1. ¿Xiñee gudxi apóstol Pablo ca xpinni Cristu hebreu cúʼsaacaʼ gana laacaʼ?

YÁNNAPEʼ nga jma caquiiñeʼ cúʼsaanu gana laanu. ¿Xiñee yaʼ? Purtiʼ lu carta ni bicaa apóstol Pablo ra nuu ca hebreu gúdxibe laacaʼ: «Naquiiñe ucáʼ ique nu acané saa nu para ganaxhii nu jma, ne guni nu ni nachaʼhuiʼ. Ne cadi guni nu casi cani rusaana de che cultu, sínuque cada tobi acané stobi para indisa ique, ne jma rusi yanna purti caduʼya nu ma zeda dxiña dxi [stiʼ Dios]» (Heb. 10:24, 25). Gaayuʼ iza despué, zuuyaʼ ca xpinni Cristu que mayaca gusihuinni «Dios enda nandxóʼ stiʼ» o dxi stiʼ Jiobá para ca binni ni bibani Jerusalén. Biénecabe maʼ cayaca cumplir señal ni guníʼ Jesús ne caquiiñeʼ guxooñecabe de guidxi que (Hech. 2:19, 20; Luc. 21:20-22). Dxi stiʼ Jiobá que bedandá ni lu iza 70, dxi biquiiñeʼ Jiobá ca romano para gunitilú guidxi Jerusalén.

2. ¿Xiñee jmaruʼ si caquiiñeʼ cúʼsaanu gana laanu yanna?

² Tiempu stinu riʼ, nápanu stale razón para guni crenu jma maʼ  gaxha nuu dxi stiʼ Jiobá, ti dxi naroʼbaʼ ni guizáʼ ruchibi (Joel 2:11). Ne ca diidxaʼ ni zeeda lu Sofonías 1:14 laaca cayaca cumplir cani yanna riʼ: «¡Maʼ gaxha nuu dxi stiʼ Jiobá! ¡Maʼ gaxha nuuni ne nagueenda zeeda guidxiña ni!». Nga runi, Pablo cayabi laanu: «Naquiiñe ucáʼ ique nu acané saa nu para ganaxhii nu jma, ne guni nu ni nachaʼhuiʼ» (Heb. 10:24). Nga runi, jmaruʼ si naquiiñeʼ guidúʼyanu xi caquiiñeʼ ca hermanu stinu ti ganda cuʼnu gana laacaʼ órapeʼ jma caquiiñecabe ni.

3. ¿Xi nuu apóstol Pablo gusiene ora guníʼ cuʼnu gana xcaadxi? (Biiyaʼ dibuju ni zeeda ra ruzulú tema riʼ).

³ Biblia ná «ora nuu ansiedad ndaaniʼ ladxidóʼ ti hombre, raca deprimir, peru ti diidxaʼ galán la? rusiecheʼ ni laa» (Prov. 12:25). Nga runi, guiranu riquiiñeʼ chuʼ tu cuʼ gana laanu gatigá. Pablo guníʼ dede ca binni ni riguu gana caquiiñecaʼ tu cuʼ gana laacaʼ. Sicaríʼ bicaabe ra nuu ca xpinni Cristu de Roma: «Napa stale gana guuya laatu para acaniá laatu guiene chaahui tu stiidxa Dios ti uzuhuaa chaahui tu. Ne zacá zacané saa nu pur fe stinu, purti zacané tu naa pur fe stitu, ne zacaniá laatu pur fe stinneʼ» (Rom. 1:11, 12). Casi maʼ bidúʼyanu ca, dede apóstol Pablo guyuu ora biquiiñeʼ tu cuʼ gana laa (biindaʼ Romanos 15:30-32).

4, 5. Tiempu riʼ, ¿tuu nga cani caquiiñeʼ cuʼnu gana, ne xiñee?

⁴ Stale hermanu runi sacrificiu naroʼbaʼ para guni servir Jiobá de tiempu completu. Ládecabe nuu ca precursor, ca misioneru, ca betelita, ca superintendente de circuito ne xheelacaʼ, ne ca hermanu ni runi dxiiñaʼ ndaaniʼ ca oficina de traducción. Guirácabe caquiiñecabe tu cuʼ gana laacabe, ne caquiiñeʼ gúninu ni. Laaca naquiiñeʼ cuʼnu gana ca hermanu ni biʼniʼ xhiiñaʼ Dios de tiempu completu dxiqué, neca yanna maʼ qué randa rúnicaʼ ni, pa gúninu ni zusiéchenu laacabe.

