ARTÍCULO DE ESTUDIU 16
«Ziasa bizáʼnaluʼ»
«Para ná Jesús rabi laabe: “Ziasa bizáʼnaluʼ”» (JUAN 11:23).
CANCIÓN 151 Jiobá zucaa ridxi de guiráʼ
NI ZAZÍʼDINU a
1. ¿Ximodo bisihuinni ti hombrehuiiniʼ napa fe zedandá dxi zabani ca ni maʼ guti?
TI HOMBREHUIINIʼ láʼ Matthew nápabe ti guendahuará malu ne stale biaje maʼ biʼniʼ operárcabe laabe. Dxi nápabe gadxe iza, laabe ne familia stibe cayuuyacabe programa JW Broadcasting®. Ne lu canción stini bihuinni cadxaagalú caadxi hermanu ca familia sticaʼ ni maʼ biasa de lade gueʼtuʼ. b Biluxe biiyasícabe Broadcasting, guyé Matthew ra nuu bixhoze ne jñaa, gunaazebe nacaʼ ne gúdxibe laacaʼ: «Mami, papi, ¿biiyatu la? Pa gateʼ la? zadúʼyanu sti biaje, cadi guidxíbitu». ¡Nanna pabiáʼ nayecheʼ biʼniʼ sentir bixhoze ne jñaa Matthew ora bíʼyacaʼ pabiáʼ fe nápabe! Rihuínnica dxandíʼ runi cré hombrehuiiniʼ riʼ zabani ca binni ni maʼ guti.
2, 3. ¿Xiñee nabé galán guiníʼ íquenu lu esperanza ni nápanu zedandá dxi ziasa ca ni maʼ guti?
2 Gatigá galán guiníʼ íquenu lu ca promesa ni zeeda lu Biblia ra ná zabani ca binni ni maʼ guti (Juan 5:28, 29). ¿Xiñee yaʼ? Purtiʼ zándaca gueeda gátinu o gueeda gati ti binni ni nadxiinu (Ecl. 9:11; Sant. 4:13, 14). Zacané esperanza riʼ laanu gudxíʼlunu intiica guendanagana gápanu (1 Tes. 4:13). Biblia cayabi laanu runibiáʼ Bixhózenu ni nuu guibáʼ laanu ne guizáʼ nadxiibe laanu (Luc. 12:7). Guníʼ ique pabiáʼ runibiáʼ Jehová laanu. Ne guizáʼ nadxiibe laanu purtiʼ neca gátinu zusibánibe laanu sti biaje.
3 Lu artículo riʼ zadúʼyanu ximodo zanda gápanu fe lu promesa ni caníʼ zedandá dxi ziasa ca gueʼtuʼ ca. Laaca zaguidxi fe stinu ra guidúʼndanu relatu ni zeeda lu textu ra biree artículo riʼ: «Ziasa bizáʼnaluʼ» (Juan 11:23). Ne últimu la? zazíʼdinu ximodo iguidxi fe stinu lu esperanza ni nápanu zedandá dxi ziasa ca binni ni maʼ guti.
XIÑEE ZANDA GUNI CRENU ZIASA CA BINNI NI MAʼ GUTIʼ
4. ¿Xidé caquiiñeʼ chuʼnu seguru para guni crenu ti promesa? Bizeeteʼ ti ejemplu.
4 Para guni crenu zaca cumplir ti promesa la? caquiiñeʼ chuʼnu seguru napa ni chiguni ni ca poder, ne racalaʼdxiʼ guni ni. Guiníʼ íquenu, bininá ti tormenta lídxinu, ne gudxi ti xhamígunuʼ laanu: «Zacaniáʼ lii gacachaahuiʼ lídxiluʼ». Nánnanu nácabe ti binni ni runi ni riníʼ, nánnabe gucuibe yoo ne nápabe ca herramienta ni caquiiñeʼ. Ngue runi zuni crenu zanda gacanebe laanu. Yanna, ¿ñee runi crenu promesa ni cayuni Dios laanu, zandisaʼ ca ni maʼ guti la? ¿Ñee racaláʼdxibe ne nápabe poder para gúnibe ni la?
5, 6. ¿Xiñee nanna dxiichinu racalaʼdxiʼ Jehová guindisaʼ ca ni maʼ guti?
5 ¿Ñee racalaʼdxiʼ Jehová guindisaʼ ca ni maʼ guti la? Racalaʼdxiʼ pue. Pur espíritu santu stiʼ Jehová bicaa caadxi hombre lu Biblia ziasa ca binni ni maʼ guti (Is. 26:19; Os. 13:14; Apoc. 20:11-13). Runi cumplir Jehová guiráʼ promesa ni runi (Jos. 23:14). Ne maʼ racaláʼdxibe guindísabe ca ni maʼ guti. ¿Ximodo nánnanu ni yaʼ?
