1, 2. a) ¿Xi zándaca guizaaca ti xpinni Cristu pa ni málasi guchaa xquendanabani? (Biiyaʼ foto ni zeeda ra ruzulú tema riʼ). b) Casi riete lu Salmo 131, ¿xi zanda gacané laanu para cadi gunítinu paz ni nuu ndaaniʼ ladxidoʼno?

BIʼNIʼ servir Lloyd ne Alexandra veinticinco iza Betel. Nga runi, guyuucabe triste dxi bidxaacabe de asignación ne bireecabe de Betel. Lloyd guníʼ: «Dxiiñaʼ ni bineʼ Betel beeda gaca ni parte de xquendanabaneʼ. Bieneʼ xi pur bichaacabe laadu de asignación, peru ra gudiʼdiʼ tiempu la? bineʼ sentir casi ora bíʼnicabe menu naa. Guizáʼ nagana guca ni para naa. Guyuu ora bineʼ sentir galán, peru ni málasi maʼ nuaaʼ triste».

² Ora ni málasi guchaa xquendanabáninu la? zándaca chuʼnu xizaa o gaca estresarnu (Prov. 12:25). Ne zándaca gaca nagana para laanu guni aceptarnu guiráʼ ni cadídinu. ¿Xi zacané laanu para cadi tan chuʼnu xizaa ne gatadxí ladxidoʼno yaʼ? (Biindaʼ Salmo 131:1-3). Guidúʼyanu xi biʼniʼ caadxi xpinni Dios de dxiqué ne xi runi caadxi de cani nuu yanna para cadi guníticaʼ  paz ni nuu ndaaniʼ ladxidoʼcaʼ neca guchaa modo nabánicaʼ.

3. ¿Xi bizaaca José?

³ José nga xiiñiʼ Jacob, ne jma gunnaxhii Jacob laabe. Nga runi nabé gupa ca bíʼchibe envidia laabe ne bitoocaʼ laabe para gácabe esclavu dxi nápabe biaʼ 17 iza (Gén. 37:2-4, 23-28). Trece iza biʼniʼ huantarbe dxi guyuube de esclavu ne bideguyoobe ndaaniʼ guidxi Egipto, ne guyuube zitu de bixhózebe ni nadxii laabe. ¿Xi gucané José para cadi guiree gana ne cadi guidxiichi yaʼ?

4. a) ¿Xi jma guníʼ ique José dxi nuu ndaaniʼ cárcel? b) ¿Ximodo bicabi Jiobá ca oración stiʼ José?

⁴ Laga cayuni sufrir José ndaaniʼ cárcel que la? nanna dxiichinu guníʼ íquebe lu ca prueba ni rusihuinni cayapa Jiobá laabe (Gén. 39:21; Sal. 105:17-19). Ne ca bacaandaʼ bidii Dios José dxi jma nahuiinibe gucané cani laabe para gápabe jma confianza cayapa Jiobá laabe (Gén. 37:5-11). Nuunu seguru stale biaje bixhélebe ladxidoʼbe nezalú Jiobá ne gúdxibe laa xi cayuni sentirbe (Sal. 145:18). Ne gucané Jiobá laabe guiénebe qué zusaana laabe neca guizaacabe intiica cosa (Hech. 7:9, 10). *

5. ¿Ximodo zanda gacané paz ni rudii Dios laanu para ugaandanu ca meta stinu?

⁵ Tiempu riʼ, zándaca guidxaagalunu guendanagana ni guniná laanu. Pa zacá ni la? laaca zanda guni sentirnu ximodo rapa paz stiʼ Dios xquendabiaaninu (biindaʼ Filipenses 4:6, 7). Nga runi ora gápanu ansiedad la? guidxíñanu Jiobá, ne óraque zacané paz stibe laanu para ugaandanu ca meta espiritual stinu ne zacanebe laanu cadi guireʼnu gana. Guidúʼyanu caadxi ejemplu de tiempu riʼ ni rusihuinni zacá ni.

6, 7. Ora guni orarnu Jiobá ne gábinu laa guiráʼ ni cayuni sentirnu, ¿ximodo racané ni laanu gatadxí ladxidoʼno? Bizeeteʼ ti ejemplu.

