1. ¿Xii nga paraísu espiritual, ne xi maʼ gudixhe íquenu gúninu?

 TIEMPU stinu riʼ, ndaaniʼ guidxilayú riʼ nuu ti paraísu ra nuu millón de binni ni cayuni cosa galán, nabánicaʼ nayecheʼ ne maʼ gudixhe íquecaʼ cadi guireecaʼ de ndaaniʼ ni. Laaca racaláʼdxicabe chuʼ xcaadxi binni ndaaniʼ paraísu riʼ. ¿Xi paraísu ndiʼ caninu raríʼ yaʼ? ¡Caninu de ti paraísu espiritual! a

2. ¿Xiñee ridxagayaanu nuu ti paraísu espiritual?

² Ridxagayaanu purtiʼ Jehová maʼ biʼniʼ chuʼnu ndaaniʼ paraísu riʼ sin guidxíbinu neca nabáninu ndaaniʼ ti guidxilayú malu ra gastiʼ guendarannaxhii ne nuu stale guendaquéiquiiñeʼ (1 Juan 5:19; Apoc. 12:12). Cumu nanna Jehová zanda guniná guidxilayú stiʼ Binidxabaʼ riʼ binni, riguube laanu ti lugar seguru ra zanda guni adorarnu laabe né guendanayecheʼ. Lu Biblia riete naca paraísu espiritual riʼ casi ti lugar «ra zanda guilanu» ne casi «ti jardín ni qué riaadxaʼ nisa» (Is. 4:6; 58:11). Napa ca ni nuu ndaaniʼ paraísu riʼ ndaayaʼ stiʼ Jehová nga runi nuucaʼ nayecheʼ ne runi sentircaʼ seguru lu ca últimu dxi nabé nagana riʼ (Is. 54:14; 2 Tim. 3:1).

3. ¿Padxí ne ximodo guca cumplir ca diidxaʼ ni riete lu Isaías capítulo 65 primé biaje?

 ³ Lu libru stiʼ Isaías capítulo 65 guníʼ Jehová ximodo zabáninu ndaaniʼ paraísu espiritual. Ca diidxaʼ ni bicaa profeta riʼ, guca cumplir ca ni primé biaje lu iza 537 ante de ca dxi stiʼ Jesús. Tiempu que, ca judíu ni guca arrepentir bireecaʼ de ndaaniʼ guidxi Babilonia ne bibiguétacaʼ xquídxicaʼ. Cumu gucané ne guluu Jehová ndaayaʼ laacabe la? bibiguetaʼ bicuícabe guidxi Jerusalén ne bíʼnicabe ni ti guidxi sicarú. Ne laaca biʼniʼ chaahuicabe templu ni nuu ndaaniʼ guidxi Israel para guibiguetaʼ guni adorárcabe Jehová modo racalaʼdxiʼ (Is. 51:11; Zac. 8:3).

4. Tiempu riʼ, ¿ximodo cayaca cumplir ca diidxaʼ ni riete lu Isaías capítulo 65?

⁴ Guiropa biaje guca cumplir profecía ni guníʼ Isaías nga lu iza 1919, dxi biree ca xpinni Jehová de Babilonia guidxi roʼ. Ne dede dxi que, ziroobaʼ paraísu espiritual riʼ lu guidubi guidxilayú. Né stale ganna biʼniʼ formar ca ni runi predicar de Reinu stiʼ Dios stale congregación. Stale hombre ne gunaa ni biʼniʼ cosa qué iquiiñeʼ ne ni gupa ti vida inmoral dxiqué maʼ gudixhe íquecaʼ guibánicaʼ modo riuulaʼdxiʼ Dios ne maʼ nácucaʼ ti lari nacubi «ni bizaʼbe según ni jneza ne ni dxandíʼ» (Efes. 4:24). Dxandíʼ, stale de ca ndaayaʼ ni guníʼ Isaías zaca cumplir ca ni ndaaniʼ guidxilayú cubi ca. Peru dede ca yanna maʼ cadúʼyanu caadxi de laacani. Guidúʼyanu xi ndaayaʼ ricaanu pur nuunu ndaaniʼ paraísu espiritual riʼ ne xiñee cadi naquiiñeʼ guireʼnu ndaaniʼ ni.

