1. ¿Ximodo rácanu binni nuu xpiaaniʼ, ne ximodo racané ni laanu?

GUENDANUUXPIAANIʼ ca zeeda ni de Jiobá ne rudiibe ni laanu purtiʼ nacháʼhuibe. Santiago 1:5 ná: «Pa nuu tuuxa de laatu caʼru guiene chaahui xi naquiiñe guni la? inaba lu Dios usiene laa ne zusiene Dios laa. Purti tutiica inabaʼ, rudii Dios ni laa de idubi ladxidóʼ sin tinde né laa». Ti modo para gácanu binni nuu xpiaaniʼ nga gudiʼnu lugar uguu jneza Jiobá laanu. Guendanuuxpiaaniʼ ca rapa ni laanu para cadi gúninu cosa malu ne racané ni laanu jma gaca xhamígunu laabe (Prov. 2:10-12). Ne pur nga la? qué zaxélenu de Dios ni nadxii laanu laga cabézanu gudii laanu «enda nabani ni qué zaluxe» (Jud. 21).

2. ¿Xi zacané laanu para gusisácanu disciplina stiʼ Dios?

² Cumu gadxé gadxé modo biniisinu, nácanu binni ruchee ne pur xcaadxi cosa la? zándaca qué chuuláʼdxinu ora uguu jnézacabe laanu o guiníʼ íquenu qué zacané ni laanu. Peru ora guidúʼyanu ximodo racané ni laanu lu xquendanabáninu la? zusisácanu ni jma ne zudiʼnu cuenta pabiáʼ nadxii Dios laanu. Proverbios 3:11, 12 cayabi laanu: «Xiiñeʼ, cadi gudxiidécheluʼ Jiobá ora gulidxe lii». Ne laaca ruzeeteʼ ni: «Purtiʼ riguu jneza Jiobá ca binni ni nadxii, cásica runi bixhoze binni né ti xiiñiʼ ni rusiecheʼ laa». Cadi guiaandaʼ laanu  racalaʼdxiʼ Jiobá guibáninu galán (biindaʼ Hebreos 12:5-11). Cumu runibiáʼ chaahuiʼ Jiobá laanu la? jneza runi disciplinar laanu. Lu tema riʼ zadúʼyanu tapa cosa ni zeeda lu disciplina: 1) autodisciplina o gucueezanu laca laanu, 2) ora riguu jneza binni xiiñiʼ, 3) ora uguu jnézacabe laanu ndaaniʼ congregación ne 4) xiixa ni zándaca guniná laanu jma que ora riguu jnézacabe laanu.

3. ¿Ximodo zanda gacané binni ca xiiñiʼ para gucueezacaʼ laca laacaʼ? Bizeeteʼ ti ejemplu.

³ Pa nápanu autodisciplina o rucueezanu laca laanu la? zuni controlarnu ni rúninu ne cani riníʼ íquenu. Qué ralenenu cualidad riʼ, nga runi caquiiñeʼ gúninu stipa para gápanu ni. Zanda guchaaganu ni né ti hombrehuiiniʼ ni deruʼ caziidiʼ gusá bicicleta. Primerugá la? rinaazeʼ bixhózebe laabe para cadi guiábabe. Peru ora maʼ randa rucueeza hombrehuiiniʼ riʼ laa la? chaahuidugá chaahuidugá maʼ zundaa bixhózebe laabe. Ora maʼ biiyaʼ bixhózebe maʼ zanda gusabe ni stúbibe ne maʼ qué ziábabe la? oraqueruʼ rundaa laabe. Zacaca nga ora qué rusaana binni de gusiidiʼ ca xiiñiʼ né paciencia ne gulídxecaʼ laacabe modo ná Jiobá, pa gúnicabe ndiʼ la? zacanécabe xiiñicabe gaca binni nuu xpiaaniʼ ne gucueeza laca laa (Efes. 6:4).

