1. ¿Xi runi laanu gadxé de ca maniʼ ca?

DXI bizáʼ Jiobá binni bidiibe laanu xiixa ni runi laanu gadxé de ca maniʼ ca, laani nga conciencia. Adán ne Eva gúpacaʼ conciencia. ¿Ximodo nánnanu ni yaʼ? Purtiʼ dxi bicheenécabe Dios, bicaachilúcabe. Nga rusihuinni bichiiñaʼ conciencia stícabe laacabe.

2. ¿Xiñee zanda guchaaganu conciencia stinu né ti brújula? (Biiyaʼ dibuju ni zeeda ra ruzulú tema riʼ).

² Conciencia nga xiixa ni rabi laanu xii nga ni jneza ne ni cadi jneza ne racané ni laanu lu xquendanabáninu. Zanda guchaaganu ni né ti brújula. Pa galán brújula ni caquiiñeʼ ti capitán ni ziné ti barcu la? zacané ni laabe chindabe ra racaláʼdxibe. Peru pa cadi jneza cayuni brújula riʼ dxiiñaʼ la? zándaca chiné bi o corriente stiʼ nisadóʼ barcu stibe gadxé ladu. Zacaca nga laanu, pa gusiidiʼ chaahuinu conciencia stinu la? zacané ni laanu gúninu ni jneza, peru pa qué gusiidiʼ chaahuinu ni la? zándaca ziuʼnu lu peligru.

3. ¿Xi zándaca guizaaca pa qué gusiidiʼ chaahuinu conciencia stinu?

³ Pa qué gusiidiʼ chaahuinu conciencia stinu la? qué zabi ni laanu pa malu xiixa cosa ni chigúninu o pa cadi naquiiñeʼ gúninu ni  (1 Tim. 4:1, 2). Dede zándaca guiníʼ íquenu jneza xiixa cosa malu (Is. 5:20). Nga runi Jesús gudxi ca discípulo stiʼ: «Zadxiña dxi tutiica guuti laatu zaná cayuni xhiiña Dios» (Juan 16:2). Ngapeʼ nga ni guníʼ ique ca binni ni biiti discípulo Esteban, ne laaca zacá nga riníʼ ique ca binni ni runi casi biʼniʼ ca binni que (Hech. 6:8, 12; 7:54-60). Stale binni ni napa religión, guizáʼ feu modo huayuninácabe binni ne riníʼcabe rúnicabe ni purtiʼ cayúnicabe ni ná Dios. Peru ni dxandíʼ nga cucheenécabe ca ley stiʼ Dios (Éx. 20:13). Rihuinni dxíchica qué rabi conciencia stícabe laacabe pa malu ni cayúnicabe.

4. ¿Xi caquiiñeʼ gúninu para cadi quiteʼ conciencia stinu laanu?

⁴ ¿Xi caquiiñeʼ gúninu para cadi quiteʼ conciencia stinu laanu yaʼ? Caquiiñeʼ gúninu ni ná ca ley ne ca principiu ni zeeda lu Stiidxaʼ Dios, purtiʼ nuu cani para gusiidiʼ cani laanu, para gulidxe cani laanu, para gabi cani laanu paraa cucheʼnu ne para gacané cani laanu guibáninu jneza casi ná Dios (2 Tim. 3:16). Nga runi naquiiñeʼ gusiidiʼ chaahuinu conciencia stinu para ganda guiníʼ íquenu casi riníʼ ique Dios ne para gacané ni laanu gúninu ni jneza. Para gusiidiʼ chaahuinu conciencia stinu la? naquiiñeʼ guni estudiarnu Biblia, guiníʼ íquenu ni guidúʼndanu ne gúninu ni ná ni lu xquendanabáninu. Nga runi, guidúʼyanu ximodo racané ca ley ne ca principiu stiʼ Dios laanu para gusíʼdinu conciencia stinu.

5, 6. ¿Xi ribeendunu ora rúninu ni ná ca ley stiʼ Dios?

