1. Casi ná Hebreos 12:1, ¿xi caquiiñeʼ gúninu para ganda gundúʼxenu carrera ni ziné laanu lu guendanabani?

 BIBLIA ná cuxooñeʼ ca xpinni Cristu lu ti carrera. Ca ni chindá ra riluxe ni zacaacaʼ guendanabani ni qué zaluxe (2 Tim. 4:7, 8). Nga runi, gúninu stipa para cadi gusaana de guxóʼñenu purtiʼ maʼ gaxha nuu ra riluxe ni. Bizeeteʼ Apóstol Pablo xi zanda gacané laanu chindanu ra riluxe carrera de guendanabani riʼ. Laabe guniʼbe: «Gusaananu ca cosa nanaa ni nuanu […], ne guxóʼñenu sin guidxáganu lu carrera ni naguixhe Dios nezalunu» (biindaʼ Hebreos 12:1).

2. ¿Xi gucalaʼdxiʼ Pablo niníʼ né ca diidxaʼ riʼ «gusaananu ca cosa nanaa ni nuanu»?

² ¿Xi riníʼ ca diidxaʼ «gusaananu ca cosa nanaa ni nuanu» yaʼ? Cadi caníʼ diʼ Pablo cadi caquiiñeʼ guanu nin ti cosa sínuque gusaananu ca cosa ni cadi caquiiñeʼ guanu. Purtiʼ rusidxaga ne rucueeza ca ni laanu de guxóʼñenu nagueenda. Para cadi gusaana de guxóʼñenu caquiiñeʼ guidúʼyanu pa nuanu xiixa ni cadi caquíʼñenu. Ne pa zacá ni la? galán gundaanu ni. Peru nuu xcaadxi cosa ni naquiiñeʼ guanu ne cadi gundaanu. Purtiʼ pa gundaanu ca ni la? zanda gusaana de guxóʼñenu lu carrera ca (2 Tim. 2:5). Guidúʼyanu xidé nga caninu.

3. a) Casi ná Gálatas 6:5, ¿Xi caquiiñeʼ guni cada tobi de laanu? b) ¿Xi zadúʼyanu lu artículo riʼ, ne xiñee?

 ³ (Biindaʼ Gálatas 6:5). Guníʼ Pablo lu versículo riʼ, xi caquiiñeʼ guni cada xpinni Cristu. Laabe guniʼbe: «Naquiiñeʼ guni cumplir né responsabilidad stiʼ». ¿Xidé caniʼbe raríʼ yaʼ? De ca responsabilidad ni nápanu nezalú Dios ne guirutiʼ zanda chiné ca ni. Lu artículo riʼ, zadúʼyanu caadxi cosa ni zeeda lu ca responsabilidad riʼ ne xi zacané laanu guni cumplirnu ca ni. Laaca zadúʼyanu xi zanda gúninu para maʼ cadi guanu caadxi cosa ni cadi caquíʼñenu. Ne zacá ganda chindanu ra riluxe carrera ca ne guicaanu guendanabani ni qué zaluxe.

4. Promesa ni bíninu Jehová dxi bidiʼnu xquendanabáninu laa, ¿xiñee cadi nanaa ni? (Biiyaʼ ca imagen ca).

⁴ Promesa ni bíninu Jehová dxi bidiʼnu xquendanabáninu laa. Dxi bidiʼnu laanu Jehová, gúdxinu laabe zúninu ni nabe ne zuni adorarnu laabe. Naquiiñeʼ guni cumplirnu ni maʼ guninu. Neca nácani ti responsabilidad nabé risaca peru cadi nanaani. ¿Xiñee yaʼ? Purtiʼ Jehová bizáʼ laanu para gúninu ni ná  (Apoc. 4:11). Guluube ndaaniʼ ladxidoʼno gacaláʼdxinu guni biaʼnu ne guni adorarnu laabe ne laaca bizaʼbe laanu casi laabe. Nga runi, zanda guidxíñanu gaxha de laabe ne chuʼnu nayecheʼ ra gúninu ni nabe (Sal. 40:8). Ora rúninu ni racalaʼdxiʼ Jehová ne rinándanu ejemplu stiʼ Xiiñiʼ ratadxí ladxidoʼno (Mat. 11:28-30).