⁵ ¿Turuʼ caquiiñeʼ cuʼnu gana yaʼ? Ca hermanu ne ca hermana ni caʼruʼ guichaganáʼ purtiʼ racaláʼdxicaʼ guzuubacaʼ stiidxaʼ Jiobá ne guichaganacaʼ «ti xpinni Señor» (1 Cor. 7:39). Ca hermana ni maʼ bichaganáʼ laaca caquiiñeʼ gabi xheelacaʼ laacaʼ pabiáʼ nadxii laacabe ne rusisaca guiráʼ stipa ni rúnicabe (Prov. 31:28, 31). Ne cadi guiaandaʼ laanu cuʼnu gana ca xpinni Cristu ni cuzuubaʼ diidxaʼ neca canazanándacabe laacaʼ o huaracaʼ (2 Tes. 1:3-5). Riguixhedxí Jiobá ne Jesús ladxidóʼ ca hermanu ni qué rusaana laacaʼ. Biblia ná: «Ne Dios Bixhózenu, ni nadxii laanu ne ni riguixhedxí ladxidoʼno ne rudii laanu ti esperanza pur guendanachaʼhuiʼ stiʼ, laa né Señor Jesucristu quixhedxicaʼ ladxidoʼto ne gudiicaʼ laatu stipa para gúnitu ni jneza ne guiniʼtu ni jneza» (2 Tesalonicenses 2:16, 17, TNM).

6. ¿Xi dxiiñaʼ napa ca ancianu ni riete lu Isaías 32:1, 2?

⁶ (Biindaʼ Isaías 32:1, 2). Nabáninu ti tiempu nabé nagana, nga runi jma nagueenda riuʼnu triste o rireʼnu gana. Riquiiñeʼ Jesucristu «ca principe», ni zeeda gaca ca ancianu ni nuu lade ca ungidu ne ca ancianu ni naca de xcaadxi dendxuʼ. Ca ancianu qué riguíxhecaʼ xi guni cré ca hermanu, sínuque racanecaʼ para chúʼcabe nayecheʼ. Racaláʼdxicabe gacanécabe laanu para chuʼnu nayecheʼ ne cadi gusaana de guzúʼbanu diidxaʼ (2 Cor. 1:24).

7, 8. ¿Ximodo zanda cuʼ ca ancianu gana ca hermanu pur ni guiniʼcaʼ ne pur cani gúnicaʼ?

⁷ Galán chinanda ca ancianu ejemplu stiʼ apóstol Pablo. Sicaríʼ bicaabe ra nuu ca xpinni Cristu de Tesalónica dxi guzanándacabe laacaʼ: «Pa ñanda la? cadi stiidxa Dios si nudíʼ du laatu, sínuque ne xpida pe du, tantu nadxii du laatu» (1 Tes. 2:8).

 ⁸ Bisihuinni Pablo nuu biaje cadi caquiiñeʼ si gábinu tuuxa xiixa diidxaʼ para cuʼnu gana laa. Nga runi, gúdxibe ca ancianu ni nuu Éfeso ca diidxaʼ riʼ: «Acané nu cani caquiiñe ni. Laguietenalaʼdxi xi na Señor Jesús: “Jma nayeche ni rudii que ni ricaa”» (Hech. 20:35). Cadi guluu si Pablo gana ca hermanu stiʼ, sínuque laaca bíʼnibe jma pur laacaʼ. Ne gúdxibe laacaʼ: «Qué ziaʼya unite irá ni napa pur laatu, dede nin xpida qué ziaʼya para ganda acaniá laatu iniisi tu» (2 Cor. 12:15). Zacaca nga naquiiñeʼ guni ca ancianu, cadi caquiiñeʼ si cúʼcabe gana ca hermanu né diidxaʼ sínuque gusihuínnicabe ni pur ni gúnicabe. Zacá zusihuínnicabe dxandíʼ rizaaláʼdxicabe ca hermanu (1 Cor. 14:3).

9. ¿Xi zacané ca ancianu ora gudiicaʼ conseju o uguucaʼ gana ca hermanu?

