PUR ca guendanagana ni ridxaagalunu lu ca últimu dxi riʼ la? jmaruʼ si caquiiñeʼ gápanu paciencia (2 Tim. 3:1-5). Ca binni ni nabani tiempu riʼ, jma nadxiicaʼ laca laacaʼ, qué randa rucueezacaʼ laacaʼ ne qué riuucaʼ razón. Clase binni bizéʼtenu riʼ, qué gápacaʼ paciencia. Nga runi cada tobi de ca xpinni Cristu naquiiñeʼ guinabadiidxaʼ laca laa: «¿Ñee laaca maʼ huaxiéʼ napaʼ paciencia casi ca binni riʼ la? ¿Ximodo rusihuinni ti binni napa paciencia? ¿Xi zanda guneʼ para cadi gusaanaʼ de gapaʼ paciencia casi naquiiñeʼ gapa ti xpinni Cristu yaʼ?».

Biblia rusiene: ti binni ni napa paciencia la? qué runi aceptar si xiixa guendanagana, sínuque runi huantar sin guniti esperanza. Ora nápanu paciencia la? qué riníʼ íquenu ni caquiiñesinu, sínuque laaca riníʼ íquenu ni caquiiñeʼ xcaadxi, dede né ni caquiiñeʼ ca binni ni runi tratar laanu mal. Qué riníʼ íquenu maʼ qué zaca xhamígunu binni ca, sínuque ribézanu guchaabe modo laabe. Nga runi qué ridxagayaanu ora ruzeeteʼ Stiidxaʼ Dios pa nadxiinu tuuxa la? zápanu paciencia laa (1 Cor. 13:4). * Cualidad riʼ laaca zeeda ni lu fruto ni rudii espíritu santu (Gál. 5:22, 23). Yanna, ¿xi caquiiñeʼ gúninu para gápanu paciencia yaʼ?

Para ganda gápanu paciencia la? naquiiñeʼ guinábanu Jiobá gudii laanu espíritu stiʼ, purtiʼ laabe rudiibe espíritu stibe ca binni ni napa confianza laabe (Luc. 11:13). Peru neca guizáʼ nadipaʼ espíritu stibe la? naquiiñeʼ quíxhenu de parte stinu ne gúninu ni guinábanu lu oración (Sal. 86:10, 11). Guiráʼ dxi naquiiñeʼ gúninu stipa pur gusihuínninu nápanu paciencia, ti zacá guicaa xcu ni ndaaniʼ ladxidoʼno. Peru naquiiñeʼ gúninu sti cosa para cadi gusaana de gápanu paciencia. ¿Xi laani yaʼ?

Zanda guizíʼdinu gápanu paciencia ra guidúʼndanu ne chinándanu ejemplu stiʼ Jesús. Ora guníʼ apóstol Pablo naquiiñeʼ gusihuinni ca xpinni Cristu maʼ gadxe laacaʼ la? laaca cayábibe laacaʼ gápacaʼ paciencia. Sicaríʼ gúdxibe ca xpinni Cristu que: «Quixhedxí Cristu ladxidoʼto» (Col. 3:10, 12, 15, TNM). Para ganda «quixhedxí» Cristu ladxidoʼno la? caquiiñeʼ gápanu fe cásica gupa Jesús, ne gápanu confianza zuni chaahuiʼ Dios ca cosa ni riguu xizaa laanu ora maʼ caquiiñeʼ guni ni. Pa chinándanu ejemplu stiʼ Jesús la? zápanu paciencia, intiica si guizaaca (Juan 14:27; 16:33).

Neca guiranu maʼ racaláʼdxinu chuʼnu ndaaniʼ guidxilayú cubi ca la? rizíʼdinu gápanu  paciencia ora riníʼ íquenu pabiáʼ napa Jiobá paciencia laanu. Stiidxaʼ Dios ná: «Cadi candaa diʼ Jiobá para guni ni maʼ bidii stiidxaʼ, casi riníʼ ique stale binni, laabe nápabe paciencia laatu purtiʼ qué racaláʼdxibe guinitilú guirutiʼ, sínuque pa ñanda guiráʼ ñaca arrepentir» (2 Ped. 3:9, TNM). ¿Cadi dxandíʼ ora riníʼ íquenu pabiáʼ napa Jiobá paciencia laanu rucaa ni laanu laaca gápanu paciencia xcaadxi la? (Rom. 2:4). Yanna, guidúʼyanu caadxi ejemplu ra naquiiñeʼ gusihuínninu nápanu paciencia.