5. ¿Xi zacané lii gúniluʼ ni maʼ bidii stiidxaluʼ Dios? (1 Juan 5:3).

⁵ ¿Xi zacané lii gualuʼ ni? Primé, gunnaxhii Jehová jma. Pa guiníʼ íqueluʼ guiráʼ ni maʼ bíʼnibe pur lii ne ca ndaayaʼ ni chiguicaluʼ la? zannaxhiiluʼ laabe jma. Ne ra jma gannaxhiiluʼ Dios maʼ qué zaca nagana para lii guzuubaluʼ stiidxabe ne zuuyaluʼ cadi nagana gúniluʼ ni rinábabe lii (biindaʼ 1 Juan 5:3). Guiropa, yenanda ejemplu stiʼ Jesús. Bíʼnibe ni ná Dios purtiʼ biʼniʼ orarbe ne gunábabe laa gacané laabe ne qué nusaana de niníʼ íquebe ni chiguicaabe (Heb. 5:7; 12:2). Cásica Jesús, gunabaʼ Jehová gudii lii stipa ne cadi gusiaandaluʼ esperanza ni nápaluʼ de guibániluʼ sin qué chuʼ dxi gátiluʼ. Pa gannaxhiiluʼ Jehová jma ne chinándaluʼ ejemplu stiʼ Xiiñibe la? zanda gúniluʼ ni maʼ bidii stiidxaluʼ Dios.

6. ¿Xi naquiiñeʼ gúninu para guni cumplirnu responsabilidad ni nápanu ndaaniʼ familia stinu? (Biiyaʼ ca imagen ca).

⁶ Ca responsabilidad ndaaniʼ familia. Lu carrera para guicaanu guendanabani caquiiñeʼ gannaxhiinu Jehová ne Jesús jma que familia stinu (Mat. 10:37). Peru qué riníʼ diʼ nga cadi guni cumplirnu responsabilidad ni nápanu ndaaniʼ familia stinu, casi ñaca nucueeza ni laanu para gúninu ni ná Jehová. Pa racaláʼdxinu gusiéchenu Dios ne Jesús caquiiñeʼ guni cumplirnu né dxiiñaʼ ni nápanu ndaaniʼ familia stinu (1 Tim. 5:4, 8). Pa gúninu ni la? zabáninu nayecheʼ. Nanna Jehová ziuu ca familia ca galán pa gannaxhiisaa ne gusihuinni ca guendaxheelaʼ ca respetu, pa gannaxhii ne gusiidiʼ ca padre ca xiiñicaʼ ne pa guzuubaʼ ca baʼduʼ ca stiidxaʼ bixhózecaʼ ne jñaacaʼ (Efes. 5:33; 6:1, 4).

7. ¿Xi zacané lii guni cumplirluʼ né dxiiñaʼ ni nápaluʼ ndaaniʼ familia stiluʼ?

⁷ ¿Xi zacané lii gualuʼ ni? Intiica responsabilidad ni nápaluʼ ndaaniʼ familia, galán chinándaluʼ ca conseju ni zeeda lu Biblia. Cadi chinándaluʼ ni ná si íqueluʼ, modo riníʼ ique binni ra nabézaluʼ o ni ná ca ni ná nuu xpiaaniʼ lu guidxilayú riʼ (Prov. 24:3, 4). Biquiiñeʼ ca publicación ni nápanu. Lúcani zadxélaluʼ ni zacané lii para ganda chinándaluʼ ca principiu ni zeeda lu Biblia. Lu sección ni láʼ «Guendaxheelaʼ ne familia» nuu información ni zacané ca guendaxheelaʼ, ca padre ne ca joven gánnacaʼ xi gúnicaʼ ora guidxaagalucaʼ xiixa guendanagana. b Gudixhe ique chinándaluʼ ca conseju ni zeeda lu Biblia neca lii si gúniluʼ ni ndaaniʼ familia stiluʼ. Zuuyaluʼ zabeendú familia stiluʼ ni galán ne zaguu Jehová ndaayaʼ lii (1 Ped. 3:1, 2).

8. ¿Xi zándaca guizaaca pur ca decisión ni guicaanu?