CA NDAAYAʼ RICAA CA NI NUU NDAANIʼ PARAÍSU ESPIRITUAL

5. Casi ná Isaías 65:​13, ¿xi ndaayaʼ ricaanu pur nuunu ndaaniʼ paraísu espiritual?

⁵ Runi sentirnu nuunu nazaaca ne rápanu stipa. Rusihuinni ca diidxaʼ ni guníʼ Isaías riʼ, gadxé si modo nabani ca ni nuu ndaaniʼ paraísu espiritual riʼ de ca ni cadi nuu ndaaniʼ ni (biindaʼ Isaías 65:13). Rudii Jehová guiráʼ ni caquiiñeʼ ca xpinni. Rudiibe laanu espíritu santu stibe, Stiidxabe ne stale guendaró espiritual para ganda guidoʼno, guideʼnu ne chuʼnu nayecheʼ (bichaaga ni né Apocalipsis 22:17). Maʼ gadxé si ribani ca ni cadi nuu ndaaniʼ paraísu espiritual riʼ. Laacaʼ la? candaanacaʼ, cayáticaʼ nisa ne rituí lucaʼ. Qué lica runibiáʼ ca binni ca Dios (Amós 8:11).

6. ¿Gunáʼ nga ca guendaró ni riete lu Joel 2:​21-24, xi zeeda gaca ca ni tiempu riʼ, ne ximodo racané ca ni laanu?

⁶ Lu tobi de ca profecía ni guníʼ Joel bizeeteʼ zudii Jehová ni caquiiñeʼ xquidxi, casi semiá, vinu ne aceite de oliva (Joel 2:​21-24). Ni nabe nga zudii Jehová guiráʼ ni caquiiñeʼ xquidxi dede né guendaró espiritual. ¿Ximodo rúnibe ni tiempu stinu riʼ yaʼ? Bíʼnibe ni ra bidiibe laanu Biblia, rudiibe laanu stale publicación, nápanu ti sitiu de internet ne laaca rápanu reunión ne asamblea stinu. Zacá nga rudiibe ni ridoʼno guiráʼ dxi ne runi sentirnu nuunu nazaaca ne nápanu stipa.

7. ¿Xiñee nuu ladxidoʼno nayecheʼ? (Isaías 65:14).

⁷ Runi sentirnu cadi cayaadxaʼ gastiʼ laanu ne riuʼnu nayecheʼ. Rudii ca xpinni Cristu xquixe peʼ Dios de guidubi ladxidoʼcaʼ ne rucaacaʼ ridxi purtiʼ nayecheʼ nuu ladxidoʼcaʼ (biindaʼ Isaías 65:14). ¿Xiñee nuu ladxidóʼcabe nayecheʼ yaʼ? Purtiʼ racané ca promesa ne guiráʼ ni zeeda lu Stiidxaʼ Dios laacabe. Ne laaca nápacabe ti esperanza naguidxi purtiʼ guti Jesús pur laacabe. ¡Guizáʼ nayecheʼ riuucabe ora riniʼnécabe ca hermanu stícabe de ca promesa riʼ! (Sal. 34:8; 133:​1-3).

8. ¿Xi chupa cosa rihuinni ndaaniʼ paraísu espiritual ca?

⁸ Chuʼ xquidxi Jehová tobi si ne gannaxhiisaacaʼ nga chupa cosa ni rihuinni ndaaniʼ paraísu espiritual ca. Racané guendarannaxhii  ca laanu chuʼnu tobi si ne laaca racané ni laanu gánnanu ximodo zabáninu ndaaniʼ guidxilayú cubi ca. Zannaxhiinu ne ziuʼnu tobi si, jma que biaʼ nuunu yanna riʼ (Col. 3:14). Bizeeteʼ ti hermana ni bizaaca dxi binibiáʼ ca testigu stiʼ Jehová, laabe guniʼbe: «Nin ndaaniʼ familia stinneʼ qué ñuaaʼ nayecheʼ, qué ñannaʼ xii nga. Primé biaje bineʼ sentir guendarannaxhii nga dxi guyuaaʼ lade ca Testigu». Guiráʼ tu racalaʼdxiʼ guibani nayecheʼ ne cadi guiaadxaʼ xiixa laa naquiiñeʼ chuʼ ndaaniʼ paraísu espiritual ca. Intiica si guiníʼ binni guidxilayú de laanu, nezalú Jehová ne nezalú familia ni nápanu lu guidubi guidxilayú nápanu ti lá nayá (Is. 65:15).

