1. ¿Xi guendanagana bidxaagalú ca xpinni Cristu ni bibani lu primé siglu?

BIAʼ lu iza 62 ne 64 bicaa apóstol Pedro ra nuu «ca xpinni Dios ni ma cadi nabeza xquidxi, cani reche ndase neza Ponto, Galacia, Capadocia, Asia, ne Bitinia» (1 Ped. 1:1). Ca hermanu riʼ de gadxé gadxé lugar laacaʼ. Ne caquiiñecaʼ tu gacané ne cuʼ gana laacaʼ purtiʼ canazananda binni laacaʼ, ne laani nga ni bizeeteʼ Pedro zeeda gaca casi «xiixa ni nabé naná» para laacabe. Ne tiempu bibánicabe que nabé nagana ni. Apóstol riʼ bicaa: «Ma zeda dxiña dxi iluxe irá xixé ni nuu ndaaniʼ guidxilayú». Ne biaʼ chii iza despué binitilú Jerusalén. ¿Xi zacané ca xpinni Cristu que para gudxiilucaʼ ca guendanagana de tiempu que yaʼ? (1 Ped. 4:4, 7, 12).

2, 3. ¿Xiñee gudxi Pedro ca xpinni Cristu gácacaʼ hospitalariu? (Biiyaʼ foto zeeda ra ruzulú tema riʼ).

² Tobi de ca conseju ni bidii Pedro ca xpinni Cristu de dxiqué nga guidxaagalusaacaʼ o gácacaʼ hospitalariu (1 Ped. 4:9). Lu griegu, diidxaʼ hospitalariu riníʼ ni «gusihuinni tuuxa rizaalaʼdxiʼ o nachaʼhuiʼ né ca binni ni qué runibiáʼ». Peru ora guníʼ apóstol riʼ «lauchagalú saa» la? cayábibe ca hermanu que gácacaʼ hospitalariu né ca binni ni maca runibiaʼcaʼ. ¿Xi zabeendú ca xpinni Cristu que pa chinándacaʼ conseju riʼ yaʼ?

 ³ Zacané ni laacabe chuʼcabe tobi si. Yanna, guníʼ ique xi biʼniʼ sentirluʼ dxi biʼniʼ invitar ti hermanu lii ra lidxi, ¿cadi dxandíʼ qué ziuu dxi guiaandaʼ ni lii la? Ne, dxi biʼniʼ invitarnu ti hermanu ra lídxinu, ¿cadi dxandíʼ jma guca xhamígunu laabe la? Ora gácanu hospitalariu racané ni laanu gunibiáʼ chaahuinu ca hermanu stinu. Tiempu bibani Pedro que, zeʼ dxi jma nagana nabani ca binni que, nga runi caquiiñeʼ chuʼ ca xpinni Cristu tobi si. Ngaca nga caquiiñeʼ gúninu lu ca últimu dxi nabáninu riʼ (2 Tim. 3:1).

4. ¿Xi pregunta zacábinu lu tema riʼ?

⁴ ¿Pora zanda gusihuínninu nácanu hospitalariu? ¿Xi zanda gúninu para cadi chuʼ xiixa ni gucueeza laanu gácanu hospitalariu? Ne ¿ximodo zanda gácanu nachaʼhuiʼ ora guni invitárcabe laanu yaʼ?

5. ¿Ximodo zanda gusihuínninu ra reunión nácanu ti binni hospitalariu?

