1. ¿Ximodo rusihuinni cani bizáʼ Jiobá naca ti Dios ni rudii de ni napa?

STUBI Jiobá nuu dxi bizáʼ guiráʼ ni nuu guibáʼ ne ni nuu lu Guidxilayú. Peru lugar de niníʼ ique Jiobá puru para laasi la? bidiibe guendanabani cani nuu guibáʼ ne cani nuu lu Guidxilayú. Nácabe ti Dios nayecheʼ ne riuuláʼdxibe gudiibe de ni nápabe (1 Tim. 1:11; Sant. 1:17). Ne cumu racaláʼdxibe chuʼnu nayecheʼ la? rusiidibe laanu gudiʼnu de ni nápanu (Rom. 1:20).

2, 3. a) ¿Xiñee riuʼnu nayecheʼ ora rudiʼnu de ni nápanu? b) ¿Xi chiguizíʼdinu lu tema riʼ?

² Bizáʼ Dios binni cásica laa (Gén. 1:27). Bizaʼbe laanu zacá para gusihuínninu ca cualidad stibe. Nga runi pa racaláʼdxinu guibáninu nayecheʼ la? naquiiñeʼ chinándanu ejemplu stibe ra guizaaláʼdxinu prójimo stinu ne ra gudiʼnu de ni nápanu (Filip. 2:3, 4; Sant. 1:5). ¿Xiñee yaʼ? Purtiʼ zacá nga bizáʼ Dios laanu. Nga runi neca nácanu imperfectu zanda gudiʼnu de ni nápanu cásica rúnibe ni.

³ Biblia rusiidiʼ laanu gudiʼnu de ni nápanu. Lu tema riʼ zazíʼdinu caadxi cosa ni cayabi Stiidxaʼ Dios laanu de ni  bizéʼtenu riʼ. Zazíʼdinu pa gudiʼnu de ni nápanu la? ziuulaʼdxiʼ Dios ni rúninu ne zucaa ni laanu guni cumplirnu dxiiñaʼ ni bisaananebe laanu. Laaca zazíʼdinu xiñee ora rudiʼnu de ni nápanu racané ni laanu chuʼnu nayecheʼ, ne xiñee cadi naquiiñeʼ gusaana de gudiʼnu de ni nápanu.

4, 5. ¿Ximodo bisihuinni Jiobá ne Jesús riuuláʼdxicaʼ gudiicaʼ de ni nápacaʼ?

⁴ Racalaʼdxiʼ Jiobá chinándanu ejemplu stiʼ, nga runi riéchebe ora rudiʼnu de ni nápanu (Efes. 5:1). Rihuinni dxíchica racalaʼdxiʼ Jiobá chuʼnu nayecheʼ. Rihuinni zacá ni pur modo bizaʼbe laanu ne pur guiráʼ ca cosa sicarú ni bizaʼbe (Sal. 104:24; 139:13-16). Nga runi rusisácanu laabe ora rúninu stipa pur gusiéchenu xcaadxi binni.

⁵ Laanu, ca xpinni Cristu, rúninu stipa pur chinándanu ejemplu bisaana Jesús, purtiʼ laa biluíʼ laanu dede pabiáʼ zanda gudiʼnu de ni nápanu. Jesús peʼ guníʼ: «Naa nga Hombre Biseenda Dios ne benda cadi para gacané cabe naa, sínuque para gacaniá laacabe ne para udiee xpida para ilá stale binni» (Mat. 20:28). Nga runi gudxi apóstol Pablo ca xpinni Cristu ca diidxaʼ riʼ: «Laguietenalaʼdxi pabiáʼ nadóʼ uca Cristu Jesús», purtiʼ bisaanabe guiráʼ ni nápabe ne «beda gaca be casi ti mozo» (Filip. 2:5, 7). Nga runi, galán guinabadiidxanu laca laanu: «¿Ñee zanda chinandaʼ ejemplu stiʼ Jesús jma galán de biaʼ cayuneʼ ni yanna riʼ la?» (biindaʼ 1 Pedro 2:21).