9. ¿Xi zazaaca ca cosa ni runiná laanu? (Isaías 65:​16, 17).

⁹ Runi sentirnu nuudxí ladxidoʼno. Lu Isaías 65:14 riete, ca ni cadi nuu ndaaniʼ paraísu espiritual ca zucaacaʼ ridxi purtiʼ cayuubaʼ ladxidoʼcaʼ ne zuunacaʼ purtiʼ nuucaʼ triste. ¿Xi zanda guininu de ca xpinni Dios yaʼ? ¿Xi zazaaca ca cosa ni huayuniná laacabe? Ndiʼ nga ni cayuni prometer Jehová: «Ziaandaʼ ca yuubaʼ guyuu dxiqué; maʼ qué zuuyaʼ ca ni» (biindaʼ Isaías 65:​16, 17). Zabeebe guiráʼ guendanagana ni nápanu ne ra tidiʼ tiempu zusiáʼndanu ca cosa ni bininá laanu.

10. ¿Xiñee zanda guininu ti ndaayaʼ nga chuunu ca reunión ca? (Biiyaʼ foto ca).

¹⁰ Ne tiempu riʼ ratadxí ladxidoʼno ora riuunu ca reunión stinu. Racá rusiáʼndanu ca cosa malu ni cayaca lu guidxilayú riʼ. ¿Xi zanda gúninu para cadi gusaana de gatadxí ladxidoʼno ndaaniʼ paraísu espiritual ca yaʼ? Ni zacané laanu nga gápanu ca cualidad ni rudii espíritu santu, casi guendarannaxhii, chuʼnu nayecheʼ, gatadxí ladxidoʼno, gácanu amable ne gácanu nadóʼ (Gal. 5:​22, 23). ¡Ti ndaayaʼ naroʼbaʼ nga nuunu ndaaniʼ organización stiʼ Dios! Pa qué guireʼnu de ndaaniʼ paraísu espiritual ca zadúʼyanu ximodo zuni cumplir Jehová promesa ni maʼ guníʼ de guni «ti guibáʼ cubi ne ti guidxilayú cubi».

11. ¿Ximodo runi sentirnu pur nuunu ndaaniʼ paraísu espiritual riʼ? (Isaías 65:​18, 19).

¹¹ Riuʼnu nayecheʼ ne rudiʼnu xquixe peʼ. Bisiene Isaías nuu stale razón para chuʼ ca xpinni Dios nayecheʼ. Jehová nga bizáʼ paraísu espiritual ra nuunu riʼ (biindaʼ Isaías 65:​18, 19). Nga runi, riquiiñeʼ Jehová laanu para ganda gacanenu binni guiree ndaaniʼ ca organización ni qué rusiidiʼ ni dxandíʼ ni nuu ndaaniʼ guidxilayú malu riʼ ne chuʼcaʼ ndaaniʼ xquidxi Dios. ¡Guizáʼ riéchenu purtiʼ nuunu ndaaniʼ paraísu espiritual riʼ! Pur nga racaláʼdxinu  guinínenu xcaadxi de ca ndaayaʼ ni cacaanu yanna riʼ (Jer. 31:12).

12. ¿Xi runi sentirluʼ ora ruundaluʼ promesa ni riete lu Isaías 65:​20-24, ne xiiñeʼ?

¹² Guiráʼ ca ni nuu ndaaniʼ paraísu espiritual riʼ, nuunu nayecheʼ ne rudiʼnu xquixe peʼ pur esperanza ni nápanu. Guníʼ ique si guiráʼ ni zanda gúniluʼ ora maʼ nuuluʼ ndaaniʼ guidxilayú cubi ca. Lu Biblia riete: «Maʼ qué ziuu baʼduhuiiniʼ ni guibani chupa chonna si gubidxa racá, nin binni huaniisi ni gati ante guizaa ca dxi stiʼ». Ne laaca nani zucuí binni «yoo ne zabézacabe ndaaniʼ ni ne zuzuhuaacabe lubáʼ uva ne zócabe cuananaxhi stini» ne «cadi pur gana si zúnicabe stale dxiiñaʼ» purtiʼ zaguu Jehová ndaayaʼ laacabe. Cayuni prometer Dios zabánicabe galán, ziuucabe seguru ne ziuucabe nayecheʼ. «Ne ante gucaacabe ridxi» maʼ nanna Dios ni caquiiñecabe ne zudii «guiráʼ ni racalaʼdxiʼ ca ni nabani» (Is. 65:​20-24; Sal. 145:16).

