1. ¿Xi prueba bidxaagalú José, ne xi biʼniʼ?

 BIDXAAGALÚ José, xiiñiʼ Jacob, ti prueba nabé nagana. Gatigá gudxi ti gunaa laabe: «Gutané naa». Neca xheelaʼ xpixuaanabe ni láʼ Potifar, nga gunaa que la? qué nulábibe laa. Zándaca chuʼ tu guiníʼ ique xiñee qué niná José ñatané gunaa que pa qué guinni Potifar raqué ne ti esclavu si nga José. Neca nánnabe zadxaagalube stale guendanagana pur ni cayúnibe que, peru qué ninabe ñatanebe gunaa que. ¿Xiñee yaʼ? Laapebe guniʼbe: «¿Ximodo ndiʼ guneʼ guendaquéiquiiñeʼ riʼ ne gucheeniaʼ Dios yaʼ?» (Gén. 39:7-12).

2. ¿Ximodo gunna José ti pecadu nga gapa binni jnadxii?

² ¿Ximodo gunna José qué riuulaʼdxiʼ Dios gapa binni jnadxii o guni cometer adulteriu yaʼ? Cadi guiaandaʼ laanu bizaaca ndiʼ chupa gayuaa iza ante guicá Ley stiʼ Moisés, ra ná: «Cadi gápaluʼ jnadxiiluʼ» (Éx. 20:14). Peru né ni maʼ biziidiʼ José de Jehová gucané ni laa gudii cuenta qué riuulaʼdxiʼ Dios guni cometer binni pecadu sexual. Guzéʼtenu ti ejemplu, gúnnabe gudixhestí Dios guichaganáʼ ti hombre ne ti gunaa. Ne zándaca gúnnabe xi biʼniʼ Jehová para gapa bisabuela stibe, Sara, purtiʼ chupa biaje gucalaʼdxiʼ chupa rey ñatané laabe. Ne laaca zándaca gúnnabe xi biʼniʼ Jehová para gupa Rebeca, xheelaʼ Isaac (Gén. 2:24; 12:14-20; 20:2-7; 26:6-11). Ra guníʼ ique José guiráʼ ni biʼniʼ Jehová la? bidii cuenta xii nga ni jneza ne ni cadi jneza. Ne cumu nadxiibe Jehová la? laaca gunnaxhiibe ca ley stiʼ ne biʼniʼ respetarbe ca ni.

3. ¿Xi zadúʼyanu lu artículo riʼ?

³ ¿Ñee nadxiiluʼ justicia stiʼ Dios la? Nánnadu zacá ni. Peru cumu binni ruchee laanu, caquiiñeʼ gápanu cuidadu pa coʼ la? zanda guicá modo riníʼ ique binni laanu ne  maʼ qué gudiʼnu cuenta xii nga ni jneza ne ni cadi jneza (Is. 5:20; Rom. 12:2). Nga runi, chiguidúʼyanu xii nga justicia stiʼ Dios ne xiñee caquiiñeʼ gannaxhiinu ni. Laaca zadúʼyanu chonna cosa ni zacané laanu jma gannaxhiinu ca ley stiʼ Jehová.

4. ¿Ximodo nga ti binni ni qué rusihuinni justicia stiʼ Dios?

⁴ Dxi guyuu Jesús lu Guidxilayú, stale líder stiʼ ca religión guníʼ íquecaʼ nabé nacháʼhuicaʼ ne qué rucheecaʼ. Peru Jesús gudxi laacabe cadi jneza ni cayúnicabe purtiʼ nabé feu runi tratárcabe xcaadxi ne riguíxhecabe xii nga ni jneza ne ni cadi jneza (Ecl. 7:16; Luc. 16:15). Ca dxi stinu riʼ, laaca nuu binni casi laacabe purtiʼ riníʼ íquecaʼ cadi cayúnicaʼ cosa malu. Runi crecaʼ jma risácacaʼ que xcaadxi ne riniʼcaʼ mal de laacabe. Qué lica riuulaʼdxiʼ Jehová modo riníʼ ique ca binni riʼ, ne cadi nga diʼ nga justicia stiʼ Dios.

