1. ¿Xi privilegiu nápanu?

TI PRIVILEGIU nga gácanu parte de congregación stiʼ Jehová. Riuʼnu nayecheʼ ne rápanu guendariuudxi ora runi adorarnu Jehová né ca hermanu ne ca hermana stinu. Peru ¿ñee risaca cada tobi de laanu ndaaniʼ congregación la?

2. ¿Xi ejemplu biquiiñeʼ apóstol Pablo lu caadxi de ca carta ni bicaa?

² Lu caadxi de ca carta ni bicaa apóstol Pablo, biquiiñebe ti ejemplu para gusiidibe laanu risaca cada tobi de laanu ndaaniʼ congregación. Guniʼbe zeeda gaca congregación casi ti cuerpu ne ca ni nuu ndaaniʼ ni zeeda gaca ca parte napa cuerpu ca (Rom. 12:4-8; 1 Cor. 12:12-27; Efes. 4:16).

3. ¿Xi chonna cosa risaca zazíʼdinu lu artículo riʼ?

³ Cada tobi de laanu risácanu ndaaniʼ congregación stiʼ Jehová. Ne guiranu zanda gacanenu para chuʼ congregación stinu naguidxi. Neca de gadxé gadxé raza laanu, pa nápanu o qué gápanu bueltu, gadxé cultura nápanu ne pa guyuunu scuela o coʼ. Lu artículo riʼ zazíʼdinu chonna cosa risaca de ejemplu ni biquiiñeʼ apóstol Pablo. Primé, zazíʼdinu risaca cada tobi de laanu ndaaniʼ congregación stiʼ Jehová. Guiropa, zazíʼdinu xi zanda gúninu pa raca nagana para laanu gudiʼnu cuenta risácanu ndaaniʼ congregación. Ne guionna, zadúʼyanu xiñee caquiiñeʼ guicá íquenu gúninu dxiiñaʼ ni maʼ bidii Jehová laanu.

4. ¿Xi rusiidiʼ ca diidxaʼ ni zeeda lu Romanos 12:4, 5 laanu?

⁴ Primé cosa ni zanda guizíʼdinu de ejemplu ni biquiiñeʼ Pablo nga risaca cada tobi de laanu ndaaniʼ familia stiʼ Jehová. Ndiʼ nga ejemplu biquiiñeʼ Pablo: «Cásica ti cuerpu napa stale ndaa, peru gadxé gadxé ni runi cada ndaa, zaqueca nga laanu, neca stálenu, nácanu ti cuerpu si purtiʼ nuunenu Cristu tobi si, peru cada tobi de laanu nácanu ti ndaa de cuerpu que ni caquiiñeʼ gacané xcaadxi laa» (Rom. 12:4, 5). Ni guníʼ Pablo né ca diidxaʼ riʼ nga risaca cada tobi de laanu neca gadxé gadxé dxiiñaʼ nápanu ndaaniʼ congregación.

5. ¿Xi regalu maʼ bidii Jehová congregación?

⁵ Zándaca guiníʼ íquenu ca hermanu ni runi dirigir laanu nga ca ni jma risaca ndaaniʼ congregación (1 Tes. 5:12; Heb. 13:17). Dxandíʼ nga maʼ biquiiñeʼ Jehová Cristu para cuí «hombre ni napa gadxé gadxé gracia», ni zeeda gaca casi regalu, para guni dirigir congregación (Efes. 4:8). Ládecabe nuu Grupu ni Zániru ne ca ni racané laacabe, ca ni nuu lu Comité de Sucursal, superintendente de circuito, ca instructor stiʼ ca scuela ca, ca ancianu de congregación ne ca siervu ministerial. Pur espíritu santu guca nombrar ca hermanu riʼ para gacané ca dendxuʼ risaca ni napa Jehová ne para uguucaʼ gana congregación (1 Ped. 5:2, 3).