⁵ Ora nuunu ra reunión. Runi invitar Jiobá ne organización stiʼ laanu chuunu reunión. Ne racaláʼdxinu guiráʼ binni rié ra Yoo stiʼ Reinu guni sentircaʼ galán (Rom. 15:7). Ne nabé risaca ndiʼ, jmaruʼ si ora primé biaje zeʼ tuuxa reunión. Cumu laaca biʼniʼ invitar Jiobá laabe la? naquiiñeʼ gúninu xiixa para guni sentirbe galán gastiʼ naca ximodo rihuínnibe ne xi nácube (Sant. 2:1-4). Pa guidúʼyanu nin ti hermanu cadi cadxiña laabe, ¿ñee zanda gábinu laabe pa zabinebe laanu la? Pa gacanenu laabe chinándabe programa ni chitiidiʼ ra reunión ne gacanenu laabe guyúbibe ca textu ni zeeda lu Biblia la? zudiibe xquíxepeʼ laanu. Pa gúninu zacá la? zusihuínninu zinándanu ni ná conseju riʼ: «Lauchagalú cani zeeda de sti ladu» (Rom. 12:13).

6. ¿Tuu nga ca binni ni jma naquiiñeʼ guni invitarnu ra lídxinu?

⁶ Ora guni invitarnu tuuxa ti guendaró o gueʼ xiixa. Tiempu gucuá Biblia, ca binni que gatigá runi invitarcaʼ xcaadxi binni para chitó gueta ra lídxicaʼ ne zaqué gusihuínnicaʼ racaláʼdxicaʼ chuʼcaʼ tobi si ne gaca xhamígucaʼ laacabe (Gén. 18:1-8; Juec. 13:15; Luc. 24:28-30). Yanna laanu, ¿tuu nga ca binni ni jma naquiiñeʼ guni invitarnu yaʼ? Ca hermanu ne hermana de ra congregación stinu. Purtiʼ laacabe nga ridxaaganu guiráʼ dxi. Caquiiñeʼ gápanu xhamígunu ni qué gusaana laanu ne guyúbinu chuʼnu tobi si né laacabe, purtiʼ ora tiidinu ra nagana zaquiiñeʼ gacanésaanu. Nabé risaca gánnanu xi biʼniʼ Grupu ni Zaniruʼ lu iza 2011, bichaacabe hora runi estudiar familia Betel de Estados Unidos revista Torre stiʼ ni rapa, dxiqué la? guca ni 6:45 yanna riʼ maʼ raca ni 6:15 huadxí. ¿Xiñee yaʼ? Purtiʼ lu anunciu que biete despué de reunión riʼ, zapa xcaadxi betelita tiempu para guni invitarcaʼ xcaadxi hermanu ni runi dxiiñaʼ Betel para chuʼcaʼ juntu ti ratu. Ne zaqueca biʼniʼ xcaadxi sucursal. Ne pur ndiʼ la? jma tobi si nuu ca hermanu ni runi dxiiñaʼ Betel.

7, 8. ¿Ximodo zanda gácanu hospitalariu né ca hermanu ni reeda gudii discursu ra congregación stinu yaʼ?

⁷ Ora reeda gudii xcaadxi hermanu de sti congregación discursu ra congregación stinu, ora reeda ganna superintendente de circuito ne nuu biaje ca representante ni ruseendaʼ Betel la? nápanu oportunidad de gácanu hospitalariu né laacabe (biindaʼ 3 Juan 5, 8). Ti modo zanda gúninu ni nga guni invitarnu laacabe ti guendaró o guécabe xiixa. ¿Xiñee que guʼnuʼ ni sti biaje gueeda tuuxa hermanu ra congregación stiluʼ yaʼ?

⁸ Ti hermana de Estados Unidos guníʼ: «Ca iza ni maʼ gudiʼdiʼ ca, naa ne xheelaʼ nabé huayuni invitardu ca hermanu ni reeda gudii discursu ra congregación stidu ra lídxidu. Ne guiráʼ biaje gúnidu ni riuʼdu nayecheʼ, raca divertirdu, peru ni jma galán nga racané ni laadu para chuʼdu jma naguidxi en sentidu espiritual. Qué huayuu dxi gaca arrepentirdu de gácadu hospitalariu».

9, 10. a) ¿Tuu nga cani caquiiñeʼ chuʼ tu guni hospedar laacaʼ? b) Cani napa ti yoo nahuiiniʼ, ¿ñee laaca zanda gácacaʼ hospitalariu la? Bizeeteʼ ti ejemplu.

