1. Casi ná 1 Tesalonicenses 5:11, ¿xi dxiiñaʼ rúninu guiranu?

 ¿ÑEE gucaneluʼ ra gurí Yoo stiʼ Reinu ra ridagulisaa congregación stiluʼ la? Pa zacá ni, zándaca rietenaláʼdxiluʼ primé biaje guyeluʼ reunión raqué. Bidxá tipa ladxidoʼloʼ de guendanayecheʼ ne cudiiluʼ xquixe peʼ Jehová. Zándaca dede guca nagana para lii gúʼndaluʼ primé canción que. Nánnanu guizáʼ sicarú nga ca Yoo stiʼ Reinu ca purtiʼ rusisaca ca ni Jehová. Peru nuu sti dxiiñaʼ ni jma rusiecheʼ laanu ne jma rusisaca ni Jehová. Laa ni nga gacanenu ca hermanu ne ca hermana ni ridagulisaanenu ndaaniʼ ca Yoo stiʼ Reinu ca. Nga peʼ nga ni bizeeteʼ apóstol Pablo ora bicaa ca diidxaʼ ni zeeda lu textu stiʼ artículo riʼ, 1 Tesalonicenses 5:11 (biindaʼ ni).

2. ¿Xi zadúʼyanu lu artículo riʼ?

² Para cuʼnu gana ca hermanu ne ca hermana stinu zanda chinándanu ejemplu stiʼ apóstol Pablo. Biénebe ximodo cayuni sentir xcaadxi. Lu artículo riʼ zadúʼyanu ximodo gucanebe ca xpinni Cristu guni huantarcaʼ ca prueba cadíʼdicaʼ, chuʼcaʼ tobi si ne gaca fe ni nápacaʼ jma naguidxi. Guidúʼyanu ximodo zanda chinándanu ejemplu stibe (1 Cor. 11:1).

3. ¿Ximodo biiyaʼ Pablo dxiiñaʼ stiʼ ne xhiiñaʼ Jehová?

³ Guizáʼ gunnaxhii Pablo ca hermanu stiʼ. Ne cumu laapebe gúpabe stale guendanagana la? ngue runi gunda biabe ne biénebe ca hermanu ni cadiʼdiʼ lu guendanagana. Ti biaje birá bueltu stibe ngue runi gupa xidé bíʼnibe dxiiñaʼ para gápabe ni iquiiñebe ne ni iquiiñeʼ ca compañeru stibe  (Hech. 20:34). Dxiiñaʼ gúpabe nga bíʼnibe carpa o tienda de campaña. Dxi yendabe Corinto bíʼninebe Áquila ne Priscila dxiiñaʼ, purtiʼ laaca dxiiñaʼ ni rúnibe que rúnicaʼ, peru «guiráʼ sábadu» biʼniʼ predicarbe ca judíu ne ca griegu. Ne dxi yendá Silas ne Timoteo, «jmaruʼ si biʼniʼ predicar Pablo stiidxaʼ Dios» (Hech. 18:2-5). Racá ridúʼyanu ni jma risaca para apóstol riʼ nga guni ni ná Jehová primé lu xquendanabani. Biʼniʼ Pablo xhiiñaʼ ne xhiiñaʼ Dios, ngue runi gunda guluube gana ne bidiibe conseju ca hermanu para cadi guicá peʼ íquecaʼ ca guendanagana sticaʼ o jma guicá íquecaʼ gudiicaʼ ni caquiiñeʼ familia sticaʼ dede maʼ qué gacanecaʼ laacabe chúʼcabe gaxha de Jehová (Filip. 1:10).

4. ¿Ximodo gucané Pablo ne Timoteo ca hermanu para guni huantarcaʼ ora bicaalú binni laacaʼ?

