1, 2. ¿Ximodo rusihuinni experiencia stiʼ Tony de que zanda guchaa ti binni?

TONY nga ti joven ni qué nusiniisi bixhoze laa ne qué ñácabe ti buen estudiante. Dede guníʼ íquebe gusaanabe scuela. Guiráʼ ca fin de semana maʼ zizánebe ca xhamígube o maʼ zécabe cine. Cadi nadúxhube ne qué riguʼbabe droga, peru qué gapa xquendanabánibe sentidu ne riníʼ íquebe pa dxandíʼ nuu Dios. Peru binibiaʼbe ti guendaxheelaʼ Testigu ne byuíʼnebe laacaʼ de ca duda ne ca pregunta ni nápabe. Ca hermanu riʼ bidiicaʼ laabe ca folletu ni láʼ El origen de la vida ne ¿Es la vida obra de un Creador?

² Ora yeganna guendaxheelaʼ riʼ laabe sti biaje la? maʼ bichaa Tony. Biindabe ca folletu que né stale gana dede maʼ nacuuxhuʼ cani ne ñeʼchuʼ punta cani. Tony gudxi laacabe: «Dxandíʼ nuu ti Dios». Ne biʼniʼ aceptarbe ti cursu de lu Biblia ne chaahuiʼ chaahuiʼ bichaabe xquendanabánibe. Ne gúcabe ti buen estudiante ra scuela. Dede director que guizáʼ bidxagayaa, ne gúdxibe Tony: «Maʼ nápaluʼ ti actitud galán ne maʼ galán ca calificación stiuʼ. ¿Ñee pur cayuni estudiárneluʼ ca Testigu nga maʼ bichaaluʼ la?». Tony gudxi laabe pur ngue, ne gudxi laabe xi caziidiʼ. Bilúxebe preparatoria ne yanna maʼ precursor regular laabe ne  maʼ nácabe siervu ministerial. Ne yanna maʼ nuube nayecheʼ purtiʼ maʼ ruuyabe Jiobá casi Bixhózebe (Sal. 68:5).

3. ¿Xi conseju cudii Jiobá ca joven?

³ Ni bizaaca Tony rusietenalaʼdxiʼ ni laanu nabé rizaalaʼdxiʼ Jiobá ca joven. Racaláʼdxibe guibániluʼ galán ne chuʼluʼ nayecheʼ. Nga runi cudiibe conseju riʼ lii: «Bietenalaʼdxiʼ, yanna, de [Dios] ni jma nandxóʼ ni bizáʼ lii, ca dxi nahuiiniluʼ» (Ecl. 12:1). Tiempu riʼ, cadi fácil nga guni tuuxa ni bizéʼtenu riʼ, peru laaca cadi nagana ni. Zanda gacané Jiobá lii guibániluʼ galán, cadi ora si joven lii, sínuque lu guidubi xquendanabániluʼ. Para guiénenu ximodo nga zanda gacanebe lii la? guidúʼyanu xi gucané ca israelita ganda guni ganarcaʼ ne chuʼcaʼ lu Tierra Prometida ne xi gucané David para guni ganar Goliat.

4, 5. ¿Xi rizíʼdinu ora ridúʼndanu xi gucané ca israelita para guni ganarcaʼ ne chuʼcaʼ lu Tierra Prometida ne xi gucané David para guni ganar Goliat? (Biiyaʼ ca dibuju ni zeeda ra ruzulú tema riʼ).

⁴ Dxi mayaca chuʼ ca israelita que ndaaniʼ Tierra Prometida que la? qué ñabi Dios laacabe guni entrenárcabe para chécabe lu guerra nin para gácacabe ti buen soldadu (Deut. 28:1, 2). Lugar de nga la? gúdxibe laacaʼ chinándacaʼ ca mandatu stibe ne gápacaʼ confianza laabe (Jos. 1:7-9). Zándaca para ti binni cadi biaʼsi ni canabaʼ Jiobá laacabe que, peru jneza conseju bidii Jiobá laacabe, purtiʼ gucanebe laacaʼ guni ganarcaʼ ca cananeu stale biaje (Jos. 24:11-13). Nga runi, para guzúʼbanu stiidxaʼ Dios la? caquiiñeʼ gápanu fe, ne pa gápanu fe la? siempre zabáninu galán, cásica bibani ca binni de dxiqué.