 ⁹ Ora guni hospedarnu tuuxa. Dxiqué la? stale binni runi hospedarcaʼ binni de confianza ra lídxicaʼ (Job 31:32; Filem. 22). Tiempu riʼ laaca caquiiñeʼ gúninu ni. Guzéʼtenu ti ejemplu, ora riganna ca superintendente de circuito ca congregación ca la? stale biaje caquiiñecabe ra guiaanacabe. Laaca zándaca iquiiñeʼ cani rié ca scuela ni napa xquidxi Dios ne ca voluntariu de construcción ra guiaanacaʼ. Ne ora rizaaca xiixa desastre natural la? nuu familia caquiiñecaʼ ti lugar ra guiaanacaʼ laga si gaca chaahuiʼ lídxicaʼ. Cadi naquiiñeʼ guiníʼ íquenu cani napa si ti yoo naroʼbaʼ ne galán nga cani naquiiñeʼ gudii hospedaje. Ne zándaca maʼ huayúnicabe ni stale biaje. Peru ¿ñee zanda gudiʼnu hospedaje neca nahuiiniʼ ra lídxinu la?

¹⁰ Ti hermanu de Corea del Sur rietenalaʼdxiʼ né stale cariñu guiráʼ biaje biʼniʼ hospedarbe ca estudiante ni rié ca scuela ni napa xquidxi Dios. Sicaríʼ bicaabe: «Nacubigá, qué ninaʼyaʼ purtiʼ cadi xadxí de bichaganadu ne nahuiiniʼ yoo ra nabézadu que. Peru guizáʼ galán bineʼ sentir dxi bineʼ hospedar ca hermanu riʼ. Gunda bidúʼyadu pabiáʼ nayecheʼ ribani ca guendaxheelaʼ ora guirópacaʼ rúnicaʼ ni ná Jiobá ne rúnicaʼ dxiiñaʼ juntu para ugaandacaʼ ca meta sticaʼ».

11. ¿Xiñee naquiiñeʼ gácanu hospitalariu né ca hermanu ni beeda para gacané congregación stinu?

¹¹ Ora reeda gacané xcaadxi hermanu congregación stinu. Zándaca beedabíʼcabe lugar ra nabézanu para gacanécabe gaca predicar o nácacabe precursor ni guca asignar congregación stinu. Nacubigá la? zaca ni nagana para laacabe, purtiʼ naquiiñeʼ guiaacabe ti lugar gadxé, ti congregación nacubi ne zándaca ti diidxaʼ o ti cultura gadxé. Ora guni invitarnu laacabe ti guendaró o guécabe xiixa o chinenu laacabe paxaraa la? zacané ni laacabe gápacabe jma xhamígucabe ne guiaacabe lugar yendézacabe.

12. ¿Xi experiencia rusihuinni cadi caquiiñeʼ gúninu stale cosa para gácanu hospitalariu?

¹² Cadi caquiiñeʼ gúninu stale cosa para gácanu hospitalariu (biindaʼ Lucas 10:41, 42). Ti hermanu rietenalaʼdxiʼ ni bizaaca dxi bizulú biʼniʼ servir de misioneru laa ne xheelaʼ. Joven ruʼ laacabe ne ribánacabe. Laabe guniʼbe: «Ti huadxí, guizáʼ triste nuu xheelaʼ purtiʼ cabánabe, ne qué guidxelaʼ xi guneʼ para gacaniáʼ laabe chuʼbe galán. Biaʼ a las 7:30 málasi bixhidxinácabe ra puertaʼ stidu. Guca si ni ti binni cacaa estudiu, nebe chonna naranja para gudiibe bienvenida laadu. Gúdxidu laabe chuʼbe ne bidiʼdu laabe ti vasu nisa. Despué bínidu té ne dxuladi ndaʼ. Para tiempu que, caʼruʼ guizíʼdidu diidxaʼ suajili ne laabe qué riniʼbe diidxaʼ ni rinidu. Peru dede dxi que, bizulú guca xhamígudu ca hermanu ni nabeza guidxi que ne dede dxi que jma nayecheʼ bibánidu».