6. ¿Xi bisiidiʼ Jesús laanu ra guníʼ parábola stiʼ samaritanu que? (Biiyaʼ dibuju ni zeeda ra ruzulú tema riʼ).

⁶ Pa chinándanu ejemplu stiʼ Jiobá ne Jesús la? ziuulaʼdxiʼ Jiobá ni rúninu. Para chuuláʼdxibe ni rúninu la? naquiiñeʼ guizaaláʼdxinu xcaadxi binni ne gacanenu laacaʼ lu guiráʼ ni iquiiñecaʼ. Lu parábola ni guníʼ Jesús de samaritanu nachaʼhuiʼ que, bisiénebe pabiáʼ risaca guni ca discípulo stibe ni nuu lu nacaʼ para gacanecaʼ binni, ne naquiiñeʼ gacanécabe guiráʼ clase binni (biindaʼ Lucas 10:29-37). Cadi guiaandaʼ laanu guníʼ Jesús parábola riʼ, purtiʼ sicaríʼ gunabadiidxaʼ ti judíu laabe: «Tuu nga stobi [o prójimo] ni riete lu ley ca naquiiñe ganaxhiee yaʼ». Ni bicabi Jesús hombre riʼ rusiidiʼ ni laanu naquiiñeʼ chuʼnu dispuestu gudiʼnu de ni nápanu cásica biʼniʼ samaritanu que, ti chuulaʼdxiʼ Dios ni rúninu.

7. ¿Ximodo rusihuínninu runi crenu Jiobá si nga nanna xii nga ni jma galán para laanu? Bisiene ni.

⁷ Laanu, ca xpinni Cristu, nápanu stale razón para gudiʼnu de ni nápanu. Tobi de ca razón riʼ nga pur ni guníʼ Binidxabaʼ ndaaniʼ jardín de Edén que. ¿Xiñee yaʼ? Purtiʼ Binidxabaʼ guníʼ zabani Adán, Eva ne guiráʼ binni jma galán pa guyúbicaʼ puru para laasicaʼ ne pa qué guzuubacaʼ stiidxaʼ Dios. Adán ne Eva biyúbicaʼ para laasicaʼ. Gucalaʼdxiʼ Eva ñaca casi Dios, ne Adán biyubi guni ni riuulaʼdxiʼ xheelaʼ lugar de ñuni ni riuulaʼdxiʼ Jiobá (Gén. 3:4-6). Rihuinni dxíchica gastiʼ qué nibeendúcabe. Pa guyúbinu puru para laasinu qué ziuʼnu nayecheʼ, sínuque ziuʼnu triste. Pa gudiʼnu de ni nápanu la? zusihuínninu Jiobá si nga nanna xii nga ni jma galán para laanu.

8. ¿Xiñee naquiiñeʼ niníʼ ique Adán ne Eva ca binni ni gueeda despué?

⁸ Neca Adán ne Eva si nga guyuu ndaaniʼ jardín de Edén que la? ni biʼniʼ mandar  Jiobá laacabe gúnicabe que naquiiñeʼ nucaa ni laacabe niníʼ íquecabe xii nga jma galán para ca binni ni gueeda despué. Guluu Dios ndaayaʼ laacabe ne gudxi laacabe guidálecabe, ne guchácabe Guidxilayú riʼ de xiiñicabe ne gápacabe ni (Gén. 1:28). Cásica rizaalaʼdxiʼ Jiobá guiráʼ ni bizáʼ la? laacabe laaca naquiiñeʼ nizaaláʼdxicabe ñacanécabe para nibani ca binni ni gueeda despué nayecheʼ. Para nibani guirácabe nayecheʼ la? naquiiñeʼ ñúnicabe guidubi Guidxilayú riʼ ti paraísu. Ne para ñanda ñaca ni la? naquiiñeʼ ñúnicabe dxiiñaʼ juntu casi ti familia.

