1. ¿Xi razón nápanu para chuʼnu nayecheʼ?

GUIZÁʼ riéchenu ora ridúʼyanu pabiáʼ ziroobaʼ xquidxi Jiobá. Ndiʼ rusihuinni cuzaaniʼ ca xpinni Cristu casi biaaniʼ. Lu iza gudiʼdiʼ ca, bidiʼnu estudiu jma de chii millón binni. Laaca guyé stale millón binni Conmemoración ne biziidicabe bisihuinni Dios pabiáʼ nadxii laanu ra bidii Xiiñiʼ para gulá laanu (1 Juan 4:9).

2, 3. a) ¿Xi ti cosa qué rucueeza laanu para guzáʼninu casi biaaniʼ? b) ¿Xi chonna cosa zadúʼyanu lu tema riʼ?

² Gadxé gadxé idioma riníʼ ca binni ni nuu ndaaniʼ xquidxi Jiobá. Peru qué rucueeza ni laanu para gusisácanu Bixhózenu ni nuu guibáʼ tobi si (Apoc. 7:9). Gastiʼ naca xi idioma rininu o xi lugar nabézanu, zanda guzáʼninu «casi biaaniʼ ndaaniʼ guidxilayú» (Filip. 2:15).

³ Lu tema riʼ, zadúʼyanu chonna cosa ni zacané laanu para guzáʼninu casi biaaniʼ ndaaniʼ Guidxilayú riʼ. Primé, ora runi predicarnu. Guiropa, ora riuʼnu tobi si né ca hermanu. Ne guionna, ora rúninu stipa pur gusíʼdinu binni ni dxandíʼ. Guionnaʼ cosa riʼ zacané cani laanu para gusisácanu Jiobá ne chuulaʼdxiʼ  binni guiziidiʼ de laabe (biindaʼ Mateo 5:14-16).

4, 5. a) Aparte de guni predicarnu, ¿ximódoruʼ zanda gusihuínninu nácanu casi biaaniʼ? b) ¿Xi ribeendunu ora gácanu nachaʼhuiʼ né binni? (Biiyaʼ foto ni zeeda ra ruzulú tema riʼ).

⁴ Lu Torre stiʼ ni rapa ni biree 1 de Junio iza 1925 lu diidxaʼ inglés, bedané ni ti tema ni láʼ «Luz en la oscuridad», tema riʼ bizeeteʼ ni ca diidxaʼ riʼ: «Guirutiʼ zanda gaca fiel Señor ca dxi ni cayaadxaʼ ca [...] pa qué gusihuinni naca casi ti biaaniʼ». Ne laaca bizeeteʼ ni: «Naquiiñeʼ gusihuinni tuuxa naca casi ti biaaniʼ ra guni predicar ca diidxaʼ nacubi ne galán stiʼ Reinu ndaaniʼ ca guidxihuiiniʼ ni lu Guidxilayú riʼ ne guibani jneza casi ná Dios». Ndiʼ rusihuinni guni predicarnu ne gacanenu binni gaca discípulo nga ti modo zanda guzáʼninu casi biaaniʼ (Mat. 28:19, 20). Modo gaca xpiaʼnu racané ni para gusisácanu Jiobá. Ora runi predicarnu, ruuyadxí binni laanu, nga runi ora guxidxinenu ne ora ugapadiúxinu laacabe riníʼ ni bien de laanu ne de Dios ni runi servirnu.

⁵ Sicaríʼ gudxi Jesús ca discípulo stiʼ: «Ora guiuu tu ralidxi cabe, laugapa diuxi» laacabe (Mat. 10:12). Ca lugar ra biʼniʼ predicar Jesús ne ca discípulo stiʼ, runi invitar ca binni que tuuxa chuʼ ra lídxicaʼ neca qué runibiáʼcabe laaca. Zándaca neza ra nabézanu gastiʼ costumbre riʼ. Nga runi, nuu binni riuu nervioso o hasta ridxibi guxhidxináʼ tuuxa ni qué runibiáʼ ra puertaʼ stiʼ. Peru pa ugapadiúxinu, guni respetarnu ne guxidxinenu binni, zándaca gucaadiágacaʼ laanu. Ngaca nga rizaaca ca hermanu ni riquiiñeʼ carruhuiiniʼ para guni predicar. Stale de ca hermanu riʼ huayuuyacaʼ ora rugapadiúxicaʼ ne ruxidxinecaʼ binni jma rucaadiágacabe laacaʼ. Ne nuu binni ricaa xiixa publicación dede ruiʼné laacabe diidxaʼ.

6. ¿Xi huayuni ti guendaxheelaʼ ni maʼ nagola para cadi gusaana de guzaanicaʼ casi biaaniʼ?

