1. ¿Xiñee bizáʼ Jehová guendanabani?

TI TIEMPU guyuu Jehová stubi, peru qué ñuu dxi ñuni sentirbe stúbibe. Qué ñaadxaʼ laabe gastiʼ. Peru guyuuláʼdxibe guibaninebe xcaadxi nayecheʼ. Ngue runi, pur guendarannaxhii stibe bizulú bizaʼbe guendanabani (Sal. 36:9; 1 Juan 4:19).

2. ¿Ximodo biʼniʼ sentir Jesús ne ca ángel ora bizáʼ Jehová xcaadxi cosa?

² Primé ni bizáʼ Jehová nga Jesús, Xiiñibe. Ne despué biquiiñebe Jesús para «guyáʼ xcaadxi cosa», dede né millón de ángel (Col. 1:16). Nabé nayecheʼ guyuu Jesús purtiʼ biʼniné Bixhoze dxiiñaʼ (Prov. 8:30). Ne laaca guyuu ca ángel que nayecheʼ purtiʼ biiyaʼ dxíchica ximodo bizáʼ Jehová ne Jesús guibáʼ ne Guidxilayú. ¿Xi biʼniʼ ca ángel que óraque yaʼ? Biblia ná «bicaacaʼ ridxi para gusisácacaʼ» Jehová ne qué nusaanacaʼ de nusisácacaʼ laabe ora bíʼyacaʼ guiráʼ ni bizaʼbe, jmaruʼ si ora bizaʼbe binni (Job 38:7; Prov. 8:31). Guiráʼ ni maʼ bizaʼbe rusihuínnicani nadxiibe binni ne nuu xpiaanibe (Sal. 104:24; Rom. 1:20).

3. Casi ná 1 Corintios 15:21, 22, ¿xi ribeendú binni pur guti Jesús?

³ Gucalaʼdxiʼ Jehová nibani binni sin ñuu dxi ñati lu Guidxilayú sicarú ni bizáʼ. Peru dxi bidxiideche Adán ne Eva Bixhózecaʼ ni nadxii laacaʼ, guyuu pecadu ne guendaguti lu Guidxilayú (Rom. 5:12). ¿Xi biʼniʼ Jehová yaʼ? Nagueendaca guniʼbe xi chigúnibe para gulabe binni (Gén. 3:15). Gudixhe íquebe gudiibe xquendanabani Xiiñibe para gulabe ca xiiñiʼ Adán ne Eva de lu náʼ pecadu ne guendaguti. Zacá bisihuínnibe cudiibe lugar binni cuiʼ pa zuni ni nabe ne guicaa  guendanabani ni qué zaluxe (Juan 3:16; Rom. 6:23; biindaʼ 1 Corintios 15:21, 22).

4. ¿Xi zazíʼdinu lu artículo riʼ?

⁴ Promesa stiʼ Dios ni caníʼ zusibánibe ca ni maʼ guti rucaa ni laanu guiníʼ íquenu ca pregunta riʼ: ¿Ximodo nga guiasa ca ni maʼ guti?, ¿ñee zunibiaʼnu ca familia stinu ni guibani sti biaje la?, ¿xiñee guizáʼ ziecheʼ binni ora guiasa ca ni maʼ guti? ne ora gánnanu ziasa ca ni maʼ guti, ¿ximodo zacané ni laanu gusisácanu guendarannaxhii, guendanuuxpiaaniʼ ne paciencia stiʼ Jehová? Guidúʼyanu respuesta stícani.

5. ¿Xiñee jneza nga guiníʼ íquenu cadi juntu ziasa guiráʼ ca ni maʼ guti?

