JUEGU de libru riʼ binibiáʼcabe ni casi arcoíris purtiʼ de stale color cani. Ca dibuju sicarú ni biiyaʼ lu ca libru que bicaa cani naa guxuiʼluaʼ cani zeeda lúcani. Nga runi, dede nahuiineʼ guyuuladxeʼ guiziideʼ ni rusiidiʼ Biblia, casi cusiene ca libru que.

Dxi cayaca Segunda Guerra Mundial ne mayaca ugaanda ni guidxi India, bizaacaʼ xiixa ni nabé bininá naa. Guca divorciar bixhozeʼ ne jñaaʼ. Qué ñeneʼ xiñee qué niná guiropaʼ binni ni guizáʼ nadxieeʼ nibánicaʼ juntu. Bineʼ sentir nuaaʼ stubeʼ ne guirutiʼ rizaalaʼdxiʼ naa. Cumu naa siáʼ nga xiiñiʼ jñaaʼ ne bixhozeʼ la? qué nidxelaʼ tu niguixhedxí ladxiduáʼ ne tu ñacané naa.

Naa ne jñaaʼ gulézadu ndaaniʼ guidxi Karachi, capital stiʼ Sindh. Ti dxi bixhidxináʼ Fred Hardaker ra puertaʼ lídxidu, ti doctor ni maʼ huaniisi ni naca testigu stiʼ Jiobá. Laaca de religión stiʼ misioneru ni bidii ca libru que jñaaʼ ne bixhozeʼ laabe. Gúdxibe jñaaʼ pa zaziidiʼ de Biblia ne jñaaʼ gudxi laabe laa qué zaziidiʼ, peru naa la? zaziideʼ. Ngue runi, sti semana que bizulú hermanu Hardaker bidii estudiu naa.

 Ti semana despué, bizuluáʼ guyaaʼ ca reunión ni raca ra clínica stiʼ hermanu Hardaker. Raqué ridagulisaa doce Testigu ni maʼ huaniisiʼ, gudixhedxícabe ladxiduáʼ ne gúpacabe naa casi xiiñicabe. Rietenalaʼdxeʼ ribícabe cueeʼ ne dede ratagudaacabe para guyadxícabe luáʼ ora maʼ caniʼnécabe naa casi runi tuuxa ne xhamigu. Nguepeʼ nga ni caquiiñeʼ.

Ti tiempu despué biʼniʼ invitar hermanu Hardaker naa chiguneʼ predicarniaʼ laa. Bisiidibe naa iquiiñeʼ gramófono portátil para cuaaʼ ca discursu ni biree de lu Biblia ne gucaadiaga binni cani. Nuu caadxi de ca discursu que nabé directu cani, ngue runi nuu tu laa qué ñuulaʼdxiʼ nucaadiaga cani. Peru naa guizáʼ riuuladxeʼ guneʼ predicar. Riuuladxeʼ cani rusiidiʼ Biblia ne riuuladxeʼ guinieniáʼ binni de cani rusiidiʼ ni.

Laga cayuu ejércitu stiʼ ca japonés listu para gucaalucaʼ India la? jmaruʼ si bicaaluʼ ca autoridad británica ca testigu stiʼ Jiobá. Lu beeu julio iza 1943 laaca gupaʼ guendanagana pur laani. Ti sacerdote anglicano ni naca director de ra scuela, biʼniʼ expulsar naa purtiʼ ná cadi nacaʼ ti ejemplu galán para ca xcompañeruaʼ ne gúdxibe jñaaʼ bíʼnibe ni purtiʼ ridagualisaaniáʼ ca Testigu. Guizáʼ bidxiichi jñaaʼ ne biʼniʼ prohibirbe naa guidagualisaaniáʼ ca Testigu. Despué de ngue biseendabe naa ra nuu bixhozeʼ, ndaaniʼ guidxi Peshawar, ti guidxi ni riaana 1,370 kilómetros ladu guiaʼ de ra nabézadu. Cumu maʼ qué niziideʼ de Stiidxaʼ Dios ne maʼ qué ñaaʼ reunión la? chaahuiʼ chaahuiʼ bixeleʼ de Jiobá.

