1. ¿Xiñee galán guinínenu xcaadxi ximodo bizíʼdinu de Jehová?

 «¿XIMODO biziidiluʼ de Jehová?». Zándaca huacábinu pregunta riʼ stale biaje. Nga nga ni rinabadiidxaʼ tuuxa hermanu laanu ora gunibiaʼnu laa. Guizáʼ riuuláʼdxinu gucaʼdiáganu ximodo binibiaʼ xcaadxi hermanu stinu Jehová ne gunnaxhiicaʼ laabe. Laaca riuuláʼdxinu gábinu xcaadxi xiñee risaca para laanu sanu lu neza ni dxandíʼ (Rom. 1:11). Ne ra rinínenu xcaadxi la? rietenaláʼdxinu pabiáʼ risaca nga gácanu testigu stiʼ Jehová. Laaca rusietenalaʼdxiʼ ni laanu pabiáʼ risaca nga cadi gusaana de sanu lu neza «ni dxandíʼ», o cadi gusaana de gúninu ni ná Jehová para gusiéchenu laa ne uguu ndaayaʼ laanu (3 Juan 4).

2. ¿Xi zadúʼyanu lu artículo riʼ?

² Lu artículo riʼ zadúʼyanu caadxi razón xiñee rusisácanu ni dxandíʼ rusiidiʼ Biblia. Laaca zadúʼyanu ximodo zanda gusihuínninu pabiaʼ rusisácanu regalu riʼ. Ne últimu la? zucaa ni laanu gudiʼnu xquixe peʼ Jehová purtiʼ biluíʼ laanu ni dxandíʼ (Juan 6:44). Ne jma zudii gana laanu gusíʼdinu xcaadxi binni de ni dxandíʼ rusiidiʼ Biblia.

3. ¿Xiñee rusisácanu ni dxandíʼ zeeda lu Biblia?

³ Rusisácanu ni dxandíʼ pur stale razón. Razón jma risaca nga purtiʼ nadxiinu Jehová, purtiʼ de laabe nga zeeda ni dxandíʼ. Pur nápanu Stiidxaʼ Dios, Biblia, maʼ bizíʼdinu laabe nga Dios jma napa poder ni bizáʼ guibáʼ ne Guidxilayú. Ne laabe nga Bixhózenu ni nuu guibáʼ, ni nadxii laanu ne rizaalaʼdxiʼ laanu (1 Ped. 5:7). Nánnanu naca «Jehová  ti Dios ni napa misericordia ne riá, rindaa para guidxiichi ne qué rusaana de gannaxhii ne fiel laa» (Éx. 34:6). Rúnibe ni jneza (Is. 61:8). Racaná Jehová ora guʼyaʼ cayuni sufrirnu ne maʼ racaláʼdxibe cueebe ca yuubaʼ nápanu dxi maʼ gudíxhebe gúnibe ni (Jer. 29:11). ¡Guizáʼ maʼ racaláʼdxinu guedandá dxi ca! Nga runi guizáʼ nadxiinu Jehová.

4, 5. ¿Xiñee guníʼ apóstol Pablo naca esperanza stinu casi ti ancla?

⁴ Laaca nadxiinu ca ni dxandíʼ zeeda lu Biblia purtiʼ racané ca ni laanu lu xquendanabáninu. Guzéʼtenu ti ejemplu. Tobi de ca cosa ni maʼ bizíʼdinu de lu Biblia nga esperanza ni nápanu para lu ca dxi ni zeeda ca. Ne para gánnanu pabiáʼ risaca ni, sicaríʼ bicaa apóstol Pablo: «Naaze dxiichiʼ esperanza riʼ xpídanu, cásica rinaaze dxiichiʼ ti ancla barcu ne nánnanu zaca cumplir ni» (Heb. 6:19). Cásica rinaaze dxiichi’ ancla ti barcu, zacaca zanda guinaaze dxiichi’ esperanza ni zeeda lu Biblia laanu ora gápanu guendanagana.

⁵ Ora guníʼ Pablo ca diidxaʼ ca, caníʼ íquebe esperanza ni napa ca ungidu para checaʼ guibáʼ. Peru ni guniʼbe ca laaca rugaanda ni ca xpinni Cristu ni napa esperanza guibani lu Guidxilayú riʼ ora maʼ gaca ni ti paraísu (Juan 3:16). Esperanza ni nápanu de guibáninu sin chuʼ dxi gátinu, racané ni laanu para guibáninu nayecheʼ.