6. Casi ná 1 Tesalonicenses 2:6-8, ¿xi stipa runi ca hermanu ni maʼ guca nombrar pur espíritu santu?

⁶ Raca nombrar ca hermanu riʼ pur espíritu santu para guni tendercaʼ dxiiñaʼ ni raca ndaaniʼ congregación. Cásica racané nanu, ñeenu ne xcaadxi parte de cuerpu stinu para guni cani dxiiñaʼ la? zacaca nga ca hermanu ni guca nombrar pur espíritu santu, rúnicaʼ dxiiñaʼ nadipaʼ para gacanecaʼ congregación. Lugar de guyúbicaʼ gusisaca xcaadxi laacaʼ, rúnicaʼ stipa pur uguucaʼ gana ne gacanecaʼ ca hermanu (biindaʼ 1 Tesalonicenses 2:6-8). Rudiʼnu xquixe peʼ Jehová pur ca hermanu riʼ, purtiʼ cayacanecaʼ xcaadxi lugar de guyúbicaʼ para laasicaʼ.

7. ¿Xi rudii Jehová ca precursor ne ca misioneru?

⁷ Zándaca ndaaniʼ congregación ra riuunu nuu hermanu misioneru, precursor especial o precursor regular. Ne lu guidubi Guidxilayú nuu hermanu ne hermana ni runi predicar de tiempu completu ne racané binni gaca discípulo. Zacá huayacanécabe stale binni gaca discípulo stiʼ Cristu Jesús. Neca huaxiéʼ bueltu ne cosa napa ca hermanu riʼ, rudii Jehová laacabe stale ndaayaʼ (Mar. 10:29, 30). ¿Cadi dxandíʼ riéchenu purtiʼ nuu ca hermanu riʼ ndaaniʼ congregación ra riuunu la?

8. ¿Xiñee risaca cada publicador para Jehová?

⁸ Yanna, ¿ñee ca hermanu si ni maʼ guca nombrar ne ca ni cayuni dxiiñaʼ de tiempu completu nga ca ni jma risaca ndaaniʼ congregación la? Coʼ. Cada publicador nga risaca para Jehová ne para congregación (Rom. 10:15; 1 Cor. 3:6-9). Ne zacá ni purtiʼ tobi de ca cosa jma risaca ndaaniʼ congregación nga gacanenu binni gaca discípulo stiʼ Cristu (Mat. 28:19, 20; 1 Tim. 2:4). Guiráʼ ca publicador, ca ni maʼ guyuunisa ne ca ni caʼruʼ, rúnicaʼ stipa para gúʼyacaʼ dxiiñaʼ riʼ casi ti cosa ni jma risaca lu xquendanabánicaʼ (Mat. 24:14).

9. ¿Xiñee rusisácanu ca hermana stinu?

 ⁹ ¿Xi zanda guininu de ca hermana stinu? Laaca rusisaca Jehová laacabe. Rusisácabe ca hermana ni nuu ndaaniʼ congregación ni maʼ bichaganáʼ, ca ni napa xiiñiʼ, ca viuda ne ca soltera ni cadi cusaana de guni ni nabe. Lu Biblia zeeda ejemplu stiʼ stale gunaa ni guyuulaʼdxiʼ Dios ni rúnicaʼ purtiʼ nuu xpiaanicaʼ, gúpacaʼ fe, bíʼnicaʼ dxiiñaʼ né stale gana, gúcacaʼ nadxibalú, bidiicaʼ de ni nápacaʼ ne bíʼnicaʼ cosa galán (Luc. 8:2, 3; Hech. 16:14, 15; Rom. 16:3, 6; Filip. 4:3; Heb. 11:11, 31, 35). Ndaaniʼ congregación nuu hermana ni rusihuinni ca cualidad galán riʼ. Guizáʼ rudiʼnu xquixe peʼ Jehová purtiʼ nuu ca hermana riʼ ndaaniʼ congregación ra riuunu.

10. ¿Xiñee rusisácanu ca hermanu ni maʼ huaniisi?