⁶ Dxi gunna Ryan ne Juliette maʼ biluxe asignación sticaʼ casi precursor especial temporal la? guizáʼ guyuucaʼ triste. Ryan guníʼ nagueendaca biʼniʼ orárcabe Jiobá. Ne laaca bizeetebe: «Gunna dxiichidu caquiiñeʼ gusihuínnidu nápadu confianza Dios. Stale de ca hermanu ni nuu ndaaniʼ congregación ra riuudu nacubicaʼ, nga runi gunábadu Jiobá gacané laadu gácadu ti ejemplu de fe para laacabe».

⁷ ¿Ximodo bicabi Jiobá oración stícabe yaʼ? Sicaríʼ guníʼ Ryan: «Ora biluxe biʼniʼ orardu maʼ qué ñuʼdu xizaa ne gutadxí ladxidoʼdo. Óraque bidiʼdu cuenta modo cayapa paz ni rudii Dios ladxidoʼdo ne xquendabiaanidu. Ne biénedu zándaruʼ gúnidu jma lu xhiiñaʼ Jiobá, peru caquiiñeʼ gápadu ti actitud galán».

8-10. a) ¿Ximodo zanda gacané espíritu stiʼ Dios laanu para cadi guiábanu lu ansiedad? b) ¿Ximodo zacané Jiobá laanu ora qué rusaana de gúninu jma lu xhiiñaʼ?

⁸ Riguixhedxí espíritu stiʼ Dios ladxidoʼno ne laaca zanda gacané ni laanu guidxélanu versículo ni zeeda lu Biblia ni zacané laanu cadi gusaana de gúninu cosa espiritual (biindaʼ Juan 14:26, 27). Guzéʼtenu de Philip ne Mary, ti guendaxheelaʼ ni biʼniʼ servir Betel casi veinticinco iza. Lu tapa beeu si guti jñaa guirópacabe ne laaca guti ti familia Philip. Ne laaca gúpacabe bixhoze Mary purtiʼ guca huará xpiaaniʼ.

⁹ Philip guníʼ: «Para naa la? ruluíʼ biaʼsi ngue ni cayuneʼ peru cayaadxaruʼ guneʼ xcaadxi cosa. Ti dxi laga cayuundaʼ ti tema ni biree lu revista Torre stiʼ ni Rapa, biindaʼ Colosenses  1:11 ne biaanadxieeʼ ti ratu. Guníʼ iqueʼ cayuneʼ huantar peru cayaadxaruʼ guneʼ xiixa. Gucané versículo que naa guieneʼ caquiiñeʼ guneʼ huantar peru laaca caquiiñeʼ gapaʼ paciencia ne chuaaʼ nayecheʼ. Laaca bisietenalaʼdxiʼ ni naa espíritu stiʼ Dios nga ni racané naa chuaaʼ nayecheʼ ne cadi pur ca cosa feu o galán ni guizaaca lu xquendanabaneʼ».

¹⁰ Neca cadxaagalú Philip ne Mary guendanagana que la? bíʼnicabe stipa para cadi gusaana de gúnicabe xhiiñaʼ Jiobá, ne pur nga guluu Dios ndaayaʼ laacabe de stale modo. Guzéʼtenu ti ejemplu, bireesícabe de Betel, guirópacabe bidxélacabe binni ni gunabaʼ guʼndanécabe laacaʼ Biblia jma de ti biaje lu ti semana ne guca progresarcaʼ nagueenda. Pur guiráʼ ca cosa galán ni bizaaca Mary, sicaríʼ guníʼ: «Guizáʼ biéchedu, ne gucané ngue laadu gudiʼdu cuenta cayapa Jiobá laadu ne qué zusaana laadu».

11, 12. a) ¿Xi biʼniʼ José para cuʼ Jiobá ndaayaʼ laa? b) ¿Ximodo guluu Jiobá ndaayaʼ José pur biʼniʼ huantar?

¹¹ Ora ni málasi guchaa xiixa lu xquendanabáninu, zándaca guidxíbinu o guiníʼ íquenu qué zaca chaahuiʼ ca guendanagana stinu ne pur nga chuʼnu xizaa pur futuro stinu. Ñanda niníʼ ique José zacá. Peru, lugar de nga la? bíʼnibe guiráʼ ni nuu lu nabe para cuʼ Jiobá ndaayaʼ laabe. Nga runi, neca nuube ndaaniʼ cárcel que bíʼnibe stipa pur gúnibe guiráʼ ni gunábacabe laabe, cásica bíʼnibe ni dxi bíʼnibe dxiiñaʼ para Potifar (Gén. 39:21-23).