9. ¿Xiñee nibani guiráʼ binni nayecheʼ pa ñúnicaʼ guidubi Guidxilayú riʼ ti paraísu?

⁹ Ra ñuni guiráʼ binni perfectu que guidubi Guidxilayú riʼ ti paraísu la? ñacanécabe para ñaca ni naguixhe ique Jiobá ne zacá ñuucabe lu guendariziilaʼdxiʼ stiʼ (Heb. 4:11). ¿Ñee ruxuíʼlunu pabiáʼ nayecheʼ nibánicabe la? Guizáʼ niguu Jiobá ndaayaʼ laacabe, purtiʼ zacá nusihuínnicabe riuuláʼdxicabe gudiicabe de ni nápacabe ne rizaaláʼdxicabe xcaadxi binni.

10, 11. ¿Ximodo zanda guni cumplirnu dxiiñaʼ de guni predicarnu ne gacanenu binni gaca discípulo?

¹⁰ Tiempu riʼ maʼ bidii Jiobá ti dxiiñaʼ ca xpinni: guni predicarcaʼ ne gacanecaʼ binni gaca discípulo. Para ganda gúninu dxiiñaʼ riʼ la? naquiiñeʼ guizaaláʼdxinu gacanenu xcaadxi binni. Pa dxandíʼ nadxiinu Dios ne prójimo stinu la? qué zareʼnu gana de guni predicarnu ne de gacanenu binni.

¹¹ Lu primé siglu que, guníʼ apóstol Pablo laa ne xcaadxi xpinni Cristu bíʼninecaʼ «Dios dxiiñaʼ» purtiʼ bidxiibacaʼ ne bizeecaʼ ca bidxii ni zeeda gaca stiidxaʼ Reinu (1 Cor. 3:6, 9). Laanu laaca zanda guninenu «Dios dxiiñaʼ». ¿Ximodo yaʼ? Ra gudiʼnu de tiempu stinu, stipa stinu ne ni nápanu para gúninu dxiiñaʼ ni bisaanané Dios laanu. ¡Ti privilegiu guizáʼ sicarú nga guninenu Dios dxiiñaʼ!

12, 13. ¿Xi ribeendunu ora racanenu binni gaca discípulo?

¹² Laaca guizáʼ riéchenu ora runi predicarnu, purtiʼ cudiʼnu tiempu ne stipa stinu para gacanenu xcaadxi. Stale hermanu ni riquiiñeʼ tiempu stiʼ para gusiidiʼ binni de lu Biblia riniʼcaʼ ndiʼ nga dxiiñaʼ ni racané laacaʼ chuʼcaʼ nayecheʼ. Guizáʼ riéchenu ora ridúʼyanu maʼ cayene tuuxa binni cani rusiidiʼ Biblia, ora jma maʼ ziyápabe fe ne ora guchaabe xquendanabánibe ne guiníʼnebe xcaadxi binni ni caziidibe. Guizáʼ biecheʼ Jesús ora biʼyaʼ «nabé nayeche bigueta» ca 70 discípulo stiʼ dxi yeguni predicarcaʼ purtiʼ guleenducaʼ stale cosa galán (Luc. 10:17-21).