⁹ Nuu biaje, para cuʼ ca ancianu gana ca hermanu la? caquiiñeʼ gudiicaʼ conseju o uguu jnézacaʼ laacabe. Pa racalaʼdxiʼ ca ancianu cuʼcaʼ gana ca hermanu la? cadi naquiiñeʼ guiaandaʼ laacaʼ ni rusiidiʼ Biblia de modo naquiiñeʼ guni cani. Bibani si Jesús de lade gueʼtuʼ bisaana ti ejemplu galán ximodo naquiiñeʼ gudii tuuxa conseju. Dxi guluu jnézabe congregación de Éfeso, Pérgamo ne Tiatira ni guyuu Asia Menor. Ante uguu jnézabe ca congregación riʼ primeru biʼniʼ felicitarbe laacaʼ (Apoc. 2:1-5, 12, 13, 18, 19). Sicaríʼ gúdxibe congregación de Laodicea: «Rulidxe cani nadxiee ne ridinde nia laacaʼ. Nga runi lainaba perdón Dios ne laguni xhiiña ne gana» (Apoc. 3:19). Galán chinanda ca ancianu ejemplu stiʼ Cristu ora gudiicaʼ conseju.

10. ¿Xi zanda guni cada tobi de laanu para cúʼsaanu gana?

¹⁰ Cadi ca ancianu si nga naquiiñeʼ cuʼ gana xcaadxi. Pablo cayabi guiráʼ ca xpinni Cristu guiniʼcaʼ «diidxa jneza ni zanda acané stobi uzuhuaa chaahuiʼ, ne ni acané» xcaadxi binni (Efes. 4:29). Guiranu naquiiñeʼ  guizaaláʼdxinu ca hermanu stinu ne guidúʼyanu xi caquiiñecaʼ. Pablo gudxi ca xpinni Cristu hebreu ca diidxaʼ riʼ: «Lacuu stipa ná tu ne ñee tu, ne lasá jneza sin iree chu tu, purti zacá zacané tu uzuhuaa chaahui stobi ni ruluíʼ chi guiaba» (Heb. 12:12, 13). Dede ca joven zanda guiniʼcaʼ diidxaʼ ni cuʼ gana ca hermanu.

11. ¿Xi gucané ti hermana dxi guca deprimir?

¹¹ Guidúʼyanu xi bizaaca ti Testigu láʼ Marthe,  * gúpabe depresión. Laabe guniʼbe: «Ti dxi, despué de bineʼ orar Jiobá ne gunabaʼ laa gacané naa, bidxaagaʼ ti hermana maʼ huaniisi. Biʼniʼ tratarbe naa né stale cariñu ne biabe naa, nguepeʼ nga ni caquiiñeʼ óraque. Gúdxibe naa laaca gudíʼdibe lu ti guendanagana casi ni cadideʼ que, dede bineʼ sentir cadi stubeʼ nuaaʼ». Zándaca qué lica ñanna hermana riʼ pabiáʼ gucané ca diidxaʼ ni guníʼ que Marthe.

12, 13. ¿Ximodo zanda chinándanu conseju zeeda lu Filipenses 2:1-4?

¹² Pablo bidii conseju riʼ ca hermanu ni guyuu ndaaniʼ congregación de Filipos: «Pa rusieche Cristu laatu ne nuu dxí ladxidóʼ to purti nadxii laatu, ne nuu né Espíritu [...] laatu, ne nanna tu ganaxhii tu ne ilaselaʼdxi tu stobi la? lauchá ladxiduáʼ de enda nayecheʼ. Lachuu tobi si ne laganaxhii saa, lagaca tobi si lu ni quixhe tu guni tu, ne tobi si icá ique tu. Cadi guni tu xiixa para si tidi tu lú stobi, nin para chuʼ tu udxiiba laatu, sínuque cada tobi gaca nadóʼ ne usisaca stobi, ne cadi laca laa. Cadi sti si tu ma cá ique tu, sínuque laucaa ique ni caquiiñe stobi» (Filip. 2:1-4).

¹³ Ca diidxaʼ guníʼ Pablo riʼ rusiidiʼ cani laanu guiranu caquiiñeʼ gúninu stipa pur guizaaláʼdxinu ca hermanu stinu ne cuʼnu gana laacaʼ. Zanda quixhedxinu ladxidóʼcabe, gannaxhiinu laacabe, guizaaláʼdxinu laacabe ne gusihuínninu rianu laacabe né stale cariñu.

14. ¿Xi zanda gacané ca hermanu ni maʼ caree gana?

¹⁴ Ti cosa ni rusiecheʼ laanu nga, gánnanu dede yanna cayúniruʼ ca binni ni gucanenu dxiqué ni ná Jiobá. Sicaríʼ bicaa apóstol Juan: «Gasti ru ni rusieche naa jma que ganna zinanda ca xiiñe ni dxandíʼ» (3 Juan 4). Stale precursor riníʼ nabé riecheʼ ora ganna cadi cusaana ca binni ni bíʼndanecaʼ de lu Biblia de gúnicaʼ ni ná Jiobá o maʼ nácacaʼ precursor. Nga runi, pa gusietenaláʼdxinu ca precursor ni maʼ caree gana guiráʼ ni maʼ biʼniʼ pur xcaadxi binni la? zacané ni laacabe guni sentírcabe galán.