⁵ Para ganda gacané ca ley stiʼ Dios laanu la? cadi caquiiñeʼ si guidúʼndanu cani o gunibiaʼnu cani. Caquiiñeʼ gannaxhiinu cani ne gúninu ni ná cani. Sicaríʼ ruzeeteʼ Stiidxaʼ Dios: «Lagaca nanalaʼdxiʼ guiráʼ cosa malu ne lagannaxhii ni jneza» (Amós 5:15). Peru para ganda gacananaláʼdxinu ca cosa malu ca ne gannaxhiinu ni nachaʼhuiʼ la? caquiiñeʼ guidúʼyanu ca cosa ca casi ruuyaʼ Jiobá cani. Guzéʼtenu ti ejemplu, guxuíʼlunu maʼ napa dxi cadi cayásinu galán. Ne ti doctor gudxi laanu chuʼnu dieta, gúninu ejerciciu ne gusaana de gúninu caadxi cosa ni maʼ biaʼnu gúninu. Pa gúninu ni gábibe laanu ne guidúʼyanu cayacané cani laanu, ¿cadi dxandíʼ zudiʼnu xquíxepeʼ laabe pur cani gúdxibe laanu gúninu ca la?

⁶ Zacaca nga runi Dios ni bizáʼ laanu, rudiibe laanu ley ni rapa laanu para cadi gacananu pur pecadu ni bisaanané Adán laanu ne para guibáninu galán. Biblia rusiidiʼ laanu cadi gusiguiinu, cadi cuánanu, cadi guni practicarnu inmoralidad sexual, cadi tíndenu ne cadi guidúʼyanu xiixa ni napa espiritismo (biindaʼ Proverbios 6:16-19; Apoc. 21:8). Ora ridúʼyanu xi guiráʼ ribeendunu ora rúninu ni ná Jiobá la? jmaruʼ si rannaxhiinu laabe ne jmaruʼ si rusisácanu ca norma stibe.

7. Ora guidúʼndanu ne guiníʼ íquenu xi bizaaca ca binni ni bicheené Dios, ¿ximodo racané ni laanu?

⁷ Cadi caquiiñeʼ gacananu para guizíʼdinu pabiáʼ risaca nga guzúʼbanu stiidxaʼ Dios. Zanda guizíʼdinu guzúʼbanu stiidxaʼ Dios ora guidúʼndanu ne guiníʼ íquenu ni bizaaca ca binni ni bicheené laabe. Proverbios 1:5 ná: «Ti binni nuu xpiaaniʼ rucaadiaga ne jma riziidiʼ». Dios si nga ni zanda gusiidiʼ laanu para gácanu ti binni nuu xpiaaniʼ ne guirutiʼ zanda gusiidiʼ laanu casi rúnibe ni. Guiníʼ íquenu pabiáʼ gucaná David dxi bicheené Dios ra guyuuné ti gunaa ni maʼ bichaganáʼ láʼ Bat-seba (2 Sam. 12:7-14). Ora maʼ cadúʼndanu relatu riʼ guinabadiidxanu laca laanu: «¿Xi ñuni David para cadi ñacaná yaʼ? Pa ñaca ñuaaʼ lugar stiʼ David, ¿xi ñuneʼ yaʼ? ¿Ñee niree guxooñeʼ casi biʼniʼ José la? o ñuneʼ cometer adulterio casi biʼniʼ David?» (Gén. 39:11-15). Pa guiníʼ íquenu  xi guiráʼ yuubaʼ rapa tuuxa ora rucheené Dios la? jmaruʼ si zacananaláʼdxinu cosa malu.

8, 9. a) ¿Ximodo racané conciencia stinu laanu? b) ¿Ximodo racané ca principiu stiʼ Dios conciencia stinu?

⁸ Guiranu rucáʼnanu ca cosa ni nanalaʼdxiʼ Dios. Peru nuu biaje qué ruzeeteʼ Biblia xipeʼ naquiiñeʼ gúninu ora chicaanu ti decisión. Yanna, ¿ximodo zanda gánnanu xi racalaʼdxiʼ Jiobá gúninu yaʼ? Pa gusiidiʼ chaahuinu conciencia stinu ne ni rusiidiʼ Biblia zacané ni laanu guicaanu ti decisión jneza.