5. Casi ná Biblia, ¿xi runi ca binni ni nadxii justicia stiʼ Dios? Bizeeteʼ caadxi ejemplu.

⁵ Naca justicia ca ti cualidad nabé sicarú. Ne laa ni nga guni tobi ca cosa ni riuulaʼdxiʼ Dios. Lu Biblia ná «justicia» stiʼ Dios nga chinanda binni ca ley stiʼ Jehová lu xquendanabani. Ti ejemplu nga dxi gunaba Jehová ca binni de dxiqué iquiiñecaʼ ti báscula para cuʼ biaʼcaʼ ni cutoocaʼ (Deut. 25:15). Nga runi ti xpinni Cristu ni racalaʼdxiʼ guni ni jneza la? caquiiñeʼ gaca honradu lu ca negocio stiʼ. Ne ora nadxii tuuxa justicia stiʼ Jehová la? ridxiichi ora guʼyaʼ cayuni tratárcabe mal sti binni. Ne para gusiéchebe ladxidóʼ Dios, rúnibe stipa guicaabe decisión ni riuulaʼdxiʼ (Col. 1:10).

6. ¿Xiñee zanda gápanu confianza ca ley stiʼ Jehová ni caníʼ xii nga ni jneza ne ni cadi jneza? (Isaías 55:8, 9).

⁶ Lu Biblia ná ra nuu Jehová nga ridá justicia. Nga riníʼ de laabe nga zeeda justicia (Jer. 50:7). Ne cumu laabe nga bizaʼbe laanu la? laasibe nga nápabe derechu quíxhebe xii nga ni jneza ne xii nga ni cadi jneza. Ne cumu perfectu laabe la? jma biaʼsi modo riníʼ íquebe que laanu, purtiʼ nácanu binni ruchee ne runi pecarnu (Prov. 14:12; biindaʼ Isaías 55:8, 9). Peru ¿ñee zanda gúninu ni jneza casi riuuláʼdxibe la? Zanda, purtiʼ guyanu cásica laabe (Gén. 1:27). Laaca riuuláʼdxinu gúninu ni. Cumu nadxiinu Bixhózenu, nga rucaa laanu gúninu ni riuuláʼdxibe (Efes. 5:1).

7. ¿Xiñee caquiiñeʼ chinándanu ca ley ni maca nexheʼ? Bizeeteʼ xiixa ejemplu.

⁷ Ora rinándanu ca ley stiʼ Jehová ni caníʼ xii nga ni jneza ne ni cadi jneza, ribeendunu ni galán. Guidúʼyanu xiñee. Guzéʼtenu caadxi ejemplu, ¿xi nizaaca pa cada bancu niguixhe pabiáʼ naquiiñeʼ guisaca bueltu ni runinecaʼ dxiiñaʼ? O ¿xi nizaaca pa cada empresa niguixhe gadxé gadxé medida para gucuí yoo yaʼ? Cadi dxandíʼ qué ñaca ca cosa ca jneza la? Yanna, xi nizaaca pa ndaaniʼ ti hospital cada doctor o enfermera ñuni ni ná ora guni tendercaʼ binni ni huará, cadi dxandíʼ zándaca ñati binni la? rihuinni dxíchica galán chinándanu ca ley ca purtiʼ rapa ca ni laanu. Nga ca nga rizaaca né ca ley stiʼ Dios, nuu ca ni para gacané ca ni laanu.

8. ¿Xi ndaayaʼ zacaa ca ni gannaxhii justicia stiʼ Dios?