6 Guiníʼ íquenu ni guníʼ Job. Laa gunna dxiichiʼ pa gueeda gati la? zandisaʼ Jehová laa sti biaje (Job 14:14, 15). Ngaca racalaʼdxiʼ Jehová guni pur ca xpinni ni maʼ guti. ¡Guizáʼ maʼ racalaʼdxiʼ Jehová guindisaʼ laacabe! Chúʼcabe nazaaca ne guibánicabe nayecheʼ. Yanna, ¿xi runi sentir Jehová pur ca binni ni maʼ guti ni qué ñanda ñunibiáʼ laabe yaʼ? Laaca racalaʼdxiʼ Bixhózenu ni nadxii laanu gusibani laacabe sti biaje (Hech. 24:15). Racaláʼdxibe gueeda gácacaʼ xhamígube ne guibánicaʼ sin qué chuʼ dxi gáticaʼ lu Guidxilayú riʼ (Juan 3:16). Maʼ biénenu dxandíʼ peʼ racalaʼdxiʼ Jehová guindisaʼ ca binni ni maʼ guti.
7, 8. ¿Xiñee nanna dxiichinu napa Jehová poder para guindisaʼ ca ni maʼ guti?
7 ¿Ñee napa Jehová poder para guindisaʼ ca ni maʼ guti la? Nápabe pue, laabe nga Dios «ni jma napa poder» (Apoc. 1:8). Zanda gunitilube tutiica gucaalú laabe dede né guendaguti (1 Cor. 15:26). Yanna, cumu maʼ nánnanu ndiʼ la? riguidxi fe stinu ne ratadxí ladxidoʼno. Guzéʼtenu ni bizaaca hermana Emma Arnold. Nabé nadipaʼ ra gudíʼdibe laabe né familia stibe lu Segunda Guerra Mundial. Nabé stale binnilídxicabe guti lu ca campu de concentración nazi que. Ndiʼ nga ni gúdxibe xiiñibe para quixhedxibe ladxidóʼ: «Pa ñaca nundiibi guendaguti binni para siempre, ¿ñee cadi dxandíʼ nusihuinni nga jma nadipaʼ ni que Dios la?». Nga runi, gastiʼ xiixa nin tuuxa ni jma nadipaʼ que Jehová. Cumu laabe nga bizaʼbe guendanabani la? nga runi, nápabe poder para gusibánibe sti biaje ca ni maʼ guti.
8 Nuu sti razón ni rucaa laanu guni crenu zanda gusibani Dios ca ni maʼ guti: gastiʼ qué riaandaʼ laabe. Nánnabe lá cada tobi de ca beleguí (Is. 40:26). Rietenalaʼdxiʼ Jehová ca ni maʼ guti (Job 14:13; Luc. 20:37, 38). Zanda guietenaláʼdxibe dede ca cosa jma nahuiiniʼ de binni ni chindísabe ca, casi ca cosa jma nahuiiniʼ nuu lu rini stiʼ, modo bibani ne guiráʼ ni rietenaláʼdxi.
9. ¿Xi rucaa laanu guni crenu zusibani Jehová ca ni maʼ guti?
9 Maʼ bizíʼdinu zanda guni crenu zusibani Jehová ca ni maʼ guti, ¿xiñee yaʼ? Purtiʼ nápabe poder ne racaláʼdxibe gúnibe ni. Maca gundisaʼ Jehová chupa chonna binni dxiqué ne laani nga sti razón ni rucaa laanu guni crenu dxandíʼ zuni cumplirbe ni maʼ guniʼbe. Tiempu gucuá Biblia bidii Jehová poder caadxi hombre para gusibánicaʼ tuuxa ni maʼ guti, tobi de ca hombre que nga Jesús. Yanna guidúʼyanu ni bizaacaʼ dxi bisibani Jesús ti binni, riete ni lu Juan capítulo 11.
GUTI TI XHAMIGU JESÚS
10. ¿Xi bizaaca guidxi Betania dxi nuu Jesús deche guiiguʼ Jordán, ne xi bíʼnibe? (Juan 11:1-3).