⁴ Cadi xadxí de guca formar congregación de Tesalónica, bicaalú stale binni ca xpinni Cristu que. Ti biaje qué nidxela ti grupu de binni malu Pablo ne Silas, ngue runi guxubiyucaʼ «chupa chonna hermanu ne yenecaʼ laacabe nezalú ca gobernante stiʼ guidxi, ne guniʼcaʼ: [...] “Cucaalú guiráʼ ca hombre riʼ ca ley ni gudixhe César”» (Hech. 17:6, 7). ¿Ñee ruxuíʼlunu pabiáʼ bidxibi ca xpinni Cristu riʼ ora bíʼyacaʼ cucaalú binni xquídxicaʼ laacaʼ la? Ñanda nireecabe gana ne maʼ cadi ñúnicabe ni ná Jehová. Peru biʼniʼ Pablo xiixa para cadi guizaaca ngue. Despué biree Pablo ne Silas de guidxi que, biiyacabe gapa congregación ni nacubi que guiráʼ ni caquiiñeʼ. Sicaríʼ gudxi Pablo ca hermanu de Tesalónica despué: «Ne guséʼndadu hermanu Timoteo ra nuutu [...] para gacanebe laatu guzuhuaatu dxiichiʼ, para quixhedxibe ladxidoʼto ne para gaca fe stitu naguidxi, ti cadi chuʼtu xizaa pur guiráʼ guendanagana riʼ» (1 Tes. 3:2, 3). Zándaca biiyaʼ Timoteo modo bicaalú binni laa dxi guleza ndaaniʼ guidxi Listra. Biiyabe ximodo gucané Pablo ca xpinni Cristu de guidxi riʼ ne ximodo gucané Jehová laacaʼ. Ngue runi gunda gucanebe ca xpinni Cristu nacubi de Tesalónica ne gúdxibe laacaʼ zacané Jehová laacaʼ (Hech. 14:8, 19-22; Heb. 12:2).

5. ¿Xi biʼniʼ Bryant pur gucané ti ancianu laa?

⁵ ¿Xiruʼ biʼniʼ Pablo para gucané ca hermanu stiʼ? Dxi laabe ne Bernabé biguétacabe Listra, Iconio ne Antioquía, «biʼniʼ nombrárcabe ancianu ndaaniʼ cada congregación» (Hech. 14:21-23). Nánnanu guizáʼ guluu Pablo ne Bernabé gana ca congregación que, cásica runi ca ancianu ni nuu tiempu riʼ. Guidúʼyanu xi bizeeteʼ ti hermanu ni láʼ Bryant: «Dxi napaʼ 15 iza bisaana bixhozeʼ laadu ne guca expulsar jñaaʼ. Bineʼ sentir nuaaʼ stubeʼ ne guyuaaʼ triste». ¿Xi gucané laabe tiempu nagana que yaʼ? Laabe guniʼbe: «Lu ca reunión que nabé bidxiña ti ancianu lá Tony naa. Ne siempre biyúbibe guiníʼnebe naa sti ora. Guníʼnebe naa experiencia stiʼ ca hermanu ni gudiʼdiʼ lu guendanagana, peru qué nusaana de ñuucaʼ nayecheʼ. Biindanebe naa Salmo 27:10 ne stale biaje guníʼnebe naa de rey Ezequías ni biʼniʼ ni ná Jehová neca bixhoze qué ñaca ti ejemplu galán para laa». ¿Ximodo gucané ngue Bryant? Laa guníʼ: «Pur gucané Tony naa, bizuluáʼ bineʼ servir de tiempu completu, ne nga guizáʼ huasiecheʼ ni naa». Ancianu caʼ, laguuyaʼ xi caquiiñeʼ xcaadxi hermanu casi Bryant, ca ni caquiiñeʼ «diidxaʼ galán» ni cuʼ gana laacaʼ (Prov. 12:25).

6. ¿Ximodo biquiiñeʼ Pablo ni bizaaca ca xpinni Dios de dxiqué para cuʼ gana ca hermanu?

⁶ Bisietenalaʼdxiʼ Pablo ca hermanu stiʼ  nuu stale Testigu ni zeeda gaca «casi ti za naroʼbaʼ», huayuni huantarcaʼ ca guendanagana riʼ purtiʼ bidii Jehová stipa laacaʼ (Heb. 12:1). Gunna Pablo zacané ni bizaaca ca xpinni Dios ni bibani dxiqué ca hermanu riʼ para gácacaʼ nadxibalú ne guicá íquecaʼ «guidxi stiʼ Dios ni nabani» (Heb. 12:22). Ne laaca zanda gacané ni laanu tiempu riʼ. Cadi dxandíʼ ora ridúʼndanu modo gucané Jehová, Gedeón, Barac, David, Samuel ne xcaadxi, riuʼnu gana la? (Heb. 11:32-35). Ne zacaca rizaaca ora runadiáganu ejemplu stiʼ ca hermanu ni nabani tiempu riʼ. Ra central mundial rindá carta stiʼ stale hermanu ne hermana ra caniʼcaʼ pabiáʼ riguidxi fe sticaʼ ora ruundacaʼ historia stiʼ ca xpinni Jehová de tiempu riʼ.

7. ¿Xi rusiidiʼ conseju ni bidii Pablo ni zeeda lu Romanos 14:19-21 laanu?