⁸ Riguu Jehová ndaayaʼ ca ni runi stipa pur guni respetar ca ley stiʼ. Laabe cayuni  prometerbe laanu: «Zacaa ca ni biʼniʼ ni jneza guidxilayú ne zabánicaʼ luni para siempre» (Sal. 37:29). ¿Ñee ruxuíʼluluʼ ximodo zabani binni lu Guidxilayú ora guiracaʼ chinándacaʼ ca ley stiʼ Jehová la? Zabáninu nayecheʼ, ziuu paz ne ziuʼnu tobi si. Racalaʼdxiʼ Jehová guicaaluʼ ca ndaayaʼ riʼ. Ne nápanu stale razón para gannaxhiinu justicia stibe. Peru ¿xi naquiiñeʼ gúninu para gannaxhiinu cualidad riʼ jma yaʼ? Chiguidúʼyanu chonna cosa ni zacané laanu.

9. ¿Xi zacané laanu gannaxhiinu justicia?

⁹ Primé: Gannaxhiinu binni ni gudixhe ca ley ca. Pa racaláʼdxinu gannaxhiinu justicia ca, caquiiñeʼ gannaxhiinu binni ni gudixhe ca ley ra ná xii nga ni jneza ne ni cadi jneza. Ra jma gannaxhiinu Jehová, jma ziuuláʼdxinu chinándanu ca ley stibe. Guietenaláʼdxinu Adán ne Eva. Pa ñannaxhiicabe Jehová la? nuzuubacabe stiidxaʼ (Gén. 3:1-6, 16-19).

10. ¿Xi biʼniʼ Abrahán para gunda biene chaahuibe Jehová?

¹⁰ ¿Cadi dxandíʼ qué racaláʼdxinu gácanu casi Adán ne Eva la? Para cadi guizaacanu ni bizaacacabe, caquiiñeʼ gunibiáʼ chaahuinu Jehová jma, gannaxhiinu ca cualidad stibe ne gúninu stipa pur guiníʼ íquenu modo riníʼ íquebe. Pa gúninu ni la? zannaxhiinu laabe jma. Galán chinándanu ejemplu stiʼ Abrahán, laa guizáʼ gunnaxhii Dios. Ne bíʼnibe ni ná neca guyuu ora qué ñénebe xi pur gucuaa Jehová xiixa decisión, lugar de nidxiichibe laga biyúbibe modo gunibiáʼ chaahuibe laa. Casi dxi gúnnabe gudixhe ique Jehová gunitilú Sodoma ne Gomorra, primeru gá que guníʼ íquebe zuuti Dios binni nachaʼhuiʼ ne binni malu. Cumu cadi cayénebe xiñee chiguni Dios ngue la? ngue runi gúcabe humilde ne bíʼnibe laa caadxi pregunta. Né stale paciencia bicabi Jehová ca pregunta stibe. Biluxe guniʼné si Abrahán Jehová bidiibe cuenta ruuyaʼ Jehová xi nuu ndaaniʼ ladxidóʼ cada binni ne qué ziuu dxi guni castigar binni ni qué gapa donda (Gén. 18:20-32).

11. ¿Ximodo bisihuinni Abrahán nadxii Jehová ne napa confianza laabe?