⁵ Guca Goliat ti guerreru ni nasoo casi chonna metru. Ne zinebe guiráʼ guiibaʼ riné ti soldadu (1 Sam. 17:4-7). Peru David chupa cosa si ziné: ti guixhe bixeendaʼ ne fe ni nápabe Jiobá. Para ca binni ni qué gapa fe la? nahuati David. Peru cadi jneza ni, purtiʼ Goliat nga nahuati (1 Sam. 17:48-51).

6. ¿Xi zazíʼdinu lu tema riʼ?

⁶ Lu tema gudídinu que bizíʼdinu tapa cosa ni racané para chuʼnu nayecheʼ: guni tendernu ca necesidad espiritual stinu, gaca xhamígunu ca binni ni nadxii Jiobá, gápanu meta ni dxandíʼ risaca ne gusisácanu libertad ni rudii Dios laanu. Lu tema riʼ zazíʼdinu jma de ca cosa riʼ ra guni analizarnu caadxi principiu ni zeeda lu Salmo 16.

7. a) ¿Ximodo nga ti binni espiritual? b) ¿Xii nga ni bidii Jiobá David, ne xi efectu gupa ni luguiabe?

⁷ Ti binni espiritual napa fe Dios ne runi stipa pur guʼyaʼ ca cosa ca modo ruuyaʼ Dios ni. Rinabaʼ tu gacané laa ne nuu dispuestu chinanda ni (1 Cor. 2:12, 13). Zaca guca David. Ti biaje ora caniʼbe de amistad ni nápabe né Jiobá lu ti canción la? guniʼbe laani nga tobi de ca cosa ni rudii Jiobá laabe (Sal. 16:5). Rudiibe xquíxepeʼ pur nácabe xhamigu Jiobá Dios ne riuube gaxha de laa (Sal. 16:1). Pur nga bicaabe nabé nuube nayecheʼ. Ne zaca ni purtiʼ amistad ni gúpabe né Jiobá nga ni jma bisiecheʼ laabe (biindaʼ Salmo 16:9, 11).

8. ¿Gunáʼ nga caadxi de ca cosa ni racané para gapa xquendanabani binni sentidu?

⁸ Cani nabani para si guiechené ni napa o guni ganar stale bueltu la? qué zanda guibánicaʼ nayecheʼ cásica bibani David (1 Tim. 6:9, 10). Sicaríʼ guníʼ ti hermanu de Canadá: «Qué zanda guibani  binni nayecheʼ pur ca cosa ni cueendú lu xquendanabani, sínuque pur ca cosa ni rudiʼnu Jiobá Dios, purtiʼ laa nga rudii laanu guiráʼ ca cosa galán ni nápanu» (Sant. 1:17). Nga runi, pa nápaluʼ ti fe nadipaʼ Jiobá ne gúniluʼ ni nabe la? zapa xquendanabániluʼ sentidu ne zabániluʼ galán. Para gápaluʼ jma fe la? caquiiñeʼ cueeluʼ tiempu para Jiobá. ¿Ximodo zanda gúniluʼ ni yaʼ? Ra gúʼndaluʼ Stiidxabe, gúʼyaluʼ guiráʼ ni bizaʼbe ne guiníʼ íqueluʼ ca cualidad stibe, ne tobi de laani nga guendarannaxhii ni runi sentirbe pur lii (Rom. 1:20; 5:8).

9. Cásica biʼniʼ David, ¿xi zanda gúniluʼ para guchaa Stiidxaʼ Dios lii?

⁹ Cumu naca Jiobá ti buen Padre ne nadxii laanu la? nuu biaje riguu jnézabe laanu. Ne David qué ñuu ora nidxiichi ora guluu jneza Jiobá laa, ngue runi guniʼbe: «Zusisacaʼ Jiobá, purtiʼ laa rudii conseju naa. Ne huaxhinni riguu jneza xquendabiaaneʼ naa» (Sal. 16:7). Guníʼ íquebe ni ná ca conseju stiʼ Dios ne bíʼnibe stipa pur guiziidibe guiníʼ íquebe casi riníʼ ique Dios. Bidiibe lugar guchaa ca conseju riʼ laabe, o guchaa ni laabe ne gácabe ti binni jma nachaʼhuiʼ Pa gúniluʼ ni biʼniʼ David la? jma zannaxhiiluʼ Jiobá ne qué zusaana de guzuubaluʼ stiidxabe. Ne laaca zácaluʼ ti cristianu maduru. Ti hermana láʼ Christin guníʼ: «Ora runeʼ estudiar ne runeʼ meditar ni ruundaʼ la? runeʼ sentir naapeʼ nga caniʼné Jiobá».

