1. ¿Ximodo guta chaahuiʼ xhiiñaʼ ca xpinni Jehová lu primé siglu que?

 ORA rudii Jehová dxiiñaʼ ca xpinni la? ribézabe gúnicaʼ né orden (1 Cor. 14:33). Racaláʼdxibe gaca predicar ca noticia nacubi ne galán lu guidubi Guidxilayú (Mat. 24:14). Maʼ gulibe Jesús para guni dirigir dxiiñaʼ riʼ. Ne maʼ biiyaʼ Jesús gata chaahuiʼ modo gaca ni. Lu primé siglu que, ndaaniʼ guidxi Jerusalén guca formar ti grupu de apóstol ne ancianu para guicaacaʼ decisión ne gudiicaʼ instrucción ca congregación ti ganda chinándacaʼ ca ni (Hech. 15:2; 16:4). Ndaaniʼ ca congregación que raca nombrar ancianu para guni dirigir ne gudii ca instrucción que ca hermanu (Hech. 14:23). Cumu ruzuubaʼ ca hermanu que diidxaʼ la? «ngue runi, zeʼ dxi jma naguidxi ziyaca fe stiʼ ca congregación que ne zeʼ dxi jmaruʼ si zidálecaʼ» (Hech. 16:5).

2. ¿Ximodo huayuni dirigir ne huadii Jehová guendaró espiritual xquidxi dede lu iza 1919?

² Tiempu riʼ, qué huasaana Jehová de quixheʼ chaahuiʼ dxiiñaʼ ni runi xquidxi. Dede lu iza 1919, huaquiiñeʼ Jesús ti grupuhuiiniʼ de hombre ungidu para quixheʼ chaahuiʼ dxiiñaʼ de gaca predicar ne gudii guendaró espiritual ca discípulo stiʼ (Luc. 12:42). a Ne rihuinni dxichi caguu Jehová ndaayaʼ  dxiiñaʼ ni cayuni grupu riʼ (Is. 60:22; 65:​13, 14).

3, 4. a) Biquiiñeʼ ti ejemplu para gusiéneluʼ xi cosa galán rizaaca pur nexheʼ chaahuiʼ dxiiñaʼ ni rúninu. b) ¿Xi zadúʼyanu lu artículo riʼ?

³ Pa qué ñata chaahuiʼ dxiiñaʼ ni runi xquidxi Dios la? qué ñanda ñúninu dxiiñaʼ ni bisaanané Jesús laanu (Mat. 28:​19, 20). Pa qué ñapa ca congregación territorio ra ñuni predicarcaʼ la? cada tobi ñuni predicar ra ñuulaʼdxiʼ ne zándaca nuu lugar ñaca predicar jma que xcaadxi. ¿Ñee riníʼ íqueluʼ sti cosa galán ni raca pur nexheʼ chaahuiʼ dxiiñaʼ ni rúninu la?

⁴ Ca dxi stinu riʼ, laaca maʼ gudixhe chaahuiʼ Jesús dxiiñaʼ ni runi xquidxi Dios cásica modo gudixhe chaahuibe ni dxi guyuube lu Guidxilayú riʼ. Lu artículo riʼ, zadúʼyanu ejemplu ni bisaana Jesús ne ximodo zinanda organización stiʼ Dios ejemplu stibe. Laaca zadúʼyanu ximodo gusihuínninu nápanu confianza organización stiʼ Jehová.

RINANDA ORGANIZACIÓN STIʼ DIOS EJEMPLU STIʼ JESÚS

5. ¿Ximodo rinanda organización stiʼ Dios ejemplu stiʼ Jesús? (Juan 8:28).

⁵ Biziidiʼ Jesús de Bixhoze ni nuu guibáʼ xi naquiiñeʼ guni ne xi naquiiñeʼ guiníʼ. Cásica Jesús, organización stiʼ Jehová laaca riquiiñeʼ Stiidxaʼ Dios para gudii conseju ne gusiidiʼ (biindaʼ Juan 8:28; 2 Tim. 3:​16, 17). Ne gatigá rusietenaláʼdxicabe laanu guidúʼndanu Stiidxaʼ Dios ne gúninu ni cazíʼdinu. Yanna, ¿xi ndaayaʼ ricaanu ora rinándanu conseju riʼ yaʼ?

6. ¿Xi ribeendunu ora runi estudiarnu Biblia?