6, 7. Ra biziidiʼ Yvonne de esperanza ni rusiidiʼ Biblia, ¿ximodo gucané ni laa?

⁶ Guidúʼyanu ni bizaaca ti hermana láʼ Yvonne. Cumu cadi de nahuiinibe nga biziidibe de Jehová la? ngue runi, dxi nahuiinibe bidxíbibe gátibe. Bietenaláʼdxibe biindabe lu ti libru ca diidxaʼ riʼ: «Zedandá ti dxi maʼ qué zaranu gueelaʼ». Laabe guniʼbe: «Qué raseʼ ora riníʼ iqueʼ ca diidxaʼ que, ne maʼ caníʼ iqueʼ xi guizaacaʼ despué. Guníʼ iqueʼ: “¿Xiñee caadxi si iza ribani binni pue?” Neca qué gannaʼ xi pur nabaneʼ, peru qué ¡racalaʼdxeʼ gateʼ!».

⁷ Dxi maʼ adolescente Yvonne, binibiaʼ ca testigu stiʼ Jehová. Sicaríʼ guniʼbe: «Bineʼ cré zanda guibaneʼ sin qué chu dxi gateʼ ndaaniʼ ti paraísu lu Guidxilayú riʼ». Ra biziidibe ni dxandíʼ, gucané ni laabe. Sicaríʼ guniʼbe: «Maʼ randa raseʼ purtiʼ maʼ qué riníʼ iqueʼ xi guizaaca de xquendanabaneʼ despué ne maʼ qué riníʼ iqueʼ de guendaguti». Yanna maʼ nánnanu xiñee rusisaca Yvonne ca ni dxandíʼ zeeda lu Biblia ne riuuláʼdxibe guiniʼbe de esperanza riʼ né xcaadxi binni (1 Tim. 4:16).

8, 9. a) ¿Ximodo bisihuinni hombre ni bizeeteʼ Jesús que pabiáʼ bisisaca tesoro bidxela? b) ¿Xi runi sentirluʼ pur ca cosa ni rusiidiʼ Biblia?

⁸ Laaca naca ca noticia galán stiʼ Reinu stiʼ Dios ni dxandíʼ rusiidiʼ Biblia. Bichaaga Jesús ni dxandíʼ de Reinu stiʼ Dios casi ti tesoro ni gaʼchiʼ. Laa guníʼ: «Zeeda gaca Reinu ni nuu guibáʼ casi ti tesoro gaʼchiʼ lu ti layú ni bidxela ti hombre. Bicaachiʼ hombre que ni sti biaje, ne de tantu cayecheʼ, biree zeʼ ne bitoo guiráʼ ni napa ne guzíʼ layú que» (Mat. 13:44). Casi bidúʼyanu ca, cadi canayubi diʼ hombre que tesoro que. Peru, ora bidxélabe ni, bíʼnibe ti sacrificiu naroʼbaʼ para guiaananebe ni ra bitoobe guiráʼ ni nápabe. ¿Xiñee bíʼnibe ni yaʼ? Purtiʼ biénebe pabiaʼ risaca tesoro que, jma risaca ni que intiica cosa.

⁹ Nánnadu biáʼqueca risaca para lii ca ni dxandíʼ rusiidiʼ Biblia. Nánnanu jma risaca ni dxandíʼ rusiidiʼ Biblia que intiica cosa rudii guidxilayú riʼ laanu, purtiʼ  riuʼnuʼ nayecheʼ ora rúninu ni ná Jehová. Laaca rusisácanu esperanza ni nápanu de guibáninu sin chuʼ dxi gátinu ora maʼ guni mandar Reinu stiʼ Dios. Risaca intiica sacrificiu ni rúninu para gaca xhamígunu Jehová. Ti privilegiu nga gácanu xhamígube. Ne ti cosa ni guizáʼ rusiecheʼ laanu nga gúninu ni gusiecheʼ ladxidóʼ Jehová (Col. 1:10).

10, 11. ¿Xi bicaa Michael guchaa modo nabani?

