¿Ñee maʼ biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca guendarinabadiidxaʼ riʼ:

¿Xi prueba ridxélanu lu Biblia rusihuinni Dios empatía pur laanu?

Dxi guyuu ca israelita de esclavu ndaaniʼ guidxi Egipto, gunna Jiobá cayacanácabe ne biʼniʼ sentirbe yuubaʼ cayuni sentircaʼ (Éx. 3:7; Is. 63:9). Cumu bizáʼ Dios laanu casi laa la? laaca zanda guni sentirnu ni runi sentir sti binni. Dede ne ora runi sentirnu que runi merecernu gannaxhii Dios laanu la? riénebe ni runi sentirnu (wp18.3, yaza 8 ne 9).

¿Ximodo gucané Jesús binni para cadi guni menu xcaadxi?

Ca dxi bibani Jesús, nabé runi stale de ca judíu que menu xcaadxi binni. Bisiene Jesús pabiáʼ risaca nga gácacabe humilde ne gudxi laacabe cadi naquiiñeʼ guiníʼ íquecabe jma risaca raza stícabe. Ne laaca guniʼbe cadi naquiiñeʼ guni ca xpínnibe menu ca hermanu sticaʼ sínuque gannaxhiisaacaʼ (w18.06, yaza 9 ne 10).

¿Xi rizíʼdinu de ni bizaaca Moisés dxi qué nudii Dios lugar ñuu lu Tierra Prometida?

Guizáʼ guca xhamigu Moisés Jiobá (Deut. 34:10). Guiropa biaje guca quejar ca israelita que pur gastiʼ nisa dxi mayaca guizaa cuarenta iza de canazacaʼ lu desiertu que, gudxi Dios Moisés guiniʼné ti guié. Peru lugar de ñúnibe ni gudxi Dios laabe la? laga bichéndabe bara stibe luni. Zándaca bidxiichiné Jiobá laabe purtiʼ qué ñúnibe ni gudxi laabe o zándaca purtiʼ qué nusisácabe Jiobá pur milagru que (Núm. 20:6-12). Ni bizaaca Moisés riʼ la? rusiidiʼ ni laanu guizáʼ risaca nga guzúʼbanu stiidxaʼ Jiobá ne gusisácanu laa (w18.07, yaza 13 ne 14).

¿Xiñee cadi jneza nga guni juzgarnu xcaadxi pur ni ridúʼyanu?

Nuu chonna cosa ni rucaa tuuxa guni juzgar xcaadxi: raza o lugar ra gule ti binni, bueltu ne iza stiʼ tuuxa. Nabé risaca nga guizíʼdinu cadi guni juzgarnu xcaadxi ne guidúʼyanu laacaʼ casi ruuyaʼ Jiobá laacaʼ (Hech. 10:34, 35) (w18.08, yaza 8 hasta 12).

¿Ximodo zanda gacané ca hermanu ni maʼ huaniisi ndaaniʼ congregación?

Neca guidxaa ca xpinni Cristu ni maʼ huaniisi de asignación la? risacarúcabe para Jiobá ne zándaruʼ gacanécabe xcaadxi hermanu ndaaniʼ congregación. Ruyubi ca hermanu riʼ modo guiníʼnecaʼ xheelaʼ ca hermana ni cadi Testigu, racanecaʼ ca inactivu, rudiicaʼ estudiu ne racanecaʼ lu gadxé gadxé faceta de serviciu (w18.09, yaza 8 hasta 11).

¿Xi guiráʼ herramienta zeeda lu kit de enseñanza ni nápanu?

Caadxi de laacani nga tarjeta de contactu, invitación, xhono tratadu, revista Torre stiʼ ni rapa ne ¡Despertad! Laaca nápanu caadxi folletu, chupa libru de estudiu ne tapa videu, tobi de laani láʼ Xiñee naquiiñeʼ guʼndanecabe lii Biblia (w18.10, yaza 16).

Casi ná Proverbios 23:23, ¿xi caquiiñeʼ guni ti xpinni Cristu para síʼ ni dxandíʼ?

Cadi caquiiñeʼ gudiʼnu bueltu para sinu cani dxandíʼ. Peru zanda cueenu tiempu ne gúninu stipa para sinu cani (w18.11, yaza 4).

¿Xi zanda guizíʼdinu de modo biʼniʼ tratar Oseas Gómer, xheelaʼ?

Stale biaje biʼniʼ cometer Gómer adulterio. Peru biʼniʼ perdonar Oseas laabe ne qué nusaana laabe. Pa guni cometer xheelaʼ ti xpinni Cristu inmoralidad sexual la? zanda guni perdonar hermanu o hermana ca xheelaʼ. Pa guibiguetaʼ hermanu o hermana ca gapa relación sexual né xheelaʼ sti biaje la? maʼ gastiʼ nin ti razón para gaca divorciárcabe (w18.12, yaza 13).