⁶ Ribeendunu stale cosa galán ora riquíʼñenu ca publicación ni nápanu para guni estudiarnu Biblia. Racané ni laanu guchaaganu ni rusiidiʼ Biblia né ca instrucción ni rudii organización stiʼ Dios laanu. Ora ridúʼyanu zeeda ca instrucción ca lu Biblia la? riguidxi confianza ni nápanu organización stiʼ Jehová (Rom. 12:2).

7. ¿Xi biʼniʼ predicar Jesús, ne ximodo rinanda organización stiʼ Jehová ejemplu stibe?

⁷ Biʼniʼ predicar Jesús «ca noticia galán stiʼ Reinu stiʼ Dios» (Luc. 4:​43, 44). Ne laaca gúdxibe ca discípulo stibe gúnicaʼ zaqueca (Luc. 9:​1, 2; 10:​8, 9). Ca dxi stinu riʼ, guiráʼ ca ni nuu ndaaniʼ organización stiʼ Jehová runi predicarnu ca noticia galán stiʼ Reinu ra tiica si nabézanu o intiica si privilegiu nápanu.

8. ¿Xi privilegiu nápanu?

⁸ Ti privilegiu naroʼbaʼ nga nápanu guinínenu binni de Reinu stiʼ Dios. Ne cadi tutiica zanda guni ni. ¿Xiñee yaʼ? Purtiʼ dxi guyuu Jesús lu Guidxilayú riʼ, qué nudiibe lugar niníʼ ca demonio de laabe (Luc. 4:41). Ca dxi stinu riʼ, para ganda guni predicarné ti binni ca testigu stiʼ Jehová, naquiiñeʼ guni cumplir caadxi requisitu. Yanna, ¿ximodo rusihuínninu rusisácanu privilegiu ni nápanu de guni predicarnu yaʼ? Rusihuínninu ni ra guni predicarnu ra tiica si nuunu. Cásica Jesús, rúninu guiráʼ ni nuu lu nanu para guni predicarnu xcaadxi binni ne gusíʼdinu laacaʼ ni dxandíʼ zeeda lu Biblia (Mat. 13:​3, 23; 1 Cor. 3:6).

9. ¿Xi maʼ biʼniʼ organización stiʼ Dios para gunibiáʼ binni labe?

⁹ Bisiidiʼ Jesús lá Dios. Lu ti oración gúdxibe Bixhózebe ni nuu guibáʼ: «Maʼ bisiideʼ laacabe tu laluʼ» (Juan 17:26). Ne ngaca nga runi organización stiʼ Jehová, runi biaʼ gándatiʼ para gacané binni gunibiáʼ lá Dios. Ne riquiiñeʼ ni Traducción del Nuevo Mundo, ni maʼ biree interu o ti ndaa lu jma de 270 idioma. Lu traducción riʼ cá lá Dios ca lugar  ra maca cá ni lu ca idioma gucuá Biblia. Lu apéndice A4 ne A5 zeeda información ra cusiene chaahuiʼ ra bibiguetaʼ bicaacabe lá Dios sti biaje. Lu apéndice C, ni zeeda lu Biblia de estudio, ridxélanu xcaadxi prueba ni rusihuinni xiñee naquiiñeʼ cheʼ lá Dios lu Escrituras Griegas Cristianas 237 biaje.

10. ¿Xi rusiidiʼ ni bizaaca ti gunaa de guidxi Myanmar laanu?

¹⁰ Cásica Jesús, racaláʼdxinu gunibiáʼ stale binni lá Dios. Ndaaniʼ guidxi Myanmar, bisiidiʼ ti hermana ti gunaa de 67 iza Jehová nga láʼ Dios. Guizáʼ biecheʼ gunaa riʼ dede biinaʼ ne guníʼ: «Ndiʼ nga primé biaje gunadiagaʼ lá Dios. [ . . . ] Bisiidiluʼ naa ti cosa nabé risaca ni qué huayuu dxi guiziideʼ lu xquendanabaneʼ». Rusiidiʼ experiencia riʼ laanu zanda guchaa xquendanabani ti binni ni nayá ladxidóʼ ora guiziidiʼ lá Dios.

CADI GUSAANA DE GUSIHUÍNNINU NÁPANU CONFIANZA ORGANIZACIÓN STIʼ DIOS

11. ¿Ximodo rusihuinni ca ancianu nápacaʼ confianza organización stiʼ Dios? (Biiyaʼ ca foto ca).

