• «Zeeda gácani casi ñaca ñapa xheelaʼ jnadxii».

• «Runeʼ sentir qué risaca, cadi sicarú naa ne qué ganna guneʼ xiixa».

• «Guirutiʼ ganna xi cazaaca. Ne qué zanda gabeʼ ni tuuxa».

• «Guníʼ iqueʼ qué rizaalaʼdxiʼ Jehová naa».

Ca ni bizéʼtenu riʼ rusihuinni ca ni pabiáʼ racaná ti gunaa ora guuyaʼ xheelaʼ pornografía. Zándaca beeu o iza huayuni xheelabe ni nagaʼchiʼ, ngue runi zándaca guni sentirbe maʼ qué zanda gápabe confianza laa. Ti gunaa guníʼ: «Nuu biaje riníʼ iqueʼ, ¿tuu ndiʼ bichaganaʼyaʼ pue? ¿Xiruʼ cucaachibe naa?».

¿Ñee biaba xheelaluʼ lu trampa stiʼ pornografía la? a Guca artículo riʼ para gacané ni lii ne ca hermana ni biaba xheelacaʼ lu trampa riʼ. Riete caadxi principiu ni zeeda lu Biblia ni zacané lii gatadxí ladxidoʼloʼ, gánnaluʼ rizaalaʼdxiʼ ne nuuné Jehová lii ne laaca zacané ca ni lii chuʼluʼ nazaaca ne cadi guixéleluʼ de Dios. b

Neca qué zanda gánnaluʼ o gúʼyaluʼ guiráʼ ni runi xheelaluʼ, peru zanda gúniluʼ caadxi cosa ni zacané lii gatadxí xquendabiaaniluʼ. Guidúʼyanu caadxi de laacani.

Cadi guiníʼ íqueluʼ lii nga nápaluʼ donda. Zándaca ti gunaa guni sentir laa nga napa donda pur ruuyaʼ xheelaʼ pornografía. Ti hermana láʼ Alice c guníʼ ique maʼ cadi galán laa para xheelaʼ ne rinabadiidxaʼ laca laa «¿Xiñee jma riuulaʼdxiʼ xheelaʼ guuyaʼ xcaadxi gunaa ne cadi naa pue?». Ne nuu gunaa runi sentir rusiroobaʼ si guendanagana ca purtiʼ ridxiichi ne runi sentir laa nga napa donda. Ti hermana láʼ Daniela guníʼ: «Nabé runeʼ xiana purtiʼ qué rusaana xheelaʼ de guʼyaʼ pornografía ne runeʼ sentir naa piaʼ cadi cayacaniaʼ chuʼ guendaxheelaʼ stidu galán».

Pa runi sentirluʼ cásica runi sentir ca hermana riʼ la? cadi guiaandaʼ lii, qué riníʼ ique Jehová lii nga nápaluʼ donda pur ca cosa guni xheelaluʼ. Lu Santiago 1:14 ná: «Cada tobi ridiʼdiʼ lu prueba ora rigubayú deseu stiʼ laa ne ora ruquiinde ni  laa» (Rom. 14:12; Filip. 2:12). Nga runi, qué rudxiibaʼ Jehová donda íqueluʼ sínuque, rusisácabe stipa rúniluʼ para cadi guixéleluʼ de laabe (2 Crón. 16:9).

Guuyaʼ xheelaluʼ pornografía qué riniʼni lii nga nápaluʼ donda o guni sentirluʼ qué risácaluʼ. Gánnaluʼ ndiʼ nabé zacané lii. Ca binni ni nanna stale de tema riʼ, riníʼcabe pornografía ca rucaani tuuxa gapa deseu ni cadi jneza ne guiníʼ ique cosa inmoral ni qué zanda guni nin ti gunaa.

Cadi guiníʼ ique xhaataluʼ ni cazaaca ca. Ti hermana láʼ Catherine ruzeeteʼ, qué rusaana de guiníʼ ique ruuyaʼ xheelaʼ pornografía. Dede qué randa riníʼ íquebe stiʼ cosa. Sti hermana láʼ Frances ruzeeteʼ: «Ora qué gannaʼ paraa nuu xheelaʼ nabé riuaaʼ xizaa dede qué ridxelaʼ xi guneʼ. Guidubi dxi riuu ti yuubaʼ ladxiduáʼ». Xcaadxi gunaa ni maʼ bichaganáʼ riniʼcaʼ nabé rituílucaʼ ora nuucaʼ nezalú ca hermanu o hermana ni zándaca nanna xi cazaaca xheelacaʼ. Ne xcaadxi runi sentircaʼ nuucaʼ stúbicaʼ ne riníʼ íquecaʼ guirutiʼ riene laacaʼ.