⁸ Ni zándaca guizaaca pur ca decisión ni guicaanu. Cuinu xi gúninu naca ni ti regalu stiʼ Jehová ne racaláʼdxibe chuʼnu nayecheʼ pur ca decisión ni guicaanu. Peru pa cadi jneza decisión ni guicaanu la? qué zaguu nabe (Gál. 6:7, 8). Nga runi, pa cadi jneza decisión guicaanu, pa guininu o gúninu xiixa sin guiníʼ íquenu la? zudxíʼlunu guiráʼ ni guizaaca pur decisión ni gucuaanu ca. Ziuu biaje zuchiiñaʼ  conciencia stinu laanu ne zuni sentirnu nápanu donda. Ra gánnanu laanu nga naquiiñeʼ gudxiilunu ni guizaaca pur ca decisión ni guicaanu la? rucaani laanu guni confesarnu ca cosa malu ni bíninu, guchaʼnu modo nácanu ne gúninu stipa maʼ cadi guibiguetaʼ gúninu ni. Zacá qué zusaana de guxóʼñenu lu carrera ni ziné laanu lu guendanabani.

9. ¿Xi zanda gacané lii pa guicaaluʼ ti decisión ni cadi jneza? (Biiyaʼ ca imagen ca).

⁹ ¿Xi zacané lii gualuʼ ni? Pa maʼ gucaaluʼ ti decisión ni cadi jneza, ¿xi zanda gúniluʼ? Cadi gudxiibaluʼ donda íqueluʼ, gudxiibaluʼ donda ique xcaadxi o guiníʼ íqueluʼ gastiʼ cayaca pur decisión cadi jneza gucuaaluʼ ca. Ni jma jneza gúniluʼ nga gánnaluʼ bicheeluʼ ne gúniluʼ guiráʼ ni nuu lu naluʼ para chuʼluʼ galán. Pa cayuni sentirluʼ nápaluʼ donda pur xiixa ni cadi jneza bíʼniluʼ, guca humilde ne biʼniʼ orar Jehová, gudxi laabe paraa bicheeluʼ ne gunabaʼ laabe guni perdonarbe lii (Sal. 25:11; 51:3, 4). Pa bininaluʼ tuuxa, gunabaʼ guni perdonarbe lii. Ne pa caquiiñeʼ la? gunabaʼ gacané ca ancianu lii (Sant. 5:14, 15). Biziidiʼ de ca cosa ni cadi jneza bíʼniluʼ ti cadi guibiguetaʼ gúniluʼ ca ni. Zacané ne ziá Jehová lii (Sal. 103:8-13).

10. ¿Xiñee cadi jneza guiníʼ íquenu zanda gúniluʼ xiixa ni qué zanda ugaandaluʼ? (Gálatas 6:4).

¹⁰ Guiníʼ íqueluʼ zanda gúniluʼ xiixa ni qué zanda ugaandaluʼ. Pa guchaagaluʼ ni rúniluʼ ne ni runi xcaadxi la? zanda guiníʼ íqueluʼ zanda gúniluʼ xiixa ni qué zanda gúniluʼ (biindaʼ Gálatas 6:4). Pa guchaaganu laanu né stobi la? zándaca zápanu envidia ne zuni competirnu entre laanu (Gál. 5:26). Pa gacaláʼdxinu gúninu ni runi xcaadxi la? zándaca zacananu ra gúʼyanu qué zanda gúninu ni. Guníʼ ique ndiʼ, Biblia ná: «Ora cueza binni xiixa ne qué gácani la? runi huará ni ladxidóʼ» (Prov. 13:12). Nga runi, jma zareʼnu gana pa cuézanu xiixa ni qué ziuu dxi gaca. Zanda gaxhaʼ ni stipa stinu ne jma huaxiéʼ guxóʼñenu lu carrera stinu (Prov. 24:10).

11. ¿Xi zacané lii cadi guiníʼ íqueluʼ zanda gúniluʼ xiixa ni qué zanda ugaandaluʼ?