13. ¿Ximodo rusiene Isaías 65:25 ca cambiu ni runi ti binni lu xquendanabani para guni ni ná Jehová?

¹³ Zápanu paz ne gastiʼ qué zuchibi laanu. Stale binni ni nabé feu guca xpiaʼ, maʼ gucané espíritu santu laacaʼ guchacaʼ (biindaʼ Isaías 65:25). Maʼ bíʼnicaʼ stipa gusaanacaʼ modo gúcacaʼ dxiqué (Rom. 12:2; Efes. 4:​22-24). Dxandíʼ, naca ca xpinni Dios binni ruchee ne pur nga ziuu ora zucheʼnu. Peru maʼ biʼniʼ Jehová ti milagru, yanna riʼ «guiráʼ clase binni» maʼ nuucaʼ tobi si, nadxiisaacaʼ ne nápacaʼ paz (Tito 2:11). ¡Dios si ni jma napa poder nga zanda guni ni bizéʼtenu ca!

14. ¿Ximodo guca cumplir ni riete lu Isaías 65:25 luguiaa ti hermanu?

¹⁴ ¿Ñee zanda guchaa tuuxa xpiaʼ la? Ejemplu ni chiguzéʼtenu riʼ rusihuinni zanda guchaa tuuxa xpiaʼ. Ti joven de 20 iza ni nabé feu xpiaʼ, napa ti vida inmoral ne maʼ stale biaje huayuu ndaaniʼ cárcel pur caadxi cosa qué iquiiñeʼ ni runi, ribanaʼ carru ne xcaadxi cosa. Ne puru si maʼ canayubi tinde. Peru ti dxi binadiágabe ni rusiidiʼ Biblia ne bizulú guyebe ca reunión stiʼ ca testigu stiʼ Jehová, bidiibe cuenta zanda guchaabe xquendanabánibe ne chuʼbe ndaaniʼ paraísu espiritual stiʼ Dios. Despué de guyuunísabe, stale biaje guníʼ íquebe ximodo maʼ guca cumplir ca diidxaʼ ni zeeda lu Isaías 65:25 luguiabe. Despué de gúcabe naduxhuʼ casi ti lión beeda gácabe nadóʼ casi ti dendxuhuiiniʼ.

15. ¿Xiñee racaláʼdxinu gacanenu binni chuʼ ndaaniʼ paraísu espiritual, ne ximodo rúninu ni?

¹⁵ Ruzulú Isaías 65:13 né ca diidxaʼ riʼ: «Ndiʼ nga ni ná Jehová, Señor ni runi mandar guiráʼ xixé ni nuu». Ne sicaríʼ riluxe versículo 25: «Ná Jehová». Siempre raca cumplir ca promesa stiʼ Jehová (Is. 55:​10, 11). Dxandíʼ paraísu espiritual ca, guiráʼ ni maʼ guníʼ Jehová de laani maʼ guca cumplir. Maʼ guluube laanu ndaaniʼ ti familia naroʼbaʼ ra nápanu paz ne nabáninu seguru neca nuunu ndaaniʼ ti guidxilayú malu (Sal. 72:7). Pur ca ni maʼ bizéʼtenu riʼ, racaláʼdxinu gacanenu xcaadxi binni chuʼcaʼ ndaaniʼ familia stiʼ Dios. ¿Ximodo rúninu ni yaʼ? Ra gacanenu laacabe gácacabe discípulo stiʼ Cristu (Mat. 28:​19, 20).

XIMODO ZANDA GACANENU BINNI CHUʼ NDAANIʼ PARAÍSU ESPIRITUAL

16. ¿Xii nga ni rucaa binni guyubi chuʼ ndaaniʼ paraísu espiritual?