¹⁰ Sti ndaayaʼ ni nápanu nga nuu ca hermanu ni maʼ huaniisi ndaaniʼ congregación ra riuunu. Nuu de laacaʼ huayuni servircaʼ Jehová guidubi xquendanabánicaʼ. Ne xcaadxi, zándaca cadi tan xadxí de binibiaʼcaʼ Jehová. Zándaca nuu de laacabe cudxiilú xiixa guendahuará purtiʼ maʼ nagola ne maʼ qué randa peʼ runi predicarcaʼ ne gúnicaʼ jma ndaaniʼ congregación. Neca zacá, rúnicabe stipa para guni predicárcabe, cúʼcabe gana xcaadxi ne gusiidicabe laacaʼ. ¡Ne guizáʼ rizíʼdinu de ca experiencia stícabe! Rihuinni dxichi risácacabe para Jehová ne para laanu (Prov. 16:31).

11, 12. ¿Ximodo racané ejemplu stiʼ ca joven ni nuu ndaaniʼ congregación lii?

¹¹ Guiníʼ íquenu ca joven ni nuu ndaaniʼ congregación. Nagana nga guiniisicabe ndaaniʼ guidxilayú ra runi mandar Binidxabaʼ ne gudxiilúcabe modo riníʼ ique binni (1 Juan 5:19). Peru guizáʼ riéchenu guidúʼyanu laacabe guni comentárcabe ra reunión ne guni predicárcabe, ne gánnanu pabiáʼ nadxibalúcabe ora runi defendércabe fe stícabe. ¡Joven caʼ, guizáʼ risácatu ndaaniʼ congregación stiʼ Jehová! (Sal. 8:2).

 ¹² Raca nagana para caadxi hermanu ne hermana stinu guni crecaʼ zanda iquiiñeʼ Jehová laacaʼ ndaaniʼ congregación. ¿Xi zanda gacané laanu gudiʼnu cuenta risaca cada tobi de laanu ndaaniʼ congregación? Guidúʼyanu.

13, 14. ¿Xiñee zándaca chuʼ tu guiníʼ ique qué risaca ndaaniʼ congregación?

¹³ Sti cosa ni rizíʼdinu de ejemplu ni biquiiñeʼ Pablo rucaa ni laanu guiníʼ íquenu ni rizaaca stale hermanu tiempu riʼ, purtiʼ nuu de laacaʼ runi sentircaʼ qué zanda iquiiñeʼ Jehová laacaʼ ndaaniʼ congregación. Sicaríʼ bicaa Pablo: «Pa niná ti chú ñee “Cumu cadi batanáʼ naa la? cadi parte de cuerpu riʼ naa”. Lácaxa pur nga cadi naca ni parte de cuerpu que. Ne pa niná ti chú diaga “Cumu cadi guié lú naa la? cadi parte de cuerpu riʼ naa”. Lácaxa pur nga cadi naca ni parte de cuerpu que» (1 Cor. 12:15, 16). ¿Xi rusiidiʼ ca diidxaʼ riʼ laanu?

¹⁴ Pa guchaaganu laanu né sti hermanu de congregación la? zándaca qué zudiʼnu cuenta pabiáʼ risácanu. Nuu hermanu nanna gusiidiʼ, nanna quixhe chaahuiʼ xiixa dxiiñaʼ o nuu tu laa naca ti buen pastor. Ne zándaca guiníʼ íquenu cadi casi laacabe laanu. Ndiʼ rusihuinni humilde laanu ne nánnanu nuu cosa ni qué zanda gúninu (Filip. 2:3). Peru naquiiñeʼ chuʼnu cuidadu. Purtiʼ pa puru guchaaganu laanu né xcaadxi hermanu ni napa habilidad galán la? zareʼnu gana. Ne cásica guníʼ Pablo, zándaca guiníʼ íquenu qué risácanu ndaaniʼ congregación. ¿Xi zanda gúninu para cadi guiníʼ íquenu zacá yaʼ?