¹¹ ¿Xi zacané lii cadi gualuʼ ni? Cadi gacaláʼdxiluʼ gúniluʼ jma de ni canabaʼ Jehová lii. Qué ribézabe gudiiluʼ jma de ni qué zanda gudiiluʼ (2 Cor. 8:12). Qué ruchaaga Jehová ni rúniluʼ ne ni runi xcaadxi (Mat. 25:20-23). Rusisácabe ni rúniluʼ de guidubi ladxidoʼloʼ, stipa ni rúniluʼ para cadi guixéleluʼ de laabe ne modo runi huantarluʼ. Pa gácaluʼ ti binni ni nanna nuu cosa ni qué zanda guni la? zacaneni lii guiéneluʼ zándaca pur biaʼ iza nápaluʼ, ti guendahuará o pur guchaa xiixa lu xquendanabániluʼ zanda gucueeza ca ni lii de gúniluʼ ca cosa ni maʼ biaaluʼ gúniluʼ. Galán chinándaluʼ ejemplu stiʼ Barzilái ne cadi guicaaluʼ xiixa dxiiñaʼ pa qué zanda gúniluʼ ni pur xiixa guendahuará (2 Sam. 19:35, 36). O galán chinándaluʼ ejemplu stiʼ Moisés, bidii lugar gacanécabe lii ne bidii dxiiñaʼ xcaadxi ora caquiiñeʼ ni (Éx. 18:21, 22). Pa nánnaluʼ nuu cosa ni qué zanda gúniluʼ, qué zaníʼ íqueluʼ zanda gúniluʼ ni. Purtiʼ zanda gusirani stipa stiluʼ ne gusaana de guxooñeluʼ.

12. ¿Ñee nápanu donda pur ca decisión cadi jneza guicaa xcaadxi la?

¹² Guiníʼ íquenu nápanu donda pur ca decisión cadi jneza guicaa xcaadxi. Qué zanda guicaanu decisión pur xcaadxi ne cadi lu nanu nuu cueenu guendanagana ni guedané decisión ni cadi jneza gucuaa tuuxa. Guzéʼtenu ti ejemplu, nabé racaná ca ni napa xiiñiʼ ora tobi de ca xiiñiʼ guicaa decisión de maʼ cadi guni ni ná Jehová. Peru ca padre ni riníʼ íquecaʼ laacaʼ nápacaʼ donda pur ca decisión  ni gucuaa xiiñicaʼ, reeda gácani ti carga nabé nanaa para laacaʼ ne qué ribeza Jehová guácabe ni (Rom. 14:12).

13. ¿Xi zanda guni ca padre pa guicaa xiiñicaʼ xiixa decisión ni cadi jneza?

¹³ ¿Xi zacané lii cadi gualuʼ ni? Cadi guiaandaʼ lii maʼ bidii Jehová guiranu derechu para cuinu xi gúninu ne rudiibe lugar cada tobi guicaa decisión stiʼ, dede pa zuni ni nabe o coʼ. Ni racalaʼdxiʼ Jehová nga gúniluʼ biaʼ gándatiʼ para gusiniisiluʼ ca xiiñiluʼ jneza. Nga runi, pa xiiñiluʼ gusaana de guni ni nabe, cadi donda stiluʼ ni sínuque decisión stibe ni (Prov. 20:11). Neca zacá zándaca qué gusaana de guiníʼ íqueluʼ bicheeluʼ modo bisiniisiluʼ xiiñiluʼ. Nga runi, gudxi Jehová xi cayuni sentirluʼ ne gunabaʼ laabe guni perdonarbe lii. Nánnabe qué zanda diʼ gúniluʼ gastiʼ para guchaaluʼ ni maʼ bizaaca. Ne laaca qué ribeza Jehová gápaluʼ xiiñiluʼ de ca guendanagana ni guedané decisión ni cadi jneza gucuaa. Peru cadi guiaandaʼ lii, pa xiiñiluʼ guyubi guibiguetaʼ ra nuu Jehová la? ziecheʼ Dios ne zuni perdonar xiiñiluʼ (Luc. 15:18-20).

14. ¿Xiñee naquiiñeʼ gusaana de guiníʼ íquenu náparunu donda?