10. Casi ná Isaías 26:3, ¿xi zabeenduluʼ pa gácaluʼ ti binni espiritual?

¹⁰ Pa nácaluʼ ti binni espiritual la? zacané Jiobá lii gácaluʼ ti binni ni nanna ne ni riene para gúʼyaluʼ ca cosa ni rizaaca lu guidxilayú riʼ ne futuro stiluʼ modo ruuyabe ni. Ne zúnibe ni purtiʼ racaláʼdxibe gánnaluʼ xii nga ni jma risaca para lii, para guicaaluʼ decisión jneza ne para cadi guidxíbiluʼ futuro stiluʼ. Profeta Isaías guníʼ zapa Jiobá cani gapa confianza laa si ne qué zusaana de gudiibe paz laacaʼ (biindaʼ Isaías 26:3). Ti hermanu láʼ Joshua ni nabeza Estados Unidos guníʼ ti cosa ni dxandíʼ: «Pa nuuluʼ gaxha de Jiobá, zuuyaluʼ xipeʼ nga ni jma risaca ne xi coʼ».

11. ¿Ximodo gulí David ca xhamigu?

¹¹ (Biindaʼ Salmo 16:3). Bidii David cuenta caquiiñeʼ gapa amigu ni gacané laa, ngue runi gulibe cani nadxii Jiobá para gaca xhamígube. Gúdxibe laacaʼ «santu» purtiʼ rúnicaʼ stipa pur chinándacaʼ ca norma moral stiʼ Dios. Ne guniʼbe nabé riéchebe ora nuube né laacaʼ. Ne sti hombre bicaa Salmos laaca zacá guníʼ. Bicaabe nácabe xhamigu de guiráʼ cani ridxibi Dios ne ni runi ni ná (Sal. 119:63). Casi bidúʼyanu lu tema ni gudiʼdiʼ que, lii laaca zanda guidxélaluʼ xhamíguluʼ lade ca binni ni nadxii ne ni ruzuubaʼ stiidxaʼ Jiobá. Neca de gadxé gadxé iza laacaʼ.

12. ¿Xiñee guizáʼ guca xhamigu David ne Jonatán?

¹² Qué nibí diʼ David ñapa xhamigu biaacaʼ laa. ¿Ñee rietenaláʼdxiluʼ tu lá tobi de ca jma xhamígube la? Jonatán. Amistad stícabe nga tobi de ca amistad jma galán riete lu Biblia. Peru ¿ñee nánnaluʼ jma huaniisi Jonatán treinta iza para David la? Yanna, ¿xiiñeʼ guizáʼ guca xhamígucabe yaʼ? Purtiʼ guirópacabe gúpacabe fe Dios, biʼniʼ respetárcabe laacabe ne bisisácacabe ca cualidad ni nápacabe, casi valor ni gúpacabe ora gudindenécabe ca xhenemigu Dios (1 Sam. 13:3; 14:13; 17:48-50; 18:1).

13. ¿Ximodo zanda gápanu jma xhamígunu? Bizeeteʼ ti ejemplu.

¹³ Cásica David ne Jonatán, laanu laaca ziuʼnu nayecheʼ pa gaca xhamígunu ca binni ni nadxii Jiobá ne cani rusihuinni napa fe laabe. Ti hermana láʼ Kiera ni maʼ  ziné stale iza de cayuni servir Dios guníʼ: «Napaʼ xhamiguáʼ lu guidubi guidxilayú, binni de gadxé gadxé cultura ne costumbre». Pa gúniluʼ casi runi hermana riʼ la? zuuyaluʼ ximodo racané Stiidxaʼ Dios ne espíritu santu laanu para chuʼnu tobi si.