¹¹ Qué ñuu dxi nusiaandaʼ Abrahán dxi guníʼnebe Jehová de ni chiguizaaca Sodoma ne Gomorra. Nuunu seguru gucané ni laabe jma gannaxhiibe ne guni respetarbe Bixhózebe. Gudiʼdiʼ si caadxi iza, bidxaagalú Abrahán ti guendanagana guizáʼ nadipaʼ ra chigusihuínnibe pa dxandíʼ nápabe confianza Dios. Gunabaʼ Jehová guni sacrificar Abrahán Isaac, xiiñiʼ. Para tiempu riʼ, jma maʼ runibiaʼ Abrahán Dios, ngue runi qué ninabadiidxabe laa gastiʼ. Bizulú bíʼnibe guiráʼ ni gunabaʼ Jehová laabe. Peru neca zacá, zándaca gúcani nagana para laabe. Ne zándaca guníʼ íquebe guiráʼ ni maʼ biziidibe de Jehová ne gunna dxíchibe qué zuni xiixa cosa malu. Casi bisiene apóstol Pablo ni, gunna Abrahán zándisaʼ Jehová xiiñibe Isaac de lade gueʼtuʼ (Heb. 11:17-19). Jneza ni biénebe que, purtiʼ maca biʼniʼ prometer Jehová laabe de Isaac zaree ti nación, ne para tiempu riʼ caʼruʼ gapa Isaac xiiñiʼ. Cumu guizáʼ gunnaxhii Abrahán Jehová la? gunna dxíchibe zuni ni jneza. Gupa Abrahán fe ne bizuubaʼ stiidxaʼ Bixhoze, neca guca ni nagana para laa (Gén. 22:1-12).

12. ¿Ximodo zanda chinándanu ejemplu stiʼ Abrahán? (Salmo 73:28).

 ¹² ¿Ximodo zanda chinándanu ejemplu stiʼ Abrahán yaʼ? Caquiiñeʼ gunibiaʼ chaahuinu Jehová jma. Pa gúninu ni la? ziuʼnu jma gaxha de laabe ne zannaxhiinu laabe jma (biindaʼ Salmo 73:28). Laaca zanda gusíʼdinu conciencia stinu para guiníʼ íquenu modo riníʼ ique Dios (Heb. 5:14). Nga runi ora chuʼ tuuxa gucaa laanu gucheʼnu, zaninu coʼ. Qué ziuu dxi tidiʼ ndaaniʼ íquenu guchéʼnenu Bixhózenu ne guninanu ladxidóʼ. ¿Xiruʼ naquiiñeʼ gúninu para gusihuínninu nadxiinu justicia stiʼ Dios yaʼ?

13. ¿Xi naquiiñeʼ gúninu para guyúbinu gúninu ni jneza? (Proverbios 15:9).

¹³ Guiropa: Gúninu stipa jma gannaxhiinu justicia ca guiráʼ dxi. Gannaxhiinu ca ley stiʼ Jehová zeeda gaca ni casi nuquídxinu ti músculu stinu. Ne naquiiñeʼ gúninu ni guiráʼ dxi. Nánnanu riene Jehová laanu ne qué ziuu dxi guinábabe laanu xiixa ni qué zanda gúninu (Sal. 103:14). Laapebe rábibe laanu nadxiibe binni ni ruyubi guni ni jneza (biindaʼ Proverbios 15:9). ¿Cadi dxandíʼ rúninu stipa para ugaandanu xiixa meta ni maʼ gudíxhenu la? Pue ngaca nga naquiiñeʼ gúninu pa racaláʼdxinu gúninu ni jneza. Ne cadi guiaandaʼ laanu, zacané Jehová laanu né stale paciencia para guni progresarnu ne gúninu ni jneza ra zidiʼdiʼ dxi (Sal. 84:5, 7).

14. ¿Xii nga «coraza» ni bizeeteʼ Pablo, ne xiñee caquiiñenu ni?

¹⁴ Né stale guendarannaxhii rusietenalaʼdxiʼ Jehová laanu cadi nagana chinándanu ca mandamientu stiʼ (1 Juan 5:3). Rapa ca ni laanu ne caquiiñenu ca ni guiráʼ dxi. Guiníʼ íquenu de armadura espiritual ni bizeeteʼ apóstol Pablo (Efes. 6:14-18). ¿Xi parte de armadura ca nga rapa ladxidoʼno yaʼ? «Coraza, laa ni nga ni jneza», ne zeeda gaca ni ca ley stiʼ Jehová. Cásica rapa ti coraza ladxidóʼ binni, zacaca rapa ca ley stiʼ Jehová ladxidoʼno ni  zeeda gaca ni nácanu pur dentru. Nga runi, guizáʼ risaca cadi gusiáʼndanu coraza stinu ora gácunu armadura espiritual ca (Prov. 4:23).

