1-3. a) ¿Xi guendanagana ridxaagaluʼ ca joven, ne xi zanda guchaaganu ni? (Biiyaʼ foto ni zeeda ra ruzulú tema riʼ). b) ¿Xi zanda guni ca joven xpinni Cristu para gudxiilucaʼ guendanagana riʼ?

BIXUIʼLÚ cheluʼ de viaje lu ti autobús para cheluʼ ti lugar ra chigaca ti cosa nabé risaca. Ora yendaluʼ ra terminal que, de qué nidxélaluʼ xi ñúniluʼ ora bíʼyaluʼ guiráʼ binni ne guiráʼ autobús nuu raqué. Peru cumu nánnaluʼ paraa racaláʼdxiluʼ cheluʼ la? zieluʼ ra zuhuaa autobús ni chiné lii lugar que. Ne qué zaguíʼbaluʼ lu ti autobús ni ziné lii gadxé lugar.

² Guendanabani stinu zeeda gaca ni casi ora ñé tobi de viaje, ne ca joven ca zeeda gácacaʼ casi ca binni ni cabeza quibaʼ lu ti autobús. Cumu napa xidé guicaacabe stale decisión lu xquendanabánicabe la? zándaca nuu biaje qué zadxélacabe xi gúnicabe. Peru pa maʼ nánnacabe xi racaláʼdxicabe gúnicabe la? jma nagueenda zacaacabe decisión jneza.

³ Tema riʼ zacané ni ca joven quixhe íquecaʼ gusiéchecaʼ Jiobá. Ndiʼ riníʼ guicaacabe encuenta laabe lu guiráʼ ni gúnicabe lu xquendanabánicabe, casi ora chicaacabe decisión xi guni  estudiarcabe, xi dxiiñaʼ gúnicabe ne pa zachaganácabe. Ne laaca caquiiñeʼ gúnicabe stipa pur ugaandacabe xiixa meta espiritual. Ca joven ni ricá ique guni xhiiñaʼ Jiobá, zanda chuʼcaʼ seguru zaguube ndaayaʼ laacaʼ ne zabeenducaʼ ni galán lu xquendanabánicaʼ (biindaʼ Proverbios 16:3).

4. ¿Xi zazíʼdinu lu tema riʼ?

⁴ Ti decisión jneza ni zanda guicaa tuuxa nga gapa meta espiritual. ¿Xiñee yaʼ? Lu tema riʼ zadúʼyanu chonna razón. Chupa de laacani zusiidiʼ cani lii pa gúniluʼ stipa pur ugaandaluʼ ca meta espiritual stiluʼ zacané ni lii gaca xhamíguluʼ Jiobá. Ne guionna ca zusiidiʼ ni lii xi zabeenduluʼ pa gápaluʼ meta yanna laga joven lii.

5. ¿Gunáʼ nga primé razón nuu para gápaluʼ meta espiritual?

⁵ Primé razón nuu para gápaluʼ meta espiritual nga purtiʼ zacá zusihuínniluʼ pabiáʼ rudiiluʼ xquíxepeʼ Jiobá pur nadxii lii ne pur guiráʼ ni maʼ bíʼnibe pur lii. Ti xpinni Dios bicaa sicaríʼ: «Nabé galán nga gudii binni xquíxepeʼ Jiobá». Ne laaca guniʼbe: «Purtiʼ maʼ bisiécheluʼ naa Jiobá, pur guiráʼ ni maʼ bíʼniluʼ; pur guiráʼ ni bizáʼ naluʼ de rucaa ridxi tantu cayecheʼ» (Sal. 92:1, 4). Joven, guníʼ ique guiráʼ ni maʼ bidii Jiobá lii: guendanabani, oportunidad ni nápaluʼ de gunibiaʼluʼ laabe ne ni dxandíʼ rusiidibe, Biblia, congregación ne ti esperanza sicarú ni chigudii Dios laanu despué. Pa quíxheluʼ gúniluʼ ca cosa espiritual primé lu xquendanabániluʼ, cadi zusihuínnisiouʼ cudiiluʼ xquíxepeʼ Jiobá sínuque zaca xhamíguluʼ laabe.

6. a) ¿Ximodo zacané ca meta espiritual ca lii gaca xhamíguluʼ Jiobá? b) ¿Xi meta zanda gapa cani nahuiiniʼ?