15. Casi ná 1 Corintios 12:4-11, ¿ximodo naquiiñeʼ guidúʼyanu ca habilidad ni nápanu?

¹⁵ Guiníʼ íquenu ndiʼ: Caadxi xpinni Cristu ni bibani lu primé siglu bidii Jehová espíritu santu laacaʼ para gúnicaʼ milagru, peru cadi guiracaʼ gúpacaʼ ngueca  gracia (biindaʼ 1 Corintios 12:4-11). Neca gadxé gadxé gracia ne habilidad bidii Jehová ca xpinni Cristu riʼ, guirácabe risácacabe. Dxandíʼ nga maʼ qué randa rúninu milagru ne nápanu gadxé gadxé habilidad, peru risácanu para Jehová.

16. ¿Xi conseju bidii apóstol Pablo caquiiñeʼ chinándanu?

¹⁶ Lugar de guchaaganu laanu xcaadxi xpinni Cristu, chinándanu conseju ni bidii apóstol Pablo: «Cada tobi guʼyaʼ xi cayuni, zacá zapa razón para chuʼ nayecheʼ pur ni maʼ biʼniʼ, sin guchaaga laa né sti binni» (Gál. 6:4).

17. ¿Xi zabeendunu pa chinándanu conseju bidii Pablo?

¹⁷ Pa chinándanu conseju ni bidii apóstol Pablo ne guidúʼyanu ca ni rúninu, zándaca zudiʼnu cuenta nápanu habilidad ni qué gapa xcaadxi. Guzéʼtenu ti ejemplu, zándaca nuu ancianu huaxiéʼ galán rudii discursu, peru guizáʼ racané binni gaca discípulo. O zándaca qué gánnabe quixhe chaahuibe xiixa dxiiñaʼ casi runi xcaadxi ancianu ndaaniʼ congregación, peru nabé runibiáʼcabe laabe purtiʼ nácabe ti pastor ni nadxii ca hermanu ne zanda guidxíñacaʼ laabe para guinábacaʼ conseju laabe. O zándaca runibiáʼcabe laabe purtiʼ galán modo ridxaagalube ca hermanu ra lídxibe (Heb. 13:2, 16). Ora maʼ nánnanu gunáʼ nga ca habilidad ni nápanu la? zápanu razón para guiéchenu pur ca cosa ni rúninu ndaaniʼ congregación. Ne laaca zacané ni laanu para cadi gápanu envidia ca hermanu stinu ni napa gadxé habilidad que laanu.

18. ¿Xi zanda gúninu para gusíʼdinu jma jneza?

¹⁸ Intiica dxiiñaʼ nápanu ndaaniʼ congregación, guiranu naquiiñeʼ quixhe íquenu gúninu dxiiñaʼ ni nápanu jma galán ne gusíʼdinu jma jneza. Sicaríʼ nga caquiiñeʼ Jehová organización stiʼ para gusiidiʼ laanu. Guzéʼtenu ti ejemplu, lu reunión ni raca ndaaniʼ semana, rizíʼdinu ximodo guinínenu binni jma jneza lu predicación. ¿Ñee cayúninu stipa pur gúninu ni rizíʼdinu lu ca reunión riʼ la?

19. ¿Xi zanda gúninu para ganda chuunu Escuela para Evangelizadores del Reino?

¹⁹ Nuu sti cosa guizáʼ galán ni riquiiñeʼ Jehová para gusiidiʼ ca xpinni, laani nga Escuela para Evangelizadores del Reino, lu scuela riʼ zanda cheʼ hermanu ne hermana ni nuu lu serviciu de tiempu completu ni napa 23 hasta 65 iza. ¿Ñee riníʼ íquenu qué zanda chuunu scuela ca la? Lugar de gúninu ti lista ra gucaʼnu xi pur qué zanda chuunu, mejor gucaʼnu xi pur racaláʼdxinu chuunu. De racá guidúʼyanu xi zanda gúninu para chuunu scuela ca. Pa gúninu stipa ne gacané Jehová laanu, zanda gúninu ni ruluíʼ qué ziuu dxi ugaandanu.