Lu iza 1947, biguetaʼ ndaaniʼ guidxi Karachi para guyubeʼ dxiiñaʼ. Casi yendayaʼ guyaaʼ ra clínica stiʼ doctor Hardaker, ne laa bidxaagalú naa né stale cariñu.

Cumu guníʼ íquebe huaraʼyaʼ la? gunabadiidxabe naa: «¿Xi cayácaluʼ?».

Óraque bicabeʼ laabe: «Doctor, nuaaʼ bien, peru huaraʼyaʼ en sentidu espiritual. Caquiiñeʼ guneʼ estudiar Biblia».

Óraque rábibe naa: «¿Padxí racaláʼdxiluʼ guzulunu yaʼ?».

Naa bicabeʼ laabe: «Pa ganda la? nagásica».

Guidubi ti huadxí biʼniʼ estudiardu Biblia. Bineʼ sentir casi ñaca biguetaʼ ra nuu familia stinneʼ en sentidu espiritual. Gucalaʼdxiʼ jñaaʼ nuxheleʼ naa de ca Testigu, peru gudixheʼ iqueʼ guneʼ ni ná Jiobá. Guyuaanisaʼ 31 de agosto iza 1947, ne ti tiempu despué dxi napaʼ 17 iza gucaʼ precursor regular.

Primé lugar ra bineʼ servir de precursor nga Quetta, ti lugar ra guyuu ti cuartel militar británico. Lu iza 1947 guca guidxi India chupa ndaa, India ne Pakistán. * Pur ni bizaaca riʼ gudindesaa ca religión ne stale binni biree zeʼ sti guidxi. Biaʼ 14 millón de refugiadu zeʼ de guidxi que. Ca musulmán ni nabeza ndaaniʼ guidxi India guyecaʼ Pakistán, ne ca hindú ne ca sijes ni nuu Pakistán guyecaʼ guidxi India. Laga cadinde guiráʼ binni que gunda biruxhaʼ guriá ti tren ni zeʼ Karachi, dxátipa ni de binni, peru gunaazeʼ dxiicheʼ ti guiibaʼ ni nuu ra puertaʼ stiʼ tren que dede yendayaʼ Quetta.

Ndaaniʼ guidxi Quetta binebiaʼyaʼ George Singh, ti precursor especial ni napa jma de gande iza. Bidii George naa ti bicicleta para ganda guneʼ predicar ca lugar jma nasoo nuu lugar que, cumu nayooxhoʼ bicicleta que la? raca feu ni neza ne maʼ qué randa riguiʼbaʼ. Stale biaje stubeʼ bineʼ predicar. Lu xhoopaʼ beeu, maʼ runeʼ estudiarniáʼ 17 binni, ne chupa chonna de laacaʼ gúcacaʼ Testigu. Tobi de laacabe nga ti oficial stiʼ ejércitu ni láʼ Sadiq Masih. Gucanebe naa ne George guni traducirdu caadxi publicación lu diidxaʼ urdu, idioma ni riníʼ ca binni de Pakistán. Ra gudiʼdiʼ tiempu beeda gaca Sadiq ti publicador ni riuuladxiʼ guni predicar.

Ti tiempu despué, biguetaʼ Karachi, ne bineʼ servir né hermanu Henry Finch ne Harry Forrest, chupa misioneru ni deruʼ guyé Scuela stiʼ Galaad. ¡Guizáʼ rudieeʼ xquíxepeʼ laacabe purtiʼ gucanécabe naa stale! Ti dxi yeguneʼ predicar né hermanu Finch ladu guiaʼ stiʼ Pakistán. Ñee ca dani que bidxéladu stale binni ni riníʼ diidxaʼ urdu ne guizáʼ nuucaʼ gana guiziidicaʼ ni rusiidiʼ Biblia. Chupa iza despué laaca guyaaʼ Scuela stiʼ Galaad ne biguetaʼ Pakistán, ne guyuu biaje biseendacabe naa chiganna caadxi congregación  nuu lu circuito que. Naa ne xhonna misioneru gulézadu ra yoo ra riaana ca misioneru ndaaniʼ guidxi Lahore.