⁶ Guiropa razón nga purtiʼ ruʼnuʼ cosa galán ni ruuyaʼ Jiobá ora maʼ cayuʼnuʼ stipa pur ugaandaluʼ ca meta espiritual stiluʼ. Ne racané ni gaca xhamíguluʼ laabe. Nga runi, sicaríʼ bicaa apóstol Pablo: «Jneza runi Dios, ne qué zusiaanda irá enda nachaʼhui ni huayuni tu ca xpinni purti nadxii tu laa» (Heb. 6:10). Guirutiʼ zanda guiníʼ nahuiiniruʼ para quixheʼ meta. Guníʼ ique ca ejemplu riʼ. Chii iza napa Christine dxi gudixheʼ ique guʼndaʼ historia stiʼ ca Testigu ni guca fiel ne bíʼnibe ni. Napa Toby 12 iza dxi gupa meta guʼndaʼ guidubi Biblia lu ti iza ante chúʼnisa. Napa Maxim 11 iza ne Noemi bizáʼnabe chii, dxi guyuunísacaʼ. Ne guirópacabe bíʼnicabe stipa para ugaandacabe meta de guni servírcabe Betel. Ne para cadi guiaandaʼ laacabe meta stícabe la? bicaacabe ti solicitud para Betel cueʼ ti pader ra lídxicabe. Yanna lii yaʼ, ¿xiñee que guiníʼ íqueluʼ quíxheluʼ xiixa meta ni risaca para lii ne guʼnuʼ dxiiñaʼ para ugaandaluʼ ni yaʼ? (Biindaʼ Filipenses 1:10, 11).

7, 8. a) ¿Xiñee zanda guininu pa gápaluʼ meta zacané ni lii guicaaluʼ decisión jma nagueenda? b) ¿Xiñee gudixhe ique ti baʼdudxaapaʼ cadi cheʼ universidad?

⁷ Guidúʼyanu guionna razón ni nuu para quíxheluʼ meta. Ora joven lii, caquiiñeʼ guicaaluʼ decisión xi guni estudiarluʼ, paraa gúniluʼ dxiiñaʼ ne xcaadxi cosa casi laani. Ora guicaaluʼ ti decisión zeeda gaca ni casi ora zuhuaaluʼ lu tapa lu náʼ neza ne cayuuyaluʼ pa neza cheluʼ. Pa maʼ nánnaluʼ paraa racaláʼdxiluʼ chindaluʼ la? qué zaca nagana para lii cuiluʼ pa neza cheluʼ. Zacaca nga pa maʼ nánnaluʼ xi meta nápaluʼ gana ugaandaluʼ la? qué zaca nagana para lii guicaaluʼ xiixa decisión. Proverbios 21:5 ná ora riguixhe chaahuiʼ tuuxa xi chiguni la? seguru zabeendú ni galán. Pa dede yanna quixhe íqueluʼ xi gúniluʼ ne gápaluʼ meta la? jma nagueenda zabeenduluʼ ni galán. Guzéʼtenu ni bizaaca ti baʼdudxaapaʼ  láʼ Damaris dxi gucuaa ti decisión risaca.

⁸ Dxi biree Damaris de secundaria galán calificación bireené, ngue runi bidiicabe laabe ti beca para guni estudiarbe ndaaniʼ ti universidad ne gácabe abogada. Peru gulibe gúnibe dxiiñaʼ ndaaniʼ ti bancu huaxiéʼ hora. ¿Xiñee yaʼ? Laabe guniʼbe: «Maca gudixheʼ iqueʼ gacaʼ precursora. Ne para ganda guneʼ ni la? caquiiñeʼ guneʼ dxiiñaʼ huaxiéʼ hora. Pa ñuundaʼ para ñacaʼ abogada la? ñanda ñuneʼ ganar stale bueltu, peru zándaca qué nidxelaʼ dxiiñaʼ ra ñuneʼ huaxiéʼ hora». Tiempu riʼ, maʼ ziné Damaris gande iza de naca precursora. ¿Ñee raca arrepentirbe pur decisión ni gucuaabe dxi nácabe joven la? Coʼ. Laabe guniʼbe: «Nabé ridxaagaʼ stale abogadu ndaaniʼ bancu, rúnicabe dxiiñaʼ ni ñuneʼ pa ñaca ñuneʼ estudiar de laani. Peru cadi nayecheʼ rúnicabe dxiiñaʼ stícabe. Pur gudixheʼ iqueʼ gacaʼ precursora huayacané ni naa guibaneʼ nayecheʼ ne guizáʼ nayecheʼ nuaaʼ pur huayuneʼ ni ná Jiobá lu ca iza ni maʼ gudiʼdiʼ ca».

9. ¿Xiñee caquiiñeʼ guni felicitarnu ca joven?