15. ¿Ximodo rácunu coraza ni rudii Dios laanu?

¹⁵ ¿Ximodo nga rácunu coraza ca yaʼ? Ora chinándanu ca ley stiʼ Dios lu ca decisión ni ricaanu guiráʼ dxi. Ante cuinu xidé guininu, xi música gucaʼdiáganu, xi entretenimientu chiguidúʼyanu o xi libru chiguidúʼndanu, naquiiñeʼ guiníʼ íquenu: «¿Xi chinduaaʼ ndaaniʼ ladxiduáʼ? ¿Ñee riuulaʼdxiʼ Jehová ni la? ¿O rucaa ni naa guneʼ cosa ni qué riuuláʼdxibe, casi pecadu sexual, violencia, gacheluáʼ gapaʼ jma ne guiníʼ iqueʼ puru si para naa la?» (Filip. 4:8). Pa guicaanu decisión ni riuulaʼdxiʼ Jehová, zapa ca ley stibe ladxidoʼno ne qué zúninu cosa malu.

16, 17. ¿Ximodo racané Isaías 48:18 laanu gánnanu zanda chinándanu ca ley stiʼ Jehová biaʼ dxi guibáninu?

¹⁶ Yanna, ¿xi gúninu pa guiníʼ íquenu maʼ qué zanda guibáninu casi ná ca ley stiʼ Jehová yaʼ? Guiníʼ íquenu ejemplu biquiiñeʼ Jehová riʼ, zeeda ni lu Isaías 48:18 (biindaʼ ni). Cayuni prometer Jehová laanu zeeda gaca justicia stinu casi «ola nisadóʼ». Guxuíʼlunu zuhuaʼnu guriá nisadóʼ ne cadúʼyanu modo cayaba ca ola ca sin cuezadxicaʼ. ¿Cadi dxandíʼ qué liica ridiʼdiʼ ndaaniʼ íquenu ziuu ora zabezadxí ca ola ca la? Qué liica riníʼ íquenu nga. Purtiʼ nánnanu maʼ stale iza nga de nuu nisadóʼ ca racá ne qué huayuu dxi cuezadxí ca ola stini.

¹⁷ Yanna, ¿xi naquiiñeʼ gúninu para gaca justicia stinu casi ola stiʼ nisadóʼ? Ora guicaanu xiixa decisión, primé naquiiñeʼ guiníʼ íquenu xi racalaʼdxiʼ Jehová gúninu ne óracaruʼ gúninu ni. Neca nabé nagana decisión ni chiguicaanu, cadi gusaana de guinábanu Bixhózenu ni nuu guibáʼ gacané laanu ne zacá ganda chinándanu ca ley stibe guiráʼ dxi (Is. 40:29-31).

18. ¿Xiñee cadi naquiiñeʼ guni juzgarnu guirutiʼ modo rábinu?

¹⁸ Guionna: Gudiʼnu lugar Jehová nga guni juzgar. Neca rúninu stipa pur chinándanu ca ley stiʼ Jehová, cadi naquiiñeʼ guni juzgarnu xcaadxi o guiníʼ íquenu jma jneza rúninu ca cosa ca que laacabe. Ne cadi jneza guiníʼ íquenu jma risácanu que xcaadxi o guiníʼ íquenu nápanu derechu guni juzgarnu laacabe modo rábinu. Cadi guiaandaʼ laanu, Jehová nga «Juez stiʼ guidubi naca guidxilayú» (Gén. 18:25). Ne guietenaláʼdxinu qué ñúnidibe laanu juez. Ngue runi Jesús peʼ guníʼ: «Cadi guni juzgartu ti cadi guni juzgárcabe laatu» (Mat. 7:1). *

19. ¿Ximodo bisihuinni José napa confianza justicia stiʼ Jehová?