10 (Biindaʼ Juan 11:1-3). Napa Jesús caadxi xhamigu Betania: Lázaro ne ca bizaʼnaʼ, María ne Marta (Luc. 10:38-42). Ra ziluxe iza 32, guca huará Lázaro. Guizáʼ maʼ cadxibi ca bizáʼnabe; ca dxi que nuu Jesús deche guiiguʼ Jordán, ngue runi biseendacabe tu chitidxi laabe xi cayaca, peru naquiiñeʼ saʼ binni que chupa dxi para chindá ra nuube (Juan 10:40). Guiráʼ yendá binni ni zitidxi Jesús que huará xhamigu la? maʼ guti Lázaro. Neca nanna Jesús maʼ guti xhamigu la? biaanaruʼ xhupa gubidxa raqué. Ngue runi ora guyé Jesús Betania la? mápeca tapa gubidxa de guti Lázaro. Racalaʼdxiʼ Jesús guni xiixa para ca xhamigu ne para guisaca Dios (Juan 11:4, 6, 11, 17).
11. ¿Xi rusiidiʼ relatu stiʼ Jesús ne ca xhamigu laanu?
11 Guidúʼyanu xi rusiidiʼ relatu riʼ laanu. Dxi biseendaʼ María ne Marta tuuxa chitidxi Jesús ni cazaaca que la? qué ñábidicabe Jesús cheʼ Betania, ni gúdxicabe laa nga naguixhe ti guendahuará xhamigu (Juan 11:3). Ñanda nusibani Jesús Lázaro dede ra nuu. Peru guyebe Betania para chuʼbe ra nuu ca xhamígabe, María ne Marta. ¿Ñee nápaluʼ ti xhamíguluʼ ni nuuca listu para gacané lii la? Pa zacá ni la? nanna dxiichiluʼ zacanebe lii ora gápaluʼ xiixa guendananá (Prov. 17:17). Pa chinándanu ejemplu stiʼ Jesús la? zácanu ti buen amigu casi laa. Guidúʼyanu xiruʼ bizaaca.
12. ¿Xi biʼniʼ prometer Jesús Marta, ne xiñee zanda guni cré gunaa riʼ zuni Jesús ni maʼ guníʼ? (Juan 11:23-26).
12 (Biindaʼ Juan 11:23-26). Ora gunna Marta maʼ nuu Jesús gaxha de guidxi Betania, ziguxooñeʼ zidxaagalú laabe ne gudxi laabe: «Señor, pa ñuuluʼ raríʼ, qué ñati diʼ bizanaʼ» (Juan 11:21). Ñándaca nusianda Jesús Lázaro peru racaláʼdxibe gúnibe xiixa pur ca xhamígube. ¿Xii ni yaʼ? Gudxi Jesús Marta: «Ziasa bizáʼnaluʼ». Ne gudixhedxibe ladxidóʼ Marta ra gúdxibe laa: «Naa nga rusibaneʼ gueʼtuʼ, ne naa nga guendanabani». Ne zanda gúnibe ni purtiʼ maʼ bidii Jehová laabe poder para gusibánibe ca ni maʼ guti. Ante guizaaca ndiʼ, maca bisibani Jesús ti dxaapahuiiniʼ ne laaca bisibánibe xiiñiʼ ti viuda ora zigucaachicabe laa (Luc. 7:11-15; 8:49-55). Nánnacabe maʼ bisibani Jesús binni ni maʼ guti. Peru ¿ñee zanda gusibánibe tuuxa ni maʼ ziné tapa gubidxa de guti ne maʼ cayuudxuʼ la?
«¡LÁZARO, BIREE!»
Biuubaʼ ladxidóʼ Jesús ora biʼyaʼ cayacaná ca xhamigu. (Biiyaʼ párrafo 13 ne 14).
13. Casi ná Juan 11:32-35, ¿xi biʼniʼ Jesús ora biʼyaʼ cayuunaʼ María ne ca ni nuu raqué? (Biiyaʼ dibuju ca).
13 (Biindaʼ Juan 11:32-35). Yanna, guiníʼ íquenu xi biʼniʼ María ora guyé ra nuu Jesús. Bizuxíbibe xañee Jesús ne gúdxibe laa: «Señor, pa ñuuluʼ raríʼ, qué ñati diʼ bizanaʼ». Ora biʼyaʼ Jesús cayuunaʼ María ne guiráʼ ca ni nuu raqué la? biá laacabe, gucuaalaʼdxiʼ ne gucaná ladxidóʼ. Nanna Jesús pabiáʼ naná nga gati tuuxa ni nadxiinu, nga runi maʼ racaláʼdxibe cueebe guiráʼ guendanagana ni cayuniná laanu.