⁶ Ti guendaxheelaʼ de Inglaterra ni maʼ nagola, maʼ huaxiéʼ runi predicarcaʼ de yoo pur yoo purtiʼ maʼ huaracaʼ. Peru cumu racaláʼdxicabe guzaanicabe casi biaaniʼ la? runi predicárcabe frente de ra lídxicabe purtiʼ gaxha de raqué nuu ti scuela. Ora ridiʼdiʼ binni maʼ zicaa xiiñiʼ ra scuela la? ruzuhuaacabe ti mexaʼ ne riguixhecabe publicación luni. Stale binni ridxiña ne ricaacaʼ volumen 1 ne volumen 2 stiʼ libru Los jóvenes preguntan ne laaca ricaacaʼ chupa chonna folletu. Bizulú ti precursora biʼniʼ predicar né guendaxheelaʼ riʼ. Cumu nachaʼhuiʼ hermana riʼ ne nabé rizaalaʼdxiʼ guendaxheelaʼ riʼ gacané xcaadxi la? tobi de ca binni ni ricaa xiiñiʼ ra scuela maʼ ricaa estudiu.

7. ¿Ximodo zanda gacanenu ca binni ni nuu de refugiadu ndaaniʼ xquídxinu?

⁷ Lu ca últimu iza riʼ stale binni huaree de xquidxi ne nuucaʼ de refugiadu ndaaniʼ sti guidxi. ¿Ximodo zanda gacanenu ca binni riʼ gunibiaʼcaʼ Jiobá ne ni naguixhe ique guni yaʼ? Ni zanda gúninu primé nga guizíʼdinu ugapadiúxinu laacabe lu stiidxacabe. Laaca zanda iquiiñenu aplicación JW Language para guizíʼdinu chupa chonna diidxaʼ ni riníʼcabe para chuláʼdxicabe gucaadiágacabe laanu. Despué zanda guluinu laacabe videu ne publicación lu stiidxacabe ni nuu lu sitiu jw.org (Deut. 10:19).

8, 9. a) ¿Ximodo racané reunión ni rápanu ndaaniʼ semana laanu? b) ¿Ximodo zanda gacané ca hermanu xiiñicaʼ para guni comentar ra reunión?

⁸ Para ganda guni predicarnu jma jneza la? rudii Jiobá laanu ni caquiiñenu, tobi de laani nga reunión ni láʼ Xhiiñaʼ Dios ne modo nabáninu. Ca sugerencia  ni ricaanu lu ca reunión riʼ racané cani laanu cadi guidxíbinu ora gúninu revisita ne ora gudiʼnu estudiu.

⁹ Stale binni ni rié reunión primé biaje nabé ridxagayaacaʼ ora ruuyacaʼ runi comentar ca baʼduhuiiniʼ ca ra reunión. Nga runi, jneza runi ca hermanu ora rusiidicaʼ xiiñicaʼ guni comentar ti guzaaniʼ xiiñicabe casi biaaniʼ. Nuu biaje, comentariu ni gudii ti xcuidihuiiniʼ de guidubi ladxidóʼ rucaa ni ti binni ni maʼ huaniisi gudii cuenta dxandíʼ ni rizíʼdinu (1 Cor. 14:25).

10. ¿Ximodo racané adoración en familia para chuʼnu tobi si?

¹⁰ Sti modo zanda guzáʼninu casi biaaniʼ nga gacanenu para chuʼ familia stinu tobi si ne chuʼnu tobi si né ca hermanu de congregación. Ti cosa nabé risaca ni naquiiñeʼ guni ca hermanu nga gápacaʼ adoración en familia. Nuu tu laa ora rápacaʼ adoración en familia ruuyacaʼ programa ni ridiʼdiʼ guiráʼ beeu lu JW Broadcasting. Ne despué de gúʼyacabe ni zanda guiníʼcabe ximodo quíxhecabe en práctica ni biziidicabe. Cadi naquiiñeʼ guiaandaʼ cani naca xaíque de familia gadxé gadxé ni caquiiñeʼ ca xcuidi ne ca joven. Nga runi, naquiiñeʼ guʼyaʼ ca hermanu riʼ xi zanda gúnicaʼ para gacanecaʼ cada tobi de ca binnilídxicaʼ (Sal. 148:12, 13).

11-13. ¿Xi zanda gúniluʼ para gacaneluʼ chuʼ congregación stiluʼ tobi si ne para gacaneluʼ xcaadxi cadi gusaanacaʼ de guzaanicaʼ casi biaaniʼ?