4, 5. a) ¿Xiñee risaca gucueeza tobi laca laa para gusihuinni maʼ gadxé laa? b) ¿Xiñee cadi naquiiñeʼ guireʼnu gana ora gucheʼnu?

⁴ Laaca ngaca rizaaca né ca binni ni runibiáʼ Jiobá ora maʼ huaniisi. Neca randa rucueezacabe laacabe caadxi la? caʼruʼ diʼ guiniisicabe en sentidu espiritual. Peru ora guzulú tuuxa gusihuinni maʼ gadxé laa ne runi stipa pur chinanda ejemplu stiʼ Cristu, riniisi en sentidu espiritual (Efes. 4:23, 24). Nabé risaca gucueeza tobi laca laa purtiʼ racané ni laanu gusaananu guiráʼ cosa ni cadi jneza bíninu dxi caʼruʼ gunibiaʼnu Dios, ne guiráʼ deseu ni napa binni guidxilayú, ne maʼ cadi guibáninu modo ná íquenu sínuque gúninu ni jneza ne guibáninu modo riuuláʼdxibe ndaaniʼ guidxilayú riʼ (Tito 2:12).

⁵ Guiranu imperfectu laanu (Ecl. 7:20). Nga runi, pa guchee tuuxa qué riníʼ diʼ nga qué randa rucueezabe laca laabe. Proverbios 24:16 ná: «Zándaca guiaba ti binni runi ni jneza gadxe biaje, peru ziásabe sti biaje». ¿Ximodo zanda guiasa ti binni ni maʼ biaba yaʼ? Qué zanda gúnibe ni pur stipa si stibe, sínuque espíritu stiʼ Dios chigacané laabe. Biblia ná sicaríʼ: «Guiráʼ cosa zanda guneʼ purtiʼ nuu tobi ni cudii poder naa» (Filipenses 4:13, TNM). Ti cualidad stiʼ fruto stiʼ espíritu santu nga gucueeza tobi laca laa, ngaca nga autodisciplina.

6. ¿Ximodo zanda gácanu ti binni ni riuulaʼdxiʼ guni estudiar Stiidxaʼ Dios? (Biiyaʼ ca foto ni zeeda ra ruzulú tema riʼ).

⁶ Para ganda gápanu autodisciplina o gucueezanu laca laanu la? laaca naquiiñeʼ guni orarnu, guni estudiarnu Biblia ne guiníʼ íquenu ni gúʼndanu. Peru ¿xi zanda gúniluʼ pa raca nagana para lii guni estudiarluʼ Biblia o qué riuuláʼdxiluʼ guni estudiarluʼ yaʼ? Cadi guireeluʼ gana. Pa gudiiuʼ lugar la? zacané Jiobá lii guiale de lii gunibiaʼluʼ Stiidxabe (1 Ped. 2:2). Primé la? gunabaʼ laabe gacanebe lii gápaluʼ autodisciplina para ganda guni estudiarluʼ Stiidxabe. Ne biʼniʼ ni gunábaluʼ laabe. Zanda guzulú guni estudiarluʼ caadxi. Ne chaahuidugá qué zaca ni nagana para lii ne ziuuláʼdxiluʼ ni, ne ziécheluʼ ora cueeluʼ tiempu para guiníʼ íqueluʼ ca diidxaʼ ni zeeda de Jiobá (1 Tim. 4:15).

7. Biquiiñeʼ ti ejemplu para gusiéneluʼ ximodo racané autodisciplina laanu para ugaandanu ca meta espiritual stinu.

⁷ Laaca racané autodisciplina ca laanu ugaandanu meta espiritual. Guidúʼyanu ejemplu stiʼ ti padre de familia ni bidii cuenta maʼ huaxiéʼ nayecheʼ runi sentir ora chiguni  predicar. Cumu bidiibe cuenta modo nuube que, gudixhe íquebe gácabe precursor regular. Peru para ganda ugaandabe meta que, bizulú biindabe tema ni cusiene de dxiiñaʼ runi ti precursor ne biʼniʼ orarbe Jiobá. Ndiʼ guluu gana laabe ne guyuube jma gaxha de Jiobá. Ne ora gúpabe oportunidad bíʼnibe de precursor auxiliar. Gudixhe íquebe ugaandabe meta que ne qué nudiibe lugar ñuu xiixa ni nucueeza laabe de ñúnibe ni. ¿Xi guleendube yaʼ? Ra gudiʼdiʼ tiempu gúcabe precursor regular.