⁹ Nadxii Jiobá laanu, nga runi rudiibe laanu principiu para gacané conciencia stinu ora chicaanu ti decisión. Laapebe cayabibe laanu ca diidxaʼ riʼ: «Naa, Jiobá, naa nga Dios stiluʼ, ni cusiidiʼ lii para cueenduluʼ ni galán. Ni cayabi lii gunáʼ nga neza ra naquiiñeʼ saluʼ» (Is. 48:17, 18). Ora guiníʼ íquenu ni ná ca principiu ni zeeda lu Biblia ne gudiʼnu lugar chindá cani ndaaniʼ ladxidoʼno la? cusíʼdinu conciencia stinu ne zuchaʼnu modo riníʼ íquenu. Ne ra gúninu ni zacané ni laanu guicaanu decisión jneza.

10. a) ¿Xii nga ti principiu? b) ¿Ximodo biquiiñeʼ Jesús ni ná ca principiu ca para bisiidiʼ ca discípulo stiʼ?

¹⁰ Ti principiu nga xiixa ni racané laanu guiníʼ íquenu jneza ne racané ni laanu guicaanu decisión jneza. Pa guiénenu ni ná ca principiu ca zacané cani laanu guiníʼ íquenu casi riníʼ ique Jiobá ne ziénenu xiñee riguíxhebe ley. Dxi biʼniʼ predicar Jesús lu Guidxilayú riʼ, biquiiñebe caadxi principiu para gusiidibe ca discípulo stibe ne gúdxibe laacaʼ cadi naquiiñeʼ guiaandaʼ laacaʼ guiráʼ ni gúnicaʼ zapa ni consecuencia. Guzéʼtenu ti ejemplu, gúdxibe laacaʼ ora rapa tuuxa xiana ndaaniʼ ladxidóʼ rucaa ni laa tinde ne pur cani guiníʼ ique tuuxa la? zanda gucaa ni laa guni cometer adulterio (Mat. 5:21, 22, 27, 28, TNM). Pa gúninu ni ná ca principiu stiʼ Dios, zusíʼdinu conciencia stinu ne zacaanu decisión jneza ni gusisaca Dios (1 Cor. 10:31).

11. ¿Xiñee gadxé cada conciencia?

¹¹ ¿Ñee ti decisión si naquiiñeʼ guicaa de guiranu la? Coʼ. Neca maʼ bisiidiʼ ca xpinni Cristu conciencia sticaʼ modo ná Biblia la? ziuu ora gadxé gadxé decisión zacaacaʼ ora gúnicaʼ xiixa cosa. Guzéʼtenu ti ejemplu, ora reʼ tuuxa xiixa ni napa alcohol. Biblia rusiidiʼ cadi naquiiñeʼ xhudxi binni, peru qué rini diʼ ni qué zanda gueʼ tuuxa neca caadxi (Prov. 20:1; 1 Tim. 3:8). Yanna ora guicaanu decisión pa zadeʼnu o pa coʼ, ¿ñee purtiʼ si zanda guideʼnu neca caadxi guiníʼ íquenu zanda gúninu ni la? Coʼ. Purtiʼ cadi naquiiñeʼ si guicaanu encuenta conciencia stinu, sínuque laaca naquiiñeʼ guicaanu encuenta conciencia stiʼ xcaadxi hermanu.

12. ¿Ximodo zanda gúninu ni ná Romanos 14:21?

¹² Bisiidiʼ apóstol Pablo naquiiñeʼ guicaanu encuenta conciencia stiʼ xcaadxi ora guicaanu ti decisión. Laa guníʼ: «Cadi jneza go lo beela pa usaba ni hermanu stiuʼ, nin gue lu vinu, nin guʼnu intiica ni usaba laabe, nin ni uchenda laabe, nin ni ucuí sa laabe atrá» (Rom. 14:21). Pa ti hermanu qué reʼ purtiʼ ruchiiñaʼ conciencia stiʼ laa, ¿cadi dxandíʼ laanu laacaʼ qué zadeʼnu para cadi guni tropezarnu laabe la? Coʼ pue. Nuu hermanu ante gaca Testigu guizáʼ guxúdxi, peru yanna maʼ gucuaa decisión cadi lica gueʼ nin caadxi. Cadi dxandíʼ que racaláʼdxinu guni laanu xúdxibe sti biaje ne pur laani gacanabe la? (1 Cor. 6:9, 10). Nga runi, pa guni invitarnu tuuxa hermanu gueʼ neca caadxi ne gábibe laanu qué zeʼbe, cadi naquiiñeʼ guni obligarnu laabe purtiʼ zacá zusihuínninu nadxiinu laabe.