Guiráʼ cani ridídinu guiráʼ dxi, rucaa cani laanu gusihuínninu pa nápanu paciencia. Guzéʼtenu ti ejemplu, ora chiguininu xiixa nabé risaca la? zándaca ziuu ora naquiiñeʼ cuézanu ti guininu para cadi gucueezanu tuuxa binni ni caníʼ (Sant. 1:19). Zándaca laaca naquiiñeʼ gápanu paciencia ora nuunu né ca hermanu ni napa xiixa costumbre ni ruchiichi laanu. Lugar de guidxiichinu la? zaníʼ íquenu pabiáʼ naroʼbaʼ paciencia napa Jiobá ne Jesús laanu neca rúninu xiixa ni cadi jneza. Laacabe qué ruyadxícabe ra cucheʼsinu. Ni ruuyacabe nga ca cualidad stinu ne stipa ni rúninu pur gúninu ca cosa ca jma jneza (1 Tim. 1:16; 1 Ped. 3:12).

Laaca ziuu ora naquiiñeʼ gusihuínninu nápanu paciencia ora guiníʼ tuuxa bíninu o guninu xiixa cosa malu. Ne pur nga zándaca guidxiichinu nagueenda o guininu cadi dxandíʼ ni. Peru Stiidxaʼ Dios cayabi laanu xii nga ni jma jneza gúninu. Biblia ná: «Jma galán ora riluxe xiixa que ora ruzulú. Jma galán nga gapa binni paciencia que gudxiibaʼ laaca laa. Cadi guidxiichiluʼ nagueenda, purtiʼ binni nahuati nga ridxiichi nagueenda» (Ecl. 7:8, 9). Nga runi neca guiníʼcabe xiixa ni cadi dxandíʼ de laanu la? naquiiñeʼ gápanu paciencia ne guiníʼ íquenu xi guicábinu. Ngapeʼ nga ni biʼniʼ Jesús ora bisituícabe lú (Mat. 11:19).

Ca hermanu ni napa xiiñiʼ, naquiiñeʼ gápacaʼ paciencia, jmaruʼ si ora caquiiñeʼ gulídxecaʼ xiiñicaʼ pur actitud sticaʼ o pur xiixa ni riuuláʼdxicaʼ gúnicaʼ. Guiníʼ íquenu ni bizaaca Mattias, ti hermanu ni nuu Betel de Escandinavia. Dxi gúcabe ti jovenhuiiniʼ nabé biʼniʼ búrlacabe laabe ra scuela pur cani runi crebe. Nacubigá que la? qué ñanna diʼ jñaabe ne bixhózebe pa runi búrlacabe laabe. Peru despué biyúbicabe ximodo gacanécabe xiiñicabe, purtiʼ maʼ qué runi cré cani rusiidiʼ Biblia. Gillis, bixhózebe, guníʼ: «Gúpadu stale paciencia laabe». Purtiʼ gunabadiidxaʼ Mattias: «¿Tuu nga Dios? ¿Laga pa cadi Stiidxabe Biblia yaʼ? ¿Ximodo nánnanu Dios nga cayabi laanu gúninu ndiʼ o ndicaʼ yaʼ?». Laaca gúdxibe bixhózebe: «¿Xiñee cayuni juzgartu naa pa qué runeʼ cré ni runi cretu yaʼ?».