8-10. a) ¿Xi zacané cani napa xiiñiʼ gusiniisicaʼ ne gulídxecaʼ ca xiiñicaʼ modo ná Jiobá? b) ¿Xi zanda guiziidiʼ cani napa xiiñiʼ de ejemplu stiʼ Noé?

⁸ Ca xpinni Cristu nápacaʼ responsabilidad de gusiniisicaʼ, gusiidicaʼ ne gulídxecaʼ ca xiiñicaʼ modo ná Jiobá (Efes. 6:4). Ne cadi fácil guni binni ni pur guiráʼ ni nuu ndaaniʼ guidxilayú ra nabézanu riʼ (2 Tim. 3:1-5). Cadi maca nanna ti xcuidi xii nga ni jneza ne ni cadi jneza ora gale, purtiʼ caʼruʼ guiziidibe ni. Ne para ganda guiziidibe la? caquiiñeʼ guicaabe disciplina (Rom. 2:14, 15). Ti hombre ni nabé nanna de Biblia guníʼ zanda gaca traducir diidxaʼ «disciplina» casi «desarrollo infantil» o gusiniisi tuuxa xiiñiʼ para gaca ti binni responsable ora maʼ huaniisi.

⁹ Ora riguu jneza binni xiiñiʼ né guendarannaxhii la? runi sentir xiiñicabe nuu tu cayapa laacaʼ. Riziidicabe xii nga ni zanda gúnicabe ne xi qué zanda, ne xi zazaacacabe pur ni gúnicabe. Nga runi, nabé risaca guinabaʼ binni Jiobá gacané laa para gusiniisi ca xiiñiʼ. Cadi guiaandaʼ laanu ra zidiʼdiʼ tiempu ruchaa modo rusiniisi binni xiiñiʼ ne maʼ gadxé gadxé modo rusiniisi binni xiiñiʼ cada lugar. Peru ora rucaadiaga binni Dios la? cadi caquiiñeʼ guinabadiidxaʼ ximodo gusiniisi ca xiiñiʼ ne qué zusiniisi laacabe modo ná binni guidxilayú.

¹⁰ Guidúʼyanu ejemplu stiʼ Noé. Dxi biʼniʼ mandar Jiobá laabe guzaʼbe ti arca, qué nicá íquebe ñúnibe ni modo nabe, purtiʼ qué huayuu dxi gúnibe tobi. Nga runi, naquiiñeʼ gápabe confianza Jiobá ne gúnibe casipeʼ biʼniʼ mandar laabe (Gén. 6:22). ¿Xi guleendube yaʼ? Pur bizaʼbe arca que la? bilabe ne laaca bilá familia stibe. Ne pur gúpabe confianza Jiobá gunda bisiniisibe ca xiiñibe modo ná Jiobá. Bisiidibe ca xiiñibe jneza ne gúcabe ti ejemplu para laacaʼ, neca guca ni nagana ante guiaba nisaguié naroʼbaʼ que (Gén. 6:5).

11. ¿Xi zabeendú binni pa gucaadiaga Jiobá ora gusiniisi ca xiiñiʼ?

