1. ¿Xiñee riuuláʼdxiluʼ guidxaagaluʼ binni ni napa paciencia?

 GUIRANU riuuláʼdxinu guidxaaganu binni ni napa paciencia. ¿Xiñee yaʼ? Guzéʼtenu caadxi ejemplu, riníʼ íquenu galán de ca binni ni nanna cueza sin guireecaʼ gana. Rusisácanu xcaadxi purtiʼ nápacaʼ paciencia laanu ora rucheʼnu. Laaca rudiʼnu xquixe peʼ binni ni bidii estudiu laanu purtiʼ gúpabe paciencia ora guca nagana para laanu guiénenu, chinándanu ne gúninu ni cazíʼdinu. Ne jmaruʼ si rudiʼnu xquixe peʼ pur napa Jehová paciencia laanu (Rom. 2:4).

2. ¿Pora zándaca raca nagana para laanu gápanu paciencia?

² Guiranu rusisácanu ora xcaadxi napa paciencia. Peru nuu biaje raca nagana para laanu gusihuínninu cualidad riʼ. Casi, zándaca ora zuhuaʼnu lu xiixa fila gaca nagana para laanu cuézanu jmaruʼ si pa nuu xi chigúninu. Ne zándaca guidxiichinu ora chuʼ tu guni laanu xiixa. Ne nuu biaje zándaca guiníʼ íquenu candaaruʼ para gueeda guidxilayú cubi ni maʼ biʼniʼ prometer Jehová laanu. Yanna, ¿ñuuláʼdxiluʼ ñápaluʼ jma paciencia la? Lu artículo riʼ zadúʼyanu xi riníʼ gápanu paciencia ne xiñee risaca ni. Laaca zadúʼyanu caadxi cosa ni zanda gacané laanu gápanu jma paciencia.

3. ¿Xi runi ti binni ni napa paciencia ora guchiichicabe laa?

³ Guidúʼyanu tapa cosa ni zacané laanu gápanu paciencia. Primé, ti binni ni napa paciencia rindaa para guidxiichi. Rúnibe stipa cadi guidxiichibe ne qué ruquíxebe ni guni xcaadxi laabe ora guizaaca xiixa ni qué riuuláʼdxibe. Primé biaje riete lu Biblia de laani nga ora riete naca Jehová «ti Dios ni napa misericordia ne riá, rindaa para guidxiichi ne qué rusaana de gannaxhii ne fiel laa» (Éx. 34:6).

4. ¿Xi runi ti binni ni napa paciencia ora caquiiñeʼ cueza?

⁴ Guiropa, ti binni ni napa paciencia nanna cueza sin guiree gana. Qué riree gana ne qué ridxiichi pa guindaa xiixa ni cabeza gaca (Mat. 18:26, 27). Stale biaje naquiiñeʼ cuézanu sin guireʼnu gana. Casi ora gabi tuuxa laanu xiixa, naquiiñeʼ gucaadiaga chaahuinu laabe, gápanu paciencia ne cadi gucueezanu ora caniʼbe (Job 36:2). Laaca naquiiñeʼ gápanu paciencia para ganda gacanenu estudiante stinu guiene chaahuiʼ xiixa ni rusiidiʼ Biblia o gápanu paciencia laabe ora cayúnibe stipa gusaanabe xiixa ni cadi jneza cayúnibe.

5. ¿Xi sti modo rusihuínninu nápanu paciencia?

⁵ Guionna, ti binni napa paciencia qué runi xiixa sin guiníʼ ique. Neca nuu biaje caquiiñeʼ gúninu ca cosa ca nagueendaca. Ti binni ni napa paciencia la? ora chiguni xiixa dxiiñaʼ risaca, qué raca lugu para guzulú o gunduuxeʼ ni. Sínuque ribee tiempu para cuaquiʼ chaahuiʼ ni chiguni ne despué runi ni biaʼ tiempu caquiiñeʼ ti ganda guiree dxiiñaʼ ca jneza.

6. ¿Xi runi ti binni ni napa paciencia ora tidiʼ lu xiixa prueba o gapa guendanagana?