Jneza nga guni sentirluʼ zacá peru pa cadi gusaana de guiníʼ íqueluʼ ni la? ni zazaaca nga jma zuniná ni lii. Yanna, ¿xi zanda gúniluʼ yaʼ? Ni maʼ galán gúniluʼ nga chuʼluʼ gaxha de Jehová purtiʼ zudiibe stipa lii para ganda gudxiiluluʼ ni (Sal. 62:2; Efes. 6:10).

¿Ximodo zanda gacané lii gúʼndaluʼ Biblia ne guiníʼ íqueluʼ ni cayuundaluʼ yaʼ? Luni rieeteʼ ejemplu stiʼ caadxi gunaa ni bidxaagalucaʼ guendanagana ni nabé bininá laacaʼ peru ra bixhélecaʼ ladxidoʼcaʼ Jehová gucané ni laacaʼ guni sentircaʼ galán. Neca cadi guiráʼ biaje guleebe guendanagana sticaʼ peru qué nusaana de niguixhedxibe ladxidoʼcaʼ. Guníʼ ique ni bizaaca Ana, «nabé nuube xizaa». Ngue runi «nabé xadxí biʼniʼ orarbe Jehová» Ne ngue gucané laabe gatadxí ladxidoʼbe neca qué gánnabe xi chiguizaaca (1 Sam. 1:10, 12, 18; 2 Cor. 1:3, 4).

Gunabaʼ gacané ca ancianu lii purtiʼ «zeeda gácacaʼ casi ti lugar ra zanda chuʼ binni ora cundubi bi ne ra gucaachilú binni ora cayaba dxacha nisaguié» (Is. 32:2). Dede zanda gábicabe lii guidxíñaluʼ ti hermana ni zanda gacané lii gatadxí ladxidoʼloʼ ne gápaluʼ confianza gábiluʼ laa ni cazaacaluʼ que (Prov. 17:17).

¿Ñee zanda gúniluʼ xiixa para gacaneluʼ xheelaluʼ gusaana viciu de guʼyaʼ pornografía?  Zanda pue. Rusiidiʼ Biblia para ganda gaca chaahuiʼ ca guendanagana ca o ganda gudxiilú tuuxa ni cucaalú laa la? «jma galán ora nuu chupa binni que tobi si» (Ecl. 4:9-12). Nuu estudiu ni rusihuinni jma nagueenda rusaana tuuxa de guʼyaʼ pornografía ne guibiguetaʼ chuʼ confianza ndaaniʼ ti guendaxheelaʼ ora guirópacabe rúnicabe dxiiñaʼ tobi si.

Ti cosa nabé risaca gúʼyaluʼ nga pa racalaʼdxiʼ xheelaluʼ gusaana de guʼyaʼ pornografía. ¿Ñee maʼ gunábabe Jehová gudii laabe stipa ne maʼ biyúbibe gacané ca ancianu laabe la? (2 Cor. 4:7; Sant. 5:14, 15).¿Ñee maʼ qué riquiiñeʼ xhaatabe ca dispusitivu electrónicu stibe ne rucueezabe de gúʼyabe o gúnibe xiixa ni gusaba laabe lu tentación ca la? (Prov. 27:12). ¿Ñee racaláʼdxibe gacaneluʼ laabe ne cadi gucaachibe gastiʼ lii la? Pa zacá ni zándaca gacaneluʼ laabe.

¿Peru ximodo yaʼ? Guidúʼyanu ni bizaaca ti hermana láʼ Felicia. Bichaganabe Ethan, dxi nahuiiniʼ Ethan nabé biiyaʼ pornografía. Nga runi, runi Felicia guiráʼ ni nuu lu náʼ para ganda guidxiña Ethan laabe cada biaje guquiinde laa guuyaʼ pornografía. Ethan ná: «Qué rituiluaʼ gabeʼ xheelaʼ guiráʼ ni cazaacaʼ. Nabé nacháʼhuibe, racanebe naa gucanaʼyaʼ tentación ca ne gatigá ruuyabe ximodo nuaaʼ. Ne laaca racanebe naa iquiiñeʼ jneza internet». Peru nabé racaná Felicia purtiʼ xheelaʼ rapa deseu de guʼyaʼ pornografía. Laabe guniʼbe: «Neca cadxiicheʼ ne cayuubaʼ ladxiduáʼ peru qué zacané nga laabe gucaanabe viciu riʼ. Nga runi, primé rinidu ni cazaacabe ne despué maʼ ridúʼyadu xi zacané naa ganda gudxieeluáʼ yuubaʼ stinneʼ».

Ra güícabe diidxaʼ racané ni hombre ca gucaanáʼ de guʼyaʼ pornografía. Ne laaca racané ni gunaa ca guibiguetaʼ gapa confianza laabe. Pa cadi gucaachiʼ ti hombre ca tentación ni rapa, xi huayuni o paraa huayuu la? ratadxí ladxidóʼ xheelaʼ.