13. ¿Xiñee galán gácanu hospitalariu?

¹³ ¿Ñee raca nagana para laanu gácanu hospitalariu la? Pa zacá ni, zándaca maʼ binítinu oportunidad de gunibiaʼnu ne gaca xhamígunu xcaadxi hermanu. Pa gácanu hospitalariu la? zacané ni laanu para cadi guni sentirnu stúbinu. Yanna, ¿xi zándaca gucueeza tuuxa para cadi gaca hospitalariu yaʼ? Guidúʼyanu caadxi cosa ni zándaca gucueeza laanu.

14. Pa huaxiéʼ tiempu ne stipa nápanu para guni invitarnu ca hermanu ra lídxinu o guicaanu invitación sticaʼ, ¿xi zanda gúninu?

¹⁴ Tiempu ne stipa stinu. Laanu, ca xpinni Jiobá, guizáʼ riuu xhiiñanu purtiʼ nápanu stale responsabilidad. Nga runi, nuu tu laa riníʼ ique qué gapa tiempu ne stipa para gaca hospitalariu. Pa zacá riníʼ íquenu la? zándaca caquiiñeʼ quixhe chaahuinu tiempu stinu. ¿Ñee zanda quixhe chaahuinu tiempu stinu ti gápanu stipa para guni invitarnu ca hermanu  stinu o chuunu ora guni invitarcabe laanu la? Biblia cayabi laanu gácanu hospitalariu (Heb. 13:2). Ni jma jneza gúninu nga cueenu tiempu para chúʼnenu ca hermanu stinu ne cadi malu ni. Ne para ganda gúninu ni la? zándaca nuu biaje caquiiñeʼ gusaana de gúninu xcaadxi cosa ni huaxiéʼ risaca.

15. ¿Xiñee zándaca guiníʼ íquenu qué zanda gácanu hospitalariu?

¹⁵ Modo ridúʼyanu laca laanu. Nuu biaje nápanu gana gácanu hospitalariu, peru ¿ñee riníʼ íquenu qué zanda gúninu ni la? Zándaca riníʼ íquenu zacá purtiʼ natuinu o purtiʼ ridxíbinu pa qué guidxélanu xidé guinínenu ca invitadu stinu ne guireecaʼ gana. O zándaca purtiʼ huaxiéʼ bueltu nápanu ne pur nga guiníʼ íquenu qué zanda gudiʼnu laacabe ni rudii xcaadxi hermanu de congregación laacabe. Peru cadi guiaandaʼ laanu cadi caquiiñeʼ gaca ra lídxinu de luju para guni invitarnu laacabe. Ni jma risaca nga chuʼ ni nayá ne gápanu ca cosa stinu lugar stiʼ para guni sentir ca invitadu stinu galán.

16, 17. Ora chigápanu invitadu, ¿xi zacané laanu para cadi chuʼnu xizaa?

¹⁶ Pa riuʼnu xizaa ora gápanu invitadu la? cadi laasinu runi sentirnu zacá. Sicaríʼ guníʼ ti ancianu de Gran Bretaña: «Zándaca quibaʼ nerviu stinu ora maʼ cayuʼnu listu para gápanu invitadu. Peru cásica ora maʼ bíninu xiixa para Jiobá la? runi sentirnu galán ne nayecheʼ neca guca ni nagana para laanu, zacaca runi sentirnu ora guni invitarnu tuuxa. Ne nabé nayecheʼ huayuneʼ sentir ora guneʼ invitar tuuxa ti café ne güeniáʼ laa diidxaʼ». Cadi guiaandaʼ laanu guizáʼ risaca nga guizaaláʼdxinu ca invitadu stinu (Filip. 2:4). Stale binni riuulaʼdxiʼ guiníʼ de xquendanabani. Ne ora nuunenu laacabe juntu nga zanda gucaʼdiáganu laacabe. Sti ancianu guníʼ sicaríʼ: «Ora nuu ca hermanu de ra congregación ra lidxeʼ la? racané ni naa gunebiaʼyaʼ laacabe, guieneʼ laacabe jma ne gannaʼ ximodo binibiáʼcabe ni dxandíʼ rusiidiʼ Biblia». Pa guizaaláʼdxinu ca invitadu stinu la? guiranu zadídinu ti ratu nayecheʼ.