¹² Ti biaje biʼniʼ mandarcabe José guni tender chupa hombre ni gupa ti puestu risaca ra palaciu stiʼ faraón dxi deguyoocaʼ. Cumu galán biʼniʼ tratarbe ca hombre que la? ti dxi byuíʼnecaʼ laabe ni riguu xizaa laacaʼ ne cani guníʼ xcaandacaʼ ti gueelaʼ ante (Gén. 40:5-8). Qué ganna José pa despué de guiniʼné ca hombre que zuchaa xquendanabani. Nga runi, chupa iza despué, dxi ca bireebe de ndaaniʼ cárcel que gulícabe laabe para gácabe guiropa binni jma risaca ni nuu ndaaniʼ guidxi que despué de faraón (Gén. 41:1, 14-16, 39-41).

13. ¿Xi zanda gúninu para cuʼ Jiobá ndaayaʼ laanu ora cadxaagalunu guendanagana?

¹³ Cásica José, ziuu ora zadxaagalunu guendanagana ni zanda guni chaahuinu peru ziuu ora qué licapeʼ zanda guni chaahuinu cani. Peru pa gápanu paciencia ne gúninu stipa pur gúninu ni nuu lu nanu para guni chaahuinu ca guendanagana stinu la? zudiʼnu xiixa Jiobá para cuʼ ndaayaʼ laanu (Sal. 37:5). Dxandíʼ, zándaca nuu biaje qué zadxélanu xi gúninu, peru cásica guníʼ apóstol Pablo zanda gaca chaahuiʼ guendanagana stinu (2 Cor. 4:8). Ne zacá zaca ni, jmaruʼ si pa guicá íquenu gúninu jma lu xhiiñaʼ Jiobá.

14-16. ¿Xi biʼniʼ Felipe, xa evangelizador que dxi bichaa xquendanabani?

¹⁴ Yanna guininu de ejemplu stiʼ Felipe, xa evangelizador que, laa bisaana ti ejemplu galán para laanu purtiʼ bisihuínnibe zanda gúninu jma lu xhiiñaʼ Dios neca guchaa xquendanabáninu. Gupa Felipe ti responsabilidad ndaaniʼ congregación ni guyuu Jerusalén (Hech. 6:1-6). Ne despué de biiticabe Esteban bizulú guzanándacabe ca xpinni Cristu. * Ora biʼyaʼ Felipe cuxooñeʼ caadxi xpinni Cristu de Jerusalén la? qué niguiidxinabe. Yeguni predicarbe ndaaniʼ guidxi Samaria, ti guidxi ra deruʼ careeche mensaje stiʼ Reinu (Mat. 10:5; Hech. 8:1, 5).

¹⁵ Guyuu Felipe dispuestu cheʼ ratiica chiné espíritu stiʼ Dios laa. Ngue runi biquiiñeʼ Jiobá laabe para guni predicarbe xcaadxi lugar ra qué huayunadiaga binni stiidxaʼ Dios. Ca dxi que la? runi ca judíu menu ca samaritanu. Peru cumu galán biʼniʼ tratar Felipe ca samaritanu la? nuunu seguru galán biʼniʼ sentírcabe. Nga runi que ridxagayaanu xiñee bicaadiaga ca binni que laabe (Hech. 8:6-8).

¹⁶ Nga runi yené espíritu santu laabe ndaaniʼ guidxi Asdod ne Cesarea, chupa guidxi ra nabezaʼ stale binni ni cadi judíu (Hech. 8:39, 40). Biaʼ gande iza despué de bizulú biʼniʼ predicar Felipe ndaaniʼ guidxi Samaria la? ruluíʼ maʼ bichaa xquendanabánibe sti biaje, maʼ nápabe familia ne nabézabe lugar ra runi predicarbe. Neca bichaa stale cosa lu xquendanabánibe, qué nusaana de ñúnibe jma lu xhiiñaʼ Dios, ne pur nga la? guizáʼ guluu Jiobá ndaayaʼ laabe ne familia stibe (Hech. 21:8, 9).

17, 18. Pa jma guicá íquenu gúninu xhiiñaʼ Dios ora guchaa xquendanabáninu, ¿ximodo zacané ni laanu?

¹⁷ Stale hermanu ni cayuni servir de tiempu completu maʼ guniʼcaʼ ora rúnicaʼ jma lu xhiiñaʼ Dios racané ni laacaʼ cadi guni sentircaʼ triste pur bichaa xiixa lu xquendanabánicaʼ. Guidúʼyanu ni bizaaca Osborne ne Polite, ti guendaxheelaʼ de Sudáfrica. Dxi bireecabe de Betel la? guníʼ íquecabe nagueendaca zadxélacabe ti dxiiñaʼ ni gudii lugar laacabe gúnicabe xhiiñaʼ Jiobá ne ti lugar ra cuézacabe. ¿Xi guca yaʼ? Osborne guníʼ: «Triste guininu ni, peru qué nidxéladu dxiiñaʼ nagueendaca casi guníʼ íquedu». Ne Polite guníʼ: «Qué ñúnidu dxiiñaʼ chonna beeu, birá bueltu stidu. Nabé nagana guca ni para laadu».

 ¹⁸ ¿Xi gucané laacabe ora gudíʼdicabe lu guendanagana ca yaʼ? Sicaríʼ guníʼ Osborne: «Ora biʼniʼ predicardu né ca hermanu de ra congregación gucané ni laadu cadi tan guicá íquedu ca guendanagana stidu. Lugar de nibidu niguiidxinadu ne ñuʼdu xizaa la? bínidu jma lu xhiiñaʼ Jiobá. Ndiʼ gudixhedxí ladxidoʼdo, nga runi guiráʼ ladu biyúbidu dxiiñaʼ dede ra bidxéladu».

19-21. a) ¿Xi zacané laanu cadi gunítinu paz ni nuu ndaaniʼ ladxidoʼno yaʼ? b) Ora ruchaa xiixa lu xquendanabáninu, ¿ximodo racané ni laanu?

¹⁹ Casi bidúʼyanu lu ca ejemplu riʼ, pa gúninu guiráʼ ni nuu lu nanu ne gápanu confianza Jiobá la? qué zunítinu paz ni nuu ndaaniʼ ladxidoʼno neca guchaa modo nabáninu (biindaʼ Miqueas 7:7). Ne zándaca gudiʼnu cuenta pa gúninu ni ná Jiobá neca cadxaagalunu guendanagana la? zacané ni laanu en sentidu espiritual. Sicaríʼ biluxe Polite experiencia stiʼ: «Ra gucuaaʼ ti asignación cubi maʼ bisiidiʼ ni naa caquiiñeʼ gacané Jiobá neca ruluíʼ qué zanda guneʼ ni nabe. Yanna riʼ jma naguidxi amistad ni napaʼ né Jiobá».

²⁰ Mary, hermana ni guninu lu párrafo 8 que, cayáparube bixhózebe ne nácarube precursora. Laabe guniʼbe: «Maʼ biziideʼ naquiiñeʼ chuaadxiéʼ ne guneʼ orar Jiobá ora chuaaʼ xhaataʼ xizaa. Ni gudideʼ ca maʼ bisiidiʼ ni naa gusaana guiráʼ ni lu náʼ Jiobá. Ne nga nga ni caquiiñeʼ gúninu lu ca dxi ni zeeda ca».

²¹ Lloyd ne Alexandra, guendaxheelaʼ ni bizéʼtenu ra bizulunu tema riʼ, guniʼcaʼ maʼ gucané guiráʼ ni bichaa lu xquendanabánicaʼ laacaʼ gápacaʼ jma fe Jiobá. Laacaʼ guniʼcaʼ: «Ca prueba ni ridídinu ca rusihuinni cani ximodo nuu fe stinu, pa zacané ni ne zaguixhedxí ni ladxidoʼno ora guidxaagalunu guendanagana. Yanna riʼ maʼ nácadu binni jma nachaʼhuiʼ».

22. Pa gúninu ni nuu lu nanu para gudxíʼlunu intiica cosa, ¿ximodo zacané ni laanu?

²² Pa ni málasi guchaa xquendanabáninu pur ti asignación nacubi, ti guendahuará o napa xidé gápanu ti familia stinu la? cadi guiaandaʼ laanu rizaalaʼdxiʼ Jiobá laanu ne zacanebe laanu órapeʼ jma caquiiñeʼ gúnibe ni (Heb. 4:16; 1 Ped. 5:6, 7). Laga cabézanu gacanebe laanu la? gúninu ni nuu lu nanu para gudxíʼlunu ni. Nga runi guidxíñanu ra nuu Bixhózenu ni nuu guibáʼ lu oración ne gudiʼnu lugar gápabe laanu. Pa gúninu ni la? zacané ni laanu cadi gunítinu paz ni nuu ndaaniʼ ladxidoʼno neca guchaa xquendanabáninu.