15. Bizeeteʼ ti modo zanda cuʼnu gana cani cadi cusaana de guzuubaʼ stiidxaʼ Jiobá.

¹⁵ Stale superintendente de circuito riníʼ galán runi sentircaʼ ne xheelacaʼ ora tuuxa hermanu gudii laacabe ti notahuiiniʼ ra cudiicaʼ xquíxepeʼ laacabe pur yegánnacabe congregación sticaʼ. Zacaca runi sentir ca ancianu, ca misioneru, ca precursor, ne ca betelita ni cadi cusaanaʼ de guzuubaʼ stiidxaʼ Dios neca cadxagalucaʼ guendanagana.

16. ¿Ñee caquiiñeʼ gúninu stale cosa para cuʼnu gana tuuxa la?

¹⁶ Pa natuinu o huaxiéʼ rininu, cadi guiníʼ íquenu qué zanda cuʼnu gana xcaadxi. Purtiʼ cadi nagana para guni binni ni. Quíxhenu ti ejemplu, ora gudíʼnanu ti hermanu la? zanda guxidxinenu laabe, pa qué guxidxinebe laanu la? zándaca nápabe xiixa problema ne caquiiñebe tu gacané laabe. Ne zándaca ni caquiiñebe nga chuʼ tu gucaadiaga laabe ti guni sentirbe galán (Sant. 1:19).

17. ¿Ximodo gucanécabe ti hermanu joven?

¹⁷ Guidúʼyanu ni bizaaca ti hermanu joven  láʼ Henri. Guizáʼ bireebe gana purtiʼ caadxi de ca familia stibe bixélecaʼ de Jiobá, tobi de laacaʼ nga bixhózebe, ni guca ancianu. Para cuʼ ti superintendente gana Henri biʼniʼ invitar laabe ra ti cafetería ne bicaadiaga laabe ora gúdxibe laa xi cayuni sentirbe. Biene Henri pa racalaʼdxiʼ gacané familia stiʼ guibiguétacaʼ ra nuu Jiobá cadi naquiiñeʼ guixeleʼ de Jiobá. Laaca gutadxí ladxidoʼbe ora biindabe ni ná Salmo 46, Sofonías 3:17 ne Marcos 10:29, 30.

18. a) ¿Xi guníʼ rey Salomón? b) ¿Xi conseju bidii apóstol Pablo?

¹⁸ ¿Xi rizíʼdinu de ejemplu stiʼ Marthe ni bizéʼtenu lu párrafo 11, ne ejemplu stiʼ Henri? Ni rizíʼdinu nga guiranu zanda cuʼnu gana cani caquiiñeʼ ni. Rey Salomón bicaa: «Ti diidxaʼ ni guiníʼ tuuxa órapeʼ caquiiñeʼ ni, ¡nabé sicarú ni!». Ne laaca guniʼbe «ora nayecheʼ nuu lú tobi rusiecheʼ ni ladxidóʼ; ne ti informe galán rudii stipa dxita ladi binni» (Prov. 15:23, 30). Pa guidúʼyanu nuu tuuxa triste, ¿xi naquiiñeʼ gúninu yaʼ? Zanda guidúʼndanenu laabe xiixa tema ni zeeda lu revista Torre stiʼ ni Rapa o xiixa información ni nuu lu sitiu de Internet stinu. Sicaríʼ bicaa apóstol Pablo: «Lausiidi saa ne laquixhená saa [o lacuusaa gana] ne stale enda biaaniʼ. Laguunda salmo ne himno ne cantu sti Dios [Jiobá], ne maca cudii tu diuxquixe laa ndaani ladxidóʼ to» (Col. 3:16; Hech. 16:25). Sti cosa ni zacané para guni sentirnu galán nga guidúʼndanu ca diidxaʼ riuundaʼ stiʼ Reinu.

19. ¿Xiñee jma naquiiñeʼ cúʼsaanu gana laanu tiempu riʼ, ne xi naquiiñeʼ gúninu?

¹⁹ Laga zeeda dxiña dxi stiʼ Jiobá, jma caquiiñeʼ cúʼsaanu gana laanu (Heb. 10:25). Nga runi, naquiiñeʼ gúninu ni ná conseju ni bidii apóstol Pablo ora guníʼ: «Lauguusaa gana laatu ne lagacané stobi guzuhuaa chaahuiʼ, cásica modo cayúnitu ni» (1 Tes. 5:11, TNM).