Triste guinieeʼ ni, peru lu iza 1954, ca misioneru ni nabeza ndaaniʼ guidxi Lahore gúpacaʼ problema pur modo laacaʼ, ngue runi bichaa sucursal caadxi de laacaʼ de asignación. Cumu qué ñacaʼ ti binni nuu xpiaaniʼ ne guyuaaʼ lu problema stícabe la? nadipaʼ modo guluu jnézacabe naa. Guníʼ iqueʼ maʼ qué iquiiñeʼ para guneʼ xhiiñaʼ Jiobá. Biguetaʼ Karachi ne despué guyaaʼ Londres (Inglaterra) ne raqué bizuluáʼ bineʼ ni ná Jiobá sti biaje.

Ndaaniʼ congregación ra guyuaaʼ guyuu stale hermanu ni runi servir Betel stiʼ Londres. Pryce Hughes, ti hermanu ni naca siervo de sucursal que, guizáʼ nachaʼhuiʼ ne bizaalaʼdxiʼ naa. Ti biaje gúdxibe naa guizáʼ nadipaʼ modo guluu jneza hermanu Joseph Rutherford laabe, hermanu riʼ ruuyaʼ gaca dxiiñaʼ de predicación lu guidubi Guidxilayú. Gucalaʼdxiʼ hermanu Hughes niníʼ napa razón, peru nabé nadipaʼ modo gudindené hermanu Rutherford laabe. Guizáʼ bidxagayaaʼ ora biiyaʼ cuxidxi hermanu Hughes ora cayetenalaʼdxiʼ de ni bizaaca que. Neca óraque bidxiichibe, peru despué bidiibe cuenta caquiiñebe conseju que ne zaqué nga cusihuinni Jiobá nadxii laabe (Heb. 12:6). Ca diidxaʼ gúdxibe naa que yendá cani ndaaniʼ ladxiduáʼ ne gucané cani naa para guneʼ ni naa Jiobá nayecheʼ.

Tiempu que, yendeza jñaaʼ ndaaniʼ guidxi Londres ne biidibe lugar guni estudiarné John Barr laabe, ti hermanu ni guyuu lu Grupu ni Zaniruʼ. Nagueenda biʼniʼ progresarbe ne guyuunísabe lu iza 1957. Despué gunnaʼ biʼniʼ estudiarné ca Testigu bixhozeʼ ante gatiʼ.

Lu iza 1958, bichaganaʼyaʼ Lene, ti hermana de Dinamarca ni nabeza guidxi Londres. Ti iza despué, gúpadu ti dxaapahuiiniʼ ne gule ladu laabe Jane, despué gúpadu xtapa xiiñidu. Laaca bidiicabe naa caadxi responsabilidad ndaaniʼ congregación ni nuu Fulham. Peru cumu guca huará Lene la? yendézadu ti lugar ra cadi nananda. Ngue runi, lu iza 1967, yendézadu ndaaniʼ guidxi Adelaida (Australia).

Congregación ni guyuu ndaaniʼ guidxi Adelaida que guyuu doce hermanu ungidu ni maʼ huaniisi, gúcacabe ti ejemplu lu predicación. Nga runi, nagueendaca gudixhe chaahuidu tiempu stidu para gúnidu xhiiñaʼ Dios.