20. ¿Xi rusiidiʼ Romanos 12:6-8 laanu?

²⁰ Guionna cosa ni rizíʼdinu de ejemplu ni biquiiñeʼ Pablo zeeda ni lu Romanos 12:6-8 (biindaʼ ni). Lu textu riʼ sti biaje ca guníʼ apóstol Pablo napa guiráʼ hermanu ni nuu ndaaniʼ congregación gadxé gadxé habilidad. Peru ni nabe nga iquiiñeʼ cada tobi habilidad ni napa para cuʼ gana ne guquidxi ca hermanu de congregación.

21, 22. ¿Xi rizíʼdinu de ni bizaaca Robert ne Felice?

²¹ Guidúʼyanu ni bizaaca ti hermanu ni láʼ Robert. * Despué de biʼniʼ servirbe sti guidxi, biʼniʼ asignárcabe laabe Betel ni  nuu xquídxibe. Neca gúdxicabe laabe cuchaacabe laabe cadi purtiʼ bíʼnibe ti cosa ni cadi jneza, sicaríʼ guniʼbe: «Guyuaaʼ triste stale beeu ne guníʼ iqueʼ cadi jneza bineʼ xhiiñaʼ raqué. Guyuu ora guníʼ iqueʼ gusaanaʼ Betel». ¿Xi bíʼnibe para guyuube nayecheʼ sti biaje yaʼ? Bisietenalaʼdxiʼ ti ancianu laabe guiráʼ ni maʼ bisiidiʼ Jehová laanu lu ti asignación ni gúpanu dxiqué zacané ni laanu gúninu dxiiñaʼ ni nápanu yanna jma jneza. Óraque biene Robert cadi naquiiñeʼ guiníʼ ique ni biʼniʼ dxiqué ne jma gucuá ique ni zanda guni yanna.

²² Zacagá ni bizaaca ti hermanu ni láʼ Felice Epíscopo. Laabe ne xheelabe guca graduárcabe lu Escuela de Galaad lu iza 1956 ne yeguni servírcabe Bolivia casi superintendente de circuito. Lu iza 1964 gúpacabe ti xiiñicabe. Sicaríʼ guníʼ Felice: «Guca nagana para laadu gusaanadu asignación stidu. Guyuaaʼ triste guidubi ti iza. Peru cumu gucané Jehová naa la? bichaaʼ modo riníʼ iqueʼ ne gucuá iqueʼ gacaʼ ti buen padre». ¿Ñee runi sentirnu casi Robert o Felice la? ¿Ñee nuunu triste purtiʼ maʼ qué gápanu privilegiu ni gúpanu dxiqué la? Pa zacá ni, ziuʼnu jma nayecheʼ pa guicá íquenu ca ni zanda gúninu yanna para gúninu ni ná Jehová ne gacanenu ca hermanu stinu. Gúninu xhiiñaʼ Jehová ne iquiiñenu ca habilidad stinu para gacanenu xcaadxi. Ne ziuʼnu nayecheʼ ora cuʼnu gana ca hermanu de congregación.

23. a) ¿Xi para caquiiñeʼ cueenu tiempu? b) ¿Xi pregunta zacábinu lu sti artículo ca?

²³ Nabé risaca cada tobi de laanu para Jehová. Racaláʼdxibe gácanu parte de familia stibe. Pa cueenu tiempu para guiníʼ íquenu xi zanda gúninu para cuʼnu gana xcaadxi hermanu ne gúninu stipa pur gúninu ni la? qué zaca nagana para laanu gudiʼnu cuenta risácanu ndaaniʼ congregación. Yanna, ¿ximodo ridúʼyanu xcaadxi yaʼ? ¿Ximodo zanda gusihuínninu rusisácanu laacaʼ yaʼ? Lu sti artículo ca zacábinu ca pregunta riʼ.