⁹ Ndaaniʼ ca congregación ni nuu lu guidubi Guidxilayú riʼ, nuu stale joven ni caquiiñeʼ guni felicitarnu purtiʼ cayúnicaʼ ni ná Jiobá de guidubi ladxidoʼcaʼ ne cá íquecaʼ ugaandacaʼ ca meta espiritual sticaʼ. Ne ca joven riʼ, nabánicaʼ nayecheʼ. Peru laaca riziidicabe chinándacabe ni ná Jiobá lu guiráʼ cosa ni gúnicabe, casi pa zuni estudiárcabe, xi dxiiñaʼ gúnicabe, ne pa zachaganácabe. Rey Salomón cayabi laanu gápanu confianza Jiobá de guidubi ladxidoʼno. Ne laaca guniʼbe: «Lu guiráʼ ni gúniluʼ biiyaʼ xi nabe, ne laabe zúnibe ca neza stiluʼ derechu» (Prov. 3:5, 6). Guizáʼ risaca ca joven ca para Jiobá. Ne nabé nadxiibe laacaʼ ne pur nga rápabe laacaʼ, ruluiʼbe laacaʼ xi gúnicaʼ ne riguube ndaayaʼ laacaʼ.

10. a) ¿Xiñee nabé risaca guni predicarluʼ? b) ¿Xi zacané lii cueenduluʼ ni galán ora guni predicarluʼ yaʼ?

¹⁰ Pa racalaʼdxiʼ ti joven gusiecheʼ ladxidóʼ Jiobá la? caquiiñeʼ quixhe ique guni predicar. Jesucristu bisiidiʼ nabé risaca gaca dxiiñaʼ riʼ ora guníʼ: «Purti napa xidé ireeche stiidxa Dios irá guidxi» (Mar. 13:10). Nga runi, ti cosa nabé risaca naquiiñeʼ gúniluʼ lu xquendanabániluʼ nga guni predicarluʼ. ¿Ñee maʼ guníʼ íqueluʼ ugaandaluʼ meta de guni predicarluʼ jma o gácaluʼ precursor la? Yanna, ¿xi zanda gúniluʼ pa qué riuuláʼdxiluʼ guni predicarluʼ yaʼ? Ne ¿xi zacané lii cueenduluʼ ni galán ora guiniʼluʼ de Jiobá yaʼ? Biʼniʼ guiropaʼ cosa riʼ: guca preparar chaahuiʼ ne cadi gusaana de gábiluʼ xcaadxi ni maʼ biziidiluʼ. Zándaca dede zadxagayaaluʼ ora gúʼyaluʼ pabiáʼ ziuuláʼdxiluʼ ni.

11, 12. a) ¿Xi zanda guni ca joven para guni predicarcaʼ? b) ¿Xi biʼniʼ ti joven para gunda guníʼ de Jiobá ra scuela?

¹¹ Ni zanda gúniluʼ primé nga gaca prepararluʼ para guicábiluʼ xiixa pregunta ni zándaca guni tobi de ca xcompañéruluʼ lii ra scuela, casi xiñee runi creluʼ Dios. Lu sitiu jw.org nuu caadxi tema ni zanda gacané ca joven gudiicaʼ ti respuesta. Guyé lu sección ENSEÑANZAS BÍBLICAS > JÓVENES > PONLO POR ESCRITO. Racá zadxélaluʼ ti yaza ni láʼ «¿Qué razones tengo para creer en Dios?». Ne yaza riʼ zacané ni lii gucaaluʼ respuesta stiluʼ. Ne laaca zeeda chonna textu de lu Biblia ni zanda iquiiñeluʼ para gusiéneluʼ respuesta stiluʼ: Hebreos 3:4, Romanos 1:20 ne Salmo 139:14. Lu sección riʼ zanda guidxélaluʼ xcaadxi yaza ni zanda iquiiñeluʼ para guicábiluʼ xcaadxi pregunta ni gúnicabe lii (biindaʼ 1 Pedro 3:15).

¹² Ora gápaluʼ oportunidad la? gudxi ca xcompañéruluʼ chuʼcaʼ lu sitiu jw.org.  Ngapeʼ nga ni biʼniʼ Lucas ra scuela, dxi bíʼyacabe ti tema ni caníʼ de gadxé gadxé religión. Bidiibe cuenta zeeda caadxi cosa ni cadi jneza de ca testigu stiʼ Jiobá lu libru ni cayuundacabe que. Neca nuube nervioso, gunábabe maestra que pa zanda gusiénebe xiñee cadi jneza ni caníʼ libru que de ca testigu stiʼ Jiobá. Bisiénebe laacaʼ ni runi crebe ne biluiʼbe laacaʼ sitiu ni nápanu lu Internet. Bisaanané maestra que laacabe ti tariá, gúʼyacabe videu ni zeeda lu pizarra animada ni láʼ Ximodo gudxiiluluʼ tuuxa sin tíndeluʼ. Guizáʼ biecheʼ Lucas purtiʼ gunda guníʼ de Jiobá.