¹⁷ Ti precursora ni bidii hospedaje caadxi estudiante ni rié ca scuela ni napa xquidxi Dios guníʼ: «Nacubigá que guyuaaʼ xizaa purtiʼ nahuiiniʼ ra lidxeʼ ne ca mueble ni napa que maʼ nayooxhoʼ cani. Peru guizáʼ gudixhedxí xheelaʼ ti instructor ladxiduáʼ. Gúdxibe naa ora rúnicabe dxiiñaʼ de circuito, ca semana jma galán runi sentírcabe nga ora rigánnacabe ca congregación, purtiʼ runibiáʼcabe binni espiritual ni zándaca qué gapa stale cosa risaca, peru cásica laacabe jma cá íquecaʼ gúnicaʼ xhiiñaʼ Jiobá. Ni guniʼbe riʼ bisietenalaʼdxiʼ ni naa ca diidxaʼ gudxi jñaaʼ laadu dxi nahuiinidu. Jñaaʼ guníʼ: “Jma galán nga gó binni ti bladu verdura peru nadxiisaacaʼ”» (Prov. 15:17). Gastiʼ nin ti razón para chuʼnu xizaa, purtiʼ ni jma risaca nga gusihuínninu nadxiinu ca invitadu stinu.

18, 19. Ra gácanu hospitalariu, ¿ximodo racané ni laanu chuʼnu galán né xcaadxi?

¹⁸ Modo guidúʼyanu xcaadxi binni. ¿Ñee nuu tuuxa ra congregación ni qué riuuláʼdxinu modo laa la? Zándaca qué racaláʼdxinu guni invitarnu tuuxa hermanu ni qué riuuláʼdxinu modo laa ra lídxinu o tuuxa ni biʼniʼ laanu xiixa ne caʼruʼ gusiáʼndanu ni. Pa qué gúninu xiixa la? zándaca qué zuchaa modo ridúʼyanu laabe.

¹⁹ Biblia ná pa gácanu hospitalariu zacané ni laanu chuʼnu galán né xcaadxi dede né ca enemigu stinu (biindaʼ Proverbios 25:21, 22). Pa guni invitarnu tuuxa ra lídxinu zacané ni laanu gusiáʼndanu ni bíʼnicabe laanu ne ziuʼnu jma galán né laacabe. Ne laaca zacané ni laanu guidúʼyanu ca cualidad ni nápabe cásica biʼyaʼ Jiobá ni ne pur nga bichiña laabe ra nuu (Juan 6:44). Ora cadi cabeza tuuxa guni invitarnu laa ne gúninu ni purtiʼ nadxiinu laa la? zándaca zacá zuzulú zaca xhamígunu laabe. ¿Ximodo zanda gánnanu cayuni invitarnu laabe purtiʼ dxandíʼ  nadxiinu laabe yaʼ? Ti modo zanda gánnanu ni nga ra chinándanu conseju ni zeeda lu Filipenses 2:3, ra ná naquiiñeʼ gácanu humilde ra guidúʼyanu jma risaca xcaadxi que laanu. Galán guiníʼ íquenu jma risaca xcaadxi hermanu que laanu. Ne zanda guizíʼdinu de laacabe purtiʼ jma naguidxi fe stícabe, jma runi huantárcabe que laanu ne guizáʼ nadxibalúcabe o nápacabe xcaadxi cualidad ni laanu qué gápanu. Pa guidúʼyanu napa ti hermanu xiixa cualidad ni laanu qué gápanu la? zannaxhiinu laabe jma ne qué zaca nagana para laanu gácanu hospitalariu né laabe.