⁵ Zaquiiñeʼ Jehová Xiiñiʼ para gusibani stale millón de binni ni maʼ guti. Peru zándaca cadi juntu guiasa guirácabe. ¿Xiñee coʼ yaʼ? Purtiʼ pa málasi guidale binni lu Guidxilayú riʼ, qué ziuu diʼ orden. Ne qué riuulaʼdxiʼ Jehová gaca ca cosa ca modo tiica si. Nánnabe caquiiñeʼ chuʼ orden para chuʼ paz (1 Cor. 14:33). Zacaca nga modo bizáʼ Jehová ne Jesús Guidxilayú riʼ para binni, cadi juntu diʼ bizáʼcabe guiráʼ cosa, zacá bisihuinni Jehová nuu xpiaaniʼ ne napa paciencia. Laaca zusihuinni Jesús ca cualidad riʼ ora guni mandar lu ti mil iza ne gacanebe ca binni ni guilá lu Armagedón para guni chaahuicaʼ Guidxilayú riʼ para ca ni chiguiasa de lade gueʼtuʼ.

6. Casi ná Hechos 24:15, ¿tuu nga ca ni chiguiasa de lade gueʼtuʼ?

⁶ Ca binni ni guilá lu Armagedón la? zúnicaʼ ti dxiiñaʼ nabé risaca, zusiidicaʼ ca ni guiasa de lade gueʼtuʼ de Reinu stiʼ Dios ne ca ley stiʼ. ¿Xiñee caquiiñeʼ gúnicabe  ni yaʼ? Purtiʼ stale de ca ni chiguiasa riʼ qué ñúnicaʼ ni jneza (biindaʼ Hechos 24:15). Caquiiñeʼ guchaacabe stale para ganda gacané guendaguti stiʼ Cristu laacabe. Stale dxiiñaʼ nga para guiziidiʼ millón de binni ni qué runibiáʼ Dios ni dxandíʼ. ¿Ñee zudiʼnu estudiu cada binni cásica rúninu ni tiempu riʼ la? ¿Ñee zaca asignárcabe ti congregación para guiziidicabe ti zacá gusiidicabe ca ni guiasa despué de laacabe la? Caquiiñeʼ cuézanu para gánnanu ni. Ni nánnanu nga «guidxilayú riʼ zadxá tipa ni de guiráʼ ni rusiidiʼ Jehová» ora maʼ ziluxe ti mil iza de cayuni mandar Cristu (Is. 11:9). ¡Nabé stale dxiiñaʼ galán ziuu lu ti mil iza ca!

7. ¿Xiñee zapa ca xpinni Jehová paciencia ora gusiidicaʼ ca ni guiasa de lade gueʼtuʼ?

⁷ Lu ti mil iza, guiráʼ ca xpinni Jehová zúnicaʼ stipa guchaacaʼ ti chuuláʼdxibe ni rúnicaʼ. Nga runi, caquiiñeʼ gápacabe paciencia ora gacanécabe ca binni ni guiasa de lade gueʼtuʼ para gúnicaʼ stipa cadi gucheecaʼ ne guibánicaʼ modo riuulaʼdxiʼ Jehová (1 Ped. 3:8). Ora guʼyaʼ ca binni ni guiasa de lade gueʼtuʼ humilde ca xpinni Dios ne cayúnicaʼ stipa pur guchaacaʼ ne gúnicaʼ ni ná Dios cásica laacabe la? zucaa ni laacabe guni adorárcabe Dios (Filip. 2:12).

8. ¿Xiñee nánnanu zunibiáʼ binni ca familia stiʼ ni guiasa de lade gueʼtuʼ?

⁸ Nápanu stale razón para guni crenu zunibiáʼ binni familia stiʼ ni guiasa de lade gueʼtuʼ. Guzéʼtenu ti ejemplu, pur ca resurrección ni riete lu Biblia, zándaca ora gusibani Jehová ca ni maʼ guti, zandísabe laacaʼ modo nácacaʼ ante gáticaʼ, modo riniʼcaʼ ne modo riníʼ íquecaʼ. Ne cadi guiaandaʼ laanu guníʼ Jesús ora maʼ guti tuuxa, casi ora nisiaasibe ne ora guiásabe de lade gueʼtuʼ casi ora nibánibe (Mat. 9:18, 24; Juan 11:11-13). Cásica modo naca binni ora maʼ zigasi la? zacaca nga ora guibani, ngueca ridxi stiʼ ne ni riníʼ ique. Guzéʼtenu ni bizaaca Lázaro. Dxi bisibani Jesús laabe la? maʼ tapa gubidxa de gútibe, ngue runi mápeca cayuudxuʼ xcuérpube. Peru ora biásabe de lade gueʼtuʼ nagueendaca binibiáʼ ca bizáʼnabe laabe, ne laaca binibiaʼbe laacaʼ (Juan 11:38-44; 12:1, 2).