14. Ra biinaʼ Jesús dxi guti Lázaro, ¿xi rusiidiʼ ni laanu de Jehová?
14 Ra biinaʼ Jesús dxi guti Lázaro, bihuinni naca Jehová ti Dios ni riá binni. Casi bizíʼdinu lu artículo gudiʼdiʼ ca, rusihuinni Jesús modo naca Bixhoze, ni runi sentir ne ni riníʼ ique (Juan 12:45). Nga runi, ora ridúʼndanu gucaná ladxidóʼ Jesús ne biinaʼ pur ca xhamigu, nánnanu laaca zaqueca runi sentir Jehová ora ruuyaʼ cayacananu (Sal. 56:8). Yanna, ra maʼ nánnanu racaná ladxidóʼ Jehová ne riá laanu, ¿cadi dxandíʼ rucaa nga laanu chuʼnu jma gaxha de laabe la?
Bisihuinni Jesús napa poder para gusibani ca ni maʼ guti. (Biiyaʼ párrafo 15 ne 16).
15. Casi ná Juan 11:41-44, ¿xi bizaaca ra baʼ ra gaʼchiʼ Lázaro? (Biiyaʼ dibuju).
15 (Biindaʼ Juan 11:41-44). Ora yendá Jesús ra baʼ ra gaʼchiʼ Lázaro, gunábabe cueecabe guié daʼguʼ ruaa ni. Óraque guníʼ Marta: «Señor, maʼ candáʼ yuudxube». Para gudxi Jesús laabe: «¿Cadi maʼ gudxeʼ lii zuuyaluʼ poder stiʼ Dios pa guni creluʼ la?» (Juan 11:39, 40). Óraque gundisalú Jesús guibáʼ ne biʼniʼ ti oración nezalú guirácabe. Racaláʼdxibe ganna ca ni nuu raqué, Bixhózebe nga chiguni milagru riʼ. Despué de guníʼnebe Bixhózebe bicaabe ti ridxi reciu ne guniʼbe: «¡Lázaro, biree!» ne óraque biree Lázaro de ndaaniʼ baʼ que. Guizáʼ bidxagayaa ca ni nuu raqué purtiʼ guníʼ íquecaʼ guirutiʼ zanda guni ni biʼniʼ Jesús que (biiyaʼ nota de estudiu stiʼ Juan 11:17).
16. ¿Ximodo racané ni zeeda lu Juan capítulo 11 laanu gápanu fe zedandá dxi ziasa ca ni maʼ guti?
16 Riguidxi fe stinu lu esperanza ni nápanu zabani ca ni maʼ guti ora ridúʼndanu relatu ni zeeda lu Juan capítulo 11. ¿Xiñee yaʼ? Pur ni gudxi Jesús Marta: «Ziasa bizáʼnaluʼ» (Juan 11:23). Laaca racalaʼdxiʼ Jehová ne Jesús guindisacaʼ ca ni maʼ guti ne nápacabe poder para gúnicabe ni. Pur modo biuubaʼ ladxidoʼbe bisihuínnibe maʼ racaláʼdxibe cueebe guendaguti ne guiráʼ yuubaʼ. Dxi bisibani Jesús Lázaro bisihuínnibe nápabe poder para gusibánibe ca ni maʼ guti. Guietenaláʼdxinu gudxi Jesús Marta: «¿Cadi maʼ gudxeʼ lii zuuyaluʼ poder stiʼ Dios pa guni creluʼ la?» (Juan 11:40). Pur ni maʼ bidúʼyanu riʼ, zanda guni crenu dxandíʼ zandisaʼ Dios ca ni maʼ guti. Peru ¿xi zanda gúniluʼ para cadi gusaanaʼ de guni creluʼ dxandíʼ ziasa ca ni maʼ guti yaʼ?
DXANDÍʼ ZIASA CA NI MAʼ GUTI
17. ¿Xi caquiiñeʼ gúninu ora guidúʼndanu ca relatu ra riete biasa binni ni maʼ gutiʼ?
17 Guidúʼndanu ne guiníʼ íquenu ca relatu ra riete biasa ca ni maʼ guti. Lu Biblia riete xhono binni biasa de lade gueʼtuʼ. c Zanda quixheʼ íquenu guidúʼndanu cada tobi de ca relatu riʼ. Ra gúninu ni la? zadúʼyanu gúcacabe binni casi laanu: hombre, gunaa ne xcuidi. Lu cada tobi de laacani guiníʼ íquenu xi rusiidiʼ ca ni laanu, guidúʼyanu pabiáʼ poder napa Jehová ne racalaʼdxiʼ gusibani sti biaje ca ni maʼ guti. Ne ni jma risaca guiníʼ íquenu nga dxi biasa Jesús de lade gueʼtuʼ. Dxi guca ni la? stale binni biiyaʼ dxi biásabe de lade gueʼtuʼ ne ndiʼ racané laanu iguidxi fe stinu (1 Cor. 15:3-6, 20-22).