¹¹ Pa nápaluʼ xiiñiluʼ, ¿ximodo zanda gusiniisiluʼ laacabe módopeʼ ná Dios yaʼ? Bicaadiaga Jiobá. Bidii lugar gacanebe lii gusiniisiluʼ ca xiiñiluʼ, ne yenanda ca conseju ni zeeda lu Stiidxabe ne ni rudii organización stibe. Ne ra guiniisi ca xiiñiluʼ zudiicabe xquíxepeʼ lii. Ti hermanu guníʼ: «Rudieeʼ xquíxepeʼ modo bisiniisi bixhozeʼ ne jñaaʼ naa. Bíʼnicabe stipa pur chindá Stiidxa Dios ndaaniʼ ladxiduáʼ.  Ne biniiseʼ en sentidu espiritual purtiʼ gucanécabe naa». Neca runi binni stipa pur gusiniisi xiiñiʼ jneza, nuu de laacaʼ rusaanacaʼ Jiobá. Peru zanda gatadxí ladxidóʼcabe purtiʼ maʼ bíʼnicabe stipa pur chindá Stiidxaʼ Dios ndaaniʼ ladxidóʼ xiiñicabe. Nga runi, zanda gápacabe esperanza ziuu ti dxi zabiguetaʼ xiiñicabe ra nuu Jiobá.

12, 13. a) ¿Ximodo rusihuinni cani napa xiiñiʼ ruzuubacaʼ stiidxaʼ Jiobá ora raca expulsar xiiñicaʼ? b) ¿Xi guleendú ti familia ni guca expulsar xiiñiʼ pur bizuubacaʼ stiidxaʼ Dios?

¹² Tobi de ca cosa ni zusihuinni pa zuzuubaʼ cani napa xiiñiʼ stiidxaʼ Jiobá nga ora gaca expulsar xiiñicaʼ. Guidúʼyanu xi bizaaca ti gunaa xpinni Cristu dxi guca expulsar baʼdudxaapaʼ stiʼ ne zeʼ de ra lidxi. Hermana riʼ guníʼ: «Biyubeʼ lu ca publicación pa nuu xiixa ra ná zanda guidxaagaʼ laabe ne chuaaʼ ra nuu xhiagahuiineʼ». Né stale cariñu bisiene xheelabe laabe maʼ cadi responsable laacabe de xiiñicabe ne naquiiñeʼ gácacabe leal Jiobá ne gudiibe lugar guicaa xiiñicabe disciplina stiʼ Jiobá.

¹³ Caadxi iza despué, biguetaʼ xiiñibe ndaaniʼ xquidxi Dios. Hermana riʼ guníʼ: «Yanna maʼ casi guiráʼ dxi riníʼnebe naa ne ruseendabe mensaje ra nuaaʼ. Ne runi respetarbe naa ne bixhózebe purtiʼ nánnabe bizúʼbadu stiidxaʼ Dios. Ne yanna huaxa maʼ nuudu tobi si». Pa nápaluʼ ti xiiñiluʼ ni maʼ guca expulsar, ¿ñee zápaluʼ confianza Jiobá de guidubi ladxidoʼloʼ ne qué zúniluʼ ni ná si xpiaaniluʼ la? (Prov. 3:5, 6). Bietenalaʼdxiʼ, ora riguu jneza Jiobá laanu rihuinni pabiáʼ nuu xpiaanibe ne pabiáʼ nadxiibe laanu. Ne qué chuʼ dxi guiaandaʼ lii bidii Jiobá Jesús para gulá guiranu, dede né xiiñiluʼ ca, ne qué racaláʼdxibe guinitilú nin ti binni. Biblia ná sicaríʼ: «Cadi candaa diʼ Jiobá para guni ni maʼ bidii stiidxaʼ, casi riníʼ ique stale binni, laabe nápabe paciencia laatu purtiʼ qué racaláʼdxibe guinitilú guirutiʼ, sínuque pa ñanda guiráʼ ñaca arrepentir» (2 Pedro 3:9, TNM). Nga runi, cani napa xiiñiʼ naquiiñeʼ gápacaʼ confianza biaʼsi modo riguu jneza Jiobá ne chinándacaʼ ni nabe, dede né ora gaca nagana para laacaʼ guzuubacaʼ stiidxabe. Chuʼnu pur Jiobá ora uguu jnézabe tuuxa ne cadi guidxiichinu.