14. a) ¿Xi zacané lii gápaluʼ meta ni dxandíʼ risaca? b) ¿Xi huaníʼ caadxi joven de gapa binni meta espiritual?

¹⁴ (Biindaʼ Salmo 16:8). Para David la? ni jma risaca nga guni ni ná Dios. Lii laaca zabániluʼ galán ne nayecheʼ pa chinándaluʼ ejemplu stibe. Gudixhe gúniluʼ ni ná Dios primé lu xquendanabániluʼ ne ora quixhe íqueluʼ ugaandaluʼ xiixa meta cadi guiaandaʼ lii xii nga ni jma racaláʼdxibe gúniluʼ. Ti hermanu láʼ Steven guníʼ: «Ora gapaʼ ti meta ne guneʼ stipa pur ugaanda ni racané ni ne rusiecheʼ ni naa stale». Ne ti joven de Alemania ni cayuni servir stiʼ país guníʼ: «Ora maʼ igolaʼ cadi nuaaʼ guietenalaʼdxeʼ bineʼ puru si cosa para naa». Racaláʼdxidu guiníʼ íqueluʼ casi riníʼ ique ca hermanu riʼ. Pa zacá ni la? biquiiñeʼ ca talentu stiuʼ para gusisácaluʼ Jiobá ne para gúniluʼ cosa pur xcaadxi (Gál. 6:10). Gupa meta ne gunabaʼ Jiobá gacané lii guni cumplirluʼ cani. Guizáʼ riuuláʼdxibe guicábibe ca oración ca (1 Juan 3:22; 5:14, 15).

15. ¿Xi meta zanda gápaluʼ? (Biiyaʼ recuadru ni láʼ « Ca meta ni zanda ugaandaluʼ»).

¹⁵ ¿Xi meta zanda gápaluʼ? Tobi de laacani nga guni comentarluʼ lu reunión modo cayéneluʼ información ca, gácaluʼ precursor o guni servirluʼ Betel. Laaca zanda guiziidiluʼ sti diidxaʼ para gacaneluʼ ti congregación. Barak, ti joven ni runi servir de tiempu completu guníʼ: «Gástiruʼ nin sti dxiiñaʼ ni jma rusiecheʼ naa que guiasaʼ guiráʼ dxi para guneʼ xhiiñaʼ Jiobá né stale gana».

16. ¿Xi biʼniʼ sentir David pur ca Ley ne ca principiu stiʼ Dios, ne xiñee?

¹⁶ (Biindaʼ Salmo 16:2, 4). Lu tema gudídinu que la? bidúʼyanu runi ca Ley ne ca principiu stiʼ Dios laanu libre purtiʼ racané cani laanu gannaxhiinu ni jneza ne gacananaláʼdxinu ca cosa malu (Amós 5:15). Lu idioma ni gucuá Biblia primé, ni nuu David guiníʼ lu Salmo 16:2 nga para  laabe de Jiobá nga reeda guiráʼ cosa galán. Guizáʼ biʼniʼ David stipa pur gapa ca cualidad stiʼ Dios ne gacananalaʼdxiʼ ca cosa ni nanalaʼdxiʼ Dios, casi idolatría. Práctica riʼ la? runi humillar ni binni ne laaca raxha ni Jiobá gloria ni naquiiñeʼ guicaa (Is. 2:8, 9; Apoc. 4:11).

17, 18. a) ¿Xi guníʼ David zabeendú binni pa guni adorar dios falsu? b) ¿Xiñee rapa stale binni yuubaʼ?

¹⁷ Tiempu gucuá Biblia la? runi practicar binni inmoralidad sexual ora maʼ cayuni adorar dios falsu (Os. 4:13, 14). Stale binni biʼniʼ adorar dios falsu purtiʼ riuuláʼdxicaʼ guni practicarcaʼ inmoralidad sexual. Peru qué rusiecheʼ ni laacabe, laga jmaruʼ si racanácabe. Lu Salmo 16:4 guníʼ David ca binni «ruyubi guni adorar dios falsu rápacaʼ stale yuubaʼ». Dede biʼniʼ ofrecer ca binni que ca xiiñicaʼ casi sacrificiu para ca dios falsu que (Is. 57:5). Qué ñuulaʼdxiʼ Jiobá ca cosa malu ni rúnicabe (Jer. 7:31). Pa nibániluʼ tiempu que, ¿cadi dxandíʼ nabé ñécheluʼ pa ñuni adorar bixhózeluʼ ne jñaaluʼ Jiobá la?