⁷ Sti modo zanda gacanésaanu ca hermanu stinu nga ra gacanenu chuʼ guendariuudxi ndaaniʼ congregación. Qué ridxiichinu ora gadxé modo riníʼ ique tuuxa, ne qué ricanu tema gaca modo rábinu pa cadi cucheené tuuxa ti principiu ni zeeda lu Biblia. Guidúʼyanu xi bizaaca congregación de Roma, ra guyuu stale xpinni Cristu judíu ne ni zeeda de xcaadxi guidxi. Cumu maʼ cadi zinándacabe Ley stiʼ Moisés la? maʼ randa rócabe caadxi guendaró ni biʼniʼ prohibir Ley que (Mar. 7:19). Guyuu caadxi xpinni Cristu judíu ni qué nuchiiñaʼ conciencia sticaʼ laacaʼ ne gudocaʼ ca guendaró que, peru guyuu xcaadxi xpinni Cristu judíu ni guníʼ ique cadi jneza ni. Ne pur ngue maʼ qué ñuu congregación que tobi si. Bisiene Pablo laacabe pabiáʼ risaca nga chúʼcabe tobi si ne guníʼ: «Jma galán cadi goloʼ beela ne cadi gueluʼ vinu ne cadi gúniluʼ xiixa cosa pa pur laani guirá fe stiʼ hermanu stiluʼ» (biindaʼ Romanos 14:19-21). Né conseju riʼ, gucané Pablo ca hermanu gúʼyacaʼ ca tipu guendanagana riʼ zanda guniná ni laacaʼ ne congregación. Laapebe guyuube dispuestu guchaabe para cadi gúnibe xiixa ni gusirá fe stiʼ ca hermanu (1 Cor. 9:19-22). Cásica Pablo, laanu laaca zanda gacanenu xcaadxi ne chuʼnu tobi si pa qué guyúbinu guiréʼnenu xtemanu.

8. ¿Xi biʼniʼ Pablo dxi guyuu ti guendanagana naroʼbaʼ ndaaniʼ congregación?

⁸ Yanna, ¿pa málasi maʼ gadxé modo riníʼ ique tuuxa lu ca cosa ni jma risaca yaʼ? Para ganda chuʼ guendariuudxi la? zanda chinándanu ejemplu stiʼ apóstol Pablo. Ndaaniʼ ca congregación ni guyuu lu primé siglu que guyuu tu laa bicaa ca xpinni Cristu ni cadi naca judíu que gaca circuncidarcaʼ zándaca para cadi guiníʼ binni mal de laacaʼ (Gál. 6:12). Neca qué ñuu Pablo de acuerdu né modo riníʼ ique ca binni que, peru qué nuyúbibe ñaca ni nabe, sínuque gúcabe humilde ne yenebe casu que ra nuu ca apóstol ne ca ancianu ni nuu Jerusalén (Hech. 15:1, 2). Ni biʼniʼ Pablo que gucané ni chuʼ congregación tobi si ne chuʼcaʼ nayecheʼ (Hech. 15:30, 31).

9. ¿Xi zanda gúninu para chinándanu ejemplu stiʼ apóstol Pablo?

⁹ Pa chuʼ xiixa guendanagana naroʼbaʼ ndaaniʼ congregación zanda guinábanu ca hermanu ni maʼ gulí Jehová para gapaʼ laanu gacanecaʼ laanu. Cadi guiaandaʼ lii, laaca zadxélanu conseju ni zeeda lu Biblia lu ca publicación ne ca instrucción ni rudii organización laanu. Galán chinándanu ca instrucción ca lugar de guicanu tema  gaca ni racaláʼdxinu, zacá zacanenu chuʼ guendariuudxi ndaaniʼ congregación.

10. ¿Xi sti cosa biʼniʼ Pablo para gucané chuʼ congregación tobi si?

¹⁰ Laaca biʼniʼ Pablo sti cosa para gacané chuʼ congregación tobi si. Lugar de ñuuyabe ra cuchee si ca hermanu jma gucuá íquebe gúʼyabe ca cualidad galán ni nápacaʼ. Guzéʼtenu ti ejemplu, ante guiluxe gucaabe ti carta para ca romano bizeetebe lá stale hermanu ne hermana ne bizeetebe de ti cualidad ni bíʼyabe de cada tobi de laacaʼ. ¿Ximodo zanda chinándanu ejemplu stibe yaʼ? Ra gábinu ca hermanu stinu xiixa cualidad ni riuuláʼdxinu nápacaʼ ne gábinu ni xcaadxi. Zacatiʼ zacanenu ca hermanu gannaxhiisaacaʼ ne gaca xhamígucaʼ.