⁶ Guidapa, ti binni ni napa paciencia runi stipa guni huantar ca guendanagana sin quicheruaa. Nga runi, tuuxa ni napa paciencia  laaca runi huantar. Gastiʼ naca gábinu ti xhamígunu ni nápanu confianza ximodo runi sentirnu ora cadídinu lu xiixa guendanagana. Peru ti binni ni napa paciencia zuni stipa guni huantar sin guiree gana ne zuni xhiiñaʼ Jehová né guendanayecheʼ (Col. 1:11). Ca xpinni Cristu caquiiñeʼ gúninu stipa gusihuínninu nápanu paciencia lu guidapaʼ cosa bidúʼyanu riʼ. ¿Xiñee yaʼ? Guidúʼyanu caadxi razón.

7. Casi ná Santiago 5:7, 8, ¿xiñee nabé risaca gápanu paciencia? (Biiyaʼ ca imagen ca).

⁷ Para ganda guilanu caquiiñeʼ gápanu paciencia. Cásica ca xpinni Dios de dxiqué caquiiñeʼ gápanu paciencia para ganda gúʼyanu gaca ca ni maʼ guníʼ Dios (Heb. 6:11, 12). Ruchaaga Biblia laanu casi ti campesinu (biindaʼ Santiago 5:7, 8). Ti campesinu runi dxiiñaʼ nadipaʼ, rusaba semiá ne ruzee ni peru qué ganna pa dxi peʼ guiniisi ni. Nga runi, rápabe paciencia purtiʼ nánnabe zedandá dxi guindísabe cosecha. Ne ngaca runi ca xpinni Cristu: nadipaʼ rúnicaʼ dxiiñaʼ para Jehová neca qué gánnacaʼ padxí gueeda Señor sticaʼ (Mat. 24:42). Ribézanu né stale paciencia purtiʼ nánnanu zedandá dxi zuni Jehová guiráʼ ni maʼ guníʼ. Pa gusaananu de gápanu paciencia zanda gueeda guidxáganu ne chaahuiʼ chaahuiʼ gusaananu Jehová. Ne laaca zándaca guyúbinu gúninu cosa para chuʼnu nayecheʼ ti ratu si. Peru pa gápanu paciencia ne guni huantarnu dede ora gueeda fin zalanu (Miq. 7:7; Mat. 24:13).

8. Ra gápanu paciencia, ¿ximodo racané ni laanu chuʼnu tobi si né xcaadxi? (Colosenses 3:12, 13).

⁸ Gápanu paciencia racané ni laanu chuʼnu tobi si né xcaadxi. Pa nácanu binni ni napa paciencia zucaadiaga chaahuinu ora guiníʼ xcaadxi (Sant. 1:19). Laaca zuyúbinu chuʼ paz. Ne qué zúninu xiixa sin guiníʼ íquenu ne qué zaninu xiixa ni guniná xcaadxi. Ne pa chuʼ tuuxa guniná laanu qué zadxiichinenu laa ne qué zuyúbinu guquíxenu ni laabe. Ni zúninu nga zuni huantarsaanu ne zuni perdonarnu de guidubi ladxidoʼno ni guni stobi laanu (biindaʼ Colosenses 3:12, 13).

9. Gápanu paciencia, ¿ximodo racané ni laanu guicaanu decisión jneza? (Proverbios 21:5).

⁹ Gácanu binni ni napa paciencia racané ni laanu guicaanu decisión jneza. Lugar de guicaanu decisión nagueendaca o sin guiníʼ íquenu la? galán gúninu stipa guidúʼyanu xii nga ni jma jneza gúninu (biindaʼ Proverbios 21:5). Guzéʼtenu ti ejemplu, ora cuyúbinu dxiiñaʼ, zándaca guiníʼ íquenu guicaanu intiica dxiiñaʼ guidxélanu neca zándaca gucueeza ni laanu de chuunu ca reunión ca o maʼ huaxiéʼ guni predicarnu. Peru pa nápanu paciencia zaníʼ íquenu, paraa chigúninu dxiiñaʼ, pabiáʼ tiempu zúninu ni, pa zabeeni tiempu chúʼnenu familia stinu tobi si ne pa qué zusaana de gúninu ni ná Jehová. Racané paciencia ca laanu cadi gápanu stale guendanagana.

10. ¿Xi zanda gúninu para cadi gusaana de gápanu paciencia?