9. ¿Xiñee cadi casi guiasa binni de lade gueʼtuʼ zaca perfectu?

⁹ Jehová guníʼ ora guzulú guni mandar Jesús guirutiʼ tu cueza racá zaníʼ: «Huaraʼyaʼ» (Is. 33:24; Rom. 6:7). Nga runi ora guzáʼ Jehová binni ni maʼ guti sti biaje, zudiibe laacaʼ ti cuerpu nazaaca. Peru cadi casi guiásacaʼ zácacaʼ perfectu. ¿Xiñee yaʼ? Purtiʼ pa ñaca zacá ni la? zándaca qué zunibiáʼ familia stibe laabe. Ruluíʼ chaahuiʼ chaahuiʼ zaca binni perfectu lu ti mil iza guni mandar Cristu. Guiluxe si ti mil iza ca, zudxiguetaʼ Jesús Reinu ca Bixhozeʼ. Para tiempu ca, maʼ biʼniʼ Reinu ca guiráʼ ni ná Jehová ne maʼ gucané ni binni gaca perfectu (1 Cor. 15:25-28; Apoc. 20:1-3).

10. ¿Xi zuni sentirnu ora guibani ca familia stinu ni maʼ guti?

¹⁰ Guxuíʼlunu ximodo zaca ora guidxaagalunu ca familia stinu ora guiásacaʼ de lade gueʼtuʼ. ¿Ñee zuxídxinu la? ¿Ñee zadúʼnanu tantu cayéchenu la? ¿Ñee zadúʼndanu  para Jehová purtiʼ cayéchenu la? Ni nánnanu nga zannaxhiinu Bixhózenu Jehová ne Jesús purtiʼ zusibánicabe ca ni maʼ guti.

11. Né ca diidxaʼ ni guníʼ Jesús lu Juan 5:28, 29, ¿xi zacaa ca ni guiasa de lade gueʼtuʼ ni guzuubaʼ stiidxaʼ Dios?

¹¹ Guxuíʼlunu pabiáʼ ziecheʼ ca ni guiasa de lade gueʼtuʼ ora gusaanacaʼ modo gúcacaʼ dxiqué ne guibánicaʼ modo riuulaʼdxiʼ Dios. Ne ca binni ni guni ni bizéʼtenu riʼ, zabánicaʼ ndaaniʼ paraísu para siempre, peru ca ni qué guzuuba stiidxaʼ Dios zabeebe laacaʼ de ndaaniʼ paraísu (biindaʼ Juan 5:28, 29; Is. 65:20).

12. ¿Ximodo zaguu Jehová ndaayaʼ guiráʼ ca binni ni guibani lu Guidxilayú?

¹² Ora maʼ guni mandar Reinu stiʼ Dios, guiráʼ ca xpínnibe zuuyacaʼ dxandíʼ ni ná Proverbios 10:22: «Ndaayaʼ stiʼ Jehová nga ni runi binni ricu, ne ora gudiibe ni qué redané ni yuubaʼ». Zacané espíritu santu stiʼ Jehová laacabe para gácacabe casi Cristu ne ra tidiʼ tiempu zácacabe perfectu (Juan 13:15-17; Efes. 4:23, 24). Cada dxi tidiʼ la? zácacabe jma nachaʼhuiʼ ne zápacabe stipa. ¡Guizáʼ nayecheʼ zabánicabe! (Job 33:25). Yanna, ora guiníʼ íquenu zusibani Dios ca ni maʼ guti, ¿ximodo racané ni laanu?