¹¹ Guiranu, dede né ca joven, zanda gacanenu para chuʼ congregación tobi si ne zacá zaguʼnu gana xcaadxi para guzaanicaʼ casi biaaniʼ. Guzéʼtenu ti ejemplu, ca joven ca zanda gusihuínnicaʼ rizaaláʼdxicaʼ ca hermanu ni maʼ nagola. Zanda gábicabe ca hermanu riʼ güinecaʼ laacabe xi guiráʼ experiencia maʼ gúpacaʼ ra cayúnicaʼ xhiiñaʼ Jiobá. Pa guni ca joven ca ni bizéʼtenu riʼ la? cadi zaguusicabe gana ca hermanu ni maʼ nagola, sínuque laaca ziuucabe gana para gusihuínnicabe nácacabe casi biaaniʼ. Sti cosa ni naquiiñeʼ gúninu nga guidxaagalunu cani cheʼ reunión primé biaje. Ti modo zanda gúninu ni nga guxídxinenu laacabe, gacanenu laacabe guidxélacabe ti lugar ra cuícabe ne guni presentarnu laacabe xcaadxi hermanu. Pa gúninu ndiʼ zuni sentírcabe casi ora nuucabe ra lídxicabe.

¹² Ca hermanu ni runi reunión ni raca ante guireʼnu predicación, zanda  gacanécabe ca hermanu ni maʼ nagola para cadi gusaana de guzaanicaʼ casi biaaniʼ. Naquiiñeʼ gúʼyacabe xi territorio zanda guni predicar ca hermanu riʼ. Nuu biaje la? zanda guni asignárcabe ti joven guireené ca hermanu riʼ para gacané laacabe. Laaca naquiiñeʼ guiénecabe ca hermanu ni que zanda guni predicar stale hora pur huaracaʼ o pur xcaadxi problema nápacaʼ. Pa guiénecabe ca joven, ca hermanu ni maʼ nagola, cani nacubi o cani maʼ napa experiencia la? zacanécabe laacaʼ para cadi gusaana de chuʼcaʼ nayecheʼ ora guni predicarcaʼ (Lev. 19:32).

¹³ Dxi biʼniʼ adorar ca israelita que Jiobá tobi si, guleenducaʼ stale cosa galán. Tobi de ca hombre ni bicaa Salmo guníʼ: «¡Laguuyaʼ! ¡Pabiáʼ galán ne sicarú nga chuʼ ca hermanu tobi si!» (biindaʼ Salmo 133:1, 2). Ora guníʼ salmista riʼ galán chu ca hermanu tobi si la? bichaagabe ni né aceite ni biquiiñecabe para guni ungírcabe, purtiʼ rindaʼ naxhi aceite que ne nagaʼndaʼ ni. Tiempu riʼ, ¿xiñee qué quixhe íqueluʼ gácaluʼ ti ejemplu galán ndaaniʼ congregación ne gacaneluʼ chuʼ ca hermanu tobi si yaʼ? Pa maʼ cayúniluʼ ni la? runi felicitardu lii. Peru ¿ñee zándaruʼ gúniluʼ stipa pur gunibiaʼluʼ jma ca hermanu ni nuu ndaaniʼ congregación stiluʼ la? (2 Cor. 6:11-13).

14. ¿Xi zanda gúninu para guzáʼninu casi biaaniʼ neza ra nabézanu?

¹⁴ ¿Ñee zándaruʼ gúninu stipa pur guzáʼninu casi biaaniʼ neza ra nabézanu la? Pa gácanu nachaʼhuiʼ ne ca vecinu stinu, zándaca chuuláʼdxicabe guiziidicabe ni dxandíʼ. Guinabadiidxanu laca laanu: «¿Xi riníʼ ique ca vecinu stinneʼ de naa yaʼ? ¿Ñee nayá ra lidxeʼ ne nexheʼ chaahuiʼ guiráʼ cosa stinneʼ la? ¿Racané ni para guihuinni neza ra nabezaʼ galán la? ¿Ñee ruyubeʼ gacaniáʼ xcaadxi la?». Ora guinínenu ca hermanu stinu, guinabadiidxanu laacabe xi huabeendúcabe pur nacháʼhuicabe né ca vecinu stícabe ne familia stícabe, cani runinécabe dxiiñaʼ o cani rinécabe scuela. Pa guinabadiidxanu laacabe zándaca güinécabe laanu xiixa experiencia galán ni nápacabe (Efes. 5:9).

15. ¿Xiñee caquiiñeʼ gatananu?

¹⁵ Pa qué racaláʼdxinu gusaana de guzaaniʼ biaaniʼ stinu la? cadi naquiiñeʼ guiaandaʼ laanu xi tiempu nabáninu. Stale biaje gudxi Jesús ca discípulo stiʼ «lagataná» (Mat. 24:42; 25:13; 26:41). Peru pa riníʼ íquenu cayaadxaruʼ stale para guzulú gran tribulación o riníʼ íquenu maʼ qué zadúʼyanu dxi guzulú ni la? qué zazaláʼdxinu guni predicarnu (Mat. 24:21). Chaahuiʼ chaahuiʼ maʼ qué zuzaaniʼ biaaniʼ stinu o dede zándaca guizuíʼ ni.

