ. Guidúʼyanu ni bizaacaʼ ti hermanu de Rusia láʼ Alexéi Yershov. Guyuunísabe lu iza 1994, para iza riʼ la? ca testigu stiʼ Jehová de guidxi riʼ randa rúnicaʼ xhiiñaʼ Jehová sin chuʼ tu gucueeza laacaʼ. Peru gudiʼdiʼ si iza maʼ qué ñanda ñúnicabe ni. Lu iza 2020 yechuu caadxi policía ra lidxi hermanu riʼ ne zinecaʼ stale cosa stibe. Ne chupa chonna beeu despué, ti binni ni maʼ ziné jma de ti iza de cayuni estudiar Biblia. Biʼniʼ xiixa ni cadi jneza. Bitiidibe gobiernu caadxi videu ni biʼniʼ grabarbe para guseguyoocabe hermanu riʼ. ¡Aque feu ni biʼniʼ hombre riʼ njaʼ!

20. ¿Xi huayuni hermanu Yershov para chuʼ jma gaxha de Jehová?

²⁰ Gucané ni bizaaca hermanu Yershov laa chuʼ jma gaxha de Jehová. Laa guníʼ: «Naa ne xheelaʼ jma runi orardu. Pa qué ñacané Jehová laadu la? qué ñanda nudxíʼludu guendanagana riʼ» Ne guníʼrube: «Ni huayacané naa cadi guireeʼ gana nga guneʼ estudiar Biblia ne guiníʼ iqueʼ ejemplu stiʼ ca xpinni Jehová ni bibani dxiqué. Lu Biblia zeeda xcaadxi relatu ni rusihuinni pabiáʼ risaca cadi chuʼnu xizaa ne gápanu confianza Jehová».

21. ¿Xi bizíʼdinu lu artículo riʼ?

²¹ ¿Xi bizíʼdinu lu artículo riʼ? Pa gápanu confianza Jehová neca guidxaagalunu guendanagana ni cadi cabézanu la? zacanebe laanu gudxíʼlunu ca ni. Casi ná textu ra biree artículo riʼ, «stale guendanagana ridxaagalú binni nachaʼhuiʼ, peru ribee Jehová laabe de laacani» (Sal. 34:19). Nga runi, cadi guicá íquenu ca guendanagana nápanu, sínuque guiníʼ íquenu napa Jehová poder para gacané laanu. Zacá zanda guininu ca diidxaʼ guníʼ apóstol Pablo: «Napaʼ stipa para guneʼ intiica cosa purtiʼ rudii Dios poder naa» (Filip. 4:13).