13. ¿Xi biʼniʼ Timoteo para ganda gacané xcaadxi binni gucaadiaga ca diidxaʼ nacubi ne galán stiʼ Reinu?

 ¹³ Guininu de ejemplu stiʼ Timoteo. Dxi nápabe gande iza guyuube dispuestu gaca circuncidarbe para cadi guni tropezarbe ca judíu ni chiguni predicarbe, nécaxa naná operación que. Ne zaqué bisihuínnibe zinándabe ejemplu stiʼ apóstol Pablo (Hech. 16:3; 1 Cor. 9:19-23). ¿Yanna laanu yaʼ? Nuunu dispuestu gaca sacrificarnu pur xcaadxi binni la?

14, 15. a) ¿Xi caquiiñeʼ gúninu para guiniisinu lu Stiidxaʼ Dios? b) ¿Xiñee zusihuínninu maʼ biniisinu lu Stiidxaʼ Dios pa gannaxhiinu?

¹⁴ Laanu, ca xpinni Cristu, naquiiñeʼ gucáʼ íquenu guiniisinu lu Stiidxaʼ Dios ne cadi guiaananu «casi cani deru cuzulú caziidi de Cristu» (Heb. 6:1). Peru cadi ti dxi sti dxi si zanda guiniisinu lu Stiidxaʼ Dios, naquiiñeʼ gúninu stipa guiráʼ dxi. Para ganda gácanu ti xpinni Cristu ni maʼ riene casi ti binni ni maʼ huaniisi la? naquiiñeʼ guizíʼdinu jma de Stiidxaʼ Dios ne guyúbinu guiénenu ni. Nga runi nabé riguucabe gana laanu guidúʼndanu Biblia guiráʼ dxi (Sal. 1:1-3). Nga runi pa guidúʼndanu Stiidxaʼ Dios guiráʼ dxi zacané ni laanu guiénenu ca ley ne ca principiu stiʼ Dios.

¹⁵ Ti ley ni jma risaca ni naquiiñeʼ chinanda ca xpinni Cristu nga gannaxhiicaʼ. Nga runi gudxi Jesús ca xpinni: «Pa ganaxhii saa tu zacá la? zanna binni xpinne laatu» (Juan 13:35). Santiago, medio hermanu stiʼ Jesús, guníʼ laani nga ti ley ni jma risaca (Sant. 2:8). Ne Pablo guníʼ: «Ra ganaxhii tu binni ma cayuni tu irá xixé ni na ley» (Rom. 13:10). Nga runi, nabé ruzeeteʼ Biblia pabiáʼ risaca nga gannaxhiinu «purti de Dios nga reeda enda ranaxhii» (1 Juan 4:8). Cadi runi sentir si Jiobá guendarannaxhii, sínuque rusihuínnibe ni. Ne apóstol Juan peʼ guníʼ maʼ biluíʼ Dios «laanu pabiáʼ nadxii laanu ra biseenda tobi lucha Xiiñi ndaani guidxilayú, beda udii laanu enda nabani ni qué zaluxe» (1 Juan 4:9). Nga runi ora rusihuínninu nadxiinu Jiobá, Jesús, ca hermanu stinu ne xcaadxi binni la? rusihuínninu maʼ riénenu ne maʼ biniisinu lu Stiidxaʼ Dios (Mat. 22:37-39).