13. ¿Xiñee cadi naquiiñeʼ guireeluʼ gana ora tiidiluʼ guendanagana yaʼ?

¹³ Pa pur ugaandaluʼ ca meta stiluʼ guidxaagaluluʼ guendanagana lu xquendanabániluʼ, cadi guireeluʼ gana. Biʼniʼ stipa pur ugaandaluʼ cani (2 Tim. 4:2). Ngapeʼ nga ni biʼniʼ Katharina. Dxi nápabe 17 iza, gudixhe íquebe guni predicarbe guiráʼ ca xcompañérube ni runinebe dxiiñaʼ. Tobi de laacaʼ gudindené laabe stale biaje, peru qué nireebe gana. Cumu galán xpiaʼbe la? guizáʼ bidxagayaa ti xcompañérube ni láʼ Hans laabe. Pur ni biʼniʼ Katharina riʼ, bizulú Hans biindaʼ ca publicación stinu, gucuaa estudiu de lu Biblia ne guyuunisa. Qué ñanna Katharina ni bizaaca riʼ purtiʼ yendézabe sti lugar. Trece iza despué, laga nuube ra reunión ne familia stibe, guizáʼ bidxagayaabe ora bíʼyabe Hans nga chigudii discursu públicu. Ne bizaaca ndiʼ purtiʼ qué nusaanabe de ñuni predicarbe ca xcompañérube.

14, 15. a) ¿Xi naquiiñeʼ gánnaluʼ ora gucaa tuuxa lii gúniluʼ xiixa ni cadi jneza? b) ¿Xi zanda gúniluʼ ora gucaa tuuxa lii gúniluʼ xiixa ni cadi jneza?

¹⁴ Tema riʼ maʼ guluu ni gana lii para gúniluʼ ni ná Jiobá lu xquendanabániluʼ ne gápaluʼ meta espiritual. Zándaca xcaadxi joven de biaʼ iza stiluʼ nisi ricá íquecaʼ gaca divertircaʼ ne zándaca gucaacaʼ lii gúniluʼ ni rúnicaʼ. Peru cadi guiaandaʼ lii zedandá dxi zusihuínniluʼ pa maʼ nuuluʼ listu para guni cumplirluʼ ca meta ni maʼ gudixhe íqueluʼ. Cadi gudiiluʼ lugar gucaa xcaadxi lii guchaaluʼ ni maʼ gudixheʼ íqueluʼ gúniluʼ. Guníʼ ique lu ejemplu stiʼ estación ra ruzuhuaa autobús que. Guirutiʼ zaguiʼbaʼ lu ti autobús  purtiʼ si ruluíʼ nayecheʼ nuu cani dxiʼbaʼ ndaaniʼ ni.

¹⁵ Nuu caadxi cosa ni zanda gúniluʼ pa gucaa xcaadxi joven lii guʼnuʼ xiixa. Guzéʼtenu ti ejemplu, ora gúʼyaluʼ nuu xiixa ni zándaca gucaa lii gúniluʼ xiixa ni cadi jneza la? bixeleʼ de laacani (Prov. 22:3). Ne guníʼ ique xi zabeenduluʼ pa gúniluʼ cosa ni cadi jneza (Gál. 6:7). Bidii lugar gacané xcaadxi binni lii. Pa humilde lii la? zacaaluʼ ca conseju ni gudii jñaaluʼ ne bixhózeluʼ lii o ni gudii xcaadxi xpinni Cristu ni napa experiencia lii (biindaʼ 1 Pedro 5:5, 6).