¹⁹ Guidúʼyanu ni bizaaca José, laabe gúcabe ti hombre ni runi jneza. Neca guyuu tu biʼniʼ tratar laabe mal, qué ñuni juzgarbe laacaʼ. Nabé feu modo biʼniʼ tratar ca bíʼchibe laabe, bitoocaʼ laabe casi esclavu ne gúdxicaʼ bixhózecaʼ guti José. Gudiʼdiʼ si iza, biiyaʼ José laacabe sti biaje. Peru yanna maʼ naca ti gobernante ni napa poder, ñanda ñuni juzgar laacabe ne dede nuquixe laacabe ni bíʼnicabe laa. Ne nga peʼ nga ni guleza ca  bíʼchibe ñúnibe neca nuucaʼ arrepentidu pur ni bíʼnicaʼ. Peru gudxi José laacabe: «Cadi guidxíbitu. ¿Ñee naa nga nuaaʼ lugar stiʼ Dios la?» (Gén. 37:18-20, 27, 28, 31-35; 50:15-21). Guca José humilde ne guníʼ ique Jehová si nga napa derechu guni juzgar ca biʼchiʼ.

20, 21. ¿Xi zacané laanu cadi guiníʼ íquenu jma jneza ni rúninu que xcaadxi?

²⁰ Cásica José, laanu laaca rudiʼnu lugar Jehová nga guni juzgar. Guzéʼtenu ti ejemplu, cadi casi ziuunu guininu nánnanu xiñee cayuni ca hermanu stinu xiixa cosa. Qué zanda gánnanu xi nuu ndaaniʼ ladxidóʼcabe, purtiʼ Jehová si nga ruuyaʼ «xii nga rucaa tuuxa guni xiixa» (Prov. 16:2). Nadxiibe guiráʼ clase binni, gastiʼ naca padé laacaʼ o xi cultura sticaʼ. Ne cayábibe laanu ca diidxaʼ riʼ: «Laguxheleʼ ladxidoʼto» (2 Cor. 6:13). Ni jma risaca para laanu nga gannaxhiinu ca hermanu stinu ne cadi guni juzgarnu laacaʼ.

²¹ Laaca qué runi juzgarnu ca ni cadi naca parte de congregación (1 Tim. 2:3, 4). Casi ca familia stinu ni cadi naca xpinni Cristu, qué riníʼ íquenu qué ziuu dxi gácacaʼ Testigu. Pa gúninu zacá la? zusihuínninu jma risácanu que xcaadxi ne dede zaníʼ íquenu gástiruʼ sti binni ni runi ni jneza jma que laanu. Cudii Jehová lugar «guiráʼ binni de guiráʼ ladu gaca arrepentir» (Hech. 17:30). Cadi guiaandaʼ laanu qué riuulaʼdxiʼ Jehová tuuxa ni riníʼ ique jma jneza ni runi que xcaadxi.

22. ¿Xi rucaa lii gannaxhiiluʼ justicia stiʼ Jehová?

²² Pa nadxiinu justicia stiʼ Jehová, ziuʼnu nayecheʼ ne zácanu ti ejemplu galán para ca ni nuu gaxha de laanu. Zacatiʼ nga zannaxhiicabe laanu jma ne zannaxhiicabe Dios stinu. Biblia ná: «Dichoso ca ni racalaʼdxiʼ gaca justicia» (Mat. 5:6). Nanna dxíchinu ruuyaʼ Jehová stipa ni rúninu pur chinándanu ca ley stiʼ guiráʼ dxi ne nga guizáʼ rusiecheʼ ni laabe. Neca nabáninu ndaaniʼ ti guidxilayú ra nabé nuu injusticia, cadi guireʼnu gana. Cadi guiaandaʼ laanu Jehová nadxii ca ni runi ni jneza (Sal. 146:8).