16. Ora jma guiniisinu lu Stiidxaʼ Dios, ¿xiñee jma zusisácanu ca principiu stibe?

¹⁶ Ca ley ca maca nuu para zanda iquiiñenu cani, peru ca principiu ca jma stale  lugar ra zanda iquiiñenu cani. Nga runi, ra jma guiniisinu lu Stiidxaʼ Dios, jma ziénenu pabiáʼ risaca ca principiu stibe. Zanda guchaaganu ni né ni rizaaca ca xcuidihuiiniʼ. Ora nahuiinicabe la? qué rudiicabe cuenta pa zacanácabe ra guieegucabe binni ni runi cosa malu, nga runi bixhózecabe ne jñaacabe rabi laacabe xipeʼ naquiiñeʼ gúnicabe para cadi gacanácabe (1 Cor. 15:33). Peru ora maʼ ziniisi ca xcuidihuiiniʼ ca, chaahuiʼ chaahuiʼ maʼ zaníʼ íquecabe ni ná ca principiu zeeda lu Biblia ora guicaacabe xiixa decisión ne maʼ zuuyaʼ chaahuicabe tu laa zanda gaca xhamígucabe (biindaʼ 1 Corintios 13:11; 14:20). Zacaca nga rizaacanu, ora riníʼ íquenu ni ná ca principiu stiʼ Dios la? chaahuiʼ chaahuiʼ maʼ riníʼ íquenu casi riníʼ ique Jiobá ne racané conciencia stinu laanu guicaanu decisión jneza.

17. ¿Xiñee zanda guininu nuu información ni zanda gacané laanu para guicaanu decisión jneza?

¹⁷ Nápanu stale información ni zanda gacané laanu para guicaanu decisión jneza ni gusiecheʼ Jiobá. Purtiʼ ca ley ne ca principiu ni zeeda lu Biblia racané cani «para guiziidiʼ chaahuiʼ ca xpinni Dios ne chuʼcaʼ listu para gúnicaʼ intiica si dxiiñaʼ galán» (2 Tim. 3:16, 17, TNM). Yanna, pa racaláʼdxinu guiénenu xi rinabaʼ Jiobá laanu gúninu la? naquiiñeʼ gúninu stipa pur guiénenu ni ná Stiidxabe (Efes. 5:17). Ne para ganda guiénenu ni la? galán iquiiñenu guiráʼ herramienta ni rudii xquidxi Dios laanu casi folletu Ca tema ni huabee ca testigu stiʼ Jiobá, programa Watchtower Library, BIBLIOTECA NI NUU LU INTERNET Watchtower ne aplicación JW Library. Pa iquiiñenu cani zacané cani laanu guiénenu jma ni guidúʼndanu ora gápanu estudiu personal stinu ne ora gúninu adoración en familia.

18. ¿Xi ribeendunu ora gúninu ni ná ca ley ne ca principiu stiʼ Dios lu xquendanabáninu?

¹⁸ Pa gúninu ni ná ca ley ne ca principiu stiʼ Jiobá stale ni zabeendunu. Salmo 119:97-100 ná: «¡Guizáʼ nadxieeʼ ley stiuʼ! Guidubi dxi laani maʼ caníʼ iqueʼ. Pur ca mandamientu stiluʼ jma nuu xpiaaneʼ que ca xhenemiguáʼ, purtiʼ guiráʼ ora napaʼ cani ndaaniʼ iqueʼ. Jma rieneʼ chaahueʼ que guiráʼ ca maestru stinneʼ, purtiʼ nabé ricá iqueʼ cani rusietenaláʼdxiluʼ naa. Pur cani runeʼ rusihuinneʼ jma rieneʼ que ca hombre ni huaniisi para naa, purtiʼ runeʼ cani riniʼluʼ». Pa cueenu tiempu para guiníʼ íquenu ni ná ca ley ne ca principiu stiʼ Dios, zacané ni laanu para gácanu ti binni nuu xpiaaniʼ, ziénenu jma ne zánnanu xii nga ni jneza ne ni cadi jneza. Ne pa gúninu stipa pur gusíʼdinu conciencia stinu modo ná ca principiu ne ca ley stiʼ Dios la? «zaniisi nu lu stiidxa Cristu dede idxiña dxi gaca nu casi laa» (Efes. 4:13).