¿Ñee maʼ biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca guendarinabadiidxaʼ riʼ:

¿Xi tapa cosa zanda gúninu para guidúʼndanu jma galán?

Guzuhuaʼnu derechu, guicaanu bi nadipaʼ, guxheleʼ ruaʼnu ne bá yánninu ne guidúʼndanu reciu, pa gúninu zacá la? zadúʼndanu jma nadipaʼ (w17.11, yaza 5).

¿Xi rizíʼdinu de ca neza ne ca lugar ni guyuu para guxooñeʼ binni dxiqué?

Guyuu xhoopaʼ guidxi para guxooñeʼ binni ndaaniʼ guidxi Israel dxiqué ne nayá neza stiʼ cani. Ngue runi ora guxooñeʼ tuuxa hombre ra nuu tobi de ca guidxi riʼ para guilá la? jma nagueenda rindá ra nuu tobi de laaca ni (w17.11, yaza 14).

¿Xiñee zanda guininu caníʼ Salmo 118:22 de dxi bibani Jesús de lade gueʼtuʼ?

Qué ñuni crécabe pa dxandíʼ Jesús nga Mesías, ngue runi biiticabe laa. Ne napa xidé guibánibe de lade gueʼtuʼ para gácabe «guié ni jma risaca» que (w17.12, yaza 9 ne 10).

¿Ñee caquiiñeʼ gapa tuuxa derechu de baʼduʼ lugola para gueeda gaca tobi de cani gueeda gale Mesías que de laa la?

Nuu tiru de ca baʼduʼ lugola que nga za Mesías que, peru cadi guiráʼ biaje guca ni zaqué. Nanna ca judíu que ni ne biʼniʼ crecaʼ ni, ti ejemplu de laani nga biʼniʼ crécabe zeeda Mesías que de David, ni jma nahuiiniʼ lade ca xiiñiʼ Jesé (w17.12, yaza 14 ne 15).

¿Xi principiu zeeda lu Biblia zacané laanu chuʼnu nazaaca?

Ley ni gucuaa Moisés que ná naquiiñeʼ chuʼ ti binni huará en cuarentena, quiʼbiʼ náʼ despué de maʼ gudaʼnaʼ ti gueʼtuʼ ne gucaachicaʼ ni guricaʼ ndaaniʼ yú. Ne laaca biʼniʼ mandar Ley que guni circuncidárcabe ti baʼduhuiiniʼ lu xhono gubidxa de gule, purtiʼ biáʼsipeʼ lu xhono gubidxa ca maʼ raca cuagular rini stiʼ ti baʼduhuiiniʼ ne gupa ni laacabe para cadi gaca huarácabe (wp18.1, yaza 7).

¿Xiñee nánnanu cadi malu diʼ nga gannaxhii ti xpinni Cristu laca laa?

Naquiiñeʼ gannaxhiinu sti binni cásica nadxiinu laca laanu (Mar. 12:31). Ne hombre ni maʼ bichaganáʼ naquiiñeʼ gannaxhii xheelaʼ «casi nadxii cuerpu stiʼ» (Efes. 5:28). Peru pa gannaxhii xhátabe laabe zándaca guyúbibe puru para laasibe (w18.01, yaza 23).

¿Xi naquiiñeʼ gúninu para guiniisinu en sentidu espiritual?

Caquiiñeʼ guidúʼndanu Stiidxaʼ Dios, guiníʼ íquenu de laani ne gúninu ni lu xquendanabáninu. Caquiiñeʼ gúninu ni ná espíritu santu stiʼ Dios, gudiʼnu lugar gacané xcaadxi hermanu laanu ne gudiʼnu xquíxepeʼ laacaʼ (w18.02, yaza 26).

¿Xiñee cadi jneza iquiiñenu astrología ne adivinación para gánnanu xi chiguizaaca despué?

Nuu stale razón, peru razón ni jma risaca nga purtiʼ Biblia ná cadi jneza ni (wp18.2, yaza 4 ne 5).

Pa maʼ biʼniʼ aceptarnu ti invitación, ¿ximodo naquiiñeʼ guidúʼyanu ni ne xi naquiiñeʼ gúninu?

Pa maʼ gucuaanu ti invitación ne guninu ziuunu la? naquiiñeʼ chuunu (Sal. 15:4). Cadi pur intiica si cosa guininu maʼ qué ziuunu. Purtiʼ zándaca binni ni biʼniʼ invitar laanu ca maʼ biʼniʼ stipa pur guni preparar xiixa guendaró para laanu (w18.03, yaza 18).

¿Xi zanda guiziidiʼ ca hermanu ni maʼ guca nombrar de ejemplu Timoteo?

Bizaalaʼdxiʼ Timoteo xcaadxi binni ne gudixhe ique guni cosa espiritual primé lu xquendanabánibe. Bíʼnibe dxiiñaʼ nadipaʼ para bíʼnibe ni ná Jiobá ne bíʼnibe ni biziidibe. Qué nusaanabe de niniisibe en sentidu espiritual ne bidiibe lugar gacané espíritu stiʼ Jiobá laabe. Cadi ca ancianu si nga zanda chinanda ejemplu stibe, sínuque guiráʼ ca hermanu (w18.04, yaza 13 ne 14).