Lu iza 1979, gule Daniel, últimu xiiñidu. Cumu nápabe síndrome de Down * ne nabé guca huarabe la?  gudxi ca doctor que laadu qué zabánibe xadxí. Dede yanna raca nagana para naa guinieeʼ de ni bizaacadu riʼ. Bínidu guiráʼ ni gunda para gúpadu laabe, peru qué nusiáʼndadu ni caquiiñeʼ xtapa xiiñidu. Gupa Daniel chupa huecuhuiiniʼ lu corazón stiʼ; nga runi nuu tiru rácabe moradu purtiʼ rirá bi stibe ne ora rizaacabe ni nagueendaca rinedu laabe ra hospital. Peru neca huarabe la? gúcabe ti hombrehuiiniʼ nabé cariñoso, nuu xpiaaniʼ ne guizáʼ espiritual. Ora runi orardu ante guidoʼdo gueta, ruquiidibe guiropaʼ náʼhuiinibe, rindeteʼ íquebe ne riniʼbe «amén». Ne oraqueruʼ robe.

Dxi napa Daniel tapa iza, guca huarabe de leucemia. Naa ne Lene guizáʼ maʼ bidxágadu en sentidu fisicu ne emocional. Bineʼ sentir zapaʼ depresión. Órapeʼ cadídidu ra jma nagana, yeganna hermanu Neville Bromwich laadu, superintendente de circuito stidu. Gueelaʼ que, dede daʼ nisa lube gudiidxibe laadu ne biinanebe laadu. Guizáʼ gudixhedxí ca diidxaʼ sicarú ni gúdxibe laadu que ladxidoʼdo. Maʼ biaʼ la una de la mañana bireebe de ra lídxidu. Qué nindaa de zebe guti Daniel. Yuubaʼ jma naná ni huadídidu lu xquendanabánidu nga dxi guti Daniel. Neca naná ni, runi huantardu purtiʼ nuudu seguru nin guendaguti qué zanda guxheleʼ Daniel de guendarannaxhii stiʼ Jiobá (Rom. 8:38, 39). ¡Maʼ nuudu guidúʼyadu laabe sti biaje dxi guibánibe de lade gueʼtuʼ! (Juan 5:28, 29).

Neca maʼ chupa biaje bidii derrame cerebral naa la? nácaruaʼ ancianu ndaaniʼ congregación stinneʼ. Guiráʼ ni maʼ gudideʼ maʼ gucané cani naa chuaaʼ lugar xcaadxi hermanu ne guiaʼyaʼ laacabe, ne jmaruʼ si né cani cadiʼdiʼ lu xiixa guendanagana. Runeʼ stipa pur cadi guneʼ juzgar laacabe. Lugar de nga, riníʼ iqueʼ zándaca pur guiráʼ ni maʼ bizaacacabe lu xquendanabánicabe nga rucaa laacabe guiníʼ íquecabe ne guni sentírcabe zacá. Nga runi rinabadiidxaʼ laca naa: «¿Ximodo zanda gusihuinneʼ dxandíʼ rizaaladxeʼ ca hermanu yaʼ? ¿Ximodo zanda cuaaʼ gana laacabe para guzuubacabe stiidxaʼ Jiobá?». Guizáʼ riuuladxeʼ guneʼ visita de pastoreu. Ora riguixhedxieeʼ ladxidóʼ xcaadxi ne riguaaʼ gana laacaʼ la? laaca riuaaʼ gana ne ratadxí ladxiduáʼ.

Runeʼ sentir casi biʼniʼ sentir hombre ni bicaa Salmo ora guníʼ: «Ora bidale cani ruchiiñaʼ xquendabiaaneʼ, lii gudixhedxiluʼ xhialmaʼ pur guiráʼ ni gúdxiluʼ naa» (Sal. 94:19). Huayapa Jiobá naa de stale modo, casi ora huadxagaluáʼ guendanagana ndaaniʼ familia stinneʼ, ora bicaalú ca religión naa, ora bineʼ sentir qué risacaʼ pur xiixa ni cadi jneza bineʼ ne dxi gucaʼ deprimir. Naca Jiobá Bixhozeʼ purtiʼ huayápabe naa.