16. Bizeeteʼ ti experiencia ni rusihuinni xiñee nabé risaca gaca tuuxa humilde.

¹⁶ Guidúʼyanu ni bizaaca ti joven láʼ Christoph, gúcabe humilde ne gucuaabe ca conseju ni bidiicabe laabe. Despué de guyuunisabe, bizulú guyebe gimnasio. Raqué, biʼniʼ invitar caadxi joven laabe guicá labe lu ti club deportivo. Gúdxibe ni ti ancianu ne laa gudxi laabe ante guicaabe ti decisión la? guiníʼ íquebe lu ca peligru ni zanda guidxagalube, tobi de laani nga gucaa ni laabe guiníʼ íquebe jma risácabe que xcaadxi. Neca zaqué, bicaa Christoph lá. Ne ra gudiʼdiʼ tiempu, bidiibe cuenta cadi jneza deporte ni rúnibe, purtiʼ nabé rucaa ni binni tinde ne riguu ni binni ra naxoo. Guníʼnebe ca ancianu ni bizaacabe riʼ, ne laacaʼ bidiicaʼ conseju laabe. Laabe guniʼbe: «Biseendaʼ Jiobá ca hermanu riʼ ra nuaaʼ para gudiicaʼ conseju naa. Neca cadi casi ziaaʼ bicaadiaga conseju que, peru bineʼ ni». ¿Ñee nácaluʼ humilde para guicaaluʼ xiixa conseju gudiicabe lii la?

17, 18. a) ¿Xi racalaʼdxiʼ Jiobá para ca joven? b) Joven, ¿xi zanda gúniluʼ para cadi gaca arrepentirluʼ pur ca decisión ni guicaaluʼ yanna riʼ? Bizeeteʼ ti ejemplu.

¹⁷ Jiobá cayabi lii: «Biecheʼ hombrehuiiniʼ ne dxaapahuiiniʼ laga nahuiiniluʼ, ne bisiecheʼ ladxidoʼloʼ ca dxi nahuiiniluʼ» (Ecl. 11:9). Laabe racaláʼdxibe chuʼluʼ nayecheʼ. Lu tema riʼ bizíʼdinu ti modo zanda gúniluʼ ni nga gápaluʼ meta espiritual ne guicaaluʼ encuenta laabe lu guiráʼ ni gúniluʼ. Pa gúniluʼ ca ndiʼ nagueendaca la? zuluíʼ Jiobá lii pa ladu cheluʼ, zapa lii ne zaguu ndaayaʼ lii. Guníʼ ique lu guiráʼ ca conseju galán rudii Biblia lii ne biʼniʼ ni ná ca diidxaʼ riʼ: «Bietenalaʼdxiʼ, yanna, de [Dios] ni jma nandxóʼ ni bizáʼ lii, ca dxi nahuiiniluʼ» (Ecl. 12:1).

¹⁸ Nagueenda riniisi ca joven ca. Triste guininu ni, peru stale de cani maʼ huaniisi raca arrepentircaʼ purtiʼ gudixhe íquecaʼ ugaandacaʼ xiixa meta ni cadi jneza o purtiʼ qué ñápacaʼ meta lu xquendanabánicaʼ. Peru ca joven ni maʼ gudixhe ique ugaandaʼ xiixa meta espiritual la? zabánicaʼ nayecheʼ ora guiniisicaʼ. Zacá nga runi sentir Mirjana. Dxi gúcabe joven, gúcabe ti deportista ni nanna quite, ne pur nga biʼniʼ invitárcabe laabe chebe lu ca Juegu Olímpico ni raca lu hielu. Peru laabe gudixhe íquebe guni servirbe Dios de tiempu completu. Maʼ gudiʼdiʼ jma de treinta iza, ne cayuni servirube de tiempu completu laabe né xheelabe. Mirjana guníʼ: «Gaca tobi famosa, gapa ti puestu risaca ne guni ganar stale bueltu naca cani meta ni qué risaca. Ni dxandíʼ risaca nga guni tobi ni ná Dios ne gacanenu xcaadxi binni para gunibiáʼ laabe».

19. ¿Xi zabeenduluʼ pa quixhe íqueluʼ ugaandaluʼ xiixa meta espiritual?

¹⁹ Caquiiñeʼ guni felicitarnu ca joven ni runi ni ná Jiobá, purtiʼ maʼ gudixhe íquecaʼ gúnicaʼ ni ná Jiobá neca guidxaagalucaʼ intiica guendanagana. Rúnicaʼ stipa pur ugaandacaʼ meta espiritual, pur guni predicarcaʼ jma ne purtiʼ qué rudiicaʼ lugar cubayú guidxilayú riʼ laacaʼ. Joven, zanda chuʼluʼ seguru cadi pur gana si stipa ni cayúniluʼ ne gunna cadi stúbiluʼ nuuluʼ, purtiʼ nadxii ca hermanu lii ne qué zusaanacaʼ lii. Pa guicaaluʼ encuenta Jiobá lu guiráʼ ni quixhe íqueluʼ gúniluʼ la? guizáʼ galán zabániluʼ.