¹⁸ Ca dxi stinu riʼ, laaca runi permitir ca religión falsu inmoralidad sexual, dede runi permitircaʼ homosexualidad. Peru laaca rapa binni guendanagana cásica gupa ca de binni tiempu gucuá Biblia (1 Cor. 6:18, 19). Stale binni runi cré nácacaʼ libre, peru ni dxandíʼ nga nápacaʼ «stale yuubaʼ». Ne zándaca huadiiluʼ cuenta de nga. Nga runi, bicaadiaga Bixhózeluʼ ni nuu guibáʼ. Gunna zabeenduluʼ stale cosa galán pa guzuubaluʼ stiidxabe. Cadi guiaandaʼ lii ora runi binni ti cosa malu la? ti ratu si nga riuu nayecheʼ peru jma naná yuubaʼ redané ni despué (Gál. 6:8). Joshua, hermanu ni bizéʼtenu lu párrafo 10 que guníʼ: «Zanda iquiiñenu libertad stinu modo gápanu gana. Peru pa iquiiñenu ni mal la? qué zabáninu nayecheʼ».

19, 20. ¿Xi ndaayaʼ zacaa ca joven ni gapa fe Jiobá ne guzuubaʼ stiidxabe?

¹⁹ Sicaríʼ gudxi Jesús ca xpinni: «Pa qué guireechutu de stiidxaʼ, dxandipeʼ discípulo stinneʼ laatu, ne zánnatu ni dxandíʼ ne ni dxandíʼ ca zuni ni laatu libre» (Juan 8:31, 32, TNM). Racané ni dxandíʼ laanu para cadi gúninu ni runi ca religión falsu, para cadi guiníʼ íquenu casi riníʼ ique binni ne cadi guni crenu ca cosa ni zeeda de espiritismo. Ne cadi ngasi, laaca maʼ biʼniʼ prometerbe zudiibe lii libertad cásica libertad napa ca xiiñiʼ Dios (Rom. 8:21). Peru yanna riʼ laaca zanda guni disfrutarnu de libertad riʼ. ¿Ximodo yaʼ? Ora rinándanu ni rusiidiʼ Jesucristu laanu. Zacá zunibiaʼluʼ ni dxandíʼ, cadi purtiʼ si caziidiluʼ ni, sínuque purtiʼ cayúniluʼ ni lu xquendanabániluʼ.

²⁰ Joven, bisisaca libertad ni cudii Dios lii. Pa iquiiñeluʼ ni jneza la? zacané ni lii guibániluʼ galán despué. Ti joven Testigu guníʼ: «Pa iquiiñeluʼ libertad stiluʼ jneza zacané ni lii dxi guiniisiluʼ ora caquiiñeʼ guicaaluʼ ti decisión jma risaca, casi cuiluʼ xi dxiiñaʼ gúniluʼ, pa zachaganaluʼ o pa ziaanaluʼ solteru ti tiempu».

21. ¿Xi caquiiñeʼ gúniluʼ pa racaláʼdxiluʼ guicaaluʼ «enda nabani ni qué zaluxe»?

²¹ Lu guidxilayú malu riʼ, dede guendanabani ni ruluíʼ galán qué rindaa peʼ ni stale tiempu. Guirutiʼ ganna xi chiguizaaca guixíʼ (Sant. 4:13, 14). Nga runi, ni jma risaca caquiiñeʼ gúninu nga sanu lu neza ni zudii laanu «enda nabani ni qué zaluxe» (1 Tim. 6:19). Qué runi obligar Dios laanu sanu lu neza stiʼ. Cada tobi de laanu caquiiñeʼ guni decidir pa zúninu ni. Nga runi, biʼniʼ stipa pur guicaaluʼ guiráʼ ni cudii Jiobá. Ne bisisaca ni cudiibe lii (Sal. 103:5). Ne gupa confianza zudiibe lii ti guendanabani galán ne nayecheʼ para siempre (Sal. 16:11).