¹³ Lu guidubi Guidxilayú, riecheʼ ca publicador ora rúʼyacaʼ cuchaa Stiidxaʼ Dios xquendanabani stale binni. Guiníʼ  íquenu ni bizaaca ti baʼdudxaapaʼ láʼ Anna, laabe yendézabe Europa oriental ti lugar ra caquiiñeʼ jma publicador. * Sicaríʼ guniʼbe: «Guizáʼ riuuladxeʼ ora ruuyaʼ stale binni riuulaʼdxiʼ guiziidiʼ de lu Biblia. Ne nabé runeʼ sentir nayecheʼ ora runeʼ predicar. Ora ribiguetaʼ ra lidxeʼ qué lica rapa tiempu para guiníʼ iqueʼ ca problema stinneʼ. Jma ricá iqueʼ ca binni ni runeʼ estudiarniáʼ, problema sticaʼ ne cani riguu xizaa laacaʼ. Ruyubeʼ modo gacaniáʼ ne cuaaʼ gana laacabe. Yanna huaxa maʼ bidieeʼ cuenta “jma nayeche ni rudii que ni ricaa”» (Hech. 20:35).

14. Neca huaxiéʼ binni gucaadiaga laanu, ¿xiñee zanda guni sentirnu nayecheʼ ora guni predicarnu?

¹⁴ Neca qué gucaadiaga binni laanu la? runi sentirnu nayecheʼ, purtiʼ zacá cudiʼnu laacabe oportunidad de gucaadiágacabe ca diidxaʼ nacubi ne galán stiʼ Reinu. Dxiiñaʼ ni rúninu tiempu riʼ zeeda gaca ni cásica dxiiñaʼ ni biʼniʼ profeta Ezequiel. Sicaríʼ gudxi Jiobá laabe: «Ne naquiiñeʼ gábiluʼ laacabe ca diidxaʼ stinneʼ riʼ, pa gucaadiágacabe lii o pa coʼ» (Ezeq. 2:7; Is. 43:10). Neca nuu binni qué rusisaca mensaje ni zinenu ra nuu, peru Dios rusisaca stipa ni rúninu (biindaʼ Hebreos 6:10). Sicaríʼ guníʼ ti publicador: «Maʼ bidxíʼbadu, maʼ bizeʼdu ne maʼ biʼniʼ orardu para gacané Jiobá laacabe chuuláʼdxicabe guiziidicabe jma» (1 Cor. 3:6).

15. ¿Ñee ca binni si ni rusisaca ni rúninu nga naquiiñeʼ gudiʼnu de ni nápanu la? Bisiene ni guicábiluʼ.

¹⁵ Jesús racalaʼdxiʼ chuʼnu nayecheʼ, nga runi gúdxibe laanu: «Lagudii ne zudiicabe laatu. Zundaatecabe stale ndaaniʼ xhábatu. Zuniibicabe ni ne zuquídxicabe ni, dede zaxii ni. Purtiʼ modo guni tratartu xcaadxi, zacaca zuni tratárcabe laatu» (Luc. 6:38, TNM). Stale binni raca nachaʼhuiʼ ora ruuyacaʼ rudiʼnu de ni nápanu. Dxandíʼ, cadi guiráʼ diʼ binni zaná guicaa ni gudiʼnu laa, peru ca binni ni rudii xquíxepeʼ pur ni rudiʼnu laacaʼ la? rucaa ni laacaʼ gacanecaʼ xcaadxi binni. Nga  runi, neca ruluíʼ qué rusisaca binni ni rúninu la? cadi naquiiñeʼ gusaana de gudiʼnu de ni nápanu, purtiʼ qué gánnanu xi guiráʼ zanda cueendunu pur gacanenu xcaadxi.

16. ¿Tuu nga cani naquiiñeʼ gudiʼnu de ni nápanu ne xiñee?

¹⁶ Ti binni rudii de guidubi ladxidóʼ la? qué ribeza gudiicabe laa xiixa. Nga runi Jesús guníʼ: «Ora guʼnu endaró la? guridxi cani qué gapa gastiʼ, cani nachangu náʼ, cani nachangu ñee, cani nacheepa lú. Ne nabé zieche luʼ, ti laacabe qué gapa cabe ni quixe cabe lii» (Luc. 14:13, 14). Biblia ná ti binni rudii de ni napa zaguu Dios ndaayaʼ laa ne «tutiica binni ni gusihuinni riene ca pobre» la? zabani nayecheʼ (Prov. 22:9; Sal. 41:1). Rudiʼnu de ni nápanu purtiʼ ora racanenu xcaadxi binni runi sentirnu jma galán.