¹¹ ¿Ximodo zanda gusihuinni ca ancianu nápacaʼ confianza organización stiʼ Dios? Ti modo nga guʼndaʼ chaahuicabe ca instrucción ni ricaacabe ne despué gúnicabe ni nácani. Ricaacabe instrucción para gánnacabe ximodo gutiidicabe ca asignación stícabe ne ximodo gúnicabe oración lu ca reunión stinu, ne laaca ricaacabe instrucción para gápacabe ca dendxuhuiiniʼ stiʼ Cristu. Ora rinanda ca ancianu ca instrucción ni rudii organización laacaʼ, runi sentir ca hermanu nadxii ne cayapa Jehová laacaʼ.

12. a) ¿Xiñee naquiiñeʼ chinándanu ca instrucción ni rudii ca ni runi dirigir laanu? (Hebreos 13:​7, 17). b) ¿Xiñee naquiiñeʼ guidúʼyanu ca cualidad galán ni napa ca ancianu?

¹² Ora gudii ca ancianu laanu xiixa instrucción, ni jma galán gúninu nga chinándanu ni. Zacá qué zaca nagana para laacabe gúnicabe xhiiñacabe. Biblia cayabi laanu guzúʼbanu stiidxaʼ ca ni cayuni dirigir laanu ne gúninu ni gábicabe laanu de guidubi ladxidoʼno (biindaʼ Hebreos 13:​7, 17). Nuu tiru zanda gaca ni nagana. ¿Xiñee yaʼ? Purtiʼ ca ancianu laaca nácacaʼ binni ruchee. Peru pa puru si ra cuchee ca ancianu guidúʼyanu lugar de ca cualidad galán sticaʼ la? zúninu ni racalaʼdxiʼ ca enemigu stinu. ¿Xiñee yaʼ? Purtiʼ pa guiníʼ íquenu mal de ca ancianu stinu zanda guirá confianza ni nápanu organización stiʼ Dios, ne nga peʼ nga ni racalaʼdxiʼ ca enemigu ca. Yanna, ¿ximodo zanda gudiʼnu cuenta gunáʼ nga ca cosa ni cadi dxandíʼ riníʼ ca enemigu stinu ne gucáʼnanu ca ni yaʼ?

CADI GUDIILUʼ LUGAR GUSIRÁ XCAADXI CONFIANZA NI NÁPALUʼ ORGANIZACIÓN STIʼ DIOS

13. ¿Ximodo racalaʼdxiʼ ca enemigu stinu guidúʼyanu organización stiʼ Dios?

¹³ Ruyubi ca enemigu stinu guidúʼyanu ca cosa galán ni runi organización stiʼ Dios casi cosa ni cadi jneza. Rusiidiʼ Biblia racalaʼdxiʼ Jehová gácanu binni nayá, cadi gúninu cosa ni cadi jneza ne guni adorarnu laabe modo riuuláʼdxibe. Laaca nani, pa cayuni tuuxa xiixa cosa malu ne qué gaca arrepentir, naquiiñeʼ gaca expulsar (1 Cor. 5:​11-13; 6:​9, 10). Cumu zinándanu mandatu ni bizéʼtenu riʼ la? riníʼ ca enemigu stinu cadi nadxiinu binni, malu laanu ne rúninu menu xcaadxi.

14. ¿Tuu nga rucaa binni guiníʼ cosa ni cadi dxandíʼ de organización stiʼ Dios?

¹⁴ Cadi guiaandaʼ laanu tuu nga cucaalú organización stiʼ Dios. Binidxabaʼ nga «bixhoze guiráʼ ni rusiguii», pur nga rucaabe binni guiníʼ cosa ni cadi dxandíʼ de organización stiʼ Dios (Juan 8:44; Gén. 3:​1-5). Nga runi,  qué ridxagayaanu riquiiñeʼ Binidxabaʼ ca enemigu stinu para guiniʼcaʼ ca cosa ni cadi dxandíʼ ca. Ne nga peʼ nga ni bíʼnibe lu primé siglu que.

15. ¿Xi biʼniʼ ca líder stiʼ ca religión que Jesús ne ca discípulo stiʼ?