11. ¿Xi zanda gúninu para chuʼnu galán né tuuxa hermanu ni gapanenu guendanagana?

¹¹ Zándaca ziuu ora zapa ca xpinni Cristu ni maʼ ziné stale iza guendanagana né sti hermanu. Nga peʼ nga ni bizaaca Pablo ne Bernabé, chupa hermanu ni guizáʼ guca xhamigu. Ni bicaa laacabe gápacabe guendanagana nga pa zinécabe Marcos lu sti biaje misional ni chigúnicabe o coʼ. ¿Xi bizaaca óraque yaʼ? Biblia ná: «Nabé nadipaʼ modo biʼniʼ discutírcabe pur ngue ne cada tobi gucuaa gadxé gadxé ladu» (Hech. 15:37-39). Peru biʼniʼ chaahuiʼ Pablo, Bernabé ne Marcos guendanagana gúpacaʼ. Zacá bisihuínnicabe nabé risaca para laacabe chuʼ guendariuudxi ne chuʼ ca congregación ca tobi si. Gudiʼdiʼ si ti tiempu guníʼ Pablo cosa galán de Bernabé ne de Marcos (1 Cor. 9:6; Col. 4:10). Laanu laaca naquiiñeʼ guni chaahuinu intiica guendanagana gapanenu ca hermanu de congregación ne guidúʼyanu ca cualidad galán nápacaʼ. Pa gúninu ni zacanenu chuʼ guendariuudxi ne ziuu congregación tobi si (Efes. 4:3).

12. ¿Gunáʼ nga caadxi de ca guendanagana ni ridxaagalú ca hermanu?

¹² Laaca racanenu ca hermanu ora ruquídxinu fe ni nápacaʼ Jehová. Nuu de laacaʼ runi huantarcaʼ burla stiʼ familia sticaʼ ni cadi naca Testigu, compañeru ni rinecaʼ dxiiñaʼ o compañeru de scuela. Ne nuu tu laa huará o bininá tuuxa hermanu laa. Ne nuu tu laa maʼ xadxí de guyuunisa ne cabeza guedandá fin. Guiráʼ guendanagana riʼ zándaca gutiidiʼ ni fe stiʼ ti xpinni Cristu lu ti prueba. Zaqueca nga ca guendanagana ni bidxaagalú ca xpinni Cristu ni bibani lu primé siglu. ¿Xi biʼniʼ Pablo para gucané laacabe iguidxi fe stícabe yaʼ?

13. ¿Ximodo gucané Pablo ca xpinni Cristu ni biʼniʼ burla binni laacaʼ?

¹³ Biquiiñeʼ Pablo Stiidxaʼ Dios para biquidxi fe stiʼ ca hermanu. Guzéʼtenu ti ejemplu, zándaca qué ñanna ca xpinni Cristu judíu xi guicábicaʼ ora gudxi familia sticaʼ laacaʼ jma risaca religión stiʼ ca judíu que gácacaʼ xpinni Cristu. Nuunu seguru guizáʼ gucané carta ni bicaa Pablo ra nuu ca hebreu que laacaʼ para iguidxi fe sticaʼ (Heb. 1:5, 6; 2:2, 3; 9:24, 25). Ca xpinni Cristu que zanda iquiiñecaʼ ca ni guníʼ Pablo para guicábicaʼ ca binni ni guníʼ mal de laacaʼ. Yanna laanu yaʼ, ¿ximodo gacanenu ca hermanu ni runi burla xcaadxi binni laacaʼ? Zúninu ni ra gusíʼdinu laacabe iquiiñecabe ca publicación stinu para gusiénecabe ni runi crécabe. Zanda iquiiñenu ca folletu ¿Es la vida obra de un Creador? ne El origen de la vida. Cinco cuestiones dignas de análisis para gacanenu ca  joven guidxélacaʼ xi guiniʼcaʼ ora gusiénecaʼ xiñee runi crecaʼ nuu tu bizáʼ guiráʼ cosa.

14. Neca guizáʼ guyuu xhiiñaʼ Pablo, ¿xi bíʼnibe pur ca hermanu?

¹⁴ Guluu Pablo gana ca hermanu gúnicaʼ «cosa galán» pur xcaadxi (Heb. 10:24). Cadi guníʼsibe zacanebe laacaʼ, sínuque bíʼnibe ni. Guzéʼtenu ti ejemplu, dxi guyuu ti hambre Judea, Pablo nga tobi de ca ni yené ni caquiiñeʼ ca xpinni Cristu de lugar que (Hech. 11:27-30). Neca canayuni predicarbe ne canagusiidibe, siempre biyúbibe modo gacanebe ca xpinni Cristu ni naca pobre (Gál. 2:10). Zaqué gucanebe ca hermanu que gápacaʼ confianza zapa Jehová laacaʼ. Tiempu riʼ laaca racanenu para iguidxi fe stiʼ ca hermanu stinu ora riquiiñenu tiempu, stipa ne ca ni nánnanu para gacanenu lu ca labor de socorro ne ora runi donarnu para obra mundial. Ora gúninu ca cosa ni bizéʼtenu riʼ racanenu ca hermanu stinu gápacaʼ confianza qué ziuu dxi gusaana Jehová laacaʼ.