17. ¿Xi zanda gudiʼnu binni para chuʼnu nayecheʼ?

¹⁷ Ora bizeeteʼ apóstol Pablo ca diidxaʼ ni guníʼ Jesús ra ná «jma nayeche ni rudii que ni ricaa» la? cadi caníʼsibe gudiʼnu cosa material, sínuque laaca caniʼbe cuʼnu gana ne gacanenu cani caquiiñeʼ gacanécabe laacaʼ (Hech. 20:31-35). Pur ni biʼniʼ ne guníʼ apóstol Pablo bisiidibe laanu nabé risaca nga gudiʼnu de stipa stinu, tiempu stinu, gacanenu ne gannaxhiinu xcaadxi.

18. ¿Xi riníʼ caadxi especialista rizaaca ora rudii binni de ni napa?

¹⁸ Huayuuyaʼ ca sociólogo ca ora rudii tuuxa de ni napa la? racané ni laa guni sentir nayecheʼ. Lu ti información ná, stale binni riníʼ runi sentir nayecheʼ despué de gacané o guni xiixa pur xcaadxi. Ca investigador ca nacaʼ ora racanenu sti binni racané ni laanu guni sentirnu napa xquendanabáninu sentidu. Ne ca especialista ni nanna de tema riʼ rábicaʼ binni chigacanecaʼ xcaadxi purtiʼ zacané ni laacaʼ chuʼcaʼ nazaaca ne chuʼcaʼ nayecheʼ. Qué ridxagayaanu ni, purtiʼ nánnanu Biblia ca zeeda ni de Jiobá, Dios ni bizáʼ laanu ne ni nadxii laanu (2 Tim. 3:16, 17).

19, 20. ¿Xi razón nuu para gudiʼnu de ni nápanu?

¹⁹ Zándaca zaca nagana para laanu gudiʼnu de ni nápanu, purtiʼ nabáninu lade binni ni ruyubi puru para laasi. Peru Jesús guníʼ guiropaʼ mandamientu ni jma risaca nga gannaxhiinu Jiobá de guidubi ladxidoʼno, guidubi xhiálmanu, guidubi xquendabiaaninu ne stipa stinu, ne gannaxhiinu prójimo stinu cásica nadxiinu laanu (Mar. 12:28-31). Casi maʼ bidúʼyanu lu tema riʼ, cani nadxii Dios la? rúnicaʼ stipa pur chinándacaʼ ejemplu stibe. Jiobá ne Jesús rudiicaʼ de ni nápacaʼ, ne guirópacabe cayábicabe laanu gúninu cásica rúnicabe, purtiʼ dxandipeʼ ziuʼnu nayecheʼ pa gúninu zacá. Pa gúninu stipa pur gudiʼnu de ni nápanu Dios ne prójimo stinu la? cadi zusisácasinu Jiobá, sínuque zabeendunu ni galán ne laaca zabeendú xcaadxi binni ni galán.

²⁰ Zándaca maʼ cayúninu stipa pur gacanenu prójimo stinu ne jmaruʼ si ca hermanu stinu (Gál. 6:10). Pa qué guireʼnu gana la? zándaca gannaxhii xcaadxi binni laanu ne gudiicaʼ xquíxepeʼ laanu pur dxiiñaʼ ni rúninu ne zuni sentirnu nayecheʼ. Proverbios 11:25 ná: «Ti binni ni rudii de ni napa, zié ni laa galán ne ni racané xcaadxi, laaca zacanécabe laa». Nuu stale forma o stale modo zanda gudiʼnu de ni nápanu ne gácanu nachaʼhuiʼ sin cuézanu guicanu xiixa. Lu sti tema ca zazíʼdinu chupa chonna de laacani.