¹⁰ Guinábanu Jehová gacané laanu gápanu jma paciencia. Zeeda gaca paciencia ca tobi de ca cualidad stiʼ espíritu santu (Gál. 5:22, 23). Nga runi, zanda guinábanu Jehová gudii laanu espíritu santu ne gacanebe laanu gápanu ca cualidad ni rudii ni. Pa cadídinu lu xiixa guendanagana ne raca nagana para laanu gápanu paciencia la? cadi gusaana de guinábanu Jehová espíritu santu stiʼ (Luc. 11:9, 13). Ne laaca zanda guinábanu laabe  gacanebe laanu gúʼyanu ca cosa ca casi ruuyabe ca ni. Ne despué de guni orarnu la? gúninu guiráʼ ni nuu lu nanu para gápanu paciencia guiráʼ dxi. Pa cadi gusaana de guinábanu gacané Jehová laanu ne gúninu stipa pur guluinu cualidad riʼ la? chaahuiʼ chaahuiʼ zápanu jma paciencia.

11, 12 ¿Ximodo maʼ bisihuinni Jehová napa paciencia?

¹¹ Guiníʼ íquenu lu ca ejemplu zeeda lu Biblia. Riete lu Biblia ejemplu stiʼ binni ni gupa paciencia. Pa guiníʼ íquenu lu ca ejemplu riʼ la? zanda guizíʼdinu gusihuínninu cualidad riʼ. Chiguidúʼyanu caadxi ejemplu, peru primeru guidúʼyanu ximodo naca Jehová binni ni jma napa paciencia.

¹² Biʼniʼ biidiʼ Binidxabaʼ lá Jehová ndaaniʼ jardín de Edén que ra bicaabe Eva guiníʼ ique qué ganna Jehová guni mandar. Peru lugar de nunitilú Jehová Binidxabaʼ la? bisihuinni napa paciencia ne nanna gucueeza laca laa. ¿Xiñee bíʼnibe ni yaʼ? Purtiʼ nánnabe caquiiñeʼ tidiʼ tiempu para guihuinni gástiruʼ stobi ni jma galán runi mandar que laabe. Ne laga cabeza Jehová cayuni huantar neca cayaca biidiʼ lá. Ne pur paciencia stibe millón de binni zanda guiziidicaʼ de laabe ne guibánicaʼ sin qué chuʼ dxi gáticaʼ (2 Ped. 3:9, 15). Pa guiníʼ íquenu guiráʼ ca cosa galán huayaca pur napa Jehová paciencia la? qué zaca nagana para laanu cuézanu dede ora gueedanebe fin.

13. ¿Ximodo yenanda Jesús ejemplu stiʼ Bixhoze ra gupa paciencia dxi guyuu lu guidxilayú riʼ? (Biiyaʼ imagen ca).

¹³ Dxi guyuu Jesús lu guidxilayú bisihuinni napa paciencia cásica Bixhoze. Neca guyuu biaje guca nagana gusihuínnibe paciencia jmaruʼ si né ca escriba ne ca fariseu, purtiʼ nácacaʼ hipócrita (Juan 8:25-27). Peru cásica  Bixhózebe, laaca rindaa para guidxiichibe. Ne ora guluudícabe laabe qué niguudibe ne qué nuquíxebe ni laacaʼ (1 Ped. 2:23). Sínuque né stale paciencia biʼniʼ huantarbe guiráʼ ni bíʼnicaʼ laabe. Nga runi, Biblia cayabi laanu: «Laguiníʼ ique chaahuiʼ ejemplu stiʼ Jesús, purtiʼ biʼniʼ huantar guiráʼ diidxaʼ naná gudxi caadxi hombre ruchee laa» (Heb. 12:2, 3). Ngueca nga laanu, né stale paciencia zanda guni huantarnu intiica prueba gueeda luguianu purtiʼ nuuné Jehová laanu.

14. ¿Xi rizíʼdinu de modo gupa Abrahán paciencia? (Hebreos 6:15; biiyaʼ ca imagen ca).