14. ¿Ximodo riquiiñeʼ Jiobá mozo stiʼ para gacané laanu?

¹⁴ Maca bidii stiidxaʼ Jiobá zusiidiʼ ne zapa ca xpinni, ne rúnibe ni de stale modo. Tobi de laani nga gulibe Xiiñibe para gapa congregación. Ne Jesús gulí ti mozo ni runi dxiiñaʼ jneza para gudii guendaró espiritual ca xpinni órapeʼ caquiiñeʼ cani (Luc. 12:42). Mozo riʼ rabi laanu xi gúninu ne rulidxe laanu de gadxé gadxé modo. Pa maʼ huayunadiágaluʼ xiixa discursu o maʼ biindaluʼ xiixa tema ni zeeda lu ca revista stinu ni maʼ gucané lii guchaaluʼ modo riníʼ íqueluʼ ne ni rúniluʼ la? zanda chuʼluʼ nayecheʼ purtiʼ maʼ bidiiluʼ lugar uguu jneza Jiobá lii (Prov. 2:1-5).

15, 16. a) ¿Xi naquiiñeʼ gúninu para cueendunu ni galán de dxiiñaʼ runi ca ancianu? b) ¿Xi naquiiñeʼ gúninu para chuʼ ca ancianu nayecheʼ ora gúnicaʼ xhiiñacaʼ?

¹⁵ Laaca maʼ gulí Cristu ca ancianu para gápacaʼ congregación. Biblia ná zeeda gácacabe ti regalu para laanu (Efes. 4:8, 11-13). ¿Xi zanda gúninu para cueendunu ni galán de dxiiñaʼ rúnicabe yaʼ? Chinándanu ejemplu ne fe stícabe, ne ora gudiicabe conseju laanu de lu Stiidxaʼ Dios guzúʼbanu diidxaʼ. Hebreos 13:7, lu Traducción del Nuevo Mundo ná: «Laguietenalaʼdxiʼ cani zániru ládetu, cani huayuiʼné laatu stiidxaʼ Dios, ne ora guʼyaʼ chaahuitu xi guleendúcabe pur xpiáʼcabe la? lagapa fe casi nápacabe». (Biindaʼ Hebreos 13:17). Cadi guiaandaʼ laanu nabé nadxii ca ancianu laanu ne ni jma racaláʼdxicabe nga gaca xhamígunu Jiobá.  Casi pa gudiicabe cuenta riáʼdxanu reunión o maʼ careʼnu gana la? nagueendaca zacanécabe laanu. Zucaadiágacabe laanu, zaguucabe gana laanu ne zaquiiñecabe Biblia para gudiicabe conseju laanu. Ora racané ca ancianu lii, ¿ñee rudiiluʼ cuenta zacá nga culuíʼ Jiobá nadxii lii la?

¹⁶ Nuu biaje raca nagana para ca ancianu gudiicaʼ conseju. Guiníʼ íquenu pabiáʼ nagana guca para profeta Natán guiniʼné David despué de biʼniʼ cometer ti pecadu naroʼbaʼ ne gucalaʼdxiʼ nucaachiʼ ni (2 Sam. 12:1-14). Zacaca biʼniʼ apóstol Pablo, gúcabe nadxibalú para guluu jnézabe apóstol Pedro purtiʼ guyuu jma pur ca xpinni Cristu ni naca judíu (Gál. 2:11-14). Yanna, ¿ximodo zanda gacaneluʼ ca ancianu ora gudiicabe conseju lii yaʼ? Guca humilde, bicaadiaga ne bidii xquíxepeʼ laacabe. Ora gacanécabe lii, biiyaʼ ni casi ora culuíʼ Dios nadxii lii. Pa gúniluʼ zacá la? zabeenduluʼ ni galán ne ziuu ca ancianu ca nayecheʼ ra gúnicaʼ xhiiñacaʼ.