¹⁰ Stale xpinni Cristu naroʼbaʼ sacrificiu maʼ bíʼnicaʼ para gusiéchecaʼ Jehová. Nuu tu laa maʼ biʼniʼ renunciar guni estudiar ti carrera nabé risaca lu guidxilayú riʼ. Ne nuu tu laa maʼ bisaana de guyubi gapa stale cosa material. Ne nuu xcaadxi la? bichaacaʼ ni cá íquecaʼ ugaandacaʼ dxi binibiaʼcaʼ Jehová. Ne nga peʼ nga ni bizaaca Michael, ti hermanu ni binibiáʼ Jehová dxi maʼ huaniisi. Dxi joven laabe biziidibe arte marcial. Sicaríʼ guniʼbe: «Nabé risaca para naa gacaʼ cuerpu stinneʼ nadipaʼ. […] Ne guyuu biaje guníʼ iqueʼ guirutiʼ tu zanda guni ganar naa». Peru bizulú biʼniʼ estudiarbe Biblia ne biziidibe xi riníʼ ique Jehová de guendaridinde (Sal. 11:5). Sicaríʼ guniʼbe de guendaxheelaʼ ni bidii estudiu laabe: «Qué ñuu dxi ñábicabe naa nusaanaʼ de ñuneʼ practicar arte marcial jma gucuá íquecabe gusiidicabe naa ni dxandíʼ rusiidiʼ Biblia».

¹¹ Ra jma biziidiʼ Michael de Jehová jma gunnaxhiibe laa. Tobi de ca cosa ni jma guyuuláʼdxibe nga ora gúnnabe riá Dios ca xpinni. Biene Michael naquiiñeʼ guicaa ti decisión nabé risaca, naquiiñeʼ guchaa xquendanabani. Sicaríʼ guniʼbe: «Decisión jma nagana ni gucuaaʼ nga gusaanaʼ arte marcial. Peru laaca gunnaʼ pa guneʼ ni zusiecheʼ Jehová ne ngue nga decisión ni jma jneza». Guizáʼ bisisaca Michael ca ni biziidiʼ de lu Biblia ne ngue bicaa laa guchaa modo nabani (Sant. 1:25).

12, 13. Ra biziidiʼ Mayli ni dxandíʼ rusiidiʼ Biblia, ¿ximodo gucané ni laa?

¹² Ruchaaga Biblia ca ni dxandíʼ zeeda luni casi ti biaaniʼ lu guelacahui (Sal. 119:105; Efes. 5:8). Mayli, ti hermana de Azerbaiyán, guizáʼ rudii xquixe peʼ purtiʼ bizaaniʼ Stiidxaʼ Dios neza stiʼ para ganna xi guni. Chupa religión napa familia stibe, bixhózebe Musulmán laa ne jñaabe judía. Mayli guníʼ: «Runeʼ cré nuu Dios, peru nuu cosa ni qué ñeneʼ. Guníʼ iqueʼ: “¿Xiñee bizaʼbe laanu? Pa runi sufrirnu guidubi xquendanabáninu, ¿xiñee laaca chiguni sufrirnu lu ti infiernu ora maʼ gátinu yaʼ?”. Binni riníʼ, ni ná Dios nga rizaaca, ne nga bicaa naa guiníʼ iqueʼ: “¿Ñee Dios nga runi controlar guiráʼ ni rizaaca ne riuuláʼdxibe gúʼyabe gacananu la?”».

¹³ Qué nusaana Mayli de nuyubi respuesta stiʼ ca pregunta stiʼ. Gudiʼdiʼ si tiempu bidiicabe laabe estudiu de lu Biblia ne gúcabe testigu stiʼ Jehová. Laabe guniʼbe: «Cumu nabé nayaʼniʼ modo rusiene Biblia ca tema riʼ la? jmaʼ gucané ni naa guibaneʼ nayecheʼ ne gapaʼ guendariuudxi». Cásica Mayli, guiranu, ca ni rúninu ni ná Jehová, rusisácanu laa purtiʼ gulee laanu «lu guelacahui ne guluu [laanu] lu biaaniʼ sicarú stiʼ» (1 Ped. 2:9).

14. ¿Xiruʼ zanda gúninu para gusisácanu ni dxandíʼ zeeda lu Biblia? (Biiyaʼ cuadru ni láʼ « Xiruʼ ruchaaga Biblia ni»).