13. Casi ná Salmo 139:1-4, ora gusibani Jehová ca ni maʼ guti, ¿ximodo zusihuinni ni runibiáʼ chaahuibe laanu?

¹³ Casi maʼ bidúʼyanu, ora gusibani Jehová ca binni ni maʼ guti, zusibánibe laacaʼ modo gúcacaʼ dxiqué ne zietenaláʼdxicaʼ ni bizaacacaʼ ante gáticaʼ. Guiníʼ íquenu xi riníʼ ca diidxaʼ riʼ. Guizáʼ nadxii Jehová laanu dede nánnabe xi riníʼ íquenu, xi runi sentirnu, xi rininu ne xi rúninu. Nga runi, pa caquiiñeʼ gusibánibe laanu la? qué zaca nagana para laabe gudxiguétabe ca recuerdu stinu, modo laanu ne ni riníʼ íquenu. Gunna dxichi rey David runibiáʼ chaahuiʼ Jehová cada tobi de laanu (biindaʼ Salmo 139:1-4). ¿Ximodo runi sentirnu ora ridúʼyanu pabiáʼ rizaaláʼdxibe laanu?

14. ¿Ximodo naquiiñeʼ guni sentirnu ora guiníʼ íquenu runibiáʼ chaahuiʼ Jehová laanu?

¹⁴ Ora guiníʼ íquenu runibiáʼ chaahuiʼ Jehová laanu, cadi naquiiñeʼ chuʼnu xizaa. ¿Xiñee coʼ yaʼ? Cadi guiaandaʼ laanu guizáʼ nadxiibe laanu ne cada tobi de laanu risaca para laabe. Ne nánnabe xi guiráʼ maʼ bizaacanu lu xquendanabáninu ne xi bicaa laanu gápanu personalidad ni nápanu yanna. ¿Cadi dxandíʼ ratadxí ladxidoʼno gánnanu ndiʼ la? Qué chuʼ dxi guni sentirnu stúbinu, purtiʼ nuu Jehová gaxha de laanu para gacané laanu (2 Crón. 16:9).

15. Ora gusibani Jehová ca ni maʼ guti, ¿ximodo zusihuinni ni nuu xpiaanibe?

¹⁵ Stale binni ridxibi gatiʼ. Ca binni ni nuu lu náʼ Binidxabaʼ riquiiñecaʼ ni para gucaacaʼ xcaadxi binni gudxiidéchecaʼ ca xhamígucaʼ o gúnicaʼ xiixa ni cadi jneza. Peru qué zanda guchíbicabe laanu. Nánnanu pa guuti ca enemigu stinu laanu, zusibani Jehová laanu sti biaje (Apoc. 2:10). Nanna dxíchinu qué zanda gúnicabe xiixa ni guxheleʼ laanu de Dios stinu (Rom. 8:35-39). Rihuinni dxichi pabiáʼ nuu xpiaaniʼ Jehová ra bidii laanu ti esperanza de guiasa ca ni maʼ guti. Nga runi, qué ridxíbinu ca xpinni Binidxabaʼ  ora guiniʼcaʼ zuuticaʼ laanu pa qué gúninu ni nacaʼ. Ne laaca rudii Jehová valor laanu para cadi gusaananu laa.

16. ¿Xi naquiiñeʼ guinabadiidxanu, ne xi zusihuinni respuesta stinu?

¹⁶ Pa guiníʼ ca enemigu stinu zuuticaʼ laanu, ¿ñee nápanu confianza zusibani Jehová laanu sti biaje la? Para gánnanu ni, guiníʼ íquenu ndiʼ: «¿Ñee rusihuinni ca decisión ni ricaaʼ guiráʼ dxi napaʼ confianza Jehová la?» (Luc. 16:10). «¿Ñee rusihuinneʼ pur modo nabaneʼ napaʼ confianza zudii Jehová naa guiráʼ ni caquiiñeʼ pa guyubeʼ Reinu primé lu xquendanabaneʼ la?» (Mat. 6:31-33). Pa rusihuinni respuesta stinu nápanu confianza Jehová, zacané ni laanu gudxíʼlunu intiica prueba guidxaagalunu (Prov. 3:5, 6).