20. Pa maʼ biʼniʼ aceptarnu ti invitación, ¿xi naquiiñeʼ gúninu ne xiñee?

²⁰ Gunabadiidxaʼ salmista David Jiobá xi cualidad naquiiñeʼ gapa ca invitadu stiʼ (Sal. 15:1). Tobi de ca cualidad ni naquiiñeʼ gápacabe nga guni cumplírcabe né ni maʼ bidii stiidxacabe neca gaca ni nagana para laacabe (Sal. 15:4). Nga runi, ora maʼ biʼniʼ aceptarnu ti invitación, cadi naquiiñeʼ guininu maʼ qué ziuunu pur intiica si cosa. Purtiʼ pa maʼ qué chuunu la? pur gana si guiráʼ ni guni binni ni biʼniʼ invitar laanu ca (Mat. 5:37). Stale tu laa ricaa ti invitación peru despué rudxii ni para ganda cheʼ sti lugar ra biʼniʼ invitárcabe laa. ¿Cadi dxandíʼ pa guni tuuxa zacá zusihuinni qué gapa guendarannaxhii nin respetu la? Naquiiñeʼ guicaanu invitación ni gudii ca hermanu ca laanu ne gudiʼnu xquíxepeʼ laacabe pur guiráʼ ni gúnicabe pur laanu (Luc. 10:7). Peru pa málasi maʼ qué ganda chuunu la? dede ante naquiiñeʼ guinínenu hermanu ni biʼniʼ invitar laanu ca para gábinu laa maʼ qué ziuunu. Zacá zusihuínninu nadxiinu ne nápanu respetu laacabe.

21. ¿Xi costumbre naquiiñeʼ guni respetar tuuxa ora guni invitárcabe laa?

²¹ Laaca risaca guni respetarnu costumbre napa binni. Nuu cultura zanda cheluʼ ra lidxi tuuxa neca qué ñábiluʼ laa pa cheluʼ, peru nuu lugar la? napa xidé gábiluʼ laacaʼ dede ante. Ne nuu guidxi, ca binni ni runi invitar rudiicaʼ guendaró jma galán ca invitadu sticaʼ, ne familia sticaʼ maʼ gadxé ni ró, peru ndaaniʼ xcaadxi guidxi la? laaca ni gó ca invitadu nga gó familia sticaʼ. Nuu guidxi, ca invitadu ca rinecaʼ xiixa para gacané guendaró, peru xcaadxi lugar cadi caquiiñeʼ chinécabe xiixa. Nuu lugar qué ruuyacabe mal guiníʼ tuuxa qué zié primé o guiropa biaje guni invitárcabe laa, peru xcaadxi lugar la? cadi jneza ruuyacaʼ ni. Modo tiica si costumbre napa binni lugar ra nuunu, gúninu stipa pur chuʼ cani biʼniʼ invitar laanu nayecheʼ.

22. ¿Xiñee nabé risaca gácanu hospitalariu né xcaadxi yaʼ?

²² Pedro guníʼ: «Ma zeda dxiña dxi iluxe irá xixé ni nuu ndaani guidxilayú» (1 Ped. 4:7). Tiempu riʼ, rihuinni dxichi jma maʼ gaxha nuu dxi ca. Cumu jma nagana ziyaca ca dxi riʼ la? jma caquiiñeʼ gannaxhiisaanu. Nga runi, nabé risaca chinándanu conseju bidii Pedro ora guníʼ «lauchagalú saa» o lagaca hospitalariu (1 Ped. 4:9). Nabé galán gusihuínninu hospitalidad ne cadi naquiiñeʼ gusaana de gusihuínninu ni.