15, 16. ¿Ximodo naquiiñeʼ guni tratarnu ca hermanu ni maʼ cará fe stiʼ?

¹⁵ Qué niníʼ Pablo qué zacané ca ni huaxiéʼ napa fe. Gúdxibe laacaʼ diidxaʼ ni cuʼ gana laacaʼ ne bíʼnibe ni né diidxaʼ nadóʼ (Heb. 6:9; 10:39). Guzéʼtenu ti ejemplu, lu carta ni bicaabe ra nuu ca xpinni Cristu hebreu, stale biaje biquiiñebe diidxaʼ «laanu» ne qué niquiiñebe diidxaʼ «laatu» para gusihuínnibe laaca naquiiñeʼ chinándabe ca conseju ni cudiibe (Heb. 2:1, 3). Cásica Pablo, laanu laaca qué zaninu qué zacanenu ca ni huaxiéʼ napa fe. Ni rúninu nga rábinu laacabe diidxaʼ ni cuʼ gana. Zacá rusihuínninu nadxiinu laacabe. Cadi guiaandaʼ laanu risaca ca diidxaʼ  ni rininu para cuʼnu gana, peru laaca risaca gúninu ni né diidxaʼ nadóʼ ne cariñu.

¹⁶ Gudxi Pablo ca hermanu stiʼ caʼruʼ gusiaandaʼ Jehová ca cosa galán ni bíʼnicaʼ (Heb. 10:32-34). Laanu laaca zanda gúninu casi biʼniʼ Pablo ra gacanenu ca hermanu ni cará fe stiʼ. Zanda guinábanu laacabe gábicabe laanu ximodo binibiáʼcabe Jehová. O gacanenu laacabe guietenaláʼdxicabe ximodo huayacané Jehová laacabe (Heb. 6:10; 13:5, 6). Ni gábinu ca hermanu riʼ zanda guquidxi ni fe stícabe ne zanda gucaa ni laacabe cadi gusaana de gúnicabe ni ná Jehová.

17. ¿Xi zanda gúninu para cuʼnu gana xcaadxi ne gaca ni jneza?

¹⁷ Ra tidiʼ tiempu, jma riziidiʼ ti binni ni runi dxiiñaʼ lu construcción guni xhiiñaʼ jma jneza. Laanu laaca ra tidiʼ tiempu jma zazíʼdinu cuʼnu gana ca hermanu stinu. Gacanenu ca hermanu stinu para guni huantarcaʼ ca prueba ni cadíʼdicaʼ ra guinínenu laacaʼ de ejemplu stiʼ xcaadxi xpinni Cristu ni cayuni huantar. Guyúbinu chuʼ guendariuudxi ládenu ra guininu de ca cualidad galán ni napa xcaadxi ne pa nápanu xiixa guendanagana né tuuxa hermanu la? guni chaahuinu ca ni para ganda chuʼnu tobi si. Cadi gusaana de gacanenu ca hermanu stinu para guquídxinu fe sticaʼ ra guinínenu laacaʼ de ca ni dxandíʼ rusiidiʼ Biblia ne gacanenu laacabe ra caquiiñecabe ni, jmaruʼ si ca ni maʼ cará fe stiʼ.

18. ¿Xi maʼ gudixhe íqueluʼ gúniluʼ?

¹⁸ Ca hermanu ni runi dxiiñaʼ ra ribí ca lugar ni riquiiñenu para guni adorarnu Jehová ridxá tipa ladxidoʼcaʼ de guendanayecheʼ. Laanu laaca zanda guni sentirnu zacá ora racanenu ca hermanu stinu chuʼcaʼ gaxha de Jehová. Ti edificiu la? ra tidiʼ tiempu riuxe, peru ni gúninu pur ca hermanu stinu rindaa ni. Nga runi, gúninu stipa chinándanu ca diidxaʼ ni zeeda lu 1 Tesalonicenses 5:11, ni ná: «Lauguusaa gana laatu ne lagacanesaa».