16, 17. ¿Xi zanda gúninu para gatananu?

¹⁶ Mientra jma cahuinni cosa malu lu ca últimu dxi riʼ, jmaruʼ si naquiiñeʼ gatananu. Nuunu seguru zulá Dios laanu órapeʼ jma caquiiñeʼ gúnibe ni (Mat. 24:42-44). Nga runi, caquiiñeʼ cuézanu gulabe laanu ne gatananu. Guidúʼndanu Stiidxaʼ Dios guiráʼ dxi ne cadi gusaana de guni orarnu (1 Ped. 4:7). Chinándanu ejemplu stiʼ ca hermanu ni nexhená ne cani qué rusaana de guzaaniʼ casi biaaniʼ. Zadxélanu ti experiencia galán lu tema ni láʼ «Setenta iza de naazeʼ bizuudiʼ stiʼ ti judíu» ni biree lu Torre stiʼ ni rapa 15 stiʼ abril 2012, yaza 18 hasta 21.

¹⁷ Chuʼ xhiiñanu ra gúninu dxiiñaʼ stiʼ Jiobá, gacanenu xcaadxi ne cueenu tiempu para chuʼnu né ca hermanu stinu. Zacá ziuʼnu nayecheʼ ne nin zánnanu zadiʼdiʼ tiempu ca nagueenda (Efes. 5:16). Raca ti gayuaa iza, biʼniʼ ca hermanu stinu stale dxiiñaʼ lu xhiiñaʼ Dios. Peru tiempu riʼ, laaca cayacané Jiobá laanu para gaca jma lu xhiiñaʼ. Nga runi, guizáʼ cuzaaniʼ biaaniʼ stinu jma que biaʼ bixuíʼlunu.

18, 19. ¿Ximodo zanda gacané ca ancianu laanu gatananu ne cadi gusaana de gúninu xhiiñaʼ Dios? Bizeeteʼ ti ejemplu.

 ¹⁸ Neca rucheʼnu, rudii Jiobá lugar guni servirnu laa. Ne para gacanebe laanu cadi gusaana de guni predicarnu laga cabézanu guedandá dxi stibe la? maʼ «bidii be gracia binni para guni xhiiña be» o ca ancianu ni nuu ndaaniʼ congregación para gacanecaʼ laanu (biindaʼ Efesios 4:8, 11, 12). Nga runi, sti biaje chiganna ca ancianu laanu la? guicaanu ca conseju galán gudiicabe laanu.

¹⁹ Ndaaniʼ guidxi Inglaterra nabeza ti guendaxheelaʼ ni gupa caadxi guendanagana, gunábacabe gacané chupa ancianu laacabe. Hermana que guníʼ casi ñaca ñuu tobi si né tuuxa ni qué runi cré. Ne hermanu que guníʼ qué ganna gusiidiʼ ne cadi guiráʼ semana runi adoración en familia. Guniʼné ca ancianu que laacabe de ejemplu stiʼ Jesús. Gudxi ca ancianu que hermanu que galán guni pa chinanda ejemplu stiʼ Jesús, purtiʼ laa gupa ne bidii ni caquiiñeʼ ca discípulo stiʼ ne laaca gúdxicabe hermana que caquiiñeʼ gapa paciencia. Laaca bidiicabe laacaʼ caadxi sugerencia xi zanda gúnicaʼ ora gápacaʼ adoración en familia né guiropaʼ xiiñicaʼ (Efes. 5:21-29). Gudiʼdiʼ si ti tiempu, biʼniʼ felicitar ca ancianu que hermanu riʼ pur guiráʼ ni maʼ biʼniʼ pur familia stiʼ. Guluucabe gana laabe para cadi gusaana de gacanebe familia stibe ne gápabe confianza zacané espíritu santu stiʼ Dios laabe para gácabe ti xaíque ni guni xhiiñaʼ jneza. Cumu bizaalaʼdxiʼ ne gunnaxhii ca ancianu que familia riʼ, gucané ni laacabe guzaanicabe casi biaaniʼ.

20. ¿Xi zabeendunu pa guzáʼninu casi biaaniʼ?

²⁰ Salmo 128:1 ná: «Nayecheʼ ribani guiráʼ binni ni ridxibi Jiobá ni canazá lu ca neza stibe». Lu tema riʼ maʼ bizíʼdinu caadxi cosa ni caquiiñeʼ gúninu para guzáʼninu casi biaaniʼ, chupa chonna de laacani nga guni invitarnu binni guiziidiʼ de Dios, gúninu stipa pur chuʼnu tobi si ne gatananu. Pa gúninu cani, zabáninu nayecheʼ, zuuyaʼ binni ca cosa galán rúninu ne zucaa ni laacaʼ gusisácacaʼ Bixhózenu ni nuu guibáʼ (Mat. 5:16).