Gillis guníʼ: «Nuu biaje guizáʼ naduxhuʼ riniʼné Mattias laadu, peru cadi pur cadxíchinebe laadu, sínuque ridxiichibe pur cani biziidibe de lu Biblia, purtiʼ nabe runi laani gudíʼdibe lu guendanagana». ¿Xi biʼniʼ Gillis yaʼ? «Stale biaje la? gurieniáʼ laabe ne byuidu diidxaʼ xadxí. Ni runeʼ nga rucaadiaʼgaʼ laabe, ne nuu tiru runeʼ pregunta laabe  para gannaʼ xi riníʼ íquebe ne xi runi sentirbe. Guyuu ora la? rusieneʼ laabe xiixa para guiníʼ íquebe guidubi dxi, ante güidu diidxaʼ sti biaje. Nuu tiru la? rabeʼ laabe caquiiñeʼ gudiibe naa chupa chonna dxi para guiníʼ iqueʼ cani gúdxibe naa. Pur byuieniáʼ Mattias diidxaʼ gatigá la? gunda biénebe jma cani rusíʼdinu ne biʼniʼ crebe guti Cristu pur laanu, biénebe nadxii Dios laanu ne laasi nga napa derechu de guni mandar. Bindaa para gunda biénebe ne guca ni nagana, peru chaahuiʼ chaahuiʼ la? maʼ gunnaxhiibe Jiobá. Naa ne xheelaʼ riéchedu purtiʼ pur paciencia ni gúpadu Mattias dxi naca ti jovenhuiiniʼ la? gunda guleendú ni galán, purtiʼ yendá ni ndaaniʼ ladxidoʼbe».

Gupa Gillis ne xheelaʼ paciencia dxi cayacanecaʼ xiiñicaʼ, ne laaca gúpacabe confianza zacané Jiobá laacabe. Gillis guníʼ: «Stale biaje gudxeʼ Mattias guizáʼ nadxiidu laa ne pur ngue de guidubi ladxidoʼdo rinábadu Jiobá gacané laabe para guiénebe ca cosa que». Guizáʼ rudii ca hermanu riʼ xquíxepeʼ purtiʼ gúpacaʼ paciencia xiiñicaʼ.

Ca xpinni Cristu laaca naquiiñeʼ guiziidicaʼ gápacaʼ paciencia ora cayápacaʼ tuuxa binnilídxicaʼ o xhamígucaʼ ni napa xiixa guendahuará ni maʼ qué rianda. Guidúʼyanu ejemplu stiʼ Ellen, * laabe laaca de Escandinavia laabe.

Raca biaʼ xhono iza, bidii ti ataque cerebral xheelaʼ Ellen ne pur ngue la? maʼ qué runi sentir xheelabe caadxi cosa, maʼ qué riecheʼ, que riáʼ ne qué riuubaʼ ladxidoʼ. Nabé bisidxaga ni Ellen. Sicaríʼ guniʼbe: «Guizáʼ caquiiñeʼ gapaʼ paciencia ne naquiiñeʼ guneʼ stale oración». Ne laaca guniʼbe: «Ti textu nabé riuuladxeʼ ne riguixhedxí ladxiduáʼ nga Filipenses 4:13, ra ná: “Napaʼ stipa para guneʼ intiica cosa purtiʼ rudii Dios poder naa”». Pur stipa ni rudii Dios laabe la? cadi careebe gana ne nápabe paciencia, purtiʼ nápabe confianza zacané Dios laabe (Sal. 62:5, 6).

Ejemplu ni jma naroʼbaʼ nápanu nga stiʼ Jiobá, purtiʼ guirútiruʼ napa paciencia casi nápabe (2 Ped. 3:15). Lu Biblia zeeda stale ejemplu ra bisihuínnibe nápabe gran paciencia (Neh. 9:30; Is. 30:18). Guzéʼtenu ti ejemplu, guidúʼyanu xi biʼniʼ Jiobá ora gudxi Abrahán laabe cadi jneza gunitilube Sodoma. Qué nucueezabe Abrahán, sínuque gúpabe paciencia laa ne bicaadiágabe xi naguu xizaa laa. Despué bisihuínnibe bicaadiágabe laa neca ngueca gunabadiidxaʼ laabe stale biaje, ne gúdxibe laa pa nuu chii binni ni runi ni jneza Sodoma la? qué zunitilube lugar que (Gén. 18:22-33). Guizáʼ sicarú ejemplu bidii Jiobá, purtiʼ gupa paciencia ne bicueeza laca laa.

Rihuinni dxíchica tobi de cualidad nabé risaca gapa guiráʼ ca xpinni Cristu nga paciencia. Pa gúninu stipa pur gápanu cualidad riʼ la? zusisácanu Bixhózenu ni nuu guibáʼ, Dios ni nadxii laanu ne ni napa paciencia laanu, ne ziuʼnu lade ca xpínnibe cani «gucuaa promesa stiʼ Dios, purtiʼ gúpacaʼ fe ne paciencia» (Heb. 6:10-12, TNM).