18. ¿Ximodo zanda iquíʼñenu ca canción ra riete ziasa ca ni maʼ guti? (Biiyaʼ ni ca ñee yaza).
18 Bicaadiaga, biindaʼ ne guníʼ ique ca canción ra riete ziasa ca ni maʼ guti (Efes. 5:19). d Ruquidxi ca canción ca fe stinu ne rucaa ca ni laanu ganna dxiichinu dxandíʼ zabani ca ni maʼ guti. ¿Xiñee qué quixheʼ íquetu casi familia gucaadiágatu ca canción riʼ lu adoración en familia stitu yaʼ? Zanda gúʼndatu ca ni ne guiníʼ íquetu ni riete lúcani. Pa guizíʼdinu ca canción riʼ la? zacané espíritu stiʼ Jehová laanu guietenaláʼdxinu ca ni, zudii ca ni laanu stipa ne zaguidxi fe stinu ora gueeda gati ti familia stinu o gudxíʼlunu xiixa guendanagana.
19. ¿Ximodo zanda iquíʼñenu xquendabiaaninu ora guiníʼ íquenu ziasa ca ni maʼ guti? (Biiyaʼ cuadru ni láʼ: « Xi ninabadiidxaluʼ laacabe»).
19 Iquíʼñenu xquendabiaaninu. Bidii Jehová ni laanu para ganda guiníʼ íquenu maʼ nuunu lu Guidxilayú cubi ca. Ti hermana guníʼ: «Guizáʼ riníʼ iqueʼ maʼ nuaaʼ ndaaniʼ paraísu dede riuuxieeʼ ca guieʼ ni nuu raqué». Yanna, de lade ca xpinni Jehová ni bibani dxiqué, ¿tu racaláʼdxiluʼ gunibiaʼluʼ? Guníʼ ique xi zanda guinabadiidxaluʼ laabe. Ne laaca guníʼ ique ca diidxaʼ ni chitídxiluʼ ca familia stiluʼ ni guiasa de lade gueʼtuʼ. ¡Pabiáʼ ziécheluʼ gúʼyaluʼ laaca sti biaje! Dede zuunaluʼ ne zaguidxi dxiichiluʼ laacaʼ.
20. ¿Xi cadi caquiiñeʼ gusaana de gúninu?
20 Guizáʼ rudiʼnu xquixe peʼ Jehová purtiʼ maʼ bidiibe laanu esperanza zusibánibe ca ni maʼ guti. Ne nanna dxiichinu zúnibe ni purtiʼ racaláʼdxibe ne zanda gúnibe ni. Nga runi caquiiñeʼ guquídxinu fe stinu lu esperanza riʼ. Pa gúninu ni la? zadxíñanu jma gaxha de Dios stinu. Ne casi ñaca ñábibe laanu: «Ziasa familia stiluʼ ni nadxiiluʼ».
CANCIÓN 147 Chigudii Dios ti guendanabani ni qué zaluxe
a Pa maʼ guti ti binni ni nadxiiluʼ zacané esperanza ni cudii Biblia lii gatadxí ladxidoʼloʼ zedandá dxi ziasa ca binni ni maʼ guti. Peru ¿ximodo zanda gusiéneluʼ xcaadxi xiñee runi creluʼ promesa riʼ yaʼ? ¿Ne xi zanda gúniluʼ para cadi gusaana de guni creluʼ esperanza riʼ yaʼ? Zacané artículo riʼ laanu iguidxi fe stinu zedandá dxi ziasa ca gueʼtuʼ ca.
b Canción ni láʼ: Maʼ gaxhadóʼ nuuni, ni biree lu JW Broadcasting noviembre de 2016.
c Biiyaʼ cuadru ni láʼ: «Xhono binni biasa de lade gueʼtuʼ» ni biree lu Torre stiʼ ni rapa 1 de agosto 2015, yaza 4.
d Biiyaʼ ca canción ni zeeda lu libru Guidúʼndanu ne guendanayecheʼ: Bixuiʼlú nuuluʼ ndaaniʼ Guidxilayú cubi ca (canción 139), Cadi gundaaluʼ premiu riʼ (canción 144) ne Jiobá zucaa ridxi de guiráʼ (canción 151). Ne laaca zanda gúʼyaluʼ ca canción ni zeeda lu jw.org casi Maʼ gaxhadóʼ nuuni, Dxandíʼ zacaanu guendanabani ca ne Zuuyuʼ ni.