¿Ñee zanda gúniluʼ casi modo bizéʼtenu riʼ para gacaneluʼ xheelaluʼ la? Pa zanda la? galán quixhe íquetu gúʼndatu juntu artículo riʼ. ¿Xi caquiiñeʼ quixhe iqueʼ xheelaluʼ guni yaʼ? Gusaana de guʼyaʼ pornografía ne guyubi gápaluʼ laa confianza sti biaje. Lugar de guidxiichi xheelaluʼ purtiʼ racaláʼdxiluʼ guiniʼluʼ de laani la? naquiiñeʼ guni stipa guiene ximodo runiná ni lii. Yanna, ¿lii yaʼ? ¿Xi caquiiñeʼ gúniluʼ? Gacaneluʼ xheelaluʼ gudxiilú guendanagana riʼ ne gápaluʼ confianza laabe stiʼ biaje. Galán guyúbitu gánnatu xii ndiʼ rucaa tuuxa guʼyaʼ pornografía ne xi zanda gaca para gusaana tuuxa viciu ca. d

 Pa riníʼ íqueluʼ zaca nagana para guiniʼtu de tema riʼ sin guidxiichitu la? galán guyúbitu gacané ti ancianu ni nápatu confianza laa para ganda chuʼ ne guuyaʼ güitu diidxaʼ. Ne laaca cadi guireeluʼ gana, purtiʼ bietenalaʼdxiʼ neca gusaana xheelaluʼ de guuyaʼ pornografía, zándaca ziné tiempu lii gápaluʼ confianza laabe. Biiyaʼ ca cosa galán ni cueendutu pur stipa ni gúnitu. Cadi guiaandaʼ lii gápaluʼ paciencia purtiʼ ra tidiʼ tiempu zanda guibiguetaʼ chuʼtu galán (Ecl. 7:8; 1 Cor. 13:4).

Pa málasi guibiguetaʼ xheelaluʼ guuyaʼ pornografía, ¿ñee riníʼ nga qué ñaca arrepentirbe o qué zanda gudxiilube guendanagana ca la? Coʼ, ¿xiñee yaʼ? Purtiʼ ora ridxaagalú binni ti viciu zándaca gudxiilube ni lu guidubi naca guendanabani stibe. Ne zándaca málasi guibiguetaʼ gúnibe ni neca tidiʼ stale iza de maʼ qué huayúnibe ni. Para cadi guizaaca ndiʼ laabe caquiiñeʼ quíxhebe regla ne gúnibe stipa chinándabe ni neca ruluíʼ maʼ qué gápabe guendanagana ca (Prov. 28:14; Mat. 5:29; 1 Cor. 10:12). Caquiiñeʼ guchaabe modo riníʼ íquebe gaca nanaláʼdxibe ni cadi jneza, casi gúʼyabe pornografía o xiixa cosa ni cadi jneza ni zeeda luni, casi quítebe ra nácabe hombre (Efes. 4:23; Sal. 97:10; Rom. 12:9). ¿Ñee zanda gúniluʼ ca ni bizéʼtenu riʼ la? Pa zacá ni, cadi guireeluʼ gana zanda gudxiiluluʼ guendanagana ca. e

Yanna, ¿pa xheelaluʼ qué naʼ gusaana de guuyaʼ pornografía yaʼ? Zándaca guiuba ladxidoʼloʼ, guiníʼ íqueluʼ cadi nadxiibe lii dede guidxiichiluʼ. Peru, ¿xi zanda gúniluʼ yaʼ? Ni zanda gúniluʼ nga gábiluʼ Jehová guiráʼ ni riguu xizaa lii ne nga zacané gatadxí xquendabiaaniluʼ (1 Ped. 5:7). Cadi gusaana de gúʼndaluʼ Stiidxaʼ Dios, biʼniʼ orar ne guníʼ ique ni cayuundaluʼ zacá ra zidiʼdiʼ dxi jma ziuuluʼ gaxha de Jehová ne zuuyaluʼ qué zusaanabe lii. «Nuu Jehová gaxha de ca ni maʼ gucadé ladxidóʼ» ne racaláʼdxibe guibiguetaʼ chuʼcaʼ nayecheʼ (Sal. 34:18). Nga runi, biʼniʼ guiráʼ ni nuu lu naluʼ para cadi gusaana de gácaluʼ ti xpinni Cristu ni runi ni jneza, biyubi gacané ca ancianu lii ne cadi gunítiluʼ esperanza zedandá dxi zaná xheelaluʼ guchaa (Rom. 2:4; 2 Ped. 3:9).