17. ¿Ximodo gucané ca ancianu ti hermana?

¹⁷ Ti hermana guníʼ guca nagana para laa gannaxhii Jiobá pur ca cosa ni bizaacaʼ dxiqué, ne pur ngue nabé guca deprimir. Laabe guniʼbe: «Nannaʼ naquiiñeʼ guinieniáʼ ca ancianu. Qué nidíndenecabe naa ne qué niníʼcabe mal de naa. Lugar de nga guluucabe gana naa ne gudixhedxícabe ladxiduáʼ. Despué de cada reunión neca nuu xhiiñacabe la? tobi de laacabe ridxiña ra nuaaʼ ne rinabadiidxaʼ naa ximodo nuaaʼ. Pur ni bizaacaʼ dxiqué, guca nagana para naa guneʼ cré zanda gannaxhii Dios naa. Peru maʼ biiyaʼ ximodo huaquiiñeʼ Jiobá congregación ne ca ancianu para gusihuinni pabiáʼ nadxii naa. Rinabaʼ Jiobá gacané naa para cadi gusaana laa».

18, 19. ¿Xii nga ni jma runiná binni que ora riguu jnézacabe laa? Bizeeteʼ ti ejemplu.

¹⁸ Dxandíʼ, ora riguu jnézacabe tuuxa racaná, peru ti binni qué riná guicaa ni jmaruʼ si racaná (Heb. 12:11). Guidúʼyanu chupa ejemplu: stiʼ Caín ne stiʼ rey Sedequías. Dxi biʼyaʼ Dios nanalaʼdxiʼ Caín biʼchiʼ ne racalaʼdxiʼ guuti laabe la? sicaríʼ gudxi laabe: «¿Xiñee cadxiichiluʼ ne nuuluʼ triste pue? Pa gúniluʼ ni jneza, ¿ñee cadi zasaca ni gúniluʼ la? Peru pa qué gúniluʼ ni jneza, casi ñaca cabeza guendaruchee lii ra puertaʼ stiluʼ casi xiixa ni nadipaʼ ni nuu guxuuxe lii; peru ¿ñee zanda gucueezaluʼ ni la?» (Gén. 4:6, 7). Triste guininu ni, peru qué nucaadiaga Caín ni gudxi Jiobá laa, biitibe bíʼchibe, ngue runi gucanabe biaʼ dxi bibánibe (Gén. 4:11, 12). Pa ñuni Caín ni gudxi Jiobá laa la? qué ñacaná.

¹⁹ Guca Sedequías ti rey malu ne ti binni ni ridxibi. Biʼniʼ mandarbe Jerusalén ti tiempu nabé nagana. Stale biaje gudxi profeta Jeremías laabe gusaanabe de gúnibe cosa malu, peru bicaanabe disciplina stiʼ Dios ne pur ngue nabé gucanabe (Jer. 52:8-11). Casi maʼ bidúʼyanu ca, ni jma racalaʼdxiʼ Jiobá nga gucaʼdiáganu laa ti cadi gacananu (biindaʼ Isaías 48:17, 18).

20. ¿Xi zazaaca né ca binni ni qué riná guicaa disciplina stiʼ Dios, ne cani riná guicaa disciplina stibe yaʼ?

²⁰ Ca dxi riʼ stale binni qué riná guicaa disciplina stiʼ Dios. Peru maʼ cadi candaa zacanacaʼ purtiʼ qué nacaʼ guicaa cani (Prov. 1:24-31). Nga runi, gucaʼdiáganu ora uguu jnézacabe laanu ne gácanu binni nuu xpiaaniʼ. Proverbios 4:13 rabi laanu xi naquiiñeʼ gúninu ora uguu jnézacabe laanu: «Cadi gundaaluʼ ni. Gupa ni, purtiʼ laani nga xquendanabániluʼ».