¹⁶ Guiranu zanda gúninu xiixa para guʼyaʼ xcaadxi binni pabiáʼ nayecheʼ nuunu ndaaniʼ paraísu espiritual para guyúbicaʼ chuʼcaʼ ndaaniʼ ni. ¿Ximodo zanda gúninu ni yaʼ? Ra chinándanu ejemplu stiʼ Jehová. Qué runi obligarbe binni chuʼ ndaaniʼ xquídxibe, sínuque né stale guendanachaʼhuiʼ ribídxibe  laacaʼ ra nuube (Jer. 31:3; Juan 6:44). Ca binni ni riziidiʼ de Jehová ne nachaʼhuiʼ ladxidoʼcaʼ riuuláʼdxicaʼ guidxíñacaʼ laabe pur ca cualidad sicarú ni nápabe. ¿Gunáʼ nga caadxi cosa ni zanda gúninu para gacanenu binni guidxiña ndaaniʼ paraísu espiritual ca yaʼ?

17. ¿Xi zanda gúninu para chuulaʼdxiʼ binni chuʼ ndaaniʼ paraísu espiritual?

¹⁷ Ti modo zanda gacanenu binni chuulaʼdxiʼ chuʼ ndaaniʼ paraísu espiritual ca nga ra gannaxhiinu ca hermanu ne gácanu nachaʼhuiʼ né laacaʼ. Racaláʼdxinu guiníʼ ca binni ni cheʼ reunión ni zándaca guníʼ caadxi binni ni guyé ca reunión ndaaniʼ guidxi Corinto de dxiqué: «Dxandíʼ nuu Dios ládetu» (1 Cor. 14:​24, 25; Zac. 8:23). Nga runi nabé risaca chinándanu conseju riʼ: «Cadi tíndetu» (1 Tes. 5:13).

18. ¿Xi zanda gucaa binni chuʼ ndaaniʼ organización stiʼ Dios?

¹⁸ Laaca caquiiñeʼ gúninu stipa guidúʼyanu ca hermanu stinu casi ruuyaʼ Jehová laacaʼ. Nga runi, guidúʼyanu ca cosa galán ni runi ca hermanu stinu ne cadi ra cucheecaʼ, purtiʼ zedandá ti dxi maʼ qué zucheecabe. Zacané guendarannaxhii laanu guni chaahuinu intiica guendanagana gapanenu tuuxa pa qué gusaana de chinándanu conseju riʼ: «Ni gúnitu nga gácatu nachaʼhuiʼ né stobi, gannaxhiisaatu ne guiatu binni. Lachuu listu para guni perdonartu» (Efes. 4:32). Guiráʼ ca ni racalaʼdxiʼ guni tratárcabe laa zacá la? ziuulaʼdxiʼ chuʼ ndaaniʼ paraísu espiritual ca. b

 CADI GUIREʼNU DE NDAANIʼ PARAÍSU ESPIRITUAL

19. a) ¿Xi guníʼ caadxi binni ni bibiguetaʼ ndaaniʼ paraísu espiritual? (Biiyaʼ cuadru ni láʼ « Guyecaʼ, peru biguétacaʼ»). b) ¿Xi maʼ gudixhe íquenu gúninu? (Biiyaʼ imagen ca).

¹⁹ ¡Galán nga nuunu ndaaniʼ ti paraísu espiritual! Jma maʼ sicarú nuu paraísu ca yanna ne jma maʼ stale xpinni Jehová nuu ndaaniʼ ni. Gudiʼnu xquixe peʼ Dios pur paraísu ni bizáʼ para laanu. Guiráʼ tu racalaʼdxiʼ cúʼcabe gana laa, chuʼ nayecheʼ, chuʼ tranquilu ne gastiʼ ni guchibi laa la? naquiiñeʼ chuʼ ndaaniʼ paraísu ca ne cadi guiree de ndaaniʼ ni. Peru naquiiñeʼ gatananu purtiʼ racalaʼdxiʼ Binidxabaʼ quite laanu ne cuee laanu de lugar sicarú riʼ (1 Ped. 5:8; Apoc. 12:9). Cadi gudiʼnu lugar guireenebe xtémabe. Gúninu stipa para guihuinni sicarú paraísu riʼ, chuʼni nayá ne chuʼ paz ndaaniʼ ni.