¹⁴ Ca ejemplu ni maʼ bidúʼyanu lu ca párrafo ca rusihuinni ca ni pabiáʼ risaca ni  dxandíʼ rusiidiʼ Biblia. Zándaca rietenaláʼdxirunu xcaadxi ejemplu. ¿Xiñee qué guyúbinu xcaadxi razón para jma gusisácanu ni dxandíʼ rusiidiʼ Biblia yaʼ? Ra jma gusisácanu ni dxandíʼ rusiidiʼ Biblia, jma zúninu ni ná ni lu xquendanabáninu.

15. ¿Ximodo rusihuínninu rusisácanu ni dxandíʼ zeeda lu Biblia?

¹⁵ Ti modo zanda gúninu ni nga ra cadi gusaananu de guni estudiarnu Biblia ne ca publicación stinu. Neca maʼ zinenu stale iza de nácanu testigu stiʼ Jehová siempre nuuruʼ cosa ni zanda guizíʼdinu. Lu primé revista riʼ, lu diidxaʼ inglés, sicaríʼ gucuá: «Cumu nuu stale binni ni riníʼ stale cosa ni cadi dxandíʼ lu guidxilayú riʼ la? nga runi raca nagana para laanu guidxélanu ni dxandíʼ. Naquiiñeʼ gúniluʼ stipa para guyúbiluʼ ni ne guidxélaluʼ ni, cadi gusaana de guyúbiluʼ guiráʼ ni dxandíʼ rusiidiʼ Biblia». Naquiiñeʼ gúninu stipa para guni estudiarnu Biblia, peru risaca gúninu ni.

16. ¿Ximodo runi estudiarluʼ Biblia? (Proverbios 2:4-6).

¹⁶ Cadi guiranu riuuláʼdxinu guidúʼndanu  ne guni estudiarnu, peru canabaʼ Jehová laanu cadi gusaana de gunibiaʼ chaahuinu laa para guiénenu ni dxandíʼ rusiidiʼ Biblia (biindaʼ Proverbios 2:4-6). Pa gúninu ni né gana zabeendunu ni galán. Ti hermanu láʼ Corey guníʼ ora ruundaʼ Biblia ruyubi guiene versículo pur versículo, sicaríʼ guníʼ: «Ruundaʼ ca nota zeeda luni, ruyubeʼ ca referencia zeeda lu ca versículo ne runeʼ investigar. […] Zacá riziideʼ stale cosa ora ruundaʼ». Pa gúninu sicaríʼ o coʼ, naquiiñeʼ cueenu tiempu ne gúninu stipa para guni estudiarnu Biblia, purtiʼ zacá rusihuínninu rusisácanu ni dxandíʼ rusiidiʼ Biblia (Sal. 1:1-3).

17. ¿Xi naquiiñeʼ gúninu né ni dxandíʼ rusiidiʼ Biblia? (Santiago 1:25).

¹⁷ Cadi naquiiñeʼ si guni estudiarnu ni dxandíʼ zeeda lu Biblia. Naquiiñeʼ gúninu stipa pur gúninu guiráʼ ni cazíʼdinu lu xquendanabáninu. Zacatiʼ zabáninu nayecheʼ (biindaʼ Santiago 1:25). ¿Ne ximodo zanda gudiʼnu cuenta cayúninu ni cazíʼdinu lu xquendanabáninu yaʼ? Ti hermanu guníʼ zanda gúninu ti examen laca laanu para guidúʼyanu xi cayúninu jneza ne paraa naquiiñeʼ guni mejorarnu. Apóstol Pablo guníʼ: «Dede biaʼ ra biʼniʼ progresarnu, cadi gusaana de gúninu ni» (Filip. 3:16).

18. ¿Xiñee rúninu stipa pur sanu lu neza ni rusiidiʼ «ni dxandíʼ»?

¹⁸ Guiníʼ íquenu xi guiráʼ cosa galán ribeendunu ora rúninu stipa sanu lu neza «ni dxandíʼ». Cadi ribánisinu galán, sínuque laaca rusiéchenu ladxidóʼ Jehová ne ladxidóʼ ca hermanu stinu (Prov. 27:11; 3 Juan 4). ¡Gástiruʼ sti cosa jma galán que gusisácanu ca ni dxandíʼ rusiidiʼ Biblia ne guibáninu modo ná ca ni!