¹⁴ Ora guiníʼ íquenu náparunu donda. Ora rucheʼnu runi sentirnu nápanu donda. Pa guni sentirnu náparunu donda la? zeeda gácani casi ti carga ni qué racalaʼdxiʼ Jehová guanu. Nácani xiixa nanaa ni naquiiñeʼ gusaana de guanu. ¿Xi zacané laanu guni sentirnu maʼ qué gáparunu donda yaʼ? Pa maʼ biʼniʼ confesarnu pecadu stinu, maʼ guca arrepentirnu ne cayúninu stipa pur maʼ cadi guibiguetaʼ gucheʼnu la? zanda ganna dxiichinu maʼ biʼniʼ perdonar Jehová laanu. (Hech. 3:19). Ne despué de gúninu ca ni bizéʼtenu riʼ, maʼ cadi guiníʼ íquenu náparunu donda purtiʼ qué racalaʼdxiʼ Jehová gacananu ne guni sentirnu zacá (Sal. 31:10). Pa chuʼnu triste zándaca guireʼnu gana ne gusaana de guxóʼñenu lu carrera ni ziné laanu lu guendanabani (2 Cor. 2:7).

15. ¿Xi zacané lii ora guni sentirluʼ naparouʼ donda? (1 Juan 3:19, 20; biiyaʼ ca foto ca).

 ¹⁵ ¿Xi zacané lii cadi gualuʼ ni? Pa guni sentirluʼ naparouʼ donda, cadi guiaandaʼ lii dxandíʼ rutiidilaʼdxiʼ Dios donda (Sal. 130:4). Ora gaca arrepentir tuuxa de guidubi ladxidóʼ, runi Jehová ni maʼ guníʼ «maʼ qué zietenalaʼdxeʼ» ca donda stiluʼ (Jer. 31:34). Ndiʼ riníʼ, ora maʼ biʼniʼ perdonar Jehová lii rusiaandabe pecadu stiluʼ. Dxandíʼ, qué zabee Jehová ca guendanagana ni guedané ca cosa malu ni bíʼniluʼ, peru nga qué riníʼ caʼruʼ guni perdonar Jehová stóndaluʼ. Ne pa yanna maʼ qué gápaluʼ xiixa privilegiu ndaaniʼ congregación, cadi guidxiichineluʼ laca lii. Maʼ bisiaandaʼ Jehová ca pecadu stiluʼ, ne ngaca naquiiñeʼ gúniluʼ (biindaʼ 1 Juan 3:19, 20).

16. ¿Xi caquiiñeʼ gánnanu, laanu ca ni cuxooñeʼ lu carrera riʼ?

¹⁶ Para guicaanu premiu de guendanabani ca naquiiñeʼ chinándanu conseju riʼ: «Laguxooñeʼ ti ganda guni ganartu ni» (1 Cor. 9:24). Ni zacané laanu nga gánnanu gunáʼ nga ca cosa ni naquiiñeʼ guanu ne xii nga ni cadi naquiiñeʼ guanu. Lu artículo riʼ maʼ bidúʼyanu caadxi si ejemplu peru nuuruʼ xcaadxi. Guníʼ Jesús zándaca «guidxá tipa ladxidoʼto tantu gó xhaatatu ne gueʼ xhaatatu ne pur nuutu xizaa pur ca cosa ni caquiiñetu» (Luc. 21:34). Zacané textu riʼ ne xcaadxi textu ni zeeda lu Biblia laanu para gánnanu paraa caquiiñeʼ guchaʼnu ti ganda guxóʼñenu ne ganda chindanu ra riluxe carrera para guicaanu guendanabani.

17. ¿Xiñee nanna dxiichinu zuni ganarnu carrera para guicaanu guendanabani?

¹⁷ Nanna dxiichinu zuni ganarnu carrera ni cuxóʼñenu para guicaanu guendanabani, purtiʼ zudii Jehová laanu stipa ni caquíʼñenu para chindanu ra riluxe ni (Is. 40:29-31). Nga runi, cadi guireeluʼ gana, biʼniʼ casi biʼniʼ apóstol Pablo, laa bixooñeʼ né stale stipa ne biʼniʼ guiráʼ ni nuu lu náʼ para guni ganar (Filip. 3:13, 14). Dxandíʼ, guirutiʼ zanda guxooñeʼ pur lii, peru zacané Jehová lii gúniluʼ ni. Zacanebe lii gualuʼ ca cosa ni caquiiñeluʼ ne gusaanaluʼ ca ni cadi caquiiñeluʼ (Sal. 68:19). Cumu cuxooñené Jehová lii lu carrera riʼ la? gunna dxiichiʼ zanda guni ganarluʼ.