¹⁵ Neca qué nuchee Jesús, Xiiñiʼ Dios, ne biʼniʼ milagru ni bidxagayaa binni, peru biquiiñeʼ Binidxabaʼ caadxi binni para guiniʼcaʼ cosa ni cadi dxandíʼ de laabe. Gudxi ca líder stiʼ ca religión que binni ribee Jesús demonio «pur poder stiʼ gobernante stiʼ ca demonio» (Mar. 3:22). Despué, dxi guca juzgar Jesús, guníʼ ca líder stiʼ ca religión que caniʼbe contra Dios, ne bicuudxicaʼ ca binni que para guinábacaʼ gátibe (Mat. 27:20). Gudiʼdiʼ si ti tiempu, dxi bizulú biʼniʼ predicar ca discípulo stiʼ Cristu, ca xhenemígucabe «bicaacaʼ binni [ . . . ] chuʼcaʼ en contra» de laacabe ne sanándacaʼ laacabe (Hech. 14:​2, 19). Lu revista La Atalaya 1 de diciembre de 1998 riete ni ná lu Hechos 14:​2, racá ná qué nucaadiaga ca enemigu riʼ mensaje ni ziné ca xpinni Cristu, peru laaca bíʼnicaʼ ti «campaña para guiniʼcaʼ mal de laacabe» ti cuʼcaʼ binni de xcaadxi nación en contra de laacabe.

16. ¿Xi cadi naquiiñeʼ guiaandaʼ laanu pa málasi guseendacabe xiixa información ni cadi dxandíʼ ra nuunu?

¹⁶ Binidxabaʼ qué huasaana de gusiguii, ne dede yanna «caguite guiráʼ binni guidxilayú» (Apoc. 12:9). Nga runi, pa gucaadiáganu xiixa cosa ni cadi dxandíʼ de organización stiʼ Dios o de ca hermanu ni runi dirigir laanu la? cadi guiaandaʼ laanu ni biʼniʼ ca xhenemigu Dios que Jesús ne ca discípulo stiʼ ni bibani lu primé siglu que. Maca gucuá lu Biblia zazananda binni ca testigu stiʼ Jehová ne zaniʼcaʼ cosa ni cadi dxandíʼ de laacabe,  ne maʼ cayaca ni ca dxi stinu riʼ (Mat. 5:​11, 12). Qué zaguite ca enemigu stinu laanu pa nánnanu padé zeeda ca cosa ni cadi dxandíʼ riníʼcabe de laanu ne nagueendacaʼ zucáʼnanu ca ni. ¿Xi zanda gúninu para gucáʼnanu ca ni yaʼ?

17. ¿Xi naquiiñeʼ gúninu pa málasi guseendacabe xiixa información ni cadi dxandíʼ ra nuunu? (2 Timoteo 1:13; biiyaʼ cuadru ni láʼ « ¿Xi guneʼ pa málasi guseendacabe xiixa información ni cadi dxandíʼ ra nuaaʼ?»).

¹⁷ Cadi gucaadiáganu ca cosa ni cadi dxandíʼ. Apóstol Pablo bisiene ni naquiiñeʼ gúninu pa málasi guedandá xiixa cosa ni cadi dxandíʼ ra nuunu. Lu 1 Timoteo 1:​3, 4 guniʼbe cadi gucaadiáganu «cuentu falsu». Ne bidiibe conseju riʼ Timoteo: «Cadi gucaadiágaluʼ ca cuentu ra riníʼcabe mal de Dios» (1 Tim. 4:7). Guzéʼtenu ti ejemplu: pa guidxelaʼ ti xcuidihuiiniʼ xiixa ni nexheʼ lu pisu, zándaca zandísabe ni ne zaguube ni ruaabe; peru ti binni huaniisi la? qué zo ni purtiʼ nanna zanda gaca huará. Nga runi, laanu qué rucaʼdiáganu ca cosa ni cadi dxandíʼ ne rucaʼdiáganu «ca cosa galán» si ni zeeda lu Stiidxaʼ Dios (biindaʼ 2 Timoteo 1:13).

18. ¿Ximodo zanda gusihuínninu nápanu confianza organización stiʼ Jehová?

¹⁸ Lu artículo riʼ bidúʼyanu chonna modo rinanda organización stiʼ Dios ejemplu stiʼ Jesús, peru nuuruʼ xcaadxi. Zadxélaluʼ ca ni ra gúʼndaluʼ Stiidxaʼ Dios. Cadi gusaana de gacaneluʼ ca hermanu stiluʼ gápacaʼ confianza organización stiʼ Dios. Ne cadi gusaana de gúniluʼ ni ná Jehová, cadi gudiiluʼ lugar chuʼ xiixa ni guxheleʼ lii de organización ni caquiiñebe para gúnibe ni racaláʼdxibe (Sal. 37:28). Ti privilegiu naroʼbaʼ nga nuunu ndaaniʼ organización stiʼ Jehová ra nuu guendarannaxhii ne tobi si cayúninu ni nabe. ¡Cadi gusaana de gusisácanu privilegiu riʼ!