17. a) Ora gusibani Jehová ca ni maʼ guti, ¿ximodo zusihuinni ni nápabe paciencia? b) ¿Ximodo zanda gusihuínninu rudiʼnu xquixe peʼ Jehová pur paciencia stiʼ?

¹⁷ Maʼ gudixhe Jehová dxi ne hora para gunitilú guidxilayú malu riʼ (Mat. 24:36). Neca maʼ racaláʼdxibe guindísabe ca ni maʼ gutiʼ, cusihuínnibe nápabe paciencia ne qué zúnibe ni ante (Job 14:14, 15). Cabézabe gúnibe ni ora maʼ naguíxhebe ni (Juan 5:28). Nápanu stale razón para gudiʼnu xquixe peʼ Jehová purtiʼ napa paciencia. Ne pur paciencia stibe, stale binni maʼ guca arrepentir, dede né laanu (2 Ped. 3:9). Racalaʼdxiʼ Jehová gusibani stale binni ni maʼ guti. Nga runi, gúninu stipa para guidxélanu «ca ni nachaʼhuiʼ ladxidóʼ ni maʼ nuu para guicaa guendanabani ni qué zaluxe» ne gacanenu laacabe gannaxhiicabe ne gúnicabe ni ná Jehová (Hech. 13:48). Zacá zabeendúcabe ni galán pur paciencia stiʼ Jehová.

18. ¿Xiñee caquiiñeʼ gápanu paciencia xcaadxi?

¹⁸ Zabeza Jehová né stale paciencia gácanu perfectu despué de guiluxe ti mil iza. Ne nuube dispuestu guni perdonarbe ca pecadu stinu. Nga runi, chinándanu ejemplu stibe, guidúʼyanu ca cualidad galán napa xcaadxi ne gápanu paciencia laacaʼ. Guzéʼtenu ejemplu stiʼ ti hermana. Bizulú gupa xheelabe ansiedad ne bisaana de cheʼ reunión. Sicaríʼ guniʼbe: «Nabé bininá ni bizaaca riʼ naa. Guiráʼ ni gudixhe  íquedu gúnidu bixiá cani». Peru neca zacá, gunnaxhii hermana riʼ xheelaʼ ne gupa paciencia laabe. Gúpabe confianza Jehová ne qué nireebe gana. Cásica runi Jehová, qué nicá íquebe ni cadíʼdicabe, sínuque laaca biiyabe ca cosa galán ni runi xheelabe. Laabe guniʼbe: «Napa xheelaʼ caadxi cualidad galán ne chaʼhuiʼ chaʼhuiʼ cayúnibe stipa guiándabe». Nabé risaca gápanu paciencia ca familia stinu o ca hermanu de congregación ni cayuni stipa pur gudxiilú ca guendanagana stiʼ.

19. ¿Xi naquiiñeʼ quixhe íquenu gúninu?

¹⁹ Biecheʼ Jesús ne ca ángel dxi bizáʼ Dios Guidxilayú riʼ. Yanna guxuíʼlunu pabiáʼ ziéchecabe ora gúʼyacabe guidxá Guidxilayú riʼ de binni perfectu ni gannaxhii ne ni guni ni ná Jehová. Ne guiníʼ íquenu pabiáʼ ziecheʼ ca ni guni mandarné Cristu guibáʼ ora gúʼyacaʼ xi guiráʼ cabeendú binni pur dxiiñaʼ ni cayúnicaʼ (Apoc. 4:4, 9-11; 5:9, 10). Laaca guiníʼ íquenu xi zazaaca ora guʼnaʼ binni tantu cayecheʼ, ora maʼ cadi chuʼ binni triste, guiree guendahuará ne guendaguti (Apoc. 21:4). Laga cabézanu guedandá dxi ca, gannaxhiinu, gácanu binni ni napa paciencia ne ni nuu xpiaaniʼ cásica Bixhózenu. Pa gúninu ni, zabáninu nayecheʼ neca cudxíʼlunu intiica guendanagana (Sant. 1:2-4). Guizáʼ riéchenu pur promesa stiʼ Jehová ni ná zabani «ca ni maʼ guti» (Hech. 24:15).