¹⁴ ¿Xi zacané laanu gápanu paciencia dede ora gueeda fin? Zándaca gulézanu maʼ ñedandá fin o zándaca guiníʼ íquenu qué zadúʼyanu ora gueeda fin. Nga runi, galán guidúʼyanu ejemplu stiʼ Abrahán. Dxi napa Abrahán 75 iza ne qué gapa xiiñiʼ, gudxi Jehová laabe ca diidxaʼ riʼ «zuneʼ lii ti guidxi roʼ» (Gén. 12:1-4). ¿Ñee biiyaʼ Abrahán guiráʼ ni gudxi Jehová laa que la? Cadi guiráʼ ni. Despué de gudíʼdibe guiiguʼ Éufrates, gupa xidé gulézabe 25 iza para gule xiiñibe, Isaac. Ne 60 iza despué gule guiropaʼ xhiágabe, Esaú ne Jacob (biindaʼ Hebreos 6:15). Peru qué ñuuyaʼ Abrahán ñaca ca ni zá de laa ti guidxi naroʼbaʼ ne nicaacaʼ layú ni biʼniʼ prometer Jehová laabe. Neca zacá, guca Abrahán fiel ne guca xhamigu ni bizáʼ laa (Sant. 2:23). Guníʼ ique pabiáʼ ziecheʼ Abrahán ora guiasa de lade gueʼtuʼ. Zánnabe pur fe stibe ne pur gúpabe paciencia, guiráʼ guidxi ni nuu lu Guidxilayú gucuaacaʼ ndaayaʼ (Gén. 22:18). ¿Xi rizíʼdinu yaʼ? Zándaca qué zadúʼyanu guiráʼ ni maʼ guníʼ Jehová chiguni ca dxi stinu riʼ. Peru pa gápanu paciencia casi Abrahán la? zanna dxíchinu zaguu  Jehová ndaayaʼ laanu yanna ne jmaruʼ si lu guidxilayú cubi ca (Mar. 10:29, 30).

15. ¿Xi zanda guidúʼndanu lu estudiu personal stinu?

¹⁵ Ruzeeteʼ Biblia ejemplu stiʼ stale binni ni gupa paciencia (Sant. 5:10) ¿Xiñee qué quixhe íqueluʼ gúʼndaluʼ ca relatu riʼ ora gápaluʼ estudiu personal stiluʼ yaʼ? b Guzéʼtenu caadxi ejemplu, nahuiiniʼ David dxi gulícabe laa para gaca rey stiʼ guidxi Israel, peru gupa xidé gulézabe stale iza para gueeda gácabe rey. Simeón ne Ana qué nusaana de ñúnicaʼ ni ná Jehová laga cabézacaʼ guedandá Mesías que (Luc. 2:25, 36-38). Ra guni estudiarluʼ ca relatu riʼ, galán guiníʼ íqueluʼ: «¿Xi gucané laacabe gápacabe paciencia? ¿Xi ndaayaʼ gúpacabe ra biluíʼcabe cualidad riʼ? ¿Ximodo zanda chinandaʼ ejemplu stícabe yaʼ?». Laaca zanda guiziidiluʼ stale cosa de ca binni ni qué nusihuinni paciencia (1 Sam. 13:8-14). Ora gúniluʼ ni la? zanda guiníʼ íqueluʼ: «¿Xiñee qué ñápacabe paciencia? ¿Xi bizaacacabe pur qué ñápacabe paciencia yaʼ?».

16. Bizeeteʼ caadxi ndaayaʼ ni ricaanu ora gápanu paciencia.

¹⁶ Guiníʼ íquenu ni ricaanu ora nápanu paciencia. Racané paciencia ca laanu chuʼnu nayecheʼ ne gatadxí ladxidoʼno. Nga runi, zanda guininu racané ni laanu chuʼnu nazaaca ne cadi chuʼ xiixa ni guniná xquendabiaaninu. Ne laaca racané ni chuʼnu galán né xcaadxi ne chuʼ congregación tobi si. Pa qué guidxiichinu nagueendaca ora tuuxa guchiichi laanu zucueeza ni guiroobaʼ guendanagana que (Sal. 37:8, nota; Prov. 14:29). Peru ndaayaʼ ni jma naroʼbaʼ ni rápanu ora nápanu paciencia nga rinándanu ejemplu stiʼ Bixhózenu ni nuu guibáʼ ne riuunu jma gaxha de laabe.

17. ¿Xi maʼ gudixhe íquenu gúninu?

¹⁷ Casi maʼ bidúʼyanu naca paciencia ca ti cualidad nabé sicarú. Ne nuu biaje raca nagana gusihuínninu ni, zacané Jehová laanu ganda gápanu cualidad riʼ. Laga cabézanu né stale paciencia guedandá guidxilayú cubi ca, zanda ganna dxíchinu «Cayuuyaʼ Jehová ca ni ridxibi laa, ca ni cabeza cadi gusaana de gannaxhiibe laacaʼ» (Sal. 33:18). Nga runi